|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ປ່າວສາງໂຮ້ຊິ່ນ" ສູ່ຟັງ. ສຸພາສິດນີ້ໝາຍເຖິງມີເຈດຕະນາຮ້າຍຢູ່ໃນໃຈ, ພາຍຫຼັງມາໄດ້ໃຊ້ມາອຸປະມາທາງນອກໃຈບຸນ, ໃນໃຈໂຫດຫ້ຽມ.
ໃນສະໄໝຊຸ່ນຊິວຍຸດທະຈັກ ຈີນໄດ້ແຍກອອກເປັນຫຼາຍປະເທດຈັກກະວານທີ່ເປັນເອກະລາດໂດຍທຽບຖານ, ໃນນັ້ນລັດເຈິ້ງເປັນລັດທີ່ອ່ອນແອ, ຈຶ່ງຢາກຜູກມິດກັບລັດສູ, ເພື່ອອາໄສລັດສູຕ້ານຢັນກັບລັດອື່ນໆ. ກົ່ງຊຸນຕ້ວນ ເສນາບໍດີລັດເຈິ້ງມີລູກສາວຜູ່ໜຶ່ງທັງ ງາມ ທັງມີຄວາມຮູ້ຄວາມສາມາດດ້ານດີດພິນແຕ້ມຮູບເປັນຕົ້ນ. ເມື່ອກົ່ງຊຸ່ນຕ້ວນໄດ້ພິຈາລະນາກຶກກອງຢ່າງລະອຽດຮອບຄອບແລ້ວ ໄດ້ຕົກລົງຍົກລູກສາວຂອງຕົນໃຫ້ເຈົ້າຟ້າຊາຍລັດສູເປັນເມຍ, ເພື່ອເພີ່ມທະວີສຳພັນຖະໄມຕີລະຫວ່າງລັດເຈິ້ງກັບລັດສູ, ເຈົ້າຟ້າຊາຍລັດສູເຫັນດີນຳຢ່າງປຶ້ມພະໄທ.
ແຕ່ເມື່ອເຈົ້າຟ້າຊາຍລັດສູໄປຮັບເຈົ້າສາວຢູ່ລັດເຈິ້ງນັ້ນ ພັດໄດ້ນຳພາກອງທະຫານຢ່າງຫຼວງຫຼາຍໄປນຳ, ມັນເດັ່ນຊັດແລ້ວວ່າ ເຈົ້າຟ້າຊາຍລັດສູມີໃຈຢາກສວຍໂອກາດກືນກີນລັດເຈິ້ງ. ຈືສານ ເສນາບໍດີລັດເຈິ້ງໄດ້ຮັບຂ່າວວ່າກອງທະຫານລັດສູມາຮອດປະຕູເມືອງຂອງລັດເຈິ້ງແລ້ວ, ຮູ້ວ່າເຈົ້າຟ້າຊາຍລັດສູມີຈຸດປະສົງເລິກແລບ, ເລີຍໃຫ້ຈືອີໄປກ່າວເຕືອນໂດຍດ້ວຍທາງອ້ອມ. ຈືອີຢືນຢູ່ບົນກຳແພງເມືອງ, ເວົ້າຕໍ່ແຂກທີ່ມາຈາກລັດສູວ່າ:"ລາຊະທານີລັດເຈິ້ງພວກຂ້າພະເຈົ້ານ້ອຍຫຼາຍ, ຢ້ານວ່າຈະບັນຈຸພວກບໍລິວານຂອງພວກທ່ານບໍ່ໄດ້. ພວກທ່ານຢ່າເຂົ້າເມືອງ ສ້າງແທ່ນແລະຫ້ອງວິວາຈັດພິທີແຕ່ງງານຢູ່ນອກເມືອງສາ!" ເຈົ້າຟ້າຊາຍລັດສູໄດ້ຍິນແລ້ວໂມໂຫທີ່ສຸດ, ສັ່ງໃຫ້ໂປໂຈ່ວຫຼີຕອບຈືອີວ່າ:"ການແຕ່ງງານແມ່ນເລື່ອງສຳຄັນ, ຈະຈັດຢູ່ນອກເມືອງໄດ້ແນວໃດ? ພວກທ່ານບໍ່ໃຫ້ພວກຂ້າພະເຈົ້າເຂົ້າເມືອງຮັບເຈົ້າສາວ, ນີ້ບໍ່ແມ່ນຂົ່ມເຫັງລັດສູພວກຂ້າພະເຈົ້າຫວະ? ຂ້າພະເຈົ້າກັບເມືອລັດສູແລ້ວຈະເປັນເສນາບໍດີຕໍ່ໄປໄດ້ແນວໃດ? ບໍ່ພຽງແຕ່ແນວນີ້, ຖ້າຈັດພິທີແຕ່ງດອງຢູ່ນອກເມືອງ, ຍັງຈະເຮັດໃຫ້ເຈົ້າຟ້າຊາຍລັດສູພວກຂ້າພະເຈົ້າມີໂທດຂົ່ມເຫັງບັນພະບູລຸດ, ເພາະວ່າກ່ອນພວກຂ້າພະເຈົ້າອອກເດີນທາງມາລັດເຈິ້ງ, ໄດ້ໄປໄຫວ້ບັນພະບູລຸດມາແລ້ວ. ພວກຂ້າພະເຈົ້າຮັບເອົາການຈັດວາງຂອງພວກທ່ານບໍ່ໄດ້." ໃນກໍລະນີນີ້, ຈືອີຂອງລັດເຈິ້ງກໍຈຳເປັນຕ້ອງເວົ້າຢ່າງກົງໄປກົງມາ, ທ່ານເຮັດໜ້າເຄັ່ງຂຶມ ແລ້ວເວົ້າວ່າ:"ລັດເຈິ້ງພວກຂ້າພະເຈົ້າແມ່ນລັດນ້ອຍ, ແຕ່ລັດນ້ອຍບໍ່ແມ່ນຄວາມຜິດ, ແຕ່ຖ້າລັດນ້ອຍໄປອີງອາໄສລັດໃຫຍ່, ບໍ່ລະມັດລະວັງປ້ອງກັນຕົນເອງ, ນີ້ຈຶ່ງແມ່ນຄວາມຜິດພາດໃຫຍ່ປານຟ້າ. ແຕ່ເດີມ ລັດເຈິ້ງພວກຂ້າພະເຈົ້າຢາກກ່ຽວດອງກັບລັດໃຫຍ່ພວກທ່ານ, ອາໄສລັດໃຫຍ່ມາປົກປັກຮັກສາພວກຂ້າພະເຈົ້າ, ແຕ່ພວກທ່ານພັດມີເຈດຕະນາຮ້າຍ, ຢາກທຳຮ້າຍລັດເຈິ້ງພວກຂ້າພະເຈົ້າ, ນີ້ແມ່ນເລື່ອງທີ່ພວກຂ້າພະເຈົ້າອົດທົນບໍ່ໄດ້ເດັດຂາດ!" ເຈົ້າຟ້າຊາຍແລະເສນາບໍດີທັງຫຼາຍໄດ້ເຫັນກົນອຸບາຍຂອງຕົນຖືກເຜີຍແບ, ຮູ້ວ່າລັດເຈິ້ງໄດ້ກຽມພ້ອມແລ້ວ, ຈຶ່ງຈຳເປັນຕ້ອງປະລະແຜນການເດີມທີ່ຢາກຫຼອນໂຈມຕີລັດເຈິ້ງ, ແລະປະຕິເສດບໍ່ຮັບຮອງເຈດຕະນາຮຸກຮານຂອງຕົນ. ແຕ່ເພື່ອກູ້ໜ້າກູ້ຕາ, ຍັງຄົງຍຶດໝັ້ນໃຫ້ເຂົ້າໄປຈັດພິທີແຕ່ງງານຢູ່ໃນເມືອງ, ແຕ່ໄດ້ຮັບປາກວ່າ: ທະຫານລັດສູຈະບໍ່ຕິດອາວຸດໃດໆຄືທະນູເປັນຕົ້ນໄປນຳ, ຈືອີແລະຈືສານຈຶ່ງເຫັນດີນຳ. ເຈົ້າຟ້າຊາຍລັດສູເຂົ້າແຕ່ງງານກັບລູກສາວກົ່ງຊຸ່ນຕ້ວນຢູ່ໃນລາຊະທານີລັດເຈິ້ງແລ້ວ, ກໍເດີນທາງອອກຈາກລັດເຈິ້ງກັບເມືອລັດສູໃນທັນທີ.
|
