|
ທ່ານຜູ້ຟັງທີ່ໂຄລົບ,ຫວ່າງມໍ່ໆນີ້, ໃນວົງການຮູບເງົາຈີນມີຜູ້ກຳກັບການສະແດງຮູບເງົາງວດຫນຶ່ງທີ່ມີອາຍຸ30ກວ່າປີ,ຮູບເງົາຂອງພວກເຂົາເຈົ້າເຈາະຈົງໃຫ້ເຫັນສະແດງການປ່ຽນແປງດ້ານຊີວິດການເປັນຢູ່ຂອງຄົນຈີນໃນ20ຫາ30ປີທີ່ຜ່ານມານີ້,ໄດ້ຮັບລາງວັນໃນງານມະຫາກຳຮູບເງົາຕ່າງປະເທດຢ່າງເນືອງນິດ,ໃນລາຍການວັດທະນະທຳຈີນມື້ນີ້,ຂ້າພະເຈົ້າຈະແນະນຳຜູ້ຫນຶ່ງໃນຄົນເຫລົ່ານີ້,ຄື ທ່ານຈ່າງຢາງ,ເຊິນຟັງເລື່ອງ:ທ່ານຈ່າງຢາງຜູ້ກຳກັບການສະແດງຮູບເງົາຂອງຈີນ.
ປະຈຸບັນນີ້,ໂຮງສາຍຮູບເງົາຢູ່ແຫ່ງຕ່າງໆຂອງຈີນພວມສາຍຮູບເງົາເລື່ອງ ດອກຕາເວັນ ເຊິ່ງເປັນຮູບເງົາໃຫມ່ສຸດຂອງທ່ານຈ່າງຢາງ,ຫວ່າງມໍ່ໆນີ້,ຮູບເງົານີ້ໄດ້ຮັບລາງວັນຜູ້ກຳກັບການສະແດງດີເດັ່ນໃນງານມະຫາກຳ ຊານ ເຊບາສະຕຽນຂອງແອັສປາຍ.ຮູບເງົາເລື່ອງດອກຕາເວັນໄດ້ບັນລະຍາຍການປ່ຽນແປງດ້ານຊີວິດການເປັນຢູ່ຂອງຄອບຄົວປັກກິ່ງທີ່ທຳມະດາສຳມັນໃນ30ປີແຕ່ຊຸມປີ70ຮອດຊຸມປີ90ສະຕະວັດແລ້ວນີ້.ຮູບເງົາໄດ້ຖືເຫດການສຳຄັນທີ່ເກີດຂຶ້ນຢູ່ຈີນໃນ30ປີດັ່ງກ່າວນີ້ເປັນເບື້ອງຫລັງປະຫວັດສາດ,ຮູບເງົາໄດ້ສະແດງໃຫ້ເຫັນເຖິງການປ່ຽນແປງຂອງຄົນສອງຮຸນໃນ30ປີດັ່ງກ່າວໂດຍຜ່ານຈາກຄວາມຮັກກັບຄວາມຄຽດຊັງລະຫວ່າງພໍ່ກັບລູກຊາຍໃນ30ປີດັ່ງກ່າວນີ້.
ທ່ານຈ່າງຢາງ ຜູ້ກຳກັບການສະແດງຮູບເງົາເລື່ອງນີ້ປີນີ້ມີອາຍຸ38ປີ,ໄດ້ເຕີບໃຫຍ່ຢູ່ໃນຮ່ອມຂອງປັກກິ່ງ, ປະສົບການໃນການເຕີບໃຫຍ່ຂອງທ່ານພໍດີໃນໄລຍະດຽວກັນກັບບຸກຄົນສຳຄັນໃນຮູບເງົາ.ທ່ານຈ່າງຢ່າງເວົ້າວ່າ:
"ຫລາຍຂໍ້ປີກຍ່ອຍຂອງຮູບເງົາເລື່ອງນີ້,ລ້ວນແຕ່ມີການພົວພັນກັບຊີວິດຂອງຂ້າພະເຈົ້າ,ຄືແຜ່ນດິນໄຫວ,ໃນຊີວີດຕົວຈິງ,ໃນກໍລະນີທີ່ຂ້າພະເຈົ້າບໍ່ຮູ້ຫຍັງ,ພໍ່ຂອງຂ້າພະເຈົ້າໄດ້ຫນີບຂ້າພະເຈົ້າຈາກຕຽງນອນແລ່ນອອກໄປ,ໃນທັນໃດນັ້ນ,ຝາເຮືອນເບື້ອງຫນຶ່ງກໍ່ລົມລົງເລີຍ,ສະນັ້ນ,ຂ້າພະເຈົ້າຈິ່ງໄດ້ຂຽນໃສ່ຮູບເງົາເລື່ອງນີ້.ເລື່ອງຕ່າງໆໃນຊຸມປີ90ໃນຮູບເງົາເລື່ອງນີ້,ໂດຍພື້ນຖານແລ້ວກໍ່ແມ່ນໄດ້ພັນລະນາຊີວິດຕົວຈິງຂອງຂ້າພະເຈົ້າເອງ."
ສິ່ງທີ່ແທ້ຈິງແລະກະຕຸ້ນໃຈຄົນກວ່າຫມູ່ໃນຮູບເງົາແມ່ນການພົວພັນລະຫວ່າງພໍ່ກັບລູກຊາຍ, ໃນຮູບເງົາໄດ້ໃຊ້ຂໍ້ປີກຍ່ອຍຈຳນວນຫລາຍມາສະແດງການປະທະກັນລະຫວ່າງພໍ່ກັບລູກຊາຍ.ພໍ່ເເຂັ້ມງວດຕໍ່ລູກຊາຍຫລາຍ,ຫວັງໃຫ້ລູກຊາຍເດີນຕາມເສັ້ນທາງທີ່ຕົນກຳນົດ.ໃນຍາມເປັນເດັກນ້ອຍ,ພໍ່ບັງຄັບໃຫ້ລູກຊາຍແຕ້ມຮູບຢ່າງບໍ່ອີ່ດູສົງສານ.ລູກຊາຍເຂົ້າໃນຍາມສອນບ່າວແລ້ວສົມສາວ,ຢາກອອກໄປເຮັດທຸລະກິດ,ພໍ່ກໍ່ຂັດຂວາງຢ່າງເອົາເປັນເອົາຕາຍ, ບັງຄັບໃຫ້ລູກຊາຍເສັງເຂົ້າມະຫາວິທະຍາໄລ.ພໍ່ມີຄວາມບໍ່ສົມຫວັງແລະຄວາມເສຍໃຈຫຍັງ,ກໍ່ລ້ວນແຕ່ຢາກຕາບຈູນໂດຍຜ່ານຈາກຜົນສຳເລັດຂອງລູກຊາຍ.ຫລັງຈາກລູກຊາຍເຕີບໃຫຍ່ແລະສ້າງຄອບຄົວແລ້ວ,ພໍ່ຮູ້ສຶກດີໃຈຍ້ອນເຫັນລູກຊາຍໄດຮັບຜົນສຳເລັດ,ແຕ່ຄວາມເຫີນຫ່າງກັນລະຫວ່າງສອງພໍ່ລູກພັດນັບມື້ນັບຫນັກເຂົ້າ.ໂຄງເລື້ອງຫລາຍໆຕອນໄດ້ເກີດມີປະຕິກິລິຍາຢ່າງຮຸນແຮງໃນຜູ້ຊົມທີ່ມີອາຍຸ30ຫາ40ປີ.ເພາະເປັນປະສົບການຮ່ວມກັນໃນການເຕີບໃຫຍ່ຂອງຄົນຮຸ່ນນີ້.
ເດືອນກັນຍາປີ2005,ຮູບເງົາເລື່ອງດອກຕາເວັນໄດ້ຈັດພິທີສາຍເທື່ອທຳອິດຢູ່ໂຕຣົນໂຕແຫ່ງການາດາ, ໃນເວລາສາຍຢູ່ແອດສະປາຍ,ຍີ່ປຸ່ນ,ອີຕາລີກໍ່ ໄດ້ຮັບຄວາມຊົມເຊີຍທີ່ສຸດ.ທ່ານຈາງຢາງເວົ້າວ່າ:
"ໃນເວລາເບິ່ງຮູບເງົາຢູ່ຕ່າງປະເທດ,ຂ້າພະເຈົ້າປະກົດເຫັນວ່າ,ຜົນສະທ້ອນຂອງຜູ້ຊົມຕ່າງປະເທດຍັງຮຸນແຮງກວ່າຜູ້ຊົມຈີນ,ຜ່ານຈາກຮູບເງົາເລື່ອງນີ້,ພວກເຂົາເຈົ້າໄດ້ເຫັນການປ່ຽນແປງຂອງຍຸກສະໄຫມຈີນ."
ເມື່ອເວົ້າເຖິງເປັນຫຍັງຮູບເງົາເລື່ອງນີ້ຈຶ່ງຕັ້ງຊຶ່ວ່າດອກຕາເວັນ,ທ່ານຈາງຢາງເວົ້າວ່າ,ດອກຕາເວັນແມ່ນພືດຊະນິດຫນື່ງທີ່ຕາງຫນ້າຄວາມຫວັງ,ການເຕີບໃຫຍ່ຂອງຄົນຮຸ່ນນີ້ກໍ່ເຫມືອນດັ່ງດອກຕາເວັນ.
ໃບຫນ້າຂອງທ່ານຈາງຢາງເບິ່ງຄ້າຍຄືເດັກຊາຍໃຫຍ່,ໃນເວລາຍິ້ມຄືແສງຕາເວັນ,ຈິດໃຈຂອງເພິ່ນຕັ້ງຫນ້າແລະປອດໃສທີ່ສຸດ.ເພິ່ນຮຽນຈົບຈາກສະຖາບັນລະຄອນງິ້ວສູນກາງຈີນພະແນກວິຊາກຳກັບການສະແດງໃນປີ1991.ໃນເວລາຄົນໃນເກນອາຍຸດຽວກັນຂອງທ່ານເຫີ່ກັນຖ່າຍຮູບເງົາທົດລອງທີ່ມີລັກສະນະຊອກຄົ້ນນັ້ນ,ເພິ່ນພັດໄດ້ກຳກັບການສະແດງຮູບເງົາທີ່ສ່ອງແສງຊີວິດຕົວຈິງຂອງຄົນຈີນຢ່າງເປັນລະບົບ,ໄດ້ຮັບການຕີລາຄາຢ່າງດີຂອງມວນຊົນ,ແລະໄດ້ຄ່ອຍໆຈໍ່ຕົວຂຶ້ນເປັນແບບແຜນກຳກັບການສະແດງທີ່ພັນລະນາເລື່ອງຈິງແລະເດີນເລື້ອງຢ່າງລ່ຽນໄຫລ.
ທ່ານຈ່າງຢາງເຫັນວ່າ,ໃນນາມເປັນຜູ້ກຳກັບການສະແດງຜູ້ຫນຶ່ງ, ປະສົບການຂອງເພິ່ນແມ່ນມີບົດບາດສຳຄັນທີ່ສຸດຕໍ່ການປະດິດຄິດແຕ່ງ,ພ້ອມກັນນັ້ນລາງເທື່ອຍັງກາຍເປັນເນື້ອໃນສ່ວນຫນຶ່ງຂອງຮູບເງົາ.ໃນຖານເປັນພິຍານຂອງຍຸກສະໄຫມນີ້,ເພິ່ນໄດ້ສ່ອງແສງການປ່ຽນແປງຂອງຍຸກສະໄຫມຂອງຈີນໃນ20ຫາ30ປີມານີ້ໂດຍຜ່ານຈາກຮູບເງົາ ແລະການບັນລະຍາຍຂອງຕົນ.ທ່ານຈາງຢາງເວົ້າວ່າ:
"ທີ່ຈິງແລ້ວ,ຈຸດພິເສດໃຫຍ່ກວ່າຫມູ່ຂອງຮູບເງົາແມ່ນສິ່ງທີ່ກັບຄືນສູ່ທາດແທ້ຂອງຊີວິດ,ຮູບເງົາມີຫລາຍແບບ,ແຕ່ຖ້າເຈົ້າບັນທຶກຊີວິດຢ່າງຊື່ສັດ,ສາມາດສະແດງຊີວິດຕົວຈິງໃຫ້ຜູ້ຊົມ,ເວົ້າສຳລັບຜູ້ຊົມທຸກຄົນແລ້ວ,ກໍ່ເປັນການເສບສຸກຊະນິດຫນຶ່ງ,ເພາະວ່າຮູບເງົາແມ່ນພາຫະນະຊະນິດຫນຶ່ງທີ່ບັນທຶກເລື່ອງຈິງຢ່າງບັງເກີດຜົນກວ່າການແຕ້ມຮູບແລະດົນຕີ."
|
