|
|
 |
| (GMT+08:00)
2005-11-03 10:53:42
|
 |
|
ຈີນກັບອາຊຽນຕັ້ງໜ້າຊຸກຍູ້ການສ້າງສາເຂດການຄ້າເສລີຈີນອາຊຽນ(ສຽງ)
cri
Author: da
|
ງານເອັກສ໌ໂປຈີນອາຊຽນຄັ້ງທີ 2 ທີ່ໝາຍຈະຊຸກຍູ້ການຮ່ວມມືທາງເສດຖະກິດການຄ້າລະຫວ່າງຈີນອາຊຽນ ທີ່ໄຂຂຶ້ນຢູ່ນະຄອນນານນິງ ເທດສະບານເຂດກວາງຊີເຜົ່າຈ້ວງປົກຄອງຕົນເອງ ທາງພາກຕາເວັນຕົກສຽງໃຕ້ຂອງຈີນ ໄດ້ອັດລົງແລ້ວໃນຫວ່າງມໍ່ໆນີ້. ເຈົ້າໜ້າທີ່ກະຊວງການຄ້າຈີນເວົ້າວ່າ, ປະຈຸບັນ ການສ້າງສາເຂດການຄ້າເສລີຈີນອາຊຽນໄດ້ດຳເນີນມາຢ່າງສະດວກ.ໃນລາຍການເຂົ້າສູ່ອາຊຽນພາກນີ້,ເຊີນຟັງບົດແຈ້ງຂ່າວທີ່ພາດຫົວເລື່ອງວ່າ: ຈີນກັບອາຊຽນຕັ້ງໜ້າຊຸກຍູ້ການສ້າງສາເຂດການຄ້າເສລີຈີນອາຊຽນ.
ເຂດການຄ້າເສລີແມ່ນໝາຍຄວາມເຖິງເຂດເສດຖະກິດຫຼືກຸ່ມເສດຖະກິດທີ່ປະກອບດ້ວຍ 2 ຫຼືຫຼາຍກວ່າ 2 ປະເທດຫຼືເຂດແຄວ້ນ ຫຼື ເຂດພາສີໂດຍຈຳເພາະ ເຊິ່ງຍົກເລີກພາສີແລະຄວາມຈຳກັດທີ່ບໍ່ແມ່ນພາສີຢູ່ໃນເຂດແລະປົກປ້ອງການຄ້າຢູ່ນອກເຂດ.ເພື່ອເປີດກວ້າງການພັດທະນາເສດຖະກິດທີ່ໝັ້ນທ່ຽງແລະຊ່ອງຫວ່າງການເຕີບໂຕຂອງການຄ້າກັບພາຍນອກ,ປີ 2002 ຜູ້ນຳຈີນແລະ 10 ປະເທດອາຊຽນໄດ້ເຊັນ"ສັນຍາຂອບກ່ຽວກັບການຮ່ວມມືເສດຖະກິດຮອບດ້ານລະຫວ່າງຈີນກັບອາຊຽນ"ແລ້ວ,ໄດ້ເປີດການເຈລະຈາເຂດການຄ້າເສລີຈີນອາຊຽນຢ່າງເປັນທາງການ.
ຫວ່າງມໍ່ໆນີ້ ທ່ານເສີນຈ້ຽນ ຜູ້ຊ່ອຍລັດຖະມົນຕີກະຊວງການຄ້າຈີນເວົ້າວ່າ:
"ການສ້າງສາເຂດການຄ້າເສລີຈີນອາຊຽນໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງ,ໃນການເຈລະຈາເຂດການຄ້າເສລີລະຫວ່າງຈີນກັບປະເທດແລະເຂດອື່ນໆນັ້ນ, ການສ້າງສາເຂດການຄ້າເສລີຈີນອາຊຽນແມ່ນກ້າວເດີນໄວກວ່າເພິ່ນ,ໝາກຜົນທີ່ໄດ້ຮັບນັ້ນ ກໍຕິດແທດຕົວຈິງກວ່າ ມີຜົນສັກສິດຫຼາຍກວ່າ ແລະເດັ່ນຊັດກວ່າ."
ຕາມໄດ້ຊາບ,ແຕ່ປີ 2002 ຮອດປີ 2004,ສະເລ່ຍແລ້ວ ຍອດມູນຄ່າການຄ້າລະຫວ່າງຈີນກັບອາຊຽນໄດ້ເພີ່ມຂຶ້ນ 38,9% ຕໍ່ປີ. ປີ 2004,ຍອດມູນຄ່າການຄ້າລະຫວ່າງສອງຝ່າຍບັນລຸ 105 ຕື້ 900 ລ້ານໂດລາສະຫະລັດ,ເຊິ່ງບັນລຸຄາດໝາຍຍອດມູນຄ່າການຄ້າລື່ນກາຍ 100 ລ້ານໂດລາສະຫະລັດກ່ອນເວລາກຳນົດປີໜຶ່ງ.ຈີນກັບອາຊຽນໄດ້ແຕ່ງເປັນຄູ່ການຄ້າໃຫຍ່ທີ 4 ຂອງຝ່າຍກົງກັນຂ້າມ.
ເພື່ອເຮັດໃຫ້ການຄ້າລະຫວ່າງຈີນກັບອາຊຽນມີຄວາມເສລີແລະສະດວກກວ່າເກົ່າ,ຕົ້ນປີ 2004 ,ຈີນກັບປະເທດອາຊຽນສ່ວນຫຼາຍໄດ້ເລີ່ມປະຕິບັດ"ແຜນການໄດ້ຜົນໄລຍະຕົ້ນ"ພາຍໃນຂອບເຂດການຄ້າເສລີ,ຫຼຸດພາສີຜະລິດຕະພັນກະສິກຳໃຫ້ໜ້ອຍລົງ,ເມື່ອຮອດປີ 2006,ການຄ້າຜະລິດຕະພັນກະສິກຳຂອງພາກພື້ນແຫ່ງນີ້ ຈະຍົກເວັ້ນພາສີ.ໃນທ້າຍປີ 2004,ຈີນກັບອາຊຽນໄດ້ເຊັນ"ສັນຍາການຄ້າສິນຄ້າ"ແລະ"ສັນຍາກົນໄກແກ້ໄຂຄວາມວິວາດກັນ",ແລ້ວໄດ້ສຳເລັດການເຈລະຈາການຄ້າສິນຄ້າ. ໃນເດືອນກໍລະກົດປີ 2005,ສອງຝ່າຍເລີ່ມປະຕິບັດພາສີພິເສດເປັນເທື່ອລະກ້າວຕໍ່ຜະລິດຕະພັນ 7 ພັນກວ່າຊະນິດທີ່ຜະລິດຢູ່ຝ່າຍກົງກັນຂ້າມ.
ໃນຂະນະທີ່ສອງຝ່າຍເຈລະຈາກັນຢ່າງຕັ້ງໜ້ານັ້ນ,ງານເອັກສ໌ໂປຈີນອາຊຽນແລະກອງປະຊຸມສຸດຍອດການຄ້າແລະການລົງທຶນຈີນອາຊຽນທີ່ໄຂຂຶ້ນປີລະເທື່ອ,ສ້າງການສະໜອງແທ່ນສຳຄັນໃຫ້ແກ່ການຄ້າສິນຄ້າ ການຫາລືການລົງທຶນ ແລະການຮ່ວມມືທາງເສດຖະກິດເຕັກນິກໃຫ້ນັກທຸລະກິດໃນເຂດການຄ້າເສລີ. ຍອດມູນຄ່າການຄ້າໃນງານເອັກສ໌ໂປຈີນອາຊຽນທີ່ຫາກໍ່ສິ້ນສຸດລົງນັ້ນ ໄດ້ບັນລຸ 1 ຕື້ 100 ລ້ານໂດລາສະຫະລັດ,ໄດ້ເຊັນໂຄງການຮ່ວມມືການລົງທຶນ 120 ກວ່າໂຄງການ,ເຊິ່ງເງິນທຶນໄດ້ບັນລຸ 5 ຕື້ກວ່າໂດລາສະຫະລັດ.
ທ່ານຈູມມາລີ ໄຊຍະສອນ ຮອງປະທານປະເທດລາວກ່າວວ່າ: (ປ່ອຍອັດສຽງ)
ຄຽງຄູ່ກັບຂະບວນວິວັດການສ້າງສາເຂດການຄ້າເສລີຈີນອາຊຽນເລັ່ງໄວເຂົ້າ,ອາຊຽນບໍ່ພຽງແຕ່ໄດ້ກາຍເປັນແຫຼ່ງນຳເຂົ້າສິນຄ້າທີ່ສຳຄັນຂອງຈີນທໍ່ນັ້ນ,ຫາກຍັງຄ່ອຍໆກາຍເປັນເຂດຈຸດໜັກແຫ່ງໜຶ່ງທີ່ວິສາຫະກິດຈີນລົງທຶນຢູ່ຕ່າງປະເທດອີກດ້ວຍ. ນັບມາຮອດ 6 ເດືອນຕົ້ນປີນີ້,ວິສາຫະກິດຈີນທີ່ບໍ່ແມ່ນທະນາຄານໄດ້ລົງທຶນຢູ່ 10 ປະເທດອາຊຽນນັ້ນໄດ້ບັນລຸ 880 ກວ່າແຫ່ງ,ຍອດມູນຄ່າການລົງທຶນຂອງຈີນໃນສັນຍາໄດ້ບັນລຸ 1 ຕື້ໂດລາສະຫະລັດ.ແຕ່ເຈົ້າໜ້າທີ່ກຳກັບເສດຖະກິດການຄ້າຂອງສອງຝ່າຍເຫັນວ່າ,ວຽກດ່ວນທີ່ສຸດໃນສະເພາະໜ້ານີ້,ແມ່ນສ້າງກົນໄກການຄ້າແລະການລົງທຶນທີ່ປອດໄສ ເສລີແລະສະດວກ. ທ່ານຊັນຊູເຊິງ ລັດຖະມົນຕີກະຊວງອຸດສາຫະກຳການຄ້າສິງກະໂປເວົ້າວ່າ:
"ຂ້າພະເຈົ້າມີຄວາມປາຖະໜາອັນໜຶ່ງ,ນັ້ນກໍຄື ຈີນກັບອາຊຽນສາມາດເພີ່ມທະວີການຮ່ວມມືກັນ,ເຮັດໃຫ້ສິນຄ້າ ການບໍລິການແລະການລົງທຶນສາມາດຈໍລະຈອນຂ້າມຊາດຢ່າງເສລີ. ບັນດາປະເທດຄວນສ້າງກົນໄກກະຕຸກທີ່ສົມຄູ່ກັນ,ສົ່ງເສີມການນຳເຂົ້າທຶນຕ່າງປະເທດ,ໃຫ້ການຄ້າການບໍລິການມີຄວາມເສລີໂດຍໄວເທົ່າທີ່ຈະໄວໄດ້."
ຕາມແນະນຳວ່າ,ປະຈຸບັນ ລັດຖະບານຈີນແລະບັນດາປະເທດອາຊຽນໄດ້ມີຄວາມຮັບຮູ້ຄືກັນຕໍ່ຫົວຂໍ້ການເຈລະຈາກ່ຽວກັບການເປີດກວ້າງຂົງເຂດການຄ້າການບໍລິການແລະການລົງທຶນ,ບາດກ້າວຕໍ່ໄປຈະຫາລືບັນຫາລະອຽດ.
|
|
|
