ຕາມ​ຂ່າວCRI: ວັນ​ທີ 7 ພະຈິກ, ກອງ​ປະຊຸມ​ປ້ອງ​ກັນ​ແລະ​ປິ່ນ​ປົວ​ພະຍາດ​ໄຂ້ຫວັດ​ສັດ​ປີກ​ທົ່ວ​ໂລກ​ເຊິ່ງ​ແມ່ນ​ອົງການ​ອະນາ​ໄມ​ໂລກ ອົງການ​ຟາ​ວສະຫະ​ປະຊາ​ຊາດ ອົງການ​ອະນາ​ໄມ​ສັດ​ໂລກ​ແລະ​ທະນາຄານ​ໂລກ​ພ້ອມ​ກັນ​ລິ​ເລີ່​ມ​ນັ້ນ ​ໄດ້​ໄຂ​ຂຶ້ນຢູ່​ທີ່​ເຊີ​ແນວ.

​ໃນ​ພິທີ​ໄຂ​ກອງ​ປະຊຸມ, ທ່ານ​ລີ​ຈົງ​ວຸກ ຜູ່​ອຳນວຍການ​​ໃຫຍ່​ອົງການ​ອະນາ​ໄມ​ໂລກ​ກ່າວ​ຄຳ​ປາ​ໄສວ່າ, ​ເຊື້ອ​ໄວ​ລັດ​ພະຍາດ​ໄຂ້ຫວັດ​ສັດ​ປີກ​ຜັນ​ແປ​ເປັນ​​ເຊື້ອ​ໄວ​ລັດພະຍາດ​ປະ​ເພດ​ຮ້າຍ​ແຮງ​ທີ່​ລະບາດ​ຢູ່​ລະຫວ່າງ​ຄົນ​ຈະ​ເກີດ​ຂຶ້ນ ມີ​ແຕ່​ຈະ​ເກີດຂຶ້ນ​ໃນ​​ເວລາ​ໃດ​ທໍ່​ນັ້ນ. ຖ້າ​ເຊື້ອ​ໄວ​ລັດ​ນີ້​ແຜ່​ລະບາດ​ຢ່າງ​ຂະໜາດ​ໃຫຍ່, ຈະ​ເຮັດ​ໃຫ້​ມະນຸດ​ເຮົາ​ປະສົບ​ຄວາມ​ເສຍ​ຫາຍ​ຢ່າງ​ໜັກໜ່ວງ. ທ່ານ​ຊີ້​ອອກ​ວ່າ, ຈຸດປະສົງ​ຂອງ​ກອງ​ປະຊຸມ​ເທື່ອ​ນີ້​ແມ່ນ​ປຶກສາ​ຫາລື​ຫົວ​ຂໍ້​ຕ່າງໆ ​ເຊັ່ນ ເຮັດ​ແນວ​ໃດ​ຄວບ​ຄຸມ​ຢ່າງ​ບັງ​ເກີດ​ຜົນບໍ່​ໃຫ້​ເຊື້ອ​ໄວ​ລັດ​ນີ້​ແຜ່​ລະບາດ​ຢູ່​ລະ​ຫວ່າງ​ສັດ​ປີກ​ແລະ​ແຜ່​ລະບາດ​ໃຫ້​ຄົນ ​ເພີ່ມ​ທະວີລະບົບ​ກວດກາ​ວັດ​ແທກ​​ໃນທົ່ວ​ໂລກ, ​ແລະ​ຍາດ​ແຍ່ງ​ກ້າວ​ເຖິງ​ຂັ້ນ​ເປັນ​ເອກະ​ພາບ​ກັນ​ຢ່າງ​ກວ້າງຂວາງໃນ​ຫົວ​ຂໍ້​ເຫຼົ່ານີ້.

ນອກ​ນີ້, ກອງ​ປະຊຸມ​ຍັງຈະ​ປຶກສາ​ຫາລືກັນກ່ຽວກັບ​ການຈະ​ເຮັດ​​ແນວ​ໃດ​ຊ່ອຍ​ປະ​ເທດ​ທຸກ​ຍາກ​ສ້າງ​ກົນ​ໄກ​ສຸກ​ເສີນຮັບ​ມືກັບ​ພະຍາດ​ໄຂ້ຫວັດ​ສັດ​ປີກ.

​ເຈົ້າໜ້າ​ທີ່ ຜູ່​ຊ່ຽວຊານຂອງ 80 ກວ່າ​ປະ​ເທດ​ ຜູ່​ແທນ​ຂອງ​ອົງການ​ຈັດຕັ້ງສາກົນ​ທີ່​ກ່ຽວ​ຂ້ອງ​​ແລະ​ບໍລິສັດ​ຜະລິດ​ຢຸກຢາ​ທີ່​ຊື່​ດັງ 500 ກວ່າ​ທ່ານ​ໄດ້​ເຂົ້າຮ່ວມ​ກອງ​ປະຊຸມ. ກອງ​ປະ​ຊຸມ​ຈະ​ສິ້ນ​ສຸດ​ລົງ​ໃນ​ວັນ​ທີ 9 ພະຈິກ.