|
|
 |
| (GMT+08:00)
2005-11-10 21:35:48
|
 |
|
ໄທໄດ້ກາຍເປັນສູນຈຳໜ່າຍສິນຄ້າຈີນ(ສຽງ)
cri
Author: da
|
ຄຽງຄູ່ກັບການສ້າງເຂດກາຄ້າເສລີຈີນອາຊຽນ,ນັກທຸລະກິດຈີນນັບມື້ນັບຫຼາຍພາກັນຢາກໄປລົງທຶນເຮັດທຸລະກິດຢູ່ໄທ.ໃນລາຍການເຂົ້າສູ່ອາຊຽນພາກນີ້,ເຊີນຟັງບົດສະເໜີທີ່ພາດຫົວເລື່ອງວ່າ: ໄທໄດ້ກາຍເປັນສູນຈຳໜ່າຍສິນຄ້າຈີນ.
ຕາມຊາບວ່າ ໄທບາງກອກມັກສິນຄ້າຈີນທີ່ສຸດ. ສະເລ່ຍແລ້ວ ໄທບາງກອກປະມານ 35% ແຕ່ລະເດືອນຈະຕ້ອງຊື້ສິນຄ້າຈີນເທື່ອໜຶ່ງ.ໃນສິນຄ້າເຫຼົ່ານີ້,ໝາກໄມ້ແຫ້ງ ໝາກໄມ້ສົດ ເຄື່ອງຫຼິ້ນປະເພດລົດຍົນນ້ອຍແລະມະນຸດກົນເປັນຕົ້ນ,ລູກຄ້າມັກທີ່ສຸດ.ເພາະວ່າ ສິນຄ້າເຫຼົ່ານີ້ລາຄາຖືກ,ທັງຄຸນນະພາບກໍດີ.
ຕາມຂໍ້ມູນສຳຫຼວດຂອງສູນຄົ້ນຄວ້າຊາວນາໄທຈີນສະແດງໃຫ້ເຫັນວ່າ,ປະຈຸບັນ ບາງກອກໄດ້ກາຍເປັນສູນຈຳໜ່າຍສິນຄ້າຈີນ,ບໍ່ວ່າຈະແມ່ນຕະຫຼາດທຳມະດາ ຫຼືຢູ່ໃນຮ້ານຄ້າໃຫຍ່ໆ,ລ້ວນແຕ່ມີສິນຄ້າຈີນວາງຂາຍ.ຖະໜົນສຳເພັ້ງແລະສະພານເຫຼັກຂອງບາງກອກ,ໄດ້ກາຍເປັນຕະຫຼາດຂາຍຍົກສິນຄ້າຈີນທີ່ໃຫຍ່ກວ່າເພິ່ນຢູ່ໄທ.ຄຽງຄູ່ກັບການສ້າງຕັ້ງເຂດການຄ້າເສລີຈີນ-ອາຊຽນແລະແມ່ນ້ຳລ້ານຊ້າງ-ແມ່ນ້ຳຂອງເດີນເຮືອຢ່າງເປັນທາງການ,ການໄປມາຫາສູ່ກັນແລະຮ່ວມມືກັນທາງການຄ້າລະຫວ່າງຈີນກັບໄທກໍແຮ່ງຫຼາຍກວ່າເກົ່າ.
ຢູ່ຕາມຖະໜົນບາງກອກ,ສິນຄ້ານ້ອຍ ຄືນ້ຳມັນປົວກະດູກທີ່ຜະລິດຢູ່ເມືອງອີ້ຫຼິນເຂດກວາງຊີຈີນ ກໍມີຂາຍ.ນີ້ແມ່ນຍ້ອນວ່າ ຄົນໄທມັກຢາທຳມະຊາດປະເພດນີ້ທີ່ສຸດ,ໂດຍສະເພາະແມ່ນຢາຈີນປົວພະຍາດ ຢາຮັກສາສຸຂະພາບແລະຢາເສີມສວຍເປັນຕົ້ນ.ຢູ່ໄທແລະຢູ່ປະເທດອາຊຽນອື່ນໆ,ຄົນສ່ວນຫຼາຍກໍຮູ້ຈັກຜົນການປົວພະຍາດຂອງແພດສາດຈີນແລະຢາຈີນ.ຮ້ານຂາຍຢາຖົງເຢິນຖາງ ຊຶ່ງແມ່ນບໍລິສັດຜະລິດຢາຈີນປັກກິ່ງໄດ້ກຳໂອກາດດັ່ງກ່າວ,ເປີດຮ້ານຂາຍຢາ 10 ກວ່າຮ້ານຢູ່ບາງກອກໄທ ກົວລາລຳເປີມາເລເຊຍແລະເມືອງໃຫຍ່ໆຂອງປະເທດອາຊຽນອື່ນໆ.ປະຈຸບັນ ຮ້ານເຫຼົ່ານີ້ຂາຍດີຫຼາຍ.
ຕາມຊາບວ່າ,ປະຈຸບັນ ຂະແໜງການເສດຖະກິດຂອງໄທໄດ້ຈະເລີນຮຸ່ງເຮືອງຄືນໃໝ່ແລ້ວ.ອຸດສາຫະກຳລົດຍົນ ເອເລັກໂຕຼນິກແລະເຄື່ອງໄຟຟ້າ ການປຸງແຕ່ງໂລຫະ ແລະການຜະລິດເບົ້າແບບຂອງໄທລ້ວນແຕ່ພັດທະນາໄວຫຼາຍ,ຄວາມຕ້ອງການຈັກສ່ຽນໄດ້ເພີ່ມຂຶ້ນຢ່າງຫຼວງຫຼາຍ,ໂດຍສະເພາະແມ່ນຕ້ອງການເຄື່ອງອາໄລ່ແລະເຄື່ອງປະກອບຂອງຈັກສ່ຽນທີ່ສຸດ.ໃນສອງປີມານີ້,ໄທໄດ້ນຳເຂົ້າເຄື່ອງອາໄລ່ ຊີກສ່ວນແລະເຄື່ອງປະກອບຂອງຈັກສ່ຽນ ຕົກເປັນມູນຄ່າປະມານ 200 ລ້ານໂດລາ,ກວມຍອດມູນຄ່າສິນຄ້າຂາເຂົ້າຂອງໄທປະມານ 30%.ປະຈຸບັນ ເພື່ອກະຕຸກເສດຖະກິດໃຫ້ເພີ່ມຂຶ້ນ,ໄທພວມກໍ່ສ້າງພື້ນຖານໂຄງລ່າງຫຼາຍແຫ່ງ.ສະນັ້ນ,ອຸປະກອນເຫຼັກກ້າ ຊີມັງ ອຸປະກອນກໍ່ສ້າງ ກົນຈັກແລະເຄື່ອງຜະລິດໄຟຟ້າຂອງຈີນໄດ້ສົ່ງເຂົ້າໄທຫຼາຍກວ່າເກົ່າ.
ເຖິງວ່າຂະບວນການຫັນເປັນອຸດສາຫະກຳຂອງໄທພັດທະນາໄວຫຼາຍ,ແຕ່ປະຈຸບັນ ໄທຍັງແມ່ນປະເທດກະສິກຳຢູ່. ຍ້ອນວ່າ ການຜະລິດຝຸ່ນເຄມີຍັງບໍ່ຫຼາຍ,ສະນັ້ນ ຈຶ່ງຕ້ອງຊື້ຝຸ່ນເຄມີຊະນິດຕ່າງໆຈາກຕ່າງປະເທດປະມານ 6 ລ້ານໂຕນຕໍ່ປີ,ໃນນັ້ນ ລວມທັງຝຸ່ນເຄມີຂອງຈີນ.
ໄທແມ່ນປະເທດທີ່ມີໝາກໄມ້ຫຼາຍ,ປະຈຸບັນ ປະລິມານບໍລິໂພກນ້ຳໝາກໄມ້ຂອງໄທ ສະເລ່ຍຕໍ່ຄົນ ມີພຽງແຕ່ 2 ລິດທໍ່ນັ້ນ,ຕະຫຼາດມີກຳລັງບົ່ມຊ້ອນອັນໃຫຍ່ຫຼວງ.ພ້ອມກັນນັ້ນ ໄທມີແຕ່ໝາກໄມ້ແຖບຮ້ອນ,ບໍ່ມີໝາກໄມ້ແຖບອຸ່ນ.ຫຼັງຈາກຈີນໄທປະຕິບັດນະໂຍບາຍຍົກເວັ້ນພາສີໝາກໄມ້ແລ້ວ, ໝາກໄມ້ແຖບອຸ່ນຂອງຈີນຄື ໝາກຈອງ ໝາກໂປ່ມແລະໝາກເຊີລີເປັນຕົ້ນ,ໄດ້ສົ່ງໄປຂາຍຢູ່ແຫ່ງຕ່າງໆຂອງໄທຢ່າງບໍ່ຂາດສາຍ.
ຍ້ອນໄທພວມສ້າງໂຄງການພື້ນຖານໂຄງລ່າງຢ່າງຕໍ່ເນື່ອງກັນ,ສະນັ້ນ,ໄທກໍໄດ້ກາຍເປັນຕະຫຼາດສຳຄັນແຫ່ງໜຶ່ງຂອງຈີນທີ່ຮັບເໝົາກິດຈະການຢູ່ຕ່າງປະເທດ.ຕາມຂໍ້ມູນເອກະສານຂອງສະຖານທູດຈີນປະຈຳໄທສະແດງໃຫ້ເຫັນວ່າ,ໂຄງການກໍ່ສ້າງທີ່ບໍລິສັດຈີນຮັບເໝົາຢູ່ໄທ ໄດ້ກ່ຽວພັນເຖິງຫຼາຍຂົງເຂດ ຄືອຸດສາຫະກຳເຄຫະສະຖານ ທາງຫຼວງ ຂົວ ຫຼໍ່ຫຼອມໂລຫະ ຊົນລະປະທານ ທ່າເຮືອ ການລວງຄອງນ້ຳ ແລະເຈາະສ້າງເປັນຕົ້ນ,ເນື້ອໃນຂອງຂໍ້ຜູກພັນກໍກວມຫຼາຍດ້ານ,ເຊັ່ນການອອກແບບ ໃຫ້ຄຳປຶກສາ ກໍ່ສ້າງ ການສະໜອງວັດຖຸອຸປະກອນ ການຮ່ວມມືຄຸ້ມຄອງແລະອື່ນໆ.
ຜູ້ຊ່ຽວຊານທີ່ກ່ຽວຂ້ອງກ່າວວ່າ,ຄຽງຄູ່ກັບເຂດການຄ້າເສລີຈີນ-ອາຊຽນເລີ່ມດຳເນີນງານຢ່າງຮອບດ້ານ,ແລະຈີນໄທຮ່ວມມືທາງເສດຖະກິດການຄ້ານັບມື້ນັບເພີ່ມທະວີຂຶ້ນ,ການຮ່ວມມືສອງຕໍ່ສອງລະຫວ່າງຈີນກັບໄທຍ່ອມຈະນຳເອົາໂອກາດການຄ້າຫຼວງຫຼາຍມາໃຫ້ນັກທະລຸກິດຂອງທັງສອງປະເທດ.
|
|
|
