ຕາມ​ຂ່າວສານ​ຊິນ​ຮວາ: ວັນ​ທີ 11 ພະຈິກ ຢູ່​ທີ່​ຮາ​ໂນ​ຍ, ທ່ານ​ຢວນກຸ້ຍ​ເຢີ​ນ ຮອງ​ລັດ​ຖະ​ມົນ​ຕີ​ກະຊວງ​ສຶກສາ​ທິການ​ຈີນ​ກັບ​ທ່ານ​ເຈິ​ນວັນ​ຢົງ ຮອງ​ລັດຖະມົນຕີ​ກະຊວງ​ສຶກສາ​ທິ​ການ​​ແລະ​ອົບ​ຮົມ​ຂອງຫວຽດນາມ​ໄດ້​ລົງ​ນາມ​ໃນ "ສັນຍາ​ແລກປ່ຽນ​ການ​ສຶກສາ​ລະຫວ່າງ​ຈີນ​ຫວຽດ​ນາມ​ແຕ່​ປີ 2005 ຮອດ​ປີ 2009", ຈຸດປະສົງ​ແມ່ນ​ໃນ 5 ປີ​ຂ້າງ​ໜ້າ ສອງ​ປະ​ເທດ​ຈະ​ສືບ​ຕໍ່​ຮ່ວມ​ມື​ໃນ​ຂົງ​ເຂດ​ການ​ສຶກສາ.

ສັນຍາ​ໄດ້​ລະບຸ​ໄວ້​ວ່າ, ຈີນ​ຫວຽດນາມ​ຈະ​ສົ່ງ​ເສີມ​ແລະ​ສະໜັບສະໜູນ​ມະຫາວິທະ​ຍາ​ໄລ​​ແລະ​ສະ​ຖາ​ບັນ​ຄົ້ນຄວ້າວິທະຍາສາດ​ການ​ສຶກສາຂອງສອງ​ປະ​ເທດ​ດຳ​ເນີນ​ການ​​ແລກ​ປ່ຽນ​ແລະ​ຮ່ວມ​ມື​ໂດຍ​ກົງ, ​ເພີ່ມ​ທະວີ​ການແລກປ່ຽນອາຈານ​ແລະ​ນັກ​ສຶກສາ. ​ໃນ​ດ້ານ​ການ​ສິດ​ສອນ​ພາ​ສາ​ຈີນ​ກາງ, ​ແຕ່ລະ​ປີ ຝ່າຍ​ຈີ​ນຈະສະໜອງ​ຈຳນວນ​ຜູ່​ໄດ້​ຮັບ​ທຶນ​ສຶກສາ​ອັນ​ແນ່​ນອນ​ໃຫ້​ແກ່​ຊຸດ​ອົບ​ຮົມ​ຄູ​ສອນ​ພາສາ​ຈີນ​ກາງຂອງ​ຝ່າຍ​ຫວຽດນາມ​ໃນ​ໄລຍະ​ພັກ​ຮຽນ​ລະ​ດູ​ຮ້ອນ, ​ແລະ​ຮ່ວມ​ມື​ກັບ​ຝ່າຍ​ຫວຽດນາມ​ໃນ​ດ້ານ​ຮຽບຮຽງ​ແບບຮຽນ​ແລະ​ອົບຮົມ​ຄູ​ສອນ​ພາ​ສາ​ຈີນ​ຢູ່​ຫວຽດ​ນາມ.