|
ເຮັດແນວໃດຈິ່ງສາມາດເອົາຊະນະໃນການແຂ່ງຂັນ(ສຽງ)
cri
|
ດຳລົງຊີວິດໃຈສັງຄົມຍຸກປະຈຸບັນ, ບ່ອນໃດກໍເຕັມໄປດ້ວຍການຊ່ວງຊິງແຂ່ງຂັນ, ທ່ານຜູ້ຟັງທີ່ຮັກແພງ, ເຊື່ອວ່າ, ບົນເສັ້ນທາງເຕີບໂຕຂອງທ່ານ, ທ່ານກໍ່ເຄີຍປະສົບການແຂ່ງຂັນນ້ອຍໆໃຫຍ່ໆບໍ່ໜ້ອຍກັນຕິເນາະ. ທຸກຄົນກໍ່ຫວັງຢາກໃຫ້ຕົນເອງເປັນຝ່າຍຊະນະ, ຕໍ່ໄປ, ສົມບູນຈະເລົ່າເລື່ອງໜຶ່ງກ່ຽວກັບເຮັດແນວໃດຈິ່ງສາມາດເອົາຊະນະໃນການແຂ່ງຂັນສູ່ທ່ານຟັງ:
ມີນັກມວຍທີ່ເກັ່ງກ້າຜູ້ໜຶ່ງໄປເຂົ້າຮ່ວມການແຂ່ງຂັນຊີງລາງວັນ, ເຂົາແນ່ໃຈວ່າຕົນເອງຈະຕ້ອງຊະນະຕ້ອງຊິງໄດ້ແຊມປຽນແນ່ນອນ. ແຕ່ບໍ່ໄດ້ຄຶດເລີຍວ່າ, ໃນການແຂ່ງຂັນຮອບສຸດທ້າຍ, ເຂົາໄດ້ພົບຄູ່ແຂ່ງຂັນຜູ້ໜຶ່ງທີ່ມີກຳລັງພໍປານກັນເຂົາ, ສອງຝ່າຍຕ່າງຊົກຕ່ອຍກັນສຸດແຮງຂອງຕົນ, ເມື່ອຊົກໄປໄລຍະໜຶ່ງ, ນັກມວຍຜູ້ນີ້ປະກົດວ່າ, ຕົນເອງບໍ່ສາມາດຈັບຈຸດອ່ອນຂອງຄູ່ແຂ່ງຂັນ, ແຕ່ວ່າຄູ່ແຂ່ງຂັນຜູ້ນັ້ນພັດສາມາດບຸກຊ່ອງໂຫວ່ຂອງຕົນໄດ້.
ໃນທີ່ສຸດ, ນັກມວຍຜູ້ນີ້ເສຍ, ເຂົາໄດ້ເສຍຂັນແຊມປຽນທີ່ຕົນຄອງມາ.
ຕໍ່ມາ, ເຂົາໄດ້ໄປຫາພໍ່ຄູຂອງຕົນ, ແລ້ວສະແດງການຊົກຕ່ອຍກັບຄູ່ແຂ່ງຂັນເທື່ອນີ້ໃຫ້ພໍ່ຄູເບິ່ງ, ຫວັງຢາກໃຫ້ພໍ່ຄູຊ່ອຍຈັບຈຸດອ່ອນຂອງຄູ່ແຂ່ງຂັນ, ຫາວິທີເອົາຊະນະຄູ່ແຂ່ງຂັນແລະຕັດສິນໃຈຈະເອົາຊະນະຜູ້ນັ້ນໃນການແຂ່ງຂັນເທື່ອໜ້າ, ຍາດເອົາຂັນແຊມປຽນຄືນມາ.
ເມື່ອພໍ່ຄູຟັງແລ້ວກໍຍີ້ມຊື່ໆ, ບໍ່ເວົ້າຫຍັງ, ມີແຕ່ຂີດເສັ້ນຊື່ເສັ້ນໜຶ່ງຢູ່ໜ້າດິນ, ແລະໃຫ້ນັກມວຍຜູ້ນີ້ຊອກຫາວິທີເຮັດໃຫ້ເສັ້ນຊື່ເສັ້ນນີ້ສັ້ນເຂົ້າແຕ່ບໍ່ໃຫ້ລຶບຖິ້ມ.
ນັກມວຍເກັ່ງຜູ້ນີ້ຄິດໄປຄິດມາເຮັດຈັ່ງໃດກໍບໍ່ເຂົ້າໃຈ, ມັນຈະເປັນໄປໄດ້ແນວໃດ, ເສັ້ນຊື່ເສັ້ນນີ້ຈະສັ້ນເຂົ້າໂດຍບໍ່ລຶບມັນຖິ້ມສ່ວນໜຶ່ງ. ສຸດທ້າຍ, ເຂົາຂໍຍອມແລ້ວຂໍຮຽນນຳພໍ່ຄູ.
ພໍ່ຄູເລີຍຂີດອີກເສັ້ນໜຶ່ງຍາວກວ່າໃສ່ຂ້າງເສັ້ນເກົ່າ. ເມື່ອທຽບກັນແລ້ວ, ກໍ່ຮູ້ສຶກວ່າເສັ້ນເກົ່າສັ້ນກວ່າຫຼາຍ.
ພໍ່ຄູເວົ້າວ່າ, ຢາກຍາດເອົາແຊມປຽນ, ບໍ່ພຽງແຕ່ຕ້ອງຮູ້ຕີຈຸດອ່ອນຂອງຝ່າຍກົງກັນຂ້າມທໍ່ນັ້ນ, ກໍຄືກັບເສັ້ນສອງເສັ້ນນີ້, ມີແຕ່ເຈົ້າເອງເກັ່ງກວ່າ, ຄູ່ແຂ່ງຂັນກໍ່ຈະຄືກັບເສັ້ນທີ່ແຕ້ມໄວ້ກ່ອນ, ເມື່ອທຽບໃສ່ກັນແລ້ວ, ມັນກໍ່ຈະສັ້ນກວ່າຫຼາຍ. ເຮັດແນວໃດໃຫ້ຕົນເອງເຂັ້ມແຂງກວ່າຈຶ່ງແມ່ນກົກຮາກຂອງການຝຶກແອບຂອງເຈົ້າ.
ບົນເສັ້ນທາງຍາດແຍ່ງເອົາໄຊຊະນະນັ້ນ, ມີຄວາມລຳບາກແລະອຸປະສັກຫຼາກ ຫຼາຍທີ່ພວກເຮົາຕ້ອງຂ້າມຜ່ານ, ຕ້ອງໄປຜາບແພ້. ທຳມະດາແລ້ວ, ຈະມີສອງຊ່ອງທາງ:
ທາງໜຶ່ງແມ່ນຖືການບຸກໂຈມຕີຈຸດອ່ອນຂອງຄູ່ແຂ່ງຂັນເປັນຈຸດໜັກ. ຄືນັກມວຍໃນເລື່ອງດັ່ງກ່າວ, ຢາກຊອກຫາຈຸດອ່ອນຂອງຄູ່ແຂ່ງຂັນ, ແລ້ວໃຊ້ໝົດແຮງໂຈມຕີໃຫ້ຖືກບ່ອນ, ແກ້ໄຂບັນຫາໂດຍໄວດ້ວຍເຕັກນິກຫຼືວິທີທີ່ຮຸນແຮງທີ່ສຸດໂດຍກົງ.
ອີກທາງໜຶ່ງກໍ່ແມ່ນ, ເພີ່ມກຳລັງແຮງຂອງຕົນຢ່າງຮອບດ້ານ, ຊຶ່ງກໍ່ແມ່ນວິທີທີ່ພໍ່ຄູສອນໃຫ້ ຄື, ຍິ່ງເອົາໃຈໃສ່ນຳການເຮັດໃຫ້ຕົນເອງເຕີບໃຫຍ່ເຂັ້ມແຂງກວ່າເກົ່າໃນດ້ານຄຸນສົມບັດ, ສະຕິປັນຍາ, ແລະກຳລັງຕົວຈິງ, ແກ້ໄຂບັນຫາ.
ໃນໂລກນີ້, ບ່ອນໃດກໍ່ມີການແຂ່ງຂັນ, ແຕ່ການສອບເສັງຂອງນັກຮຽນ, ຮອດການທຽບກຳລັງລະຫວ່າງປະເທດ. ຄວາມບູຮານຈີນເວົ້າວ່າ: ພາຍເຮືອຂຶ້ນແກ້ງ, ຄັນບໍ່ຂຶ້ນກໍຕ້ອງຖອຍ. ບາງເທື່ອ, ໃນເວລາສອງຄົນແຂ່ງຂັນກັນນັ້ນ, ບໍ່ແມ່ນວ່າເຮົາເອງລະດັບບໍ່ສູງ, ເມື່ອທຽບໃສ່ແຕ່ກ່ອນແລ້ວ, ເຮົາອາດຈະບໍ່ໄດ້ຖອຍຫຼັງ, ແຕ່ວ່າ, ຖ້າຄູ່ແຂ່ງຂັນຂອງເຮົາກ້າວໜ້າແລ້ວ, ເມື່ອທຽບໃສ່ກັນ, ກໍ່ທໍ່ກັບຝ່າຍເຮົາອ່ອນກວ່າ, ກໍ່ຈະຢູ່ໃນທ່າອ່ອນ, ແລ້ວອາດຈະເສຍໄຊ. ເມື່ອທຽບໃສ່ວິທີທີ່ມີແຕ່ຄຶດຢາກຊອກຫາໂຈມຕີຈຸດອ່ອນຂອງຄູ່ແຂ່ງຂັນນັ້ນແລ້ວ, ວີທິເຮັດໃຫ້ຕົນເອງແຂງແຮງກວ່າເກົ່າ, ພ້ອມທັງຊອກຫາວິທີໂຈມຕີຈຸດອ່ອນຂອງຄູ່ແຂ່ງຂັນນັ້ນຈະເປັນວິທີທີ່ສະຫຼາດກວ່າ, ແລະແນ່ນອນກວ່າ. ບໍ່ວ່າໃນເວລາເຂົ້າຮ່ວມການແຂ່ງຂັນ, ຫຼືໃນເວລາປະເຊີນກັບບັນຫາອື່ນໆໃນຊີວິດ, ມີແຕ່ເພີ່ມຄວາມສາມາດແລະຄຸນນະທາດຂອງຕົນຢ່າງບໍ່ຢຸດຢັ້ງ, ເຮັດໃຫ້ຕົນເອງເຂັ້ມແຂງທໍ່ນັ້ນ, ຕົນເອງຈຶ່ງຈະມີຄວາມທຸ່ນທ່ຽງແລະແນ່ໃຈເມື່ອປະເຊີນກັບຄູ່ແຂ່ງຂັນໃດໆແລະການທ້າທາຍທຸກຢ່າງ, ນີ້ຈຶ່ງແມ່ນຮາກຖານທີ່ເຮັດໃຫ້ຕົນເອງບໍ່ເສຍໄຊ.
|
|
