|
ຢູ່ປັກກິ່ງ,ມີອົງການຈັງຕັ້ງມະຫາຊົນອົງການໜຶ່ງເອີ້ນວ່າ,"ສູນວັດທະນະທຳສິ່ງແວດລ້ອມບ້ານໜ່ວຍໂລກປັກກິ່ງ",ຄົນທັງຫຼາຍລ້ວນແຕ່ເອີ້ນວ່າ"ບ້ານໜ່ວຍໂລກປັກກິ່ງ"."ບ້ານໜ່ວຍໂລກປັກກິ່ງ"ມີຜົນສະທ້ອນຫຼາຍໃນດ້ານຊຸກຍູ້ການກໍ່ສ້າງເຂດຄຸ້ມສີຂຽວແລະສະຕິອະນຸລັກສິ່ງແວດລ້ອມຂອງມະຫາຊົນເປັນຕົ້ນ.ຜູ່ສ້າງຕັ້ງອົງການນີ້ແມ່ນຜູ່ຍິງຜູ່ໜຶ່ງ,ຊື່ວ່າລ້ຽວສຽວອີ້.ໃນລາຍການ"ມອງຕ່າງມຸມ"ພາກນີ້,ເຊີນຟັງບົດລາຍງານ:ນາງລ້ຽວສຽວອີ້ທູດອະລະຍທຳສີຂຽວ.
ນາງລ້ຽວສຽວອີ້ມີອາຍຸ50ປີກວ່າແລ້ວ,ແຕ່ຍັງຄົງສວຍງາມແລະສຸພາບຮຽບຮ້ອຍດີ,ນາງເຮັດຊົງຜົມສັ້ນສີດຳ,ຕາມົນສະແດງອອກເຖິງຄວາມເລິກລັບແລະຄວາມສະຫຼາດ,ເພິ່ນຈ່ອຍຫຼາຍ,ຈິ່ງເຮັດໃຫ້ຄົນນຶກບໍ່ອອກເລີຍວ່ານາງໄດ້ສ້າງພາລະກິດທີ່ມີຜົນສະທ້ອນຫຼາຍຄືແນວນີ້.
ນາງລ້ຽວສຽວອີ້ເຄີຍຄົ້ນຄວ້າທິດສະດີປັດຊະຍາໃນູສະພາບັນດິດວິທະຍາສາດສັງຄົມຂອງຈີນ.ນັບແຕ່ປີ1993,ນາງໄດ້ໄປເປັນນັກປາດຢ້ຽມຢາມຢູ່ລັດຄາໂຣລາຍນາເໜືອຂອງອາເມລິກາເປັນເວລາສອງປີ.ທີ່ຈິງແລ້ວ,ເພິ່ນສາມາດຮຽນເອົາປະລິນຍາເອກຢູ່ອາເມລິກາ,ແຕ່ເນື່ອງຈາກເອົາໃຈໃສ່ນຳບັນຫາອະນຸລັກສິ່ງແວດລ້ອມຕະຫຼອດມາ,ໃນທີ່ສຸດເພິ່ນໄດ້ເລືອກກັບຄືນປະເທດຈີນດຳເນີນພາລະກິດອະນຸລັກສິ່ງແວດລ້ອມທີ່ຕົນເອງມັກ.
"ກ່ອນຂ້າພະເຈົ້າໄປຮຽນຢູ່ຕ່າງປະເທດ,ກໍ່ມີໜ່ວຍຖ່າຍທຳຮູບເງົາໜ່ວຍໜຶ່ງແລ້ວ,ໃນຖານະເປັນຜູ່ຖ່າຍເງົາທີ່ເປັນອິດສະລະ,ພວມຖ່າຍທຳໂທລະພາບເລື່ອງຫົວຂໍ້ສະເພາະທີ່ພາດຫົວເລື່ອງວ່າ《ອະລະຍະທຳສີຂຽວກັບຈີນ》,ໃນໄລຍະຂ້າພະເຈົ້າເປັນນັກປາດຢ້ຽມຢາມຢູ່ອາເມລິກາ,ແມ່ນໝູ່ຜູ່ໜຶ່ງຂອງຂ້າພະເຈົ້າຖ່າຍທຳເລື່ອງນີ້,ພາຍຫຼັງມາ,ຍ້ອນວ່າມີວຽກອື່ນ,ເພິ່ນເຮັດຕໍ່ບໍ່ໄດ້.ຂ້າພະເຈົ້າຕ້ອງກັບຄືນມາເຮັດເລື່ອງນີ້ຕໍ່,ຈະຖິ້ມເລື່ອງນີ້ຢູ່ເຄິ່ງທາງບໍ່ໄດ້.ຂ້າພະເຈົ້າຮູ້ດີວ່າບັນຫາສິ່ງແວດລ້ອມຂອງຈີນຮ້າຍແຮງພຽງໃດ,ແຕ່ການລາຍງານຂ່າວຂອງສື່ມວນຊົນໃນຄາວນັ້ນຍັງໜ້ອຍທີ່ສຸດ."
ພາຍຫຼັງກັບຄືນປະເທດຈີນແລ້ວ,ນາງລ້ຽວສຽວອີ້ບໍ່ພຽງແຕ່ໄດ້ຖ່າຍທຳໂທລະພາບຫົວຂໍ້ສະເພາະເລື່ອງ《ອະລະຍະທຳສີຂຽວກັບຈີນ》ເທົ່ານັ້ນ,ແລະຍັງໄດ້ເຮັດໃຫ້ຄວາມໃຝ່ຝັນໃນເບື້ອງຕົ້ນຂອງຕົນບັນລຸຜົນເປັນຈິງ,ຄື,ໜຶ່ງແມ່ນ,ໄດ້ສ້າງຕັ້ງສູນວັດທະນະທຳສິ່ງແວດລ້ອມບ້ານໜ່ວຍໂລກປັກກິ່ງ,ອີກອັນໜຶ່ງແມ່ນ,ໄດ້ຈັດລາຍການສະເພາະທີ່ພາດຫົວເລື່ອງວ່າ"ເວລາອະນຸລັກສິ່ງແວດລ້ອມ"ໃນສະຖານີໂທລະພາບສູນກາງຈີນ,ເລີ່ມເຮັດວຽກງານເພື່ອຍົກສະຕິອະນຸລັກສິ່ງແວດລ້ອມຂອງນວນຊົນຈີນໃຫ້ສູງຂຶ້ນ.ມາຮອດປະຈຸບັນ,ນາງລ້ຽວສຽວອີໄດ້ຮູບເງົາບົດຄວາມມີ4ແສນກວ່າໂຕໜັງສຶຈີນກ່ຽວກັບການອະນຸລັກສິ່ງແວດລ້ອມ,ໄດ້ຖ່າຍທຳຟິມໂທລະພາບກ່ຽວກັບການອະນຸລັກສິ່ງແວດລ້ອມຮ້ອຍກວ່າເລື່ອງ.ເພິ່ນຍັງໄດ້ນຳພາ"ບ້ານໜ່ວຍໂລກປັກກິ່ງ"ເຜີຍແຜ່ການອະນຸລັກສິ່ງແວດລ້ອມໃນຊີວິດການເປັນຢູ່ໂດຍຜ່ານຈາກການເຄື່ອນໄຫວສາທາລະນະປະໂຫຍດຂະໜາດໃຫຍ່ຈຳນວນໜຶ່ງ.ເຊັ່ນ,ໃນວັນທີ22ເມສາປີ2000,ຄືວັນໜ່ວຍໂລກ,"ບ້ານໜ່ວຍໂລກປັກກິ່ງ"ກັບອົງການຈັດຕັ້ງມະຫາຊົນຈຳນວນໜຶ່ງໄດ້ຮ່ວມກັນຈັດ"ການເຄື່ອນໄຫວຂອງຈີນໃນວັນໜ່ວຍໂລກ",ມວນຊົນປະມານ10ລ້ານຄົນໄດ້ເຂົ້າຮ່ວມການເຄື່ອນໄຫວອະນຸລັກສິ່ງແວດລ້ອມທີ່ມີຂໍ້ປະເດັນວ່າ"ລິເລີ່ມການບໍລິໂພກແບບຍຶນຍົງ,ເລືອກເອົາຊີວິດການເປັນຢູ່ສີຂຽວ",ປີດຽວກັນ,ນັກຮຽນຢູ່ໂຮງຮຽນປະຖົມປັກກິ່ງ8ແສນກວ່າຄົນກັບພໍ່ແມ່ຂອງພວກເຂົາເຈົ້າໄດ້ຂຽນບັດໃຫ້ຄຳໝັ້ນສັນຍາອະນຸລັກສິ່ງແວດລ້ອມທີ່"ບ້ານໜ່ວຍໂລກປັກກິ່ງ"ແລະພາກສ່ວນທີ່ກ່ຽວຂ້ອງຂອງລັດຖະບານຈີນແຈກໃຫ້,ເຮັດໃຫ້ສະຕິກ່ຽວກັບໂອລິມປິກສີຂຽວແລະຊີວິດການເປັນຢູ່ສີຂຽວເດີນເຂົ້າສູ່ຄອບຄົວ.
ນາງລ້ຽວສຽວອີ້ທີ່ຮຽນຈົບວິຊາປັດຊະຍາ,ແມ່ນຄົນທີ່ຊ່າງຄິດ,ແລະກໍ່ແມ່ນຜູ່ທີ່ກ້າເອົາຄວາມຄິດຂອງຕົນໄປປະຕິບັດຕົວຈິງ.ນາງຊູ້ລີ້ໝູ່ໃກ້ຊິດກວ່າໝູ່ຂອງເພິ່ນທີ່ເຮັດວຽກງານຄຸ້ມຄອງໂຄງການຢູ່ບ້ານໜ່ວຍໂລກປັກກິ່ງ ໄດ້ແນະນຳນາງລ້ຽວສຽວອີ້ຄືແນວນີ້ວ່າ:
"ນາງລ້ຽວສຽວອີ້ເປັນຜູ່ກ້າຄິດກ້າທຳ,ຂໍແຕ່ແມ່ນເລື່ອງທີ່ນາງເຫັນວ່າຖືກຕ້ອງແລ້ວກໍ່ຈະໄປເຮັດຢ່າງແນ່ນອນແລະ,ບໍ່ເຄີຍກິນເໜງຈັກເທື່ອ."
ເພື່ອບຳລຸງສ້າງສະຕິອະນຸລັກສິ່ງແວດລ້ອມຂອງຄົນທັງຫຼາຍ,ນາງລ້ຽວສຽວອີ້ໄດ້ເຊົ່າປ່າໄມ້ຢູ່ເທິງພູ180ເຮັກຕາຢູ່ຊານເມືອງປັກກິ່ງ,ຖືເປັນແຫຼ່ງສຶກສາການອະນຸລັກສິ່ງແວດລ້ອມ.ຄວບຄົວຊາວນາຢູ່ຫັ້ນໄດ້ຖິ້ມຂີ້ເຫຍື່ອຕາມປະເພດ,ໃຊ້ພະລັງຕາເວັນມາເຍືອງຮຸ່ງ, ປູກພືດກະສິກຳທີ່ປອດສານເຄມີ. ແບບວິທີດຳລົງຊີວິດແລະການຜະລິດຂອງພວກເຂົ້າເຈົ້າ,ໄດ້ເຮັດໃຫ້ຜູ່ທີ່ມາຈາກຕົວເມືອງເມື່ອມາຮອດແຫ່ງນີ້,ໃນຂະນະທີ່ໄດ້ສຳພັດກັບທຳມະຊາດ,ຍັງໄດ້ຮັບການສຶກສາດ້ານອະນຸລັກສິ່ງແວດລ້ອມຫຼາຍຮູບຫຼາຍແບບ.ປະຈຸບັນ,ບ້ານພູດອຍທີ່ນ້ອຍໆທີ່ມີປ່າໄມ້,ດິນທາມ,ດິນເຮື້ອ,ນ້ຳພູນ້ຳຫ້ວຍແລະຄອບຄົວຊາວນາ40ກວ່າຄອບຄົວນັ້ນ,ໄດ້ພັດທະນາເປັນເຂດທ່ອງທ່ຽວຊີວະພາບທີ່ໂຮມສູນການອະນຸລັກສິ່ງແວດລ້ອມຂອງຄອບຄົວຊາວນາ,ການທ່ອງທ່ຽວສີຂຽວແລະການສຶກສາອົບຮົມດ້ານອະນຸລັກສິ່ງແວດລ້ອມເຂົ້າເປັນອັນໜຶ່ງອັນດຽວກັນ.
9ປີໄດ້ຜ່ານໄປແລ້ວ,"ບ້ານໜ່ວຍໂລກປັກກິ່ງ"ມີພະນັກງານພຽງແຕ່ສອງ,ສາມຄົນ,ດຽວນີ້ໄດ້ເພີ່ມຂຶ້ນຮອດ15ຄົນ,ແລະມີຜູ່ອາສາສະໝັກທີ່ຂຶ້ນທະບຽນຢ່າງເປັນທາງການພັນກວ່າຄົນ.ໃນຖານະເປັນອົງການຈັດຕັ້ງມະຫາຊົນຂອງຈີນທີ່ມີຄວາມສາມາດສັງລວມດ້ານການຄົ້ນຄວ້າທິດສະດີ,ການຖ່າຍທຳຮູບເງົາ,ການສຶກສາໃນເຂດຄຸ້ມແລະການແລກປ່ຽນລະຫວ່າງຊາດ,ວຽກງານຂອງ"ບ້ານໜ່ວຍໂລກປັກກິ່ງ"ໄດ້ຮັບຄວາມເອົາໃຈໃສ່ຈາກປະຊາຄົມໂລກແລະສື່ມວນຊົນສາກົນ.ປີ2000,"ລາງວັນໂຊຟິ"ເຊິ່ງເປັນລາງວັນໃຫຍ່ດ້ານອະນຸລັກສິ່ງແວດລ້ອມສາກົນ,ໄດ້ມອບໃຫ້ນາງລ້ຽວສຽວອີ້,ພ້ອມກັນນັ້ນ,ຜູ້ປົກປັກຮັກສາສິ່ງແວດລ້ອມມວນຊົນຜູ່ນີ້,ຍ້ອນການປະພຶດອັນພົ້ນເດັ່ນໃນຂົງເຂດອະນຸລັກສິ່ງແວດລ້ອມ,ຄະນະກຳມະການຈັດຕັ້ງງານກິລາໂອລິມປິກປັກກິ່ງປີ2008ຍັງໄດ້ຈ້າງເພິ່ນເປັນທີ່ປຶກສາດ້ານອະນຸລັກສິ່ງແວດລ້ອມເປັນພິເສດ.
ໃນຊູ່ມື້ນີ້ທີ່ຫຼາຍໆຄົນສະແຫວງຫາຊີວິການເປັນຢູ່ທີ່ທັນສະໄໝແລະຟຸ່ມເຟືອຍ,ນາງລ້ຽວສຽວອີ້ພັດດຳລົງຊີວີດແບບງ່າຍດາຍຕະຫຼອດມາ,ເພິ່ນບໍ່ຂັບລົດເກ໋ງ,ບໍ່ໃຊ້ເຄື່ອງແອເຢັນ.ຫ້ອງການຂອງເພິ່ນຢູ່ຊັ້ນ8, ຖ້າບໍ່ມີເລື່ອງດ່ວນ,ເພິ່ນກໍ່ບໍ່ຂີ່ລິບ,ຫາກແມ່ນຂຶ້ນຂັ້ນໃດເອງ.ເພິ່ນເວົ້າວ່າ,ເພິ່ນມີເຄື່ອງໄຟຟ້າສາມເຄື່ອງຄື,ໂທລະພາບສີ,ຕູ້ເຢັນແລະຈັກຊັກເຄື່ອງກໍ່ພໍແລ້ວ.
"ຂ້າພະເຈົ້າຮູ້ສຶກວ່າຖະໜອງມຊັບພະຍາກອນ,ເອົາໃຈໃສ່ຮັກຫຼອມຊີວິດ,ສ້າງສຸຂະພາບໃຫ້ແຂງແຮງ,ເຄົາລົບທຳມະຊາດ,ພ້ອມກັນກ້າວໜ້າຢ່າງກົມກຽວກັນ,ຊີວິດການເປັນຢູ່ແນວນີ້ແມ່ນສົມບູນທີ່ສຸດ.ຊັບສົມບັດຂອງພວກເຮົາຈະໜ້ອຍແດກໍ່ໄດ້,ແຕ່ພວກເຮົາຄວນເອົາເວລາຫາຊັບສົມບັດມາເອົາໃຈໃສ່ຮັກຫອມນຳສຸຂະພາບຂອງພວກເຮົາ,ເອົາໃຈໃສ່ນຳສິ່ງແວດລ້ອມທຳມະຊາດຂອງພວກເຮົາ,ເຮັດໃຫ້ຈິດໃຈຂອງພວກເຮົາໃຫ້ສົມບູນຂຶ້ນ.
|
