|
ທ່ານຜູ້ຟັງທີ່ໂຄລົບ,ນານທົ່ງ ເມືອງນ້ອຍທາງພາກໃຕ້ຂອງຈີນ,ຫ່າງຈາກຕົວເມືອງໃຫຍ່ຊຽງໄຮ້ມີໄລຍະທາງລົດປະມານສອງຊົ່ວໂມງ.ຫວ່າງມໍ່ໆນີ້,ຫົວຫນ້າຫໍພິພິດທະພັນຫລາຍກວ່າ130ແຫ່ງຂອງຈີນແລະຕ່າງປະເທດໄດ້ເຕົ້າໂຮມກັນຢູ່ແຫ່ງນີ້,ອວຍພອນວັນສ້າງຕັ້ງຄົບຮອບ100ປີຂອງຫໍພິພິດທະພັນແຫ່ງຫນຶ່ງຢູ່ເມືອງນີ້.ໃນລາຍການ"ວັດທະນະທຳຈີນ"ເທື່ອນີ້,ເຊີນຟັງແຈ້ງຂ່າວ: ພາລະກິດຫໍພິພິດທະພັນຂອງຈີນພັດທະນາມາເປັນເວລາ100ປີ ໄດ້ຮັບຜົນສຳເລັດຢ່າງເດັ່ນຊັດ.
ປີ1905ແມ່ນປີຫນຶ່ງທີ່ເປັນຕາລະລຶກໃນປະຫວັດວັດທະນະທຳຈີນ.ໃນເວລານັ້ນ,ຈີນທີ່ມີຜືນແຜ່ນດິນອັນກວ້າງໃຫຍ່ຍັງຢູ່ໃຕ້ການປົກຄອງຂອງເຈົ້າຈັກກະພັດລາຊະວົງສັກດິນາຊິງ.ຕັ້ງແຕ່ສົງຄາມຢາຝິ່ນໃນປີ1840ເປັນຕົ້ນມາ, ພາຍໃຕ້ການບີບບັງຄັບດ້ວຍກຳລັງອາວຸດຂອງບັນດາມະຫາອຳນາດຕາເວັນຕົກ,ລາຊະວົງຊິງໄດ້ເຊັນສັນຍາທີ່ບໍ່ສະເຫມີພາບຫລາຍສະບັບ,ຈີນໄດ້ກາຍເປັນປະເທດເຄິ່ງສັກດິນາເຄິ່ງເມືອງຂຶ້ນ.ໃນໄລຍະນີ້,ຢູ່ນານທົ່ງ ເມືອງນ້ອຍທາງພາກໃຕ້ມີນັກທຸລະກິດຜູ້ຫນຶ່ງທີ່ຊື່ວ່າຈ່າງຈຽນເລີ່ມທົດລອງ"ກອບກູ້ປະເທດຊາດດ້ວຍການສຶກສາ",ທ່ານໄດ້ສ້າງຕັ້ງຫໍພິພິດທະພັນນານທົ່ງໃນປີ1905,ນີ້ແມ່ນຫໍພິພິດທະພັນທີ່ມີຄວາມຫມາຍຍຸກປະຈຸບັນແຫ່ງທຳອິດຂອງຈີນ.
ທ່ານນາງວາງຕົ້ງຢຸນແມ່ນຫົວຫນ້າຊຸດປະຈຸບັນຂອງຫໍພິພິດທະພັນນານທົ່ງ.ທ່ານນາງເວົ້າວ່າ,ຫໍພິພິດທະພັນນານທົ່ງບໍ່ແມ່ນຫໍພິພິດທະພັນທີ່ທຳມະດາສາມັນ,ເຖິງຈະແມ່ນຢູ່ໃນສາຍຕາຂອງຄົນໃນປະຈຸບັນ,ທັດສະນະຄະຕິກໍ່ສ້າງຂອງມັນກໍ່ແມ່ນກ້າວຫນ້າ.ທ່ານນາງເວົ້າວ່າ:
"ການວາງສະແດງຂອງຫໍພິພິດທະພັນນານທົ່ງມີສິ່ງວາງສະແດງໃນຫ້ອງແລະນອກຫ້ອງປະສົມປະສານກັນ,ສິ່ງວາງສະແດງໃນຫ້ອງມີປະຫວັດສາດ,ວິຈິດຕະກຳ,ຕົວຢ່າງທຳມະຊາດເປັນຕົ້ນ,ຍັງມີພືດແລະສັດເປັນນອກຫ້ອງ.ທັດສະນະຄະຕິໃນການສ້າງຫໍພິພິດທະພັນກໍແມ່ນໄດ້ສ້າງແບບແຜນຂອງຫໍພິພິດທະພັນຈີນເປັນຜູ້ທຳອິດ,ເຊິ່ງກໍ່ຄືຊ່ອຍການສິດສອນຂອງໂຮງຮຽນ, ເຜີຍແຜ່ຄວາມຮູ້ດ້ານວິທະຍາສາດ,ພ້ອມທັງເປັນສະຖານທີ່ລື້ນເລີງແລະພັກຜ່ອນຢ່ອນອາລົມຂອງຄົນທັງຫລາຍ."
ຫໍພິພິດທະພັນມີກົກເຄົ້າປະຫວັດສາດຍາວນານຢູ່ຈີນ,ແຕ່ຫໍພິພິດທະພັນສະໄຫມມໍ່ກໍ່ຄືກັນກັບໂຮງຮຽນແບບໃຫມ່,ລ້ວນແຕ່ກຳເນີດຂຶ້ນໃນຂະບວນວິວັດທີ່ສັງຄົມຈີນຫັນເປັນສະໄຫມມໍ່ເທື່ອລະກ້າວ.ການສ້າງຫໍພິພິດທະພັນໄດ້ກາຍເປັນມາດຕະການສຳຄັນແຫ່ງການ"ພັດທະນາສະຕິປັນຍາຂອງປະຊາຊົນ"ທີ່ນັກຮຽນຮູ້ທີ່ກ້າວຫນ້າຂອງຈີນລິເລີ່ມສົ່ງເສີມໃນທ້າຍສະຕະວັດທີ19.
ຫລັງທ່ານນາງອາລີເຊັນດຼາ ຄຸມມິນສ໌ ປະທານສະພາຫໍພິພິດທະພັນສາກົນໄດ້ທ່ຽວຊົມຫໍພິພິດທະພັນນານທົ່ງແລ້ວ,ໄດ້ຍ້ອງຍໍຫໍພິພິດທະພັນນານທົ່ງວ່າເປັນຜູ້ນຳຫນ້າພາທາງຂອງຫໍພິພິດທະພັນຊີວະພາບແລະຫ້ອງທົດລອງຫໍພິພິດທະພັນ.ທ່ານນາງເວົ້າວ່າ:
"ຫໍພິພິດທະພັນນານທົ່ງໄດ້ສ້າງຕັ້ງຂຶ້ນໃນຕົ້ນສະຕະວັດແລ້ວນີ້,ມັນໄດ້ສະຫນອງຕົວແບບເອກະລັກພິເສດອັນຫນຶ່ງ.ເພາະວ່າ,ເຖິງແມ່ນວ່າຢູ່ຝ່າຍຕາເວັນຕົກ,ການໃຫ້ຄວາມສຳຄັນນຳການຄົ້ນຄວ້າວິຊາການແລະການສະສົມພ້ອມກັນຂອງຫໍພິພິດທະພັນກໍ່ແມ່ນເລື່ອງພຽງແຕ່ໃນ30ປີມານີ້.ປະຫວັດສາດຂອງຫໍພິພິດທະພັນນານທົ່ງມີຄວາມຫມາຍຖອດຖອນອັນສຳຄັນຕໍ່ການກໍ່ສ້າງຂອງຫໍພິພິດທະພັນໃນພາກພື້ນອື່ນໆໃນໂລກ."
ລັດຖະບານຈີນເອົາໃຈໃສ່ນຳຫໍພິພິດທະພັນນານທົ່ງສ້າງຕັ້ງຂຶ້ນຄົບຮອບ100ປີແມ່ນມີຄວາມຫມາຍສັນຍະລັກ.ຕາມສຳເນົາເອກະສານບັນທຶກໄວ້ວ່າ,ໃນຕົ້ນສະຕະວັດທີ20,ຫໍພິພິດທະພັນຂອງຈີນເຄີຍພັດທະນາຮອດ70ແຫ່ງ.ແຕ່ໃນຊຸມປີ30ຫາຊຸມປີ40,ສົງຄາມຍີ່ປຸ່ນຮຸກຮານຈີນໄດ້ທຳລາຍສັງຄົມແລະວັດທະນະທຳຂອງຈີນຢ່າງໃຫຍ່ຫລວງ.ໃນເວລາສາທາລະນະລັດປະຊາຊົນຈີນສ້າງຕັ້ງຂຶ້ນໃນປີ1949,ຫໍພິພິດທະພັນປະເທດຈີນເກົ່າຈົ່ງໄວ້ຢູ່ແຫ່ງຕ່າງໆມີແຕ່25ແຫ່ງເທົ່ານັ້ນ.ຫໍພິພິດທະພັນນານທົ່ງແມ່ນແຫ່ງຫນຶ່ງໃນຫໍພິພິດທະພັນເຫລົ່ານີ້.
ການພັດທະນາຂອງຫໍພິພິດທະພັນນານທົ່ງແມ່ນຕົວຢ່າງຫນຶ່ງຂອງພາລະກິດຫໍພິພິດທະພັນຂອງຈີນທີ່ຈະເລີນຮຸ່ງເຮືອນໃນປະຈຸບັນ.ໃນຫລາຍປີມານີ້,ລັດຖະບານຈີນໄດ້ເພີ່ມທະວີການສ້າງສາວັດທະນະທຳ,ລິເລີ່ມສົ່ງເສີມໃຫ້ມະນຸດແລະສັງຄົນພັດທະນາຢ່າງກົມກຽວກັນ.ການກໍ່ສ້າງສາຂອງຫໍພິພິດທະພັນຂອງທົ່ວປະເທດໄດ້ປະກົດມີສະຖານະພາບໃຫມ່.ຢູ່ປັກກິ່ງ,ຫໍພິພິດທະພັນແຫ່ງຊາດພວມສ້າງແລະຂະຫຍາຍຢູ່,ເມື່ອສ້າງສຳເລັດແລ້ວຈະມີຂະຫນາດກວ້າງຂຶ້ນຫນຶ່ງເທົ່າ;ຢູ່ເມືອງໃຫຍ່ຕ່າງໆຄືຊຽງໄຮ້,ຊີອານ,ເຈິ້ງໂຈ່ວເປັນຕົ້ນ,ຫໍພິພິດທະພັນໃຫມ່ທີ່ທັນສະໄຫມໄດ້ກາຍເປັນທິວທັດວັດທະນະທຳທີ່ຕົວເມືອງຖືເປັນສິ່ງພາກພູມໃຈ.ຢູ່ເມືອງນ້ອຍນານທົ່ງ,ຢູ່ອ້ອມແອ້ມຄັນຄຸເມືອງຮ່າວເຫີໄດ້ສ້າງສຳເລັດຫໍພິພິດທະພັນທັນສະໄຫມທີ່ມີລະດັບວິຊາສະເພາະອ່າວສູງງວດຫນຶ່ງເຊັ່ນຫໍພິພິດທະພັນແຜ່ນແພ,ຫໍພິພິດທະພັນເຕັກນິກສະຫນອງນ້ຳ,ຫໍພິພິດທະພັນສະຖາປັດຕະຍະກຳ,ຫໍພິພິດທະພັນລູກຄິດ,ຫໍພິພິດທະພັນກິລາແລະຫໍພິພິດທະພັນຕົວເມືອງເປັນຕົ້ນ,ລວມທັງຫມົດມີ23ແຫ່ງ.
ທ່ານຊ້ານຈີ້ສຽງ ຫົວຫນ້າກົມວັດຖຸບູຮານແຫ່ງຊາດຈີນເວົ້າວ່າ:
"ຮ້ອຍປີມານີ້,ພາລະກິດຫໍພິພິດທະພັນຈີນໄດ້ມີການພັດທະນາຢູ່ໃຫຍ່ຫລວງ,ປະຈຸບັນ,ຈີນໄດ້ມີຫໍພິພິດທະພັນ2300ກວ່າແຫ່ງ,ວັດຖຸບູຮານທີ່ຫໍພິພິດທະພັນສະສົມໄວ້ມີ20ລ້ານກວ່າອັນ,ມີຜູ້ເຂົ້າຊົມ150ລ້ານຄົນຕໍ່ປີ."
ທ່ານຈ່າງເວິນປິ່ນ ປະທານສະມາຄົມຫໍພິພິດທະພັນຈີນກ່າວວ່າ,ທຳມະດາແລ້ວ,ຫໍພິພິດທະພັນແມ່ນສະຖາທີ່ແລະພາຫະທີ່ສຳຄັນແຫ່ງການເຜີຍແຜ່ວັດທະນະທຳຊົນເຜົ່າ,ການພັດທະນາຢ່າງປອດໄສແລະສືບເນື່ອງຂອງປະເທດຫນຶ່ງຈະປາສະຈາກການຄ້ຳຊູຂອງວັດທະນະທຳບໍ່ໄດ້,ເຊື່ອວ່າຄຽງຄູ່ກັບກຳລັງຕົວຈິງທາງເສດຖະກິດຂອງຈີນນັບມື້ນັບເຂັ້ມແຂງແຮງຂຶ້ນ,ພາລະກິດຫໍພິພິດທະພັນຂອງຈີນຈະມີຊ່ອງກວ່າງພັດທະນາໃຫຍ່ກວ່າເກົ່າ.
|
