|
|
 |
| (GMT+08:00)
2005-11-17 16:11:38
|
 |
|
ດອກໄຟປະຢັດພະລັງງານໄດ້ເຂົ້າສູ່ຄອບຄົວຈີນນັບມື້ນັບຫຼາຍ
cri
Author: li
 ດອກໄຟແມ່ນເຄື່ອງເຍືອງຮຸ່ງທີ່ຂາດບໍ່ໄດ້ໃນຊີວິດປະຈຳວັນຂອງຄົນທັງຫຼາຍ. ແຕ່ວ່າ,ດອກໄຟນ້ອຍໆມີຄວາມຮູ້ໃຫຍ່,ດອກໄຟທີ່ມີແຕ່ສັບພະຄຸນເຍືອງຮຸ່ງທໍ່ນັ້ນບໍ່ສາມາດຕອບສະໜອງກັບຄວາມຕ້ອງການຂອງຄົນທັງຫຼາຍແລ້ວ. ການປະຢັດພະລັງງານກວ່າເກົ່າແລະທົນໃຊ້ກວ່າເກົ່າແມ່ນຄວາມຕ້ອງການໃໝ່ຂອງຄົນທັງຫຼາຍຕໍ່ດອກໄຟ. ຍ້ອນວ່າດອກໄຟປະຢັດພະລັງງານໄດ້ຕອບສະໜອງຄວາມຕ້ອງການດັ່ງກ່າວ,ຈຶ່ງໄດ້ເຂົ້າສູ່ຄອບຄົວຈີນນັບມື້ນັບຫຼາຍ.
ຢູ່ຕະຫຼາດຂາຍວັດສະດຸກໍ່ສ້າງແລະດອກໄຟແຫ່ງໜຶ່ງຂອງປັກກິ່ງ,ນາງສີຢົງອາຍຸ 20 ກວ່າປີພວມຊື້ດອກໄຟໃຫ້ເຮືອນໃໝ່ທີ່ຫາກໍ່ຕົກແຕ່ງແລ້ວ. ຢູ່ຕໍ່ໜ້າຜະລິດຕະພັນທີ່ມີຫຼາຍຢ່າງຫຼາຍແນວ,ນາງພັດສົນໃຈແຕ່ດອກໄຟທີ່ປະຢັດພະລັງງານໂດຍຈຳເພາະ. ນາງໄດ້ເລົ່າຄວາມຄິດຂອງຕົນໃຫ້ນັກຂ່າວຊາບວ່າ:
"ການຊື້ດອກໄຟທີ່ປະຢັດພະລັງງານ,ຕົ້ນຕໍແມ່ນເພື່ອປະຢັດພະລັງງານ,ພ້ອມທັງປະຢັດໄຟຟ້າແລະປະຢັດເງິນ. ໂດຍສະເພາະແມ່ນປັກກິ່ງແມ່ນຕົວເມືອງແບບບໍລິໂພກ,ທັງແມ່ນຕົວເມືອງທີ່ຂາດພະລັງງານທີ່ສຸດ,ສະນັ້ນ,ຂ້າພະເຈົ້າຮູ້ສຶກວ່າໃນຖານເປັນສະມາຊິກຜູ້ໜຶ່ງຂອງຕົວເມືອງນີ້,ມີພັນທະເຮັດຈາກຕົນເອງ,ພະຍາຍາມປະຢັດພະລັງງານ."
ທຳອິດ,ດອກໄຟປະຢັດພະລັງງານແມ່ນປະກົດຂຶ້ນຢູ່ຕ່າງປະເທດ,ເມື່ອສິບກວ່າປີກ່ອນຈຶ່ງໄດ້ແຜ່ເຂົ້າປະເທດຈີນ. ແຕ່ກ່ອນ,ເພື່ອເຜີຍແຜ່ດອກໄຟທີ່ປະຢັດພະລັງງານ,ລັດຖະບານແລະວິສາຫະກິດຜະລິດທີ່ກ່ຽວຂ້ອງໄດ້ເຮັດວຽກງານໂຄສະນາເຜີຍແຜ່ດ້ານຕະຫຼາດບໍ່ໜ້ອຍ,ແຕ່ວ່າຍ້ອນລາຄາຂອງດອກໄຟປະຢັດພະລັງງານຂ້ອນຂ້າງແພງ,ຄືແພງກວ່າດອກໄຟທຳມະດາປະມານ 20 ເທົ່າ,ສະນັ້ນ ອັດຕານຳໃຊ້ໃນຄອບຄົວຈຶ່ງຂ້ອນຂ້າງຕ່ຳ. ໃນຫຼາຍປີມານີ້,ຄຽງຄູ່ກັບເສດຖະກິດຈີນພັດທະນາຢ່າງບໍ່ຢຸດຢັ້ງ,ຄວາມສາມາດບໍລິໂພກຂອງປະຊາຊົນໄດ້ສູງຂຶ້ນຢ່າງເດັ່ນຊັດ; ພ້ອມກັນນັ້ນ ລັດຖະບານຈີນກໍໄດ້ອອກແຮງສົ່ງເສີມໃຫ້ປະຢັດພະລັງງານ,ສ້າງສັງຄົມແບບປະຢັດ,ເຮັດໃຫ້ສະຕິປະຢັດຂອງມວນຊົນນັບມື້ນັບແຮງຂຶ້ນ. ກໍແມ່ນຢູ່ໃຕ້ເບື້ອງຫຼັງດັ່ງກ່າວ,ດອກໄຟປະຢັດພະລັງງານນັບມື້ນັບໄດ້ຮັບຄວາມນິຍົມຊົມຊອບຈາກຄົນທັງຫຼາຍ.
ທ່ານລູຊ່ຽນລີ້ ຜູ້ຊ່ຽວຊານຂອງສະມາຄົມດິນໜ້ອຍຂອງຈີນຊີ້ອອກວ່າ,ດອກໄຟປະຢັດພະລັງງານແມ່ນເຮັດດ້ວຍຜົງມີແສງເຫຼື້ອມທີ່ເອົາດິນໜ້ອຍເປັນວັດຖຸດິບ,ຍ້ອນວ່າດິນໜ້ອຍມີລັກສະນະພິເສດ,ສະນັ້ນ ຈຶ່ງມີສັບພະຄຸນປະຢັດພະລັງງານ. ທ່ານເວົ້າວ່າ:
"ດອກໄຟທຳມະດານອກຈາກເຍືອງຮຸ່ງແລ້ວ,ພະລັງໄຟຟ້າສ່ວນຫຼາຍທີ່ສຸດຈະປ່ຽນເປັນພະລັງຄວາມຮ້ອນແລະເສຍຫາຍໄປ,ສ່ວນດອກໄຟປະຢັດພະລັງງານທີ່ເຮັດດ້ວຍດິນໜ້ອຍນັ້ນຜະລິດຄວາມຮ້ອນໜ້ອຍ,ມີແຕ່ໜຶ່ງສ່ວນສີ່ຂອງດອກໄຟທຳມະດາທໍ່ນັ້ນ,ສະນັ້ນ,ເມື່ອທຽບກັບດອກໄຟທຳມະດາທີ່ມີຄວາມຮຸ່ງທໍ່ກັນແລ້ວ,ດອກໄຟປະຢັດພະລັງງານສາມາດປະຢັດພະລັງງານ 60% ເຖິງ 80%."
ຕາມການຄິດໄລ່ຂອງຜູ້ຊ່ຽວຊານ,ຖ້າເອົາດອກໄຟປະຢັດພະລັງງານ 11 ວັດມາເຂົ້າແທນດອກໄຟທຳມະດາ 40 ວັດ,ບໍ່ພຽງແຕ່ຄວາມຮຸ່ງບໍ່ຕ່ຳລົງເທົ່ານັ້ນ,ພ້ອມທັງຍັງສິ້ນເປືອງໄຟຟ້າໜ້ອຍລົງປະມານ 80% ອິກດ້ວຍ. ເມື່ອຄິດໄລ່ຕາມຊາວຈີນໃຊ້ດອກໄຟປະຢັດພະລັງງານ 1 ໜ່ວຍຕາມຫົວຄົນ,ລວມທັງໝົດ 1 ຕື້ 300 ລ້ານໜ່ວຍ 4 ຊົ່ວໂມງຕໍ່ມື້,ປີໜຶ່ງສາມາດປະຢັດໄຟຟ້າ 93 ຕື້ກິໂລວັດໂມງ,ຫຼາຍກວ່າຍອດປະລິມານຜະລິດໄຟຟ້າຕາມແຜນການຕໍ່ປີຂອງໂຮງໄຟຟ້ານ້ຳຕົກຊ່ານເຊຍ ເຊິ່ງເປັນໂຮງໄຟຟ້ານ້ຳຕົກທີ່ໃຫຍ່ກວ່າໝູ່ທີ່ພວມກໍ່ສ້າງຢູ່ຂອງຈີນໃນປັດຈຸບັນ. ນອກນີ້ ດອກໄຟປະຢັດພະລັງງານຍັງທົນໃຊ້,ສະເລ່ຍແລ້ວ,ແຕ່ລະໜ່ວຍໃຊ້ໄດ້ 8 ພັນຊົ່ວໂມງ,ເປັນປະມານ 8 ເທົ່າຂອງດອກໄຟທຳມະດາ.
ເມື່ອທຽບກັບດອກໄຟທຳມະດາແລ້ວ,ດອກໄຟປະຢັດພະລັງງານມີອົງປະກອບສັບສົນກວ່າ,ສະນັ້ນ,ໃນເວລາໃຊ້ນັ້ນມີບາງບ່ອນຕ້ອງລະວັງເປັນພິເສດ. ນາງຈ່າງລີ້ ທີ່ເຮັດວຽກວິທະຍາສາດເຕັກໂນໂລຢີໄດ້ໃຊ້ດອກໄຟປະຢັດພະລັງງານມາຫຼາຍປີແລ້ວ,ນາງໄດ້ບອກເຄັດລັບໃນການໃຊ້ດອກໄຟປະຢັດພະລັງງານໃຫ້ນັກຂ່າວຊາບວ່າ,
"ຕົວຢ່າງຄືຢູ່ບ່ອນທີ່ຄົນໃນຄອບຄົວເຂົ້າອອກເລື້ອຍໆເຊັ່ນຫ້ອງນ້ຳແລະເຮືອນຄົວເປັນຕົ້ນ,ຢ່າໄຂມອດໄຟເລື້ອຍໆ. ນີ້ແມ່ນຍ້ອນວ່າ,ໃນເວລາໄຂ,ກະແສໄຟຟ້າຂອງດອກໄຟປະຢັດພະລັງງານແຮງຫຼາຍ,ສິ້ນເປືອງໄຟຟ້າກໍຫຼາຍ; ເຖິງວ່າບໍ່ມອດໄຟເປັນເວລາດົນຈະສິ້ນເປືອງໄຟຟ້າໜ້ອຍໜຶ່ງກໍຕາມ,ແຕ່ຍ້ອນວ່າດອກໄຟປະຢັດພະລັງງານປະຢັດໄຟຟ້າຫຼາຍກວ່າດອກໄຟທຳມະດາ 3 ຮອດ 4 ເທົ່າ,ສະນັ້ນ ເວົ້າລວມແລ້ວ,ເຖິງວ່າເປີດດອກໄຟປະຢັດພະລັງງານເປັນເວລາດົນ,ຍັງປະຢັດພະລັງໄຟຟ້າໄດ້."
ເພື່ອໃຫ້ຄົນທັງຫຼາຍມີໂອກາດຫຼາຍກວ່າເກົ່າໃນການເລືອກຊື້ດອກໄຟປະຢັດພະລັງງານ,ປັດຈຸບັນ,ໂຮງງານຜະລິດດອກໄຟປະຢັດພະລັງງານຂອງຈີນພວມພັດທະນາຜະລິດຕະພັນໃໝ່ຢ່າງບໍ່ຢຸດຢັ້ງ. ເມື່ອຍ່າງເຂົ້າຕະຫຼາດຂາຍດອກໄຟຫຼາຍແຫ່ງຂອງຈີນລ້ວນແຕ່ໄດ້ເຫັນດອກໄຟປະຢັດພະລັງງານທີ່ມີຮູບຊົງໃໝ່ອ່ຽມແລະມີຫຼາຍວັດຢ່າງຄົບຖ້ວນ; ພ້ອມກັນນັ້ນ ແສງຂອງດອກໄຟເຫຼົ່ານີ້ບໍ່ພຽງແຕ່ແມ່ນສີຂາວທີ່ເຫັນເລື້ອຍໆເທົ່ານັ້ນ,ຫາກຍັງມີຫຼາຍສີເຊັ່ນສີເຫຼືອງ,ສີແດງ,ສີຂຽວ,ສີຟ້າເປັນຕົ້ນ. ນອກນີ້ ເຕັກນິກຂອງດອກໄຟປະຢັດພະລັງງານກໍໄດ້ປົວແປງໃຫ້ດີຂຶ້ນເລື້ອຍໆ,ດອກໄຟປະຢັດພະລັງງານທີ່ມີສັບພະຄຸນໃໝ່ຈຳນວນໜຶ່ງຈະປະກົດອອກມາຕາມໆກັນ.
|
|
|
