|
ຄຽງຄູ່ກັບອິນເທີເນັດໄດ້ພັດທະນາຢູ່ຈີນຢ່າງວ່ອງໄວ,ຊ່ອງທາງຮັບເອົາຂໍ້ມູນຂ່າວສານແລະຮັບການບໍລິການຂອງມວນຊົນຈີນນັບມື້ນັບລຸລ່ວງສະດວກ,ໃນຂະນະດຽວກັນ,ບັນຫາກ່ຽວກັບການປົກປ້ອງສິດຊັບສິນທາງປັນຍາໃນເຄືອຂ່າຍອິນເທີເນັດກໍນັບມື້ນັບພົ້ນເດັ່ນຂຶ້ນ.ໃນກອງປະຊຸມເວທີປາໄສສາກົນກ່ຽວກັບການພັດທະນາອຸດສາຫະກຳຂໍ້ມູນຂ່າວສານກັບການປົກປ້ອງສິດຊັບສິນທາງປັນຍາຂອງຈີນທີ່ຈັດຂຶ້ນຢູ່ປັກກິ່ງໃນຫວ່າງມໍ່ໆນີ້,ນັກຂ່າວໄດ້ຊາບວ່າ,ພາກສ່ວນທີ່ກ່ຽວຂ້ອງຂອງຈີນພວມໃຊ້ມາດຕະການເພີ່ມທະວີການຕິດຕາມຄຸ້ມຄອງແລະປົວແປງສະພາບແວດລ້ອມດ້ານກົດໝາຍເປັນຕົ້ນ,ມາແກ້ໄຂບັນຫາປົກປ້ອງສິດຊັບສິນທາງປັນຍາທີ່ປະສົບໃນການພັດທະນາອຸດສາຫະກຳອິນເທີເນັດ.
ຕາມຂໍ້ມູນສຳຫຼວດລາຍໜຶ່ງທີ່ສະມາຄົມອິນເທີເນັດຈີນປະກາດໃນຫວ່າງມໍ່ໆນີ້ສະແດງໃຫ້ເຫັນວ່າ,ປັດຈຸບັນ,ຈີນມີເວັບໄຊປະມານ1ແສນ4ໝື່ນແຫ່ງບໍ່ໄດ້ຈົດທະບຽນນຳພະແນກທີ່ກ່ຽວຂ້ອງຂອງລັດ,ກວມປະມານ1/4ຂອງເວັບໄຊທັງໝົດຂອງຈີນ.ພ້ອມກັນນັ້ນ,ປະກົດການທີ່ຈະກ່າວດັ່ງຕໍ່ໄປນີ້ ໄດ້ມີຢູ່ທົ່ວໄປ.ຕົວຢ່າງຄື,ປະຊາກອນເນັດຂອງຈີນສາມາດດາວໂລດເພງຟີໃນເວັບໄຊອິນເທີເນັດຫຼາຍແຫ່ງທີ່ບໍ່ໄດ້ຮັບສິດ.ຜູ່ຫຼິ້ນເກມອິນເທີເນັດກໍຕັ້ງເຄື່ອງຫຼິ້ນເກມເອງໃນກໍລະນີທີ່ບໍ່ໄດ້ຮັບອະນຸຍາດຈາກພໍ່ຄ້າຜະລິດເກມ,ເປີດໃຫ້ຄົນຫຼິ້ນແລ້ວເກັບຄ່າ.ນອກນີ້,ສິ່ງປະພັນຫຼາຍປະເພດຂອງຫຼາຍໆຄົນເມື່ອຖືກເວັບໄຊລົງພິມຫຼືກັອບປີ້ເອົາແລ້ວ,ພັດບໍ່ໄດ້ຮັບຄ່າຕອບແທນເທົາທີ່ຄວນ.ເວັບໄຊບາງແຫ່ງຈົນກະທັ້ງບໍ່ໃສ່ຊື່ຂອງຜູ່ແຕ່ງເຫຼົ່ານີ້ເປັນຕົ້ນ.
ໃນກອງປະຊຸມເວທີປາໄສສາກົນກ່ຽວກັບການພັດທະນາອຸດສາຫະກຳຂໍ້ມູນຂ່າວສານແລະການປົກປ້ອງສິດຊັບສິນທາງປັນຍາຂອງຈີນທີ່ຈັດຂຶ້ນຢູ່ປັກກິ່ງໃນຫວ່າງມໍ່ໆນີ້.ນາງເວີຍຫົງ ຜູ່ປະຕິບັດງານໃນສູນອະນຸລັກລິຂະສິດຈີນບອກນັກຂ່າວວ່າ,ການກະທຳຂອງເວັບໄຊເຫຼົ່ານີ້ທີ່ກ່າວມານັ້ນໄດ້ລ່ວງລ້ຳສິດແລະຜົນປະໂຫຍດທີ່ຊອບກົດໝາຍຂອງຜູ່ແຕ່ງຢ່າງໜັກໜ່ວງ.
"ການລ່ວງ ສິດແລະລອກແບບໃນອິນເທີເນັດແມ່ນການກະທຳຊະນິດໜຶ່ງທີ່ລ່ວງລ້ຳສິດປະພັນທາງອິນເທີເນັດ.ປັດຈຸບັນ,ການດາວໂລດຈາກອິນເທີເນັດໄດ້ກາຍເປັນຊ່ອງທາງສຳຄັນຊ່ອງທາງໜຶ່ງຂອງຜະລິດຕະພັນພາບແລະສຽງທີ່ລອກແບບແລະຜະລິດຕະພັນເກມອິນເທີເນັດເຂົ້າສູ່ຕະຫຼາດວັດທະນະທຳຂອງຈີນ.ນີ້ໄດ້ລ່ວງລ້ຳສິດແລະຜົນປະໂຫຍດຂອງຜູ່ມີສິດຢ່າງໜັກໜ່ວງ,ມັນໄດ້ກີດຂວາງການພັດທະນາອຸດສາຫະກຳທີ່ກ່ຽວຂ້ອງກັບລິຂະສິດຢ່າງໜັກໜ່ວງ,ພ້ອມທັງໄດ້ທຳລາຍຄວາມສາມາດປະດິດສ້າງວັດທະນະທຳຂອງຊາດ,ທຳລາຍພາບພົດຂອງປະເທດ."
ນາງເວີຍຫົງບອກນັກຂ່າວວ່າ,ເພື່ອໂຈມຕີການລ່ວງສິດທີ່ປະກົດອອກມາໃນການພັດທະນາອິນເທີເນັດ,ລັດຖະບານແລະອົງການປົກປ້ອງລິຂະສິດຂອງຈີນໄດ້ໃຊ້ຫຼາຍມາດຕະການ,ຕົວຢ່າງຄືດຳເນີນການປັບປຸງສະເພາະທີ່ໂຈມຕີການລ່ວງສິດລອກແບບທາງເອິນເທີເນັດພາຍໃນຂອບເຂດທົ່ວປະເທດ,ຊຸກຍູ້ວຽກງານຈົດທະບຽນເວັບໄຊທຸກປະເພດ.ປິດເວັບໄຊທີ່ດຳເນີນການເຄື່ອນໄຫວລ່ວງສິດລອກແບບ,ກວດກາລົງໂທດຫົວໜ່ວຍແລະສ່ວນບຸກຄົນທີ່ສວຍໃຊ້ອິນເທີເນັດປະກາດຂໍ້ມູນຂ່າວສານແລະຄ້າຂາຍສິ່ງທີ່ລ່ວງສິດແລະລອກແບບ.ພ້ອມກັນນັ້ນ,ປີ2001,ຈີນໄດ້ດັດແກ້ກົດໝາຍວ່າດ້ວຍສິດປະພັນ,ກຳນົດຢ່າງຈະແຈງໃຫ້ຜູ່ປະພັນມີສິດເຜີຍແຜ່ຂໍ້ມູນຂ່າວສານໃນອິນເທີເນັດ,ແລະໄດ້ປະຕິບັດວິທີປົກປ້ອງສິດປະພັນທາງອິນເທີເນັດດ້ານບໍລິຫານສະບັບທຳອິດຂອງຈີນຢ່າງເປັນທາງການໃນເດືອນພຶດສະພາປີນີ້.
ນາງເວີຍຫົງຂອງສູນປົກປ້ອງລິຂະສິດຈີນກ່າວວ່າ,ຄ່ຽງຄູ່ກັບກົດໝາຍກົດບັນຍັດທີ່ກ່ຽວຂ້ອງໄດ້ຮັບການບູລະນະໃຫ້ສົມບູນຂຶ້ນ,ຜູ່ແຕ່ງບົດປະພັນອິນເທີເນັດຂອງຈີນສາມາດປົກປ້ອງສິດແລະຜົນປະໂຫຍດຂອງຕົນດ້ວຍຫຼາຍຮູບການ,"ໃນກົດໝາຍວ່າດ້ວຍສິດປະພັນຂອງຈີນໄດ້ກຳນົດສິດ17ປະເພດ,ຜູ່ແຕ່ງສາມາດອີງຕາມສິດເຫຼົ່ານີ້ ປົກປ້ອງສິດແລະຜົນປະໂຫຍດທີ່ຊອບກົດໝາຍຂອງຕົນຢ່າງຕັ້ງໜ້າ.ຖ້າມີຫຼັກຖານພຽງພໍທີ່ຢັ້ງຢືນວ່າສິດຂອງຕົນຖືກລ່ວງລ້ຳແທ້ແລ້ວ,ກໍສາມາດຜ່ານຈາກຊ່ອງທາງຟ້ອງຮ້ອງມາແກ້ໄຂ,ຫຼືກ່າວຟ້ອງຕໍ່ອົງການຄຸ້ມຄອງບໍລິຫານຂອງທ້ອງຖິ່ນກໍໄດ້.ເລື່ອງທີ່ຄວນກ່າວເຖິງເປັນພິເສດນັ້ນແມ່ນ,ຜູ່ປະພັນຈະໄປຈົດທະບຽນສິ່ງປະພັນຂອງຕົນຢູ່ອົງການຄຸ້ມຄອງລິຂະສິດກ່ອນກໍໄດ້,ເມື່ອເກີດການວິວາດກັນດ້ານລ່ວງສິດແລ້ວ,ກໍສາມາດຖືເປັນຫຼັກຖານໃນເວລາຕັດສິນທາງຕຸລາການ."
ໃນເວລາເອົາຂ່າວ,ນັກຂ່າວຍັງໄດ້ຮູ້ວ່າ,ປັດຈຸບັນ,ຄຽງຄູ່ກັບຈີນນັບມື້ນັບເອົາໃຈໃສ່ນຳວຽກງານປົກປ້ອງສິດຊັບສິນທາງປັນຍາຂອງອິນເທີເນັດນັ້ນ,ບໍລິສັດອິນເທີເນັດນັບມື້ນັບຫຼາຍກໍພວມປັບປຸງການທຸລະກິດຂອງຕົນໃຫ້ເປັນແບບສະບັບ.ຫວ່າງກ່ອນນີ້ບໍ່ດົນ,ບໍລິສັດບາຍດູ ຈີນເຊິ່ງເປັນເວັບໄຊພາສາຈີນສຳລັບຊອກຂໍ້ມູນຂ່າວສານໃຫຍ່ທີໜຶ່ງໃນໂລກໄດ້ໃຫ້ຄຳໝັ້ນສັນຍາວ່າ,ຈະຊຳລະສະສາງລິງຄ໌ດາວໂລດເພງຟີຂອງເວັບໄຊພວກເພິ່ນຢ່າງຮອບດ້ານ,ຮັບປະກັນໃຫ້ເວັບໄຊເຫຼົ່ານີ້ລ້ວນແຕ່ເປັນເວັບໄຊທີ່ໄດ້ຮັບສິດຈາກບໍລິສັດຈຳໜ່າຍແຜ່ນCD,ເພື່ອອັດຕັນຊ່ອງທາງເຜີຍແຜ່ເພງຂອງແຜ່ນCDລອກແບບໃນເທິງເວັບໄຊ.ບຸກຄົນທີ່ກ່ຽວຂ້ອງກ່າວວ່າ,ຄຽງຄູ່ກັບຂະໜາດອຸດສາຫະກຳອິນເທີເນັດຂອງຈີນຂະຫຍາຍຕົວເຕີບໃຫຍ່ຢ່າງບໍ່ຢຸດຢັ້ງ,ວຽກງານປົກປ້ອງສິດຊັບສິນທາງປັນຍາພາຍໃນຂົງເຂດອິນເທີເນັດກໍຈະຫັນເປັນແບບສະບັບເທື່ອລະກ້າວ.
|
