|
|
 |
| (GMT+08:00)
2005-11-24 11:19:57
|
 |
|
ຫວຽດນາມໃໝ່ພວມໂປໂລຂຶ້ນ(ຕອນຕົ້ນ) (ສຽງ)
cri
Author: da
|
ໃນຫຼາຍປີມານີ້,ຫວຽດນາມຖອດຖອນເອົາບົດຮຽນການກໍ່ສ້າງເສດຖະກິດຂອງຈີນ,ປະຕິບັດ"ນະໂຍບາຍປ່ຽນແປງໃໝ່ແລະໄຂປະຕູ",ຫວຽດນາມປ່ຽນໂສມໜ້າໃໝ່ຊູ່ມື້,ລະດັບຊີວິດການເປັນຢູ່ຂອງປະຊາຊົນຍົກສູງຂຶ້ນຊູ່ປີ,ທັດສະນະຄະຕິຊີວິດກໍນັບມື້ນັບທັນສະໄໝ. ໃນລາຍການເຂົ້າສູ່ອາຊຽນ ພວກເຮົາຈະແບ່ງອອກເປັນສອງເທື່ອ ລາຍງານສະພາບການປ່ຽນແປງຂອງຫວຽດນາມສູ່ທ່ານຟັງ.
ຮ່າໂນ້ຍແມ່ນເມືອງທັນສະໄໝ ທັງມີມູນເຊື້ອວັດທະນະທຳຝ່າຍຕາເວັນອອກອັນເຂັ້ມຂຸ້ນ. ຕອນຄ່ຳ,ແສງໄຟເຍືອງໃສ່ຖະໜົນຫົນທາງທີ່ມີຜູ້ສັນຈອນແລະລົດລາໄປໆມາໆລຸດໆລ້າຍໆ;ດອກໄຟນິອອນສີຕ່າງໆເທິງຮ້ານກາເຟແລະບາເຫຼົ້າທີ່ແຈກຢາຍຢູ່ແຫ່ງຕ່າງໆເຫຼື້ອມມາບໆ,ແລະມີສຽງເພງທີ່ມ່ວນອອນຊອນແລະຈັບໃຈຄົນສົ່ງມາເລື່ອຍລອຍຢູ່ເທິງທ້ອງຟ້າ,ເຮັດໃຫ້ລາຕີເມືອງຮ່າໂນ້ຍເພີ່ມບັນຍາກາດອ່ອນໂຍນແລະມີສະເໜ. ຍ້ອນໄດ້ຮັບຜົນສະທ້ອນຈາກວັດທະນະທຳຂອງຝ່າຍຕາເວັນຕົກ ຕອນຄ່ຳ,ຊາວໜຸ່ມທ້ອງຖິ່ນມັກໄປຢ່ອນອາລົມຢູ່ຮ້ານກາເຟ ບາເຫຼົ້າ ແລະຮ້ານດິສໂກ; ນັດພົບກັບຄູ່ຮັກ ຫຼືເຕົ້າໂຮມກັນກັບໝູ່ເພື່ອນ,ລ້ວນແຕ່ຕ້ອງການສະຖານທີ່ທີ່ນິຍົມກັນແລະຟົດຟື້ນປະເພດນີ້.
ປ້າຫງວຽນເວີນໂລວ ອາຍຸ 55 ປີ ແມ່ນພິຍານທີ່ຢືນຢັນການປ່ຽນແປງໃໝ່ແລະໄຂປະຕູຂອງຫວຽດນາມ,ຢືນຢັນການປ່ຽນແປງໃໝ່ອັນເລິກເຊິ່ງຂອງເສດຖະກິດສັງຄົມຫວຽດນາມຍ້ອນດຳເນີນການປ່ຽນແປງໃໝ່ແລະໄຂປະຕູ.ຕໍ່ລົດນິຍົມຂອງຊາວໜຸ່ມທີ່ມັກໄປຫຼິ້ນຢູ່ບາ,ປ້າເວົ້າຢ່າງມີຄວາມຮູ້ສຶກວ່າ,ແຕ່ກ່ອນ ຊາວໜຸ່ມໃສຊິມີເງິນໄປຫຼິ້ນບາ,ເຂົ້າຈະຢາທ້ອງກໍຍັງບໍ່ພໍຊ້ຳ. ປ້າເວົ້າວ່າ,ໃນຊຸມປີ 70-80 ສະຕະວັດທີ່ແລ້ວ,ຍ້ອນມູນເຫດຕ່າງໆ ໂດຍສະເພາະແມ່ນບັນຫາໂຄງປະກອບເສດຖະກິດ,ເສດຖະກິດສັງຄົມຂອງຫວຽດນາມໄດ້ປະສົບຄວາມຫຍຸ້ງຍາກນາໆປະການ,ຕົກຢູ່ໃນວິກິດການອັນໜັກໜ່ວງ,ກາຍເປັນປະເທດທີ່ທຸກຍາກກວ່າເພິ່ນປະເທດໜຶ່ງໃນໂລກ. ໃນຄາວນັ້ນ,ທົ່ວປະເທດຫວຽດນາມຂາດເຂີນອາຫານ,ແຕ່ລະປີ ລັດຕ້ອງຊື້ເຂົ້ານຳຕ່າງປະເທດນັບເປັນລ້ານໂຕນ. ຄອບຄົວຂອງປ້າທັງໝົດ 4 ຄົນກໍທຸກຍາກຫຼາຍຄືກັບຄອບຄົວສ່ວນຫຼາຍ,ນອກຈາກມີເຮືອນຫ້ອງນ້ອຍໆທີ່ມີ 10 ແມັດກາເລທີ່ຫົວໜ່ວຍແບ່ງປັນໃຫ້ນັ້ນແລ້ວ,ສິ່ງທີ່ມີຄ່າທີ່ສຸດໃນຄອບຄົວ ກໍມີແຕ່ລົດຖີບສອງຄັນ ຊຶ່ງເປັນຍານພາຫະນະຕົ້ນຕໍຂອງຊາວຫວຽດນາມໃນຄາວນັ້ນ,ໃນນັ້ນ ມີຄັນໜຶ່ງແມ່ນລົດຖີບກາເຟີ້ງຮວງຂອງຈີນ.
ຈີນຫວຽດນາມມີພູຜາແມ່ນ້ຳຕິດຈອດກັນ,ສະພາບຂອງສອງປະເທດກໍຄ້າຍຄືກັນ,ມີໂຄງປະກອບແບບດຽວກັນ. ໃນເວລາທີ່ລັດຖະບານຫວຽດນາມທຳຄວາມພະຍາຍາມເພື່ອໃຫ້ປະຊາຊົນມີຢູ່ມີກິນນັ້ນ,ນະໂຍບາຍປະຕິຮູບແລະໄຂປະຕູສູ່ພາຍນອກຂອງຈີນພວມກ້າວເຂົ້າສູ່ລວງເລິກ.ໝາກຜົນອັນໃຫຍ່ຫຼວງທີ່ໄດ້ຮັບຈາກການປະຕິຮູບໄດ້ປ່ຽນແປງໂສມໜ້າຂອງປະເທດທີ່ມີປະຊາກອນຫຼາຍກວ່າເພິ່ນໃນໂລກຢ່າງວ່ອງໄວ,ປະຊາຊົນຈີນຫຼຸດພົ້ນອອກຈາກຄວາມທຸກຍາກເທື່ອລະກ້າວ,ເດີນໄປສູ່ຄວາມຮັ່ງມີ. ການປ່ຽນແປງໃໝ່ອັນເລິກເຊິ່ງຂອງສັງຄົມຈີນເຜີຍແຜ່ມາຫາຫວຽດນາມຢ່າງໄວວາ,ໄດ້ດູດດຶງຊັ້ນຜູ້ນຳຂອງຫວຽດນາມຢ່າງເລິກເຊິ່ງ,ເກີດຜົນສະທ້ອນຕໍ່ມວນຊົນທ້ອງຖິ່ນ. ການປະຕິຮູບໂຄງປະກອບທີ່ມີຢູ່ໃນປະຈຸບັນສຸມກຳລັງດຳເນີນການສ້າງສາເສດຖະກິດ ໄດ້ກາຍເປັນໜ້າທີ່ດ່ວນທີ່ສຸດຂອງລັດຖະບານຫວຽດນາມໃນຄາວນັ້ນ.
ເມື່ອໄດ້ຖອດຖອນເອົາບົດຮຽນອັນສຳເລັດຜົນຂອງຈີນແລະໄດ້ຮັບໝາກຜົນໃນການທົດລອງເບື້ອງຕົ້ນແລ້ວ,ໃນທ້າຍປີ 1986,ກອງປະຊຸມໃຫຍ່ຂອງພັກກອມມູນິດຫວຽດນາມຄັ້ງທີ 6 ໄດ້ທຳການຕົກລົງທີ່ສຳຄັນ,ປະຕິບັດນະໂຍບາຍປ່ຽນແປງໃໝ່ແລະໄຂປະຕູຢ່າງຮອບດ້ານ,ສຸມກຳລັງສ້າງສາເສດຖະກິດ,ພະຍາຍາມເຮັດໃຫ້ຫວຽດນາມພົ້ນອອກຈາກວິກິດການເສດຖະກິດສັງຄົມ. ໃນເກືອບ 20 ປີຫຼັງຈາກນັ້ນມາ,ຜູ້ນຳຊັ້ນສູງຂອງຈີນແລະຫວຽດນາມໄດ້ຢ້ຽມຢາມກັນເລື້ອຍໆ,ການແລກປ່ຽນແລະຮ່ວມມືກັນໃນຂົງເຂດຕ່າງໆກໍດຳເນີນໄປຢ່າງຕໍ່ເນື່ອງ,ສອງຝ່າຍຮ່ຳຮຽນນຳກັນ,ຖອດຖອນເອົາບົດຮຽນຂອງກັນ,ເຮັດໃຫ້ພາລະກິດການປະຕິຮູບໄຂປະຕູສູ່ພາຍນອກຂອງຈີນແລະພາລະກິດປ່ຽນແປງໃໝ່ໄຂປະຕູຂອງຫວຽດນາມໄດ້ຮັບຜົນສຳເລັດໃໝ່ຢ່າງບໍ່ຢຸດຢັ້ງ.
ພາລະກິດປ່ຽນແປງໃໝ່ແລະໄຂປະຕູຂອງຫວຽດນາມ ກ່ອນອື່ນໄດ້ຮັບຜົນສຳເລັດຢູ່ຊົນນະບົດ. ຫວຽດນາມແມ່ນປະເທດກະສີກຳຫຼ້າຫຼັງ,ມີປະຊາກອນ 80% ດຳລົງຊີວິດໃນຊົນນະບົດ,ການພັດທະນາກະສິກຳແລະສະຖຽນລະພາບຂອງຊົນນະບົດແມ່ນສຳຄັນທີ່ສຸດຕໍ່ສະຖຽນລະພາບທາງສັງຄົມແລະການເມືອງຂອງຫວຽດນາມ. ສະນັ້ນ,ສູນກາງພັກກອມມູນິດຫວຽດນາມຈຶ່ງຖືການປະຕິຮູບຊົນນະບົດເປັນປ່ອງບຸກທະລຸແຫ່ງການປ່ຽນແປງໃໝ່ແລະໄຂປະຕູ. ເລີ່ມແຕ່ປີ 1987 ເປັນຕົ້ນມາ, ລັດຖະບານຫວຽດນາມໄດ້ປະກາດນະໂຍບາຍປ່ຽນແປງໃໝ່ຕ່າງໆເປັນລຳດັບເພື່ອປົດປ່ອຍກຳລັງການຜະລິດໃນຊົນນະບົດແລະລະດົມຄວາມຫ້າວຫັນໃນການຜະລິດຂອງຊາວກະສິກອນ,ແກນກາງຂອງນະໂຍບາຍແມ່ນປະຕິບັດລະບອບຮັບຜິດຊອບຮັບເໝົາທີ່ດິນ.
ການປະຕິບັດນະໂຍບາຍເຫຼົ່ານີ້ ໄດ້ນຳເອົາປະສິດທິຜົນມາໃຫ້ເຫັນກັບຕາ.ຊາວກະສິກອນມີຄວາມຫ້າວຫັນດຳເນີນການຜະລິດຢ່າງບໍ່ເຄີຍມີມາກ່ອນ,ການຜະລິດກະສິກຳໄດ້ຮັບຜົນອຸດົມສົມບູນຫຼາຍປີລຽນຕິດ. ປີ 1988,ຜົນຜະລິດທັນຍາຫານຂອງຫວຽດນາມເພີ່ມຂຶ້ນຫຼາຍກວ່າປີກ່ອນ 2 ລ້ານກວ່າໂຕນ,ບັນລຸ 19 ລ້ານ 5 ແສນ 8 ໝື່ນໂຕນ,ມີທັນຍາຫານກຸ້ມຕົນເອງແລ້ວ. ປີ 1989,ຫວຽດນາມໄດ້ສົ່ງເຂົ້າສານອອກຂາຍຕ່າງປະເທດເທື່ອທຳອິດ 1 ລ້ານ 4 ແສນ 2 ໝື່ນໂຕນ.ຈາກນັ້ນມາຫຼາຍປີ,ຫວຽດນາມໄດ້ສົ່ງເຂົ້າສານອອກຂາຍຢ່າງຫຼວງຫຼາຍ ແລະກາຍເປັນປະເທດທີ່ຂາຍເຂົ້າສານໃຫ້ຕ່າງປະເທດຫຼາຍທີ 3 ໃນໂລກ. ປີ 2003,ສົ່ງອອກ 3 ລ້ານ 8 ແສນ 6 ໝື່ນໂຕນ,ກາຍເປັນປະເທດຂາຍເຂົ້າສານຫຼາຍທີ 2 ໃນໂລກ ຊຶ່ງພຽງແຕ່ຖັດຈາກໄທ. ປີ 2004,ຕົວເລກຂາຍເຂົ້າສານໄດ້ບັນລຸ 4 ລ້ານ 5 ແສນໂຕນ,ສືບຕໍ່ຮັກສາຖານະທີ 2 ຂອງປະເທດຂາຍເຂົ້າສານໃນໂລກ. ນັບມາຮອດເດືອນກັນຍາປີ 2005,ຫວຽດນາມໄດ້ສົ່ງເຂົ້າສານຂາຍໃຫ້ຕ່າງປະເທດເຖິງ 4 ລ້ານ 6 ແສນໂຕນ,ສ້າງສະຖິຕິສູງໃໝ່ໃນປະຫວັດສາດ.
|
|
|
