|
ຕາມຂ່າວcri:ວັນທີ24 ພະຈິກ,ທ່ານວາງອີ້ ເອກອັກຄະລັດຖະທູດຈີນປະຈຳຍີ່ປຸ່ນກ່າວຢູ່ໂຕກຽວວ່າ,ຜູ້ນຳຍີ່ປຸ່ນໄປນະມັດສະການວັດຢາຊູຄູນີໄດ້ທຳລາຍພື້ນຖານທາງການເມືອງໃນການຟື້ນຟູສາຍສຳພັນທາງການທູດລະຫວ່າງຈີນກັບຍີ່ປຸ່ນ.
ມື້ດຽວກັນ,ທ່ານວາງອີ້ໄດ້ຮັບເຊີນໄປຈັດງານຊຸມນຸມນັກຂ່າວຢູ່ສະໂມສອນນັກຂ່າວຕ່າງປະເທດປະຈຳຍີ່ປຸ່ນ.ໃນເວລາຕອບຄຳຖາມທີ່ວ່າ"ຈີນປະຕິບັດຕໍ່ບັນຫານາໆປະການທີ່ມີຢູ່ໃນການພົວພັນລະຫວ່າງຈີນກັບຍີ່ປຸ່ນນັ້ນເປັນແນວໃດ",ທ່ານວາງອີ້ກ່າວວ່າ,ຈີນປະຕິບັດນະໂຍບາຍທີ່ມີໄມຕີຈິດຖານບ້ານໃກ້ເຮືອນຄຽງຕໍ່ຍີ່ປຸ່ນແຕ່ຕົ້ນຕະຫລອດປາຍ,ຫວັງໃຫ້ສອງຝ່າຍບັນລຸການຢູ່ຮ່ວມກັນໂດຍສັນຕິ,ມີໄມຕີຈິດຕໍ່ກັນທຸກເຊັ່ນຄົນ,ຮ່ວມມືກັນຕ່າງຝ່າຍຕ່າງມີຜົນປະໂຫຍດ,ພັດທະນາພ້ອມກັນບົນພື້ນຖານໃນເອກກະສານການເມືອງ3ສະບັບຄືຖະແຫລງການຮ່ວມລະຫວ່າງຈີນກັບຍີ່ປຸ່ນເປັນຕົ້ນ.ແຕ່ສິ່ງທີ່ຫນ້າເສຍດາຍນັ້ນແມ່ນບັນຫາຮັບຮູ້ປະຫວັດສາດທີ່ຖືການໄປນະມັດສະການວັດຢາຊູຄູນີເປັນຕົວແທນຍັງພວມຂັດຂວາງການພົວພັນລະຫວ່າງສອງປະເທດຂະຫຍາຍຕົວຢ່າງປອດໃສ.
ທ່ານວາງອີ້ຊີ້ອອກວ່າ,ຈະປະຕິບັດຕໍ່ແລະແກ້ໄຂ້ບັນຫາກ່ຽວກັບອາຊະຍາກອນສົງຄາມຊັ້ນກແນວໃດ,ນັ້ນບໍ່ແມ່ນວຽກງານພາຍໃນຂອງຍີ່ປຸ່ນຢ່າງລ້ວນໆແລ້ວ,ມັນກ່ຽວພັນເຖິງພື້ນຖານທາງການເມືອງໃນການຟື້ນຟູສາຍສຳພັນທາງການທູດລະຫວ່າງຈີນກັບຍີ່ປຸ່ນ,ແລະກໍແມ່ນບັນຫາລະຫວ່າງຍີ່ປຸ່ນກັບປະເທດທັງຫມົດທີ່ຖືກທຳຮ້າຍຂອງອາຊີ,ຍັງແມ່ນບັນຫາລະຫວ່າງຍີ່ປຸ່ນກັບປະຊາຄົມໂລກ.
|
