|
|
 |
| (GMT+08:00)
2005-12-01 10:48:53
|
 |
|
ຫວຽດນາມໃໝ່ພວມໂປໂລຂຶ້ນ(ຕອນປາຍ) (ສຽງ)
cri
Author: da
|
ຄຽງຄູ່ກັບການປ່ຽນແປງໃໝ່ໄດ້ຮັບຜົນອັນໃຫຍ່ຫຼວງຢ່າງບໍ່ຢຸດຢັ້ງ,ຊີວິດການເປັນຢູ່ ແລະທັດສະນະຄະຕິໃນການບໍລິໂພກຂອງຄົນຫວຽດນາມກໍປ່ຽນແປງໄປນຳ. ໃນລາຍການເຂົ້າສູ່ອາຊຽນມື້ນີ້,ເຊີນຟັງຕອນປາຍຂອງບົດແຈ້ງຂ່າວທີ່ພາດຫົວເລື່ອງວ່າ:ຫວຽດນາມໃໝ່ພວມໂປໂລຂຶ້ນ.
ຜົນການປ່ຽນແປງຂອງຫວຽດນາມເຫັນໄດ້ບາຍເຖິງ.ເວົ້າສະເພາະແຕ່ອາຫານເທິງໂຕະຂອງຄົນຫວຽດນາມ,ການປ່ຽນແປງໃໝ່ໃນຫຼາຍປີມານີ້ໄດ້ເຮັດໃຫ້ປະຊາຊົນມີເງິນຫຼາຍຂຶ້ນ,ສະນັ້ນ ອາຫານເທິງໂຕະຂອງພວກເຂົາເຈົ້າຈຶ່ງໄດ້ປ່ຽນຈາກ"ຜັກຫຼາຍກວ່າຊີ້ນ"ກາຍມາເປັນ"ຊີ້ນຫຼາຍກວ່າຜັກ"ແລ້ວ.ໂດຍສະເພາະແມ່ນ,ຄົນຫວຽດນາມນັບມື້ນັບຫຼາຍເລີ່ມເອົາໃຈໃສ່ນຳການກິນນ້ຳນົມແລະໝາກໄມ້ ເພື່ອຮັກສາໃຫ້ສຸຂະພາບເຂັ້ມແຂງ.ໃນດ້ານຍວດຍານພາຫະນະ,ລົດຖີບແລະລົດ 3 ລໍ້ກໍບໍ່ແມ່ນຍານພາຫະນະສຳຄັນຂອງຕົວເມືອງອີກ. ລົດຈັກນັບມື້ນັບມີຄົນໃຊ້ຫຼາຍຂຶ້ນ. ເມືອງໃຫຍ່ແລະເມືອງສ່ຳກາງຄື ນະຄອນຫຼວງຮ່າໂນ້ຍ ເມືອງໂຮຈິມິນ ແລະເມືອງຮາຍຟອງເປັນຕົ້ນໄດ້ກາຍເປັນໂລກລົດຈັກ. ນອກນີ້,ລັດຖະບານຫວຽດນາມກໍເອົາໃຈໃສ່ທີ່ສຸດນຳການພັດທະນາຄົມມະນາຄົມສາທາລະນະ,ລົດຕັກຊີກໍມີຫຼາຍຂຶ້ນໃນຕົວເມືອງ,ລົດ 3 ລໍ້ທີ່ແລ່ນເຕັມເມືອງໃນເມື່ອກ່ອນກໍຄ່ອຍໆຖອນອອກຈາກເວຖີປະຫວັດສາດ.
ໝາກຜົນທີ່ໄດ້ຮັບໃນການປ່ຽນແປງໃໝ່ແລະໄຂປະຕູໄດ້ເຮັດໃຫ້ພັກແລະປະຊາຊົນຫວຽດນາມມີຄວາມຕັດສິນໃຈແລະຄວາມໝັ້ນໃຈຢ່າງເຕັມປ່ຽມທີ່ຈະຍຶດໝັ້ນພາລະກິດປ່ຽນແປງໃໝ່ແລະໄຂປະຕູລົງສູ່ລວງເລິກ. ເພື່ອຊຸກຍູ້ການພັດທະນາເສດຖະກິດສັງຄົມຕື່ມອີກ,ລັດຖະບານຫວຽດນາມໄດ້ເພີ່ມທະວີການປ່ຽນແປງໃໝ່ຢ່າງບໍ່ຢຸດຢັ້ງ,ຕັ້ງໜ້າສັບຊ້ອນອົງປະກອບອຸດສາຫະກຳ,ເລັ່ງລັດການປະຕິຮູບຂອງລັດວິສາຫະກິດ ໂດຍສະເພາະແມ່ນຂະບວນວິວັດຂອງລະບອບຫຸ້ນສ່ວນຂອງລັດວິສາຫະກິດ; ເພີ່ມຄວາມແຮງໃນການດູດດຶງເອົາທຶນຕ່າງປະເທດ,ເຮັດໃຫ້ທຳນຽມການລົງທຶນງ່າຍເຂົ້າ,ຍົກປະສິດທິຜົນຂອງການລົງທຶນໃຫ້ສູງຂຶ້ນ; ຕັ້ງໜ້າແລະເປັນເຈົ້າການເຊື່ອມໂຍງເຂົ້າຂະບວນວິວັດຂອງລະບົບເສດຖະກິດສາກົນ,ຊຸກຍູ້ການຮ່ວມມືເສດຖະກິດການຄ້າກັບຕ່າງປະເທດ,ຊຸກຍູ້ການຄ້າຂາອອກແລະຫຼຸດຂຸມການເງິນໃຫ້ໜ້ອຍລົງ.
ຄົນຫວຽດນາມທີ່ຮັ່ງມີຂຶ້ນໃນການປ່ຽນແປງໃໝ່ໃນຫຼາຍປີມານີ້ ໄດ້ມີຄວາມຮຽກຮ້ອງຕ້ອງການສູງກວ່າເກົ່າໃນດ້ານຊີວິດການເປັນຢູ່. ທ່ານຫງວນເວີນລິວ ໄທເມືອງຫວຽດນາມເວົ້າດ້ວຍຄວາມຮູ້ສຶກເລິກເຊິ່ງວ່າ,ຄວາມທຸກຍາກໄດ້ຜ່ານພົ້ນໄປໂດນບໍ່ກັບຄືນມາອີກແລ້ວ,ຊີວິດໄດ້ເປີດໜ້າໃໝ່.ການກິນອາຫານດີໃຫ້ມີສຸຂະພາບແຂງແຮງແລະສະເຫວີຍຄວາມສຸກໃນຊີວິດໄດ້ກາຍເປັນທັດສະນະຄະຕິໃໝ່ຂອງຄົນໃນທ້ອງຖິ່ນນີ້. ໂຕະອາຫານຂອງຄົນທັງຫຼາຍໄດ້ກັບຄືນສູ່ສະພາບທີ່"ຜັກຫຼາຍກວ່າຊີ້ນ"ອີກ,ແຕ່ເທື່ອນີ້ພັດຕ່າງກັບແຕ່ກ່ອນໃນດ້ານທາດແທ້,ຄົນທັງຫຼາຍກິນຊີ້ນໜ້ອຍລົງ ແມ່ນເພື່ອບໍ່ໃຫ້ອ້ວນ,ເພື່ອໃຫ້ແຂງແຮງ. ປະຈຸບັນ,ຢູ່ຕາມສະໂມສອນຫັດກາຍ ຫໍກິລາແລະສະຖານທີ່ຫຼິ້ນກິລາກາງແຈ້ງຕ່າງໆ,ບໍ່ວ່າເຊົ້າຫຼືຄ່ຳມີຄົນໄປຫຼິ້ນກິລານັບມື້ນັບຫຼາຍ,ຫໍກິລາແລະສະໜາມກິລາສ່ວນຫຼາຍໄດ້ມີຄົນຈອງໄວ້ລ່ວງໜ້າໝົດແລ້ວ. ເຖິງວ່າລົດຈັກຍັງແມ່ນຍານພາຫະນະສຳຄັນ,ແຕ່ຄົນຫວຽດນາມຜູ້ຮັ່ງມີສ່ວນຫຼາຍ ໄປໃສມາໃສລ້ວນແຕ່ຂັບລົດເອງທັງນັ້ນ.ຕາມສະຖິຕິ,ປະຈຸບັນ,ໃນປະຊາກອນ 82 ລ້ານກວ່າຄົນໃນທົ່ວປະເທດຫວຽດນາມ, 14 ລ້ານຄົນມີໃບຂັບຂີ່,ໃນນັ້ນ ລົດຈັກ 13 ລ້ານຄັນ,ລົດຍົນ 9 ແສນ 2 ໝື່ນຄັນ.ແຕ່ຕົວເລກຕົວຈິງຍັງຫຼາຍກວ່ານີ້.
ລະດັບຊີວິດການເປັນຢູ່ຂອງຄົນຫວຽດນາມດີຂຶ້ນຍັງສ່ອງແສງໃຫ້ເຫັນໃນດ້ານເງື່ອນໄຂເຮືອນຢູ່ມີການປົວແປງໃຫ້ດີຂຶ້ນ.ແຕ່ກ່ອນ,ເຮືອນຂອງປະຊາຊົນໃນຕົວເມືອງແມ່ນຄັບແຄບຫຼາຍ, 3 ເຊັ່ນຄົນຢູ່ເຮືອນຫ້ອງດຽວແມ່ນເລື່ອງທຳມະດາທີ່ສຸດ.ໄທຊົນນະບົດ ສ່ວນຫຼາຍຢູ່ເຮືອນດິນມຸງຫຍ້າ. ດຽວນີ້,ຄົນໃນເມືອງພາກັນໄປຊື້ດິນປຸກເຮືອນໃນຊົນນະບົດ,ຈຶ່ງມີເຮືອນຕຶກສ່ວນຕົວທີ່ໃໝ່ອ່ຽມຕັ້ງລຽນຊ້າຍລ້າຍ,ຈໍ່ຕົວເປັນພາບວິວທີ່ສວຍງາມຢູ່ແຫ່ງນັ້ນ. ໄທຊົນນະບົດສ່ວນຫຼາຍກໍປຸກເຮືອນໃໝ່ແລ້ວ.ໂດຍສະເພາະແມ່ນ,ຊາວໜຸ່ມນັບມື້ນັບຫຼາຍພາກັນນິຍົມຊື້ເຮືອນສິນຄ້າເປັນຊຸດທີ່ກວ້າງໃຫຍ່ ອອກແບບເໝາະສົມ ແລະຄຸ້ມຄອງເປັນແບບສະບັບ. ສິ່ງທີ່ເຮັດໃຫ້ຄົນຫວຽດນາມດີໃຈຫຼາຍທີ່ສຸດນັ້ນແມ່ນ,ລັດຖະບານຫວຽດນາມໄດ້ສະເໜີວ່າຈະເລັ່ງລັດບາດກ້າວປຸກເຮືອນ,ເມື່ອຮອດປີ 2010,ຍາດແຍ່ງໃຫ້ບັນລຸເປົ້າໝາຍທີ່ເຮັດໃຫ້ເນື້ອທີ່ເຮືອນຢູ່ສະເລ່ຍຕໍ່ຫົວຄົນຈາກ 10 ແມັດກາເລໃນປະຈຸບັນເພີ່ມຂຶ້ນເຖິງ 15 ແມັດກາເລ.
ຫວ່າງມໍ່ໆນີ້,ລັດຖະບານຫວຽດນາມໄດ້ສະເໜີແຜນການພັດທະນາເສດຖະກິດສັງຄົມ 5 ປີຕໍ່ໄປ,ກ່າວເນັ້ນວ່າຕ້ອງສືບຕໍ່ຊຸກຍູ້ຂະບວນການປ່ຽນແປງໃໝ່,ພະຍາຍາມຍາດແຍ່ງໃຫ້ GDP ແຕ່ປີ 2006 ຫາປີ 2010 ເພີ່ມຂຶ້ນຮອດ 7,5% ຫາ 8% ສະເລ່ຍຕໍ່ປີ,ພະຍາຍາມຍາດແຍ່ງໃຫ້ເພີ່ມຂຶ້ນ 8%. GDP ສະເລ່ຍຕໍ່ຫົວຄົນເພີ່ມຂຶ້ນຮອດ 1050 ຫາ 1100 ໂດລາສະຫະລັດ. ຄົນທັງຫຼາຍເຊື່ອວ່າ,ຄຽງຄູ່ກັບການປ່ຽນແປງໃໝ່ແລະໄຂປະຕູລົງສູ່ລວງເລິກ,ອະນາຄົດຂອງປະຊາຊົນຫວຽດນາມຍິ່ງຈະ ສວຍງາມກວ່າເກົ່າ.
|
|
|
