|
ຕາມຂ່າວCRI,ວັນທີ1ທັນວາແມ່ນວັນໂຣກເອດສ໌ຂອງໂລກຄັ້ງທີ18,ຫົວຂໍ້ຂອງວັນໂຣກເອດສ໌ຂອງໂລກປີນີ້ແມ່ນ"ສະກັດກັ້ນໂຣກເອດສ໌,ປະຕິບັດຕາມຄຳໝັ້ນສັນຍາ".ແຫ່ງຕ່າງໆຂອງຈີນໄດ້ຈັດການເຄື່ອນໄຫວຫຼາຍຢ່າງຫຼາຍແນວ,ໂຄສະນາຄວາມຮູ້ກ່ຽວກັບການປ້ອງກັນແລະປົວໂຣກເອດສ໌.
ຢູ່ນະຄອນຫຼວງປັກກິ່ງ,ພາກສ່ວນທີ່ກ່ຽວຂ້ອງໄດ້ຈັດການເຄື່ອນໄຫວໂຄສະນາຢູ່ເຂດທີ່ມີປະຊາກອນເຄື່ອນທີ່ໂຮມສູນເຊັ່ນສະຖານີລົດເມທາງໄກເປັນຕົ້ນ.ແຂວງເຮີນານ ທີ່ຢູ່ພາກກາງແລະແຂວງຢຸນນານ ພາກຕາເວັນຕົກສຽງໃຕ້ຂອງຈີນເປັນເຂດທີ່ສະຖານະການປ້ອງກັນແລະປົວໂຣກເອດສ໌ຂ້ອນຂ້າງຂ້ຽວຂາດ ຂອງຈີນ.ວັນທີ1ທັນວາ,ພາກສ່ວນທີ່ກ່ຽວຂ້ອງຂອງແຂວງເຮີນານໄດ້ດຳເນີນການເຄື່ອນໄຫວໃຫ້ຄຳປຶກສາກ່ຽວກັບການປ້ອງກັນໂຣກເອດສ໌,ກວດກາດ້ວຍຄວາມສະໝັກໃຈ,ແຈກຢາຍຖົງຢາງອະນາໄມແລະເອກະສານໂຄສະນາເປັນຕົ້ນຢູ່ນະຄອນເຈີ້ງໂຈ່ວເທດສະບານແຂວງແລະແຫ່ງອື່ນໆ.ຢູ່ນະຄອນຄຸນມິງແຂວງຢຸນນານ,ການເຄື່ອນໄຫວທ່ຽວວາງສະແດງຮູບຖ່າຍກ່ຽວກັບການປ້ອງກັນແລະປົວໂຣກເອດສ໌ໄດ້ເລີ່ມຕົ້ນໃນວັນທີ1ທັນວາ.
ນອກນີ້,ໜັງສືພິມເຢິນມິນຢື້ປ້າວຂອງຝ່າຍທາງການຈີນສະບັບວັນທີ1ທັນວາ,ນອກຈາກໄດ້ລາຍງານຂ່າວຈຳນວນຫຼວງຫຼາຍກ່ຽວກັບການປ້ອງກັນແລະປົວໂຣກເອດສ໌ຂອງຈີນແລ້ວ,ຍັງໄດ້ລົງພິມໂຄສະນາກ່ຽວກັບການປ້ອງກັນແລະປົວໂຣກເອດສ໌ໃນໜ້າໜັງສືພິມສອງໜ້າເຕັມໆ,ປຸກລະດົມວົງການຕ່າງໆໃນສັງຄົມປະກອບສ່ວນໃຫ້ຫຼາຍກວ່າເກົ່າເຂົ້າໃນການປ້ອງກັນແລະປິ່ນປົວໂຣກເອດສ໌ແລະຊ່ອຍເຫຼືອຜູ່ເປັນໂຣກເອດສ໌.
|
