|
ທ່ານເວີ່ນເຈ່ຍປາວກ່າວວ່າ,ຈີນຍິນດີເພີ່ມທະວີການຮ່ວມມືກັບຟິລິບປິນແລະກຳປູເຈຍໃນຂົງເຂດພະລັງງານເປັນຕົ້ນ
cri
Author: zhangshuo
ຕາມຂ່າວCRI:ວັນທີ11ທັນວາ,ຢູ່ທີ່ກົວລາລຳເປີ ນະຄອນຫຼວງມາເລເຊຍ,ທ່ານເວີ່ນເຈ່ຍປາວ ນາຍົກລັດຖະມົນຕີຈີນທີ່ໄປຢ້ຽມຢາມມາເລເຊຍໄດ້ແຍກກັນພົບປະທ່ານນາງອາໂລໂຢ ປະທານາທິບໍດີຟິລິບປິນແລະທ່ານຮຸນແຊນ ນາຍົກລັດຖະມົນຕີກຳປູເຈຍທີ່ໄປເຂົ້າ ຮ່ວມກອງປະຊຸມສຸດຍອດຕ່າງໆຂອງອາຊຽນຢູ່ມາເລເຊຍ.
ໃນເວລາພົບປະທ່ານນາງອາໂລໂຢ,ທ່ານເວີ່ນເຈ່ຍປາວເວົ້າວ່າ,ຝ່າຍຈີນຍິນດີພ້ອມກັນກັບຝ່າຍຟິລິບປິນ,ຊຸກຍູ້ການພົວພັນຮ່ວມມືທີ່ມີໄມຕີຈິດລະຫວ່າງຈີນກັບຟິລິບປິນໃຫ້ກ້າວໄປໜ້າຢ່າງບໍ່ຢຸດຢັ້ງ,ແລະເພີ່ມທະວີການຮ່ວມມືໃນຂົງເຂດຕ່າງໆ ເຊັ່ນພະລັງງານ ການກໍ່ ສ້າງພື້ນຖານໂຄງລ່າງແລະກະສິກຳເປັນຕົ້ນ.ທ່ານນາງອາໂລໂຢກ່າວລື້ມວ່າ,ຟິລິບປິນຍຶດໝັ້ນປະຕິບັດນະໂຍບາຍປະເທດຈີນດຽວ.ເພິ່ນຍັງກ່າວວ່າ,ການພົວພັນລະຫວ່າງຟິລິບປິນກັບຈີນພວມຢູ່ໃນໄລຍະທອງຄຳ,ຫວັງໃຫ້ສອງຝ່າຍດຳເນີນການຮ່ວມມືໃນຂົງເຂດພະລັງງານ.
ໃນເວລາພົບປະທ່ານຮຸນແຊນ,ທ່ານເວີ່ນເຈ່ຍປາວເວົ້າວ່າ,ຝ່າຍຈີນຈະສືບຕໍ່ຊ່ອຍເຫຼືອກຳປູເຈຍອົບຮົມຜູ້ມີຄວາມຮູ້ຄວາມສາມາດວິຊາສະເພາະຊະນິດຕ່າງໆ,ຫວັງໃຫ້ສອງຝ່າຍເພີ່ມທະວີການຮ່ວມມືໃນດ້ານການເມືອງແລະເສດຖະກິດການຄ້າ,ແລະຊຸກຍູ້ການຮ່ວມກັນພັດທະນາໃນຂົງເຂດພະລັງງານ ບໍ່ແຮ່ແລະຊັບພະຍາກອນນ້ຳມັນອາຍແກັສເປັນຕົ້ນ.ທ່ານຮຸນແຊນກ່າວວ່າ,ຝ່າຍກຳປູເຈຍຕີລາຄາໃນລະດັບສູງຕໍ່ໂຄງການພື້ນຖານໂຄງລ່າງທີ່ບໍລິສັດຈີນຮັບເໝົາກໍ່ສ້າງຢູ່ກຳປູເຈຍ,ຫວັງໃຫ້ສອງຝ່າຍເພີ່ມທະວີການຮ່ວມມືໃນດ້ານການກໍ່ສ້າງພື້ນຖານໂຄງລ່າງແລະການລົງທຶນ.
|
|
