|
ທ່ານຜູ້ຟັງທີ່ໂຄລົບ,ຫມາກນ້ຳເຕົ້າແມ່ນພືດຈຳພວກຜັກຊະນິດຫນຶ່ງທີ່ມັກເຫັນຢູ່ຈີນ,ຫມາກນ້ຳເຕົ້າທີ່ແກ່ດີແລ້ວສາມາດແປຮູບເປັນເຄື່ອງສິນລະປະຊະນິດຕ່າງໆ.ຢູ່ເມືອງລານໂຈ່ວຂອງພາກຕາເວັນຕົກສຽງເຫນືອຂອງຈີນ,ການຄວັດຫມາກນ້ຳເຕົ້າແມ່ນຫັດຖະກຳພື້ນເມືອງທີ່ມີຊື່ສຽງຢູ່ແຫ່ງນັ້ນ,"ແມວຫມາກນ້ຳເຕົ້າ"ທີ່ພໍ່ເຖົ້າໂຈ່ວອີ້ເຊິ່ງນັ້ນຄວັດຍິ່ງແມ່ນຕົວເດັ່ນກວ່າຫມູ່ໃນນັ້ນ.ໃນລາຍການວັດທະນະທຳຈີນມື້ນີ້,ຂ້າພະເຈົ້າຈະສະເຫນີພໍ່ເຖົ້າທີ່ຄວັດແມວໃສ່ຫມາກນ້ຳເຕົ້າຜູ້ນີ້ສູ່ທ່ານຟັງ.
ພໍ່ເຖົ້າໂຈ່ວອີ້ເຊິ່ງເວົ້າວ່າເພິ່ນເອງໄດ້ຄວັດຫມາກນ້ຳເຕົ້າ60ປີແລ້ວ.ຊຸມປີ40ຂອງສະຕະວັດແລ້ວນີ້,ທ່ານໂຈ່ວອີ້ເຊິ່ງທີ່ອາຍຸ17ປີໄດ້ເປັນເຖົ້າແກ່ຫນຸ່ມຂອງຮ້ານຄ້າເຄື່ອງໄມ້ແຕ້ມສີ,ເພີ່ນປະກົດເຫັນລູກຈ້າງຂອງຮ້ານຄ້າຄວັດຮູບໃສ່ຫມາກນ້ຳເຕົ້າ,ເພີ່ນກໍ່ເລີຍຮຽນນຳພວກເພີ່ນ.ເມື່ອໄດ້ຄວັດມາສອງປີ,ລູກຈ້າງທັງຫລາຍຮູ້ສຶກວ່າທ່ານໂຈ່ວອີ້ເຊິ່ງຄວັດໄດ້ດີກວ່າພວກຕົນ ຫລາຍ,ເລີຍແນະນຳທ່ານໃຫ້ອາຈານຂອງຕົນຄືທ່ານຫລີເວິນເຈ່ຍ ອາຈານໃຫຍ່ຄວັດຫມາກນ້ຳເຕົ້າຮຸ່ນທຳອິດຂອງເມືອງລານໂຈ່ວ.ສະນັ້ນ,ທ່ານໂຈ່ວອີ້ເຊິ່ງກໍ່ໄດ້ກາຍເປັນລູກສິດຂອງນັກຄວັດຫມາກນ້ຳເຕົ້າທີ່ມີຊື່ສຽງ.
ເມື່ອຮຽນນຳທ່ານຫລີເວິນຈ່າຍມາຫລາຍປີແລ້ວ,ສີມືຄວັດແກະຂອງທ່ານໂຈ່ວອີ້ເຊິ່ງໄດ້ຍົກສູງຂຶ້ນຢ່າງຫລວງຫລາຍ.ຫມາກນ້ຳເຕົ້າທີ່ທ່ານຫລີເວິນຈ່າຍຄວັດນັ້ນຖືຕົວຫນັງສືເປັນຕົ້ນຕໍ,ຖືຮູບແຕ້ມເປັນສຳຮອງ.ແຕ່ຫມາກນ້ຳເຕົ້າຂອງທ່ານໂຈ່ວອີ້ເຊິ່ງພັດຖືຮູບແຕ້ມເປັນຕົ້ນຕໍ,ຖືຕົວຫນັງສືເປັນສຳຮອງ.ໃນເວລາຫາກໍ່ເລີ່ມຄວັດຫມາກນ້ຳເຕົ້າ,ທ່ານໂຈ່ວອີ້ເຊິ່ງສວ່ນຫລາຍແມ່ນຄວັດຮູບນາງງາມຂອງສະໄຫມບູຮານຈີນ,ຮູບນາງງາມເຫລົ່ານີ້ມີເສັ້ນວາດລ່ຽນໄຫລ,ມີອິລິຍະບັດຕ່າງກັນ,ມີສະເຫນຫລາຍສົມຄວນ.
ພາຍຫລັງມາ,ອາຈານຂອງທ່ານໂຈ່ວອີເຊິ່ງໄດ້ເຖິງແກ່ກຳ,ທ່ານໂຈ່ວອີເຊິ່ງໄດ້ຕົກຢູ່ໃນຄວາມໂສກເສົ້າສະຫລົດໃຈ.ຈົນຮອດມື້ຫນຶ່ງ,ທ່ານໂຈ່ວອີ້ເຊິ່ງເຫັນແມວທີ່ທ່ານລ້ຽງໃນບ້ານຂົດຕົວຢູ່ເທິງເກົ້າອີ້ຫນ່ວຍຫນຶ່ງ,ຮູບຊົງທີ່ບໍ່ຫ້າວຫັນຈັ່ງແມ່ນຫນ້າຮັກທີ່ສຸດ,ທ່ານເລີຍເອົາເຈັ້ຍແລະປາກກາມາ,ແຕ້ມທ່າທາງຂອງແມວໄວ້,ແລະຄວັດຮູບແມວແຜ່ນນີ້ໃສ່ຫມາກນ້ຳເຕົ້າ.ທ່ານໂຈ່ວອີ້ເຊິ່ງແຮ່ງຕໍ່ຄວັດຮູບແມວແຮ່ງຕິດ,ເພິ່ນເກືອບບໍ່ໄດ້ກ່ຽວພັນເຖິງເນື້ອໃນຂໍ້ຄວາມອື່ນໆອີກ,ການຄວັດແມວໄດ້ກາຍເປັນສິ່ງທີ່ທ່ານມັກທີ່ສຸດ.ທ່ານໂຈ່ວອີ້ເຊິ່ງເວົ້າວ່າ,ແມວຄວັດຍາກ,ຍ້ອນວ່າແມວແມ່ນສັດທີ່ພວກເຮົາທຸກຄົນລ້ວນແຕ່ຄຸ້ນເຄີຍ,ໃຜໆກໍ່ຄຸ້ນເຄີຍນຳທ່າທາງຂອງມັນ,ສະນັ້ນ,ຖ້າຢາກຄວັດຮູບແມວໃຫ້ດີກໍ່ຕ້ອງສັງເກດໃຫ້ຫລາຍ.ທ່ານເວົ້າວ່າ:
"ພໍ່ຂອງຂ້າພະເຈົ້າມັກລ້ຽງແມວ,ຂ້າພະເຈົ້າກໍມັກຄືກັນ.ພາຍຫລັງຂ້າພະເຈົ້າຮຽນຄວັດແມວແລ້ວ,ຄວາມສະມາດສັງເກດກໍ່ໄດ້ເພີ່ມຂຶ້ນ.ຂ້າພະເຈົ້າເລີຍສັງເກດທ່າທາງຂອງແມວໂດຍຈຳເພາະ.ລາງເທື່ອຈັບຈີໂກະຈາກໄຮ່ນາ,ລາງເທື່ອຈັບຫນູຕົວຫນຶ່ງ,ແມວກໍ່ລໍ້ຫລິ້ນຫນູຕົວນີ້,ຂ້າພະເຈົ້າກໍ່ຖ່າຍເອົາທ່າທາງຂອງແມວໄວ້.ພາຍຫລັງສັງເກດອິລິຍະບົດຂອງແມວແລ້ວ,ຂ້າພະເຈົ້າຄວັດແມວກໍ່ມີຊີວິດຊີວາຂຶ້ນ."
"ແມວຫມາກນ້ຳເຕົ້າ"ທີ່ທ່ານໂຈ່ວອີ້ເຊິ່ງຄວັດນັ້ນມີຊື່ສຽງຫລາຍ,ຫມາກນ້ຳເຕົ້າເຫລົ່ານີ້ໃຫຍ່ຄືຫມາກຈອງຫນ່ວຍຫນຶ່ງ,ນ້ອຍທໍ່ໄຂ່ໄກ່,ແມວຢູ່ເທິງຫມາກນ້ຳເຕົ້າແຕ່ລະຫນ່ວຍລ້ວນແຕ່ມີຊີວິດຊີວາເປັນໂຕຢົ້ງໆ,ມີກິລິຍາທ່າທາງຂອງຄືແທ້,ບາງໂຕພວມຈັບແມງກະເບື້ອ,ບາງໂຕພວມຢອກໃຍຫນູນ້ອຍທີ່ຈັບໄດ້, ບາງໂຕພວມນອນເວັນຢູ່ກ້ອງດອກໄມ້,ຍັງມີບາງໂຕພວມວົນວຽນໄລ່ຕາມຫາງຂອງຕົນ.
ຕໍ່ຜົນງານທຸກເທື່ອຂອງຕົນ,ທ່ານໂຈ່ວອີເຊິ່ງແມ່ນຊຳນານແລ້ວຊຳນານອີກ,ຫມາກນ້ຳເຕົ້າທຸກຫນ່ວຍ,ແຕ່ການຄັດເລືອກຮອດການປະກອບພາບ,ທ່ານລ້ວນແຕ່ໄດ້ປັ່ນສະຫມອງຄິດຈົນສຸດຂີດ,ທ່ານໂຈ່ວອີ້ເຊິ່ງເວົ້າວ່າ,ການຄັດເລືອກຫມາກນ້ຳເຕົ້າແມ່ນສຳຄັນທີ່ສຸດ,ເພາະວ່າ,ມີແຕ່ຫມາກນ້ຳເຕົ້າດີເທົ່ານັ້ນຈິ່ງຄວັດເປັນຜົນງານດີໄດ້,ທ່ານໂຈວອີ້ເຊິ່ງເວົ້າວ່າ:
"ຕ້ອງເລືອກເອົາຫມາກນ້ຳເຕົ້າ,ທີ່ມີເປືອກລະອຽດອ່ອນ,ມີຮູບຊົງດີ,ບໍ່ມີດ່າງດຳແລະບໍ່ມີລິງລາຍ.ຂູດເປືອກງກ່ອນ,ແລ້ວທານ້ຳມັນ,ແລ້ວຂັດດ້ວຍຫິນໃຫ້ມີເງົາແວວວາວ,ຍັງຕ້ອງເອົາມາ,ຂັດໃນມື,ຖູດ້ວຍເຫື່ອຢູ່ເທິງຈອມດັງ,ຖູແລ້ວຈຶ່ງຄວັດແກະ."
ຜ່ານຈາກກຳມະວິທີອັນສັບສົນເຫລົ່ານີ້,ຫມາກນ້ຳເຕົ້າກໍກ້ຽງມື່ນທີ່ສຸດແລ້ວ,ຮູບຊົງຂອງຫມາກນ້ຳເຕົ້າແຕ່ລະຫນ່ວຍ.ທ່ານໂຈວອີ້ເຊິ່ງກໍ່ໄດ້ຈື່ໄວ້ຢູ່ໃນໃຈ,ໃນເວລານີ້,ທ່ານໂຈ່ວອີ້ເຊິ່ງຈຶ່ງເລີ່ມປະກອບພາບ,ແລ້ວລົງມີດຄວັດແກະ.ຫມາກນ້ຳເຕົ້າທີ່ພໍ່ເຖົ້າໂຈ່ວອີ້ເຊິ່ງຄວັດນັ້ນ,ສີມືຄວັດກະທັດຮັດງ່າຍດາຍ,ເສັ້ນຄວັດລ່ຽນໄຫລ,ມີອິລິຍະບົດຊີວິດຊີວາ.ປະຈຸບັນ,"ແມວຫມາກນ້ຳເຕົ້າ"ຂອງທ່ານໂຈ່ວອີ້ເຊິ່ງຂາຍດິບຂາຍດີທີ່ສຸດ,ຕ້ອງຈອງໄວ້ກ່ອນຈຶ່ງຊື້ໄວ້,ຍັງມີຈຳນວນຫລວງຫລາຍໄປຂາຍຮອດຍີ່ປຸ່ນແລະປະເທດເອີລົບ,ໄດ້ຮັບຄວາມຊົມເຊີຍທີ່ສຸດ.
ການຄວັດແມວໃສ່ຫມາກນ້ຳເຕົ້າເຮັດໃຫ້ພໍ່ເຖົ້າໂຈ່ວອີ້ເຊິ່ງໄດ້ຝຶກຝົນຫລໍ່ຫລອມນິໃສໃຈຄໍຂອງຕົນ,ຮັກສາຈິດໃຈອັນມ່ວນຊື່ນແລະມິດງຽບ,ເຖິງແມ່ນວ່າມີອາຍຸ80ປີແລ້ວ,ແຕ່ຮ່າງກາຍຍັງແຂງແຮງຢູ່,ຫູບໍ່ຫນວກ,ຕາບໍ່ລາຍ,ຍຶດຫມັ້ນຄວັດຫມາກນ້ຳເຕົ້າທຸກມື້.ແຕ່ພໍ່ເຖົ້າກໍ່ມີຄວາມເສຍໃຈຂໍ້ຫນຶ່ງ,ເຊິ່ງກໍ່ຄືນັບມາຮອດປະຈຸບັນເພິ່ນຍັງຊອກຫາລູກສິດທີ່ຖືກໃຈບໍ່ໄດ້ເທື່ອ.ຍ້ອນສາເຫດຕ່າງໆ,ຊາວຫນຸ່ມໃນຊູ່ມື້ນີ້ມີຫນ້ອຍຄົນສາມາດນັ່ງ,ຄວັດຫມາກນ້ຳເຕົ້າຢ່າງອົດທົນຄືທ່ານ.ທ່ານຫວັງໃຫ້ລັດຖະບານໂຄສະນາໃຫ້ຫລາຍ,ເຮັດໃຫ້ຊາວຫນຸ່ມເອົາໃຈໃສ່ແລະມັກຫັດຖະກຳພື້ນເມືອງລາຍນີ້, ຮຽນຝີມືນີ້ແລະມີມານະຈິດຍຶດຫມັ້ນຕໍ່ໄປ.ເຮັອແນວນີ້ທ່ານຈຶ່ງສາມາດຊອກພົບຜູ້ທີ່ຖືກໃຈ,ແລະຖ່າຍທອດຝີມືຂອງຕົນໃຫ້.
|
