|
|
 |
| (GMT+08:00)
2005-12-14 19:38:31
|
 |
|
ເອົາຊະນະດ້ວຍແຜນພິເສດຕ່າງໝູ່
cri
|
ໃນສະໄໝຍຸດທະຈັກທີ່ຫ່າງຈາກປັດຈຸບັນ 2000 ກວ່າປີ, ຢູ່ເມືອງລິນຈື່ແຫ່ງລັດສີ(ປັດຈຸບັນຂຶ້ນກັບແຂວງຊານຕົ່ງ) ມີຂ້າລາຊະການນ້ອຍຜູ່ໜຶ່ງຊື່ວ່າຖຽນຕ່ານ,ເພິ່ນມີສະຕິປັນຍາສຽບແຫຼມ ຊຳນານຕຳລາພິໄຊສົງຄາມ.
ມີປີໜຶ່ງ, ເຢ້ອີ້ ແມ່ທັບລັດອ້ຽນນຳພາກອງທັບມາບຸກໂຈມຕີລັດສີ, ກອງທັບລັດສີເສຍໄຊຢ່າງສາຫັດ, ສິໝິນຫວັງ ເຈົ້າຊີວິດລັດສີໄດ້ໂຕນໜີໄປຮອດຈີຈື້(ປັດຈຸບັນຢູ່ແຂວງຊານຕົ່ງ). ໃນເວລານັ້ນ, ຖຽນຕ່ານໄດ້ພາວົງຕະກູນໜີໄປສູ່ເມືອງອານຜິງ, ເພິ່ນໄດ້ຕັດໄມ້ເພົາຂອງລົດມ້າໄປທ່ອນໜຶ່ງ, ແລ້ວເອົາແຜ່ນເຫຼັກມາຫຸ້ມຫົວເພົາ. ຕໍ່ມາບໍ່ດົນ, ເມືອງອານຜິງຖືກກອງທະຫານລັດອ້ຽນຕີແຕກ, ມວນຊົນໃນເມືອງທະຍອຍກັນໜີອອກນອກເມືອງ. ມີລົດມ້າຫຼາຍຄັນຕຳກັນຈົນເພົາຫັກ, ໃນທີ່ສຸດກໍ່ຖືກທະຫານລັດອ້ຽນຂ້າຕາຍ. ລົດຂອງຖຽນຕ່ານ ຍ້ອນໄດ້ຫຸ້ມດ້ວຍແຜ່ນເຫຼັກໄວ້ກ່ອນ, ເພົາລົດຈຶ່ງຍັງດີຢູ່ຄືເກົ່າ, ຖຽນຕ່ານໄດ້ໜີໄປຮອດເມືອງຈີມໍ້ຢ່າງປອດໄພ. ຄົນທັງຫຼາຍເຫັນວ່າຖຽນຕ່ານມີສະຕິປັນຍາ, ຈຶ່ງສະເໜີໃຫ້ເພິ່ນເປັນນາຍພົນນຳພາກອງທະຫານເຝົ້າຮັກສາເມືອງຈີມໍ້.
ຕໍ່ມາບໍ່ດົນ, ອ້ຽນຈ່າວຫວັງ ເຈົ້າຊີວິດລັດອ້ຽນສະເດັດສະຫວັນລະຄົດ, ຮຸ້ຍຫວັງຂຶ້ນຄອງລາຊະບັນລັງແທນ. ຮຸ້ຍຫວັງບໍ່ມັກເຢ້ອີ້. ຖຽນຕ່ານເລີຍສວຍໂອກາດໃຊ້ກົນອຸບາຍແບ່ງແຍກຮຸ້ຍຫວັງແລະເຢ້ອີ້. ເພິ່ນແຕ່ງຄົນໄປຫວ່ານຂ່າວລືຢູ່ລັດອ້ຽນ, ກ່າວວ່າເຢ້ອີ້ຢາກຍອມຈຳນົນຕໍ່ລັດສີ, ສະນັ້ນຈຶ່ງບໍ່ບຸກໂຈມຕີເມືອງຈີມໍ້ ແລະຄອຍຖ້າໂອກາດຢູ່. ເຈົ້າຊີວິດລັດອ້ຽນຫຼົງເຊື່ອ,ເລີຍປົດຕຳແໜ່ງຂອງເຢ້ອີ້, ແລະໃຫ້ສິເຈເຂົ້າແທນເຢ້ອີ້. ເຢ້ອີ້ຖືກປົດອອກຈາກຕຳແໜ່ງ ເຮັດໃຫ້ນ້ຳໃຈສູ້ລົບຂອງກອງທະຫານລັດອ້ຽນຕົກຕ່ຳ. ຕໍ່ມາ, ຖຽນຕ່ານໄດ້ໃຊ້ກົນອຸບາຍຢ່າງຕໍ່ເນື່ອງກັນ, ຫຼອກໃຫ້ກອງທະຫານລັດອ້ຽນເຮັດເລື່ອງໂງ່ຈ້າຫຼາຍເທື່ອ, ເພື່ອປຸກລະດົມນ້ຳໃຈສູ້ລົບຂອງທະຫານລັດສີ. ຖຽນຕ່ານໄດ້ເຫັນກອງທັບລັດສີມີນ້ຳໃຈສູ້ລົບສູງຂຶ້ນ, ກໍ່ເລີຍກຽມຕ່າວໂຈມຕີຄືນ. ກ່ອນອື່ນ,ເພິ່ນໃຫ້ຄົນຖືເງິນຄຳໄປສົ່ງໃຫ້ນາຍພົນຂອງກອງທະຫານລັດອ້ຽນຢ່າງລັບໆ,ແລະຫຼອກລວງພວກເຂົາເຈົ້າວ່າ: "ກອງທະຫານເຝົ້າຮັກສາເມືອງຈີມໍ້ຈະຍອມຈຳນົນໃນໄວໆນີ້, ເມື່ອພວກທ່ານເຂົ້າໄປໃນເມືອງແລ້ວຢ່າຂ້າເມຍແລະລູກເຕົ້າຂອງພວກຂ້າພະເຈົ້າ." ທະຫານລັດອ້ຽນຖືເປັນເລື່ອງຈິງ, ຈຶ່ງຂາດສະຕິລະວັງຕົວ. ຖັດມາ, ຖຽນຕ່ານໄດ້ເຕົ້າໂຮມງົວ 1000 ໂຕໃນເມືອງ, ຕຸ້ມຜ້າທີ່ແຕ້ມລາຍມັງກອນ 5 ສີໃສ່ຫຼັງງົວ, ມັດມີດໃສ່ເຂົາງົວ, ມັດຫຍ້າທີ່ຫົດດ້ວຍນ້ຳມັນໃສ່ຫາງ. ລັກເຈາະໂກນບົນກຳແພງ 10 ກວ່າແຫ່ງ, ຮອດກາງຄືນ ໄຕ້ໄຟໃສ່ຫາງງົວ ແລະປ່ອຍງົວອອກຈາກໂກນ. ມີທະຫານລົບເກັ່ງ 5000 ຄົນແລ່ນຕາມຫຼັງງົວ, ບຸກເຂົ້າຄ້າຍທະຫານລັດອ້ຽນ. ຍ້ອນໄຟໄໝ້ຫາງ, ງົວຈຶ່ງແລ່ນໄປໜ້າຢ່າງເອົາເປັນເອົາຕາຍ, ແປວໄຟໄດ້ສ່ອງໃຫ້ເຫັນລາຍມັງກອນບົນຫຼັງງົວ, ເຮັດໃຫ້ທະຫານລັດອ້ຽນຕື່ນຕົກໃຈແລະໂຕນໜີ, ທະຫານລັດອ້ຽນຖືກງົວຕຳຫຼືຢຽບຕາຍຈົນນັບບໍ່ຖ້ວນ. ຖຽນຕ່ານລັ່ນກອງສູ້ລົບຢູ່ເທິງກຳແພງເມືອງ, ກອງທະຫານລັດສີບຸກໄປໜ້າຢ່າງກ້າຫານ, ສຽງຮ້ອງໂຮດັງກ້ອງສະໜັ່ນ, ທະຫານລັດສີໄດ້ຂ້າສິເຈ ນາຍພົນຂອງລັດອ້ຽນຕາຍ, ກອງທະຫານລັດອ້ຽນປະສົບຄວາມປະລາໄຊຢ່າງຍ່ອຍຍັບ. ຖຽນຕ່ານນຳພາກອງທະຫານໄລ່ຕາມ, ແລະກູ້ເອົາເມືອງ 70 ກວ່າແຫ່ງທີ່ຖືກກອງທະຫານລັດອ້ຽນຍຶດຄອງນັ້ນຄືນມາໄດ້. ຖັດມາ, ຖຽນຕ່ານສະໜັບສະໜູນຊຽງຫວັງເປັນເຈົ້າຊີວິດລັດສີ, ກັບຄືນເມືອລາຊະທານີລິນຈື່.ສີຊຽງຫວັງ ເຈົ້າຊີວິດລັດສີຊົງພະລາຊະທານຖຽນຕ່ານເປັນເຈົ້າຄອງແຜ່ນດິນອານຜິງ.
|
|
|
