|
ເຈົ້າໜ້າທີ່ກະຊວງກະສິກຳຈີນປະຕິເສດບໍ່ຮັບຮອງວ່າໄດ້ປິດບັງສະພາບໄຂ້ຫວັດສັດປີກ
cri
Author: cai
ຕາມຂ່າວສານຊີນຮວາ:ວັນທີ 15 ທັນວາ,ຢູ່ປັກກິ່ງ,ເຈົ້າໜ້າທີ່ທີ່ກ່ຽວຂ້ອງຂອງກະຊວງກະສິກຳຈີນໄດ້ກ່າວຕີໂຕ້ຖ້ອຍຄວາມກ່ຽວກັບແຜ່ນດິນໃຫຍ່ຈີນປິດບັງສະພາບໄຂ້ຫວັດສັດປີກແລະພະຍາດດັ່ງກ່າວໄດ້ຢູ່ນອກການຄວບຄຸມຢູ່ຈີນ,ແລະກ່າວວ່າ,ສະພາບພະຍາດສັດຂອງຈີນແມ່ນເປີດເຜີຍແລະໂປ່ງໃສ,ບໍ່ມີບັນຫາປິດບັງ.
ຫວ່າງມໍ່ໆນີ້,ໃນເວລາທ່ານກວນອີ້ຂອງມະຫາວິທະຍາໄລຮົງກົງໃຫ້ສຳພາດຕໍ່ສື່ມວນຊົນການາດາ,ທ່ານເວົ້າວ່າ,"ໄຂ້ຫວັດສັດປີກຢູ່ຈີນໄດ້ຢູ່ນອກການຄວບຄຸມແລ້ວ."ຕໍ່ເລື່ອງນີ້,ໃນເວລາເຈົ້າໜ້າທີ່ທີ່ກ່ຽວຂ້ອງຂອງກະຊວງກະສິກຳຈີນໃຫ້ສຳພາດຕໍ່ນັກຂ່າວ,ເພິ່ນເວົ້າວ່າ,ໃນຂະບວນການປ້ອງກັນແລະຄວບຄຸມໄຂ້ຫວັດສັດປີກ,ຈີນໄດ້ສ້າງຕັ້ງລະບອບປະກາດສະພາບພະຍາດສັດທີ່ເປີດເຜີຍແລະໂປ່ງໃສ.ກະຊວງກະສິກຳຈີນໄດ້ປະກາດສະພາບໄຂ້ຫວັດສັດປີກທຸກລາຍຢ່າງທັນການແລະແມ່ນຢຳ,ແລະໄດ້ແຈ້ງສະພາບທີ່ກ່ຽວຂ້ອງໃຫ້ອົງການຈັດຕັ້ງສາກົນ ປະເທດແລະເຂດແຄວ້ນທີ່ກ່ຽວຂ້ອງຊາບ.ເຈົ້າໜ້າທີ່ອົງການຈັດຕັ້ງສາກົນເຊິ່ງລວມທັງອົງການອານາໄມໂລກກໍ່ໄດ້ກ່າວຕັ້ງຫຼາຍເທື່ອວ່າ,ໃນບັນຫາປ້ອງກັນຄວບຄຸມສະພາບພະຍາດສັດອັນສຳຄັນຄືໄຂ້ຫວັດສັດປີກເປັນຕົ້ນ,ລັດຖະບານຈີນບໍ່ໄດ້ເລື່ອນເວລາປະກາດສະພາບພະຍາດ.
|
|
