|
ໃນລາຍການພາກກ່ອນ, ພວກເຮົາໄດ້ຕອບຄຳຖາມໃນຈົດໝາຍຂອງທ້າວວັນນະຈິດ ກິດຕິຄຸນທີ່ຢູ່ແຂວງໄຊຍະບູລີກ່ຽວກັບສະພາບປະຊາກອນຈີນໃນປະຈຸບັນ ສະພາບລາຍໄດ້ສະເລ່ຍຕາມຫົວຄົນຕໍ່ປີຂອງຈີນແລະວິທີແບ່ງເຂດບໍລິຫານຂອງຈີນຢ່າງລະອຽດແລ້ວ,ພວກເຮົາຫວັງວ່າຜ່ານຈາກຄຳຕອບຂອງພວກເຮົາ,ຄົງສາມາດຊ່ອຍທ້າວວັນນະຈິດແລະທ່ານຜູ້ຟັງທຸກໆທ່ານເຂົ້າໃຈຈີນຢ່າງລະອຽດແລະຕິດແທດຕົວຈິງກວ່າເກົ່າ.ໃນລາຍການພາກນີ້,ພວກເຮົາຈະຕອບຄຳຖາມຂໍ້ສຸດທ້າຍໃນຈົດໝາຍຂອງທ້າວວັນນະຈິດ,ຄື:ນັກສຶກສາລາວມາສຶກສາຮ່ຳຮຽນຢູ່ຈີນມີຫຼາຍເທົ່າໃດ?
ໃນສະເພາະໜ້ານີ້,ຍອດຈຳນວນນັກສຶກສາລາວທີ່ລັດຖະບານລາວສົ່ງມາສຶກສາຮ່ຳຮຽນຢູ່ຈີນບໍ່ລື່ນກາຍ 230 ຄົນ,ໃນນັ້ນ,ລວມທັງພະນັກງານຂອງລັດແລະນັກສຶກສາທຳມະດາຂອງລາວ.ນອກນີ້,ໃນແຕ່ລະປີ,ຍັງມີນັກສຶກສາອີກຈຳນວນໜຶ່ງມາຮຽນຢູ່ຈີນດ້ວຍທຶນຮຽນສ່ວນຕົວ,ຍ້ອນວ່າສະຖິຕິຂ້ອນຂ້າງຍາກ,ສະນັ້ນ,ບໍ່ໄດ້ຈັດເຂົ້າໃນຕົວເລກດັ່ງກ່າວ.ສຳລັບນັກສຶກສາລາວທີ່ລັດຖະບານລາວສົ່ງມາຮຽນຢູ່ຈີນນັ້ນ,ລ້ວນແຕ່ແມ່ນສຳເລັດຫຼັກສູດການສຶກສາຢູ່ຈີນພາຍໃນຂອບໂຄງການແລກປ່ຽນທຶນສຶກສາລະຫວ່າງລັດຖະບານຈີນກັບລັດຖະບານຕ່າງປະເທດ,ຕາມສັນຍາສົ່ງນັກສຶກສາເຊິ່ງກັນແລະກັນລະຫວ່າງຈີນລາວ,ຜ່ານຈາກການເລືອກເຟັ້ນຂອງລັດຖະບານລາວ,ແລະລັດຖະບານຈີນໃຫ້ທຶນສຶກສາ.ພາຍຫຼັງນັກສຶກສາລາວເຫຼົ່ານີ້ໄດ້ຮຽນຈົບກັບຄືນປະເທດແລ້ວ,ສືບຕໍ່ຮັບໃຊ້ການສ້າງສາປະເທດຊາດຂອງຕົນ.ເມື່ອມີນັກສຶກສາລາວຮຽນຈົບກັບຄືນປະເທດລາວໃນທຸກປີ,ລັດຖະບານລາວກໍຈະສົ່ງນັກສຶກສາຜູ້ໃໝ່ມາສຶກສາໂລດ,ເພື່ອເຮັດໃຫ້ຍອດຈຳນວນນັກສຶກສາມີ 230 ຄົນ.ນັກສຶກສາລາວເຫຼົ່ານີ້ສ່ວນຫຼາຍແມ່ນຮ່ຳຮຽນຢູ່ມະຫາວິທະຍາໄລທີ່ມີຊື່ສຽງຂອງແຂວງແລະນະຄອນຕ່າງໆຂອງຈີນ,ໄດ້ກວມເຖິງທຸກວິຊາ,ເມື່ອໄດ້ກັບຄືນປະເທດແລ້ວ,ລ້ວນແຕ່ໄດ້ກາຍເປັນຜູ້ເກັ່ງກ້າສາມາດໃນໜ້າທີ່ວຽກງານຂອງຕົນ.
ແຕ່ປີ 1989 ເປັນຕົ້ນມາ,ຈີນກັບລາວໄດ້ເຊັນສັນຍາຮ່ວມມືວັດທະນະທຳການຂ່າວແລະບົດບັນທຶກຊ່ອຍຈຳການຮ່ວມມືດ້ານການສຶກສາ ສາທາລະນະສຸກແລະວິທະຍຸ ໂທລະພາບແລະຮູບເງົາຢ່າງເປັນລຳດັບ.ລັດຖະມົນຕີແລະຮອງລັດຖະມົນຕີທີ່ຮັບຜິດຊອບການສຶກສາ ສາທາລະນະສຸກ ກິລາ ວັດທະນະທຳ ວິທະຍຸໂທລະພາບແລະຮູບເງົາຂອງສອງປະເທດກໍໄດ້ຢ້ຽມຢາມເຊິ່ງກັນແລະກັນ,ຄະນະສິລະປະ ນັກປະພັນແລະນັກຂ່າວຂອງສອງປະເທດກໍໄດ້ແລກປ່ຽນກັນເລື້ອຍໆ.ປີ 1990,ຈີນລາວໄດ້ເລີ່ມສົ່ງນັກສຶກສາແລະພະນັກງານໄປຍົກລະດັບ ສຶກສາຮ່ຳຮຽນຢູ່ປະເທດກົງກັນຂ້າມ.ນັກສຶກສາລາວມາຮຽນຢູ່ຈີນໄດ້ເພີ່ມຂຶ້ນຈາກ 30 ຄົນໃນປີ 1991 ຮອດ 230 ຄົນໃນປີ 2005.ຝ່າຍຈີນກໍໄດ້ແຕ່ງນັກສຶກສາແລະພະນັກງານຫຼາຍຄົນໄປຍົກລະດັບສຶກສາຮ່ຳຮຽນຢູ່ລາວ.
ນັບມາຮອດລາຍການພາກນີ້,ພວກເຮົາໄດ້ຕອບຄຳຖາມໃນຈົດໝາຍຂອງທ້າວວັນນະຈິດຈົນໝົດແລ້ວ,ພວກເຮົາກໍ່ຫວັງໃຫ້ເພື່ອນມິດຜູ້ຟັງຜູ້ອື່ນໆຝາກຈົດໝາຍມາຍັງພວກເຮົາຢ່າງຕັ້ງໜ້າ,ຖາມບັນຫາກ່ຽວກັບຈີນທີ່ຕົນສົນໃຈນຳ,ພ້ອມກັນນີ້,ກໍຊົມເຊີຍທ່ານຕັ້ງໜ້າເຂົ້າຮ່ວມການເສັງຄວາມຮູ້ກ່ຽວກັບໄຕ້ຫວັນ——ເກາະປະເສີດຂອງຈີນທີ່ວິທະຍຸພວກເຮົາຈັດຂຶ້ນ,ແລະຫວັງໃຫ້ທ່ານຝາກຈົດໝາຍມາໃຫ້ພວກເຮົາຫຼາຍກວ່າເກົ່າ,ສະເໜີຂໍ້ສະເໜີແນະອັນລ້ຳຄ່າຕໍ່ລາຍການຂອງພວກເຮົາ.ນອກນີ້,ເພື່ອຊ່ອຍບັນດາທ່ານຮຽນພາສາຈີນໃຫ້ດີກວ່າເກົ່າ,ປະຈຸບັນ,ປື້ມຮຽນແລະຊີດີຮຽນພາສາຈີນຂອງພວກເຮົາໄດ້ເຮັດສຳເລັດແລ້ວ,ຖ້າທ່ານຕ້ອງການ,ເຊີນທ່ານຝາກຈົດໝາຍມາບອກທີ່ຢູ່ຂອງທ່ານ,ພວກເຮົາຈະຝາກປື້ມຮຽນແລະຊີດີໃຫ້ທ່ານໂດຍໄວເທົ່າທີ່ຈະໄວໄດ້.
|
