|
ກອງປະຊຸມສຸດຍອດອາຊຽນຄັ້ງທີ 11 ໄດ້ອັດລົງແລ້ວຢູ່ສູນປະຊຸມກົວລາລຳເປີໃນວັນທີ 12 ທັນວາ.ຜູ່ນຳບັນດາປະເທດອາຊຽນທີ່ເຂົ້າຮ່ວມກອງປະຊຸມໄດ້ຜ່ານຮັບຮອງເອົາເອກະສານຫຼາຍສະບັບຊຶ່ງລວມທັງ"ຖະແຫຼງການກົວລາລຳເປີ"ກ່ຽວກັບການສ້າງລັດຖະທຳມະນູນອາຊຽນ,ໄດ້ກຳນົດທິດຂະຫຍາຍຂອງອາຊຽນໃນຕໍ່ໄປພາຍໜ້າ.
ການຜ່ານຮັບຮອງ"ຖະແຫຼງການກົວລາລຳເປີ"ກ່ຽວກັບການສ້າງລັດຖະທຳມະນູນອາຊຽນ ແມ່ນໝາກຜົນສຳຄັນທີ່ສຸດທີ່ໄດ້ຮັບໃນກອງປະຊຸມສຸດຍອດອາຊຽນຄັ້ງທີ 11 ຄັ້ງນີ້.ອີງຕາມຖະແຫຼງການສະບັບນີ້,ອາຊຽນຕົກລົງສ້າງລັດຖະທຳມະນູນ,ສ້າງຂອບກົດໝາຍແລະອົງການຈັດຕັ້ງເພື່ອໃຫ້ອາຊຽນບັນລຸຄາດໝາຍດັ່ງກ່າວ,ກຳນົດຫຼັກມາດຖານ ຂໍ້ກຳນົດແລະຄຸນຄ່າທັງໝົດຂອງອາຊຽນດ້ວຍຮູບການກົດໝາຍ,ເພື່ອສ້າງພື້ນຖານອັນໝັ້ນແກ່ນໃຫ້ແກ່ການພັດທະນາຂອງອາຊຽນໃນຂ້າງໜ້າ ພາຍໃຕ້ສະພາບສະພາບແວດລ້ອມເສດຖະກິດແລະການເມືອງສາກົນແລະພາກພື້ນມີການຜັນແປຢ່າງບໍ່ຢຸດຢັ້ງ,ເລັ່ງລັດສ້າງສາປະຊາຄົມອາຊຽນ.
ທ່ານບາດາວີ ນາຍົກລັດຖະມົນຕີມາເລເຊຍ ປະເທດປະທານວຽນກອງປະຊຸມສຸດຍອດອາຊຽນຄັ້ງນີ້ເວົ້າວ່າ,ອາຊຽນຕົກລົງສ້າງລັດຖະທຳມະນູນອາຊຽນ,ແມ່ນບາດກ້າວສຳຄັນທີ່ມີຄວາມໝາຍທາງປະຫວັດສາດໃນຂະບວນການພັດທະນາຂອງອາຊຽນ.
ກອງປະຊຸມສຸດຍອດອາຊຽນຄັ້ງນີ້ໄດ້ອອກຖະແຫຼງການປະກາດວ່າ,ອາຊຽນຕົກລົງຈະກໍ່ຕັ້ງ"ຈຸບຸກຄົນທີ່ມີຊື່ສຽງ",ນຳໄປຄົ້ນຄວ້າແລະວາງທິດຊີ້ນຳແລະທາດແທ້ຂອງລັດຖະທຳມະນູນອາຊຽນກ່ຽວກັບການສ້າງປະຊາຄົມອາຊຽນ.ໃນເວລາຈຳເປັນ,ກອງປະຊຸມຍັງທວງໃຫ້ບັນດາປະເທດສະມາຊິກກໍ່ຕັ້ງ"ຈຸຮັບຜິດຊອບພິເສດ"ເພື່ອຮັບຜິດຊອບຮ່າງລັດຖະທຳມະນູນອາຊຽນຕາມຖະແຫຼງການກົວລາລຳເປີແລະຢູ່ບົນພື້ນຖານຂອງຂໍ້ສະເໜີ"ຈຸບຸກຄົນທີ່ມີຊື່ສຽງ".
ກອງປະຊຸມສຸດຍອດອາຊຽນຄັ້ງນີ້ຍັງອະນຸມັດເອກະສານສອງສະບັບ,ແລະພິຈາລະນາບົດລາຍງານ 7 ສະບັບ.ຜູ້ນຳອາຊຽນຮູ້ສຶກເພິ່ງພໍໃຈຕໍ່"ແຜນປະຕິບັດງານວຽງຈັນ"ໄດ້ຮັບການຈັດຕັ້ງປະຕິບັດຢ່າງໜັກແໜ້ນ,ແລະສະໜັບສະໜູນການສ້າງຕັ້ງກອງທຶນພັດທະນາອາຊຽນ,ພ້ອມກັນນັ້ນ ຮຽກຮ້ອງປະເທດສະມາຊິກອາຊຽນພ້ອມກັບປະເທດຄູ່ສົນທະນາປະກອບສ່ວນເຂົ້າໃນກອງທຶນນີ້,ເພື່ອສະໜັບສະໜູນຂະບວນການເຊື່ອມໂຍງເຂົ້າກັນຂອງອາຊຽນ. ຜູ້ນຳອາຊຽນທີ່ເຂົ້າຮ່ວມກອງປະຊຸມໄດ້ອະນຸມັດການຕົກລົງກ່ຽວກັບການເລັ່ງລັດບັນລຸການຄ້າເສລີຂອງຂະແໜງການບໍລິການທີ່ກອງປະຊຸມລັດຖະມົນຕີເສດຖະກິດອາຊຽນສະເໜີອອກ,ແລະຫວັງໃຫ້ປະເທດສະມາຊິກອາຊຽນສ່ວນຫຼາຍສຳເລັດຂະບວນການດັ່ງກ່າວກ່ອນເວລາກຳນົດເມື່ອປີ 2015 .
ຜູ້ນຳອາຊຽນຮູ້ສຶກເພິ່ງພໍໃຈຕໍ່ລັດຖະມົນຕີກະຊວງເສດຖະກິດອາຊຽນເຊັນເອກະສານ 3 ສະບັບເຊັ່ນ:"ສັນຍາສ້າງແລະປະຕິບັດປ່ອງຢ້ຽມດຽວຂອງອາຊຽນ","ສັນຍາກ່ຽວກັບການສ້າງກົນໄກມາດຖານເອກະພາບຂອງໄຟຟ້າແລະເອເລັກຕຼົງຂອງອາຊຽນ"ແລະ"ອາຊຽນຮັບຮອງການຈັດວາງການບໍລິການກິດຈະການເຊິ່ງກັນແລະກັນ",ແລະເຕືອນໃຫ້ບັນດາປະເທດເລັ່ງລັດບາດກ້າວເຊື່ອມໂຍງເຂົ້າກັນຂອງຂະແໜງການທ່ອງທ່ຽວແລະຂະແໜງການຂົນສົ່ງທາງອາກາດ. ຜູ້ນຳຂອງ 10 ປະເທດອາຊຽນຍັງຫາລືບັນຫາກ່ຽວກັບການປັບປຸງຕາລາງເວລາຂະບວນການເຊື່ອມໂຍງເຂົ້າກັນຂອງອາຊຽນ,ຫວັງໃຫ້ຍ້າຍເວລາບັນລຸຄວາມເຊື່ອມໂຊງເຂົ້າກັນທາງເສດຖະກິດໃນປີ 2020 ນັ້ນມາຢູ່ໃນປີ 2015.
ໃນກອງປະຊຸມຄັ້ງນີ້ ບັນດາປະເທດອາຊຽນຍັງໄດ້ບັນລຸມະຕິເອກະສັນກ່ຽວກັບຫຼາຍບັນຫາ.ຜູ້ນຳບັນດາປະເທດອາຊຽນໄດ້ກ່າວປະນາມຕໍ່ເຫດການຫຼອນໂຈມຕີກໍ່ການຮ້າຍທີ່ເກີດຂຶ້ນໃນທົ່ວໂລກແລະໃນພາກພື້ນອາຊີອາຄະເນ,ຮຽກຮ້ອງເພີ່ມທະວີການໂຈມຕີກໍ່ການຮ້າຍ,ຕັ້ງໜ້າຊອກຫາຮາກເຫງົ້າຂອງການເກີດລັດທິກໍ່ການຮ້າຍ,ແກ້ໄຂບັນຫານີ້ຈາກກົກຮາກ.
ບັນດາປະເທດອາຊຽນເປັນເອກະສັນກັນເຫັນວ່າ,ບັນດາປະເທດອາຊຽນຕ້ອງການຮ່ວມມືກັນຢ່າງແໜ້ນແຟ້ນໃນດ້ານປ້ອງກັນຄວບຄຸມໄຂ້ຫວັດສັດປີກ,ໄດ້ປຶກສາຫາລືຂໍ້ສະເໜີຂອງມາເລເຊຍກ່ຽວກັບການສ້າງຕັ້ງສູນຄົ້ນຄວ້າປ້ອງກັນແລະປີ່ນປົວໄຂ້ຫວັດສັດປີກພາກພື້ນອາຊີອາຄະເນແລະສູນຮ່ວມມືປ້ອງກັນແລະປີ່ນປົວພະຍາດໂລຄາພາກພື້ນອາຊີອາຄະເນ.
ຜູ້ນຳອາຊຽນທີ່ເຂົ້າຮ່ວມກອງປະຊຸມຍັງເປັນເອກະສັນກັນເຫັນດີວ່າ ບັນດາປະເທດອາຊຽນຄວນເພີ່ມທະວີການຮ່ວມມືໃນຂົງເຂດການສຶກສາ,ຊຶ່ງລວມທັງຈັດງານກິລານັກສຶກສາອາຊຽນ,ກໍ່ຕັ້ງກອງສັນຕິພາບຊາວໝຸ່ມອາຊຽນ,ຈັດການແຂ່ງຂັນໂອລິມປິກຫຼີ້ນເກມຄອມພິວເຕີອາຊຽນແລະການແຂ່ງຂັນໂອລິມປິກວິທະຍາສາດເຕັກນິກອາຊຽນເປັນຕົ້ນ.
ໃນກອງປະຊຸມຄັ້ງນີ້,ບັນດາປະເທດອາຊຽນເປັນເອກະສັນກັນ ສະໜັບສະໜູນທ່ານສຸລະກຽດ ສະຖຽນໄທ ອະດີດລັດຖະມົນຕີການຕ່າງປະເທດຂອງໄທຮັບຕຳແໜ່ງເປັນເລຂາທິການໃຫຍ່ອົງການສະຫະປະຊາຊາດ,ທັງເປັນເອກະສັນກັນເຫັນວ່າ,ມີຄວາມຈຳເປັນສ້າງລະບົບເຕືອນໄພໄລຍະຕົ້ນຕໍ່ໄພທຳມະຊາດອາຊີອາຄະເນ,ເພື່ອຮັບມືກັບໄພທຳມະຊາດທີ່ຈະເກີດຂຶ້ນອີກເຊັ່ນ:ຄື້ນຊູນາມີເປັນຕົ້ນ.
|
