|
|
 |
| (GMT+08:00)
2005-12-23 14:56:44
|
 |
|
ຜົນສະທ້ອນຂອງສິ່ງແວດລ້ອມທີ່ມີຕໍ່ສະລີລະສາດຂອງນັກບິນອະວະກາດ
cri
Author: li
 ໃນເວລານັກບິນອະວະກາດບິນຢູ່ອະວະກາດ,ແມ່ນຢູ່ໃນສິ່ງແວດລ້ອມອະວະກາດອັນພິເສດໃນທຸກເວລາ. ສິ່ງແວດລ້ອມພິເສດແນວນີ້ຈະມີຜົນສະທ້ອນຕໍ່ຮ່າງກາຍຂອງນັກບິນອະວະກາດບໍ່,ແລະມີຜົນສະທ້ອນຫຍັງແດ່?
ເມື່ອໄດ້ຄົ້ນຄວ້າມາເປັນເວລາດົນນານແລ້ວ,ບັນດານັກວິທະຍາສາດໄດ້ປະກົດເຫັນວ່າ,ສິ່ງແວດລ້ອມອະວະກາດທີ່ເປັນສູນຍາກາດໃນລະດັບສູງ,ມີອຸນຫະພູມຕ່ຳເກີນໄປແລະມີລັງສີແຮງນັ້ນມີຜົນສະທ້ອນຫຼາຍທີ່ສຸດຕໍ່ເລືອດ,ກ້າມເນື້ອແລະອື່ນໆຂອງຄົນ. ໃນເວລານັກບິນອະວະກາດເຂົ້າສູ່ອະວະກາດ,ຍ້ອນວ່າກຳລັງໜີບຂອງອາກາດທີ່ຢູ່ນອກຮ່າງກາຍໄດ້ສູນຫາຍໄປຢ່າງກະທັນຫັນ,ອາກາດໃນຮ່າງກາຍຈະພອງຂຶ້ນຢ່າງວ່ອງໄວ,ອາສົດທີ່ລະລາຍໃນເລືອດກໍຈະແຍກຕົວອອກມາ,ກາຍເປັນຝອດອາກາດ,ແລ້ວອັດຕັນເສັ້ນເລືອດ. ພ້ອມກັນນັ້ນ,ຍ້ອນວ່າໃນອະວະກາດບໍ່ມີແຮງດຶງດູດຂອງນ້ຳໜັກ,ນ້ຳໃນຮ່າງກາຍກໍເລີ່ມຍ້າຍໄປສູ່ເຄິ່ງຄີງຂັ້ນເທິງແລະຫົວ. ເວລານັ້ນ,ເສັ້ນເລືອດດຳໃນຄໍຂອງນັກບິນອະວະກາດຈະພອງຂຶ້ນ,ເລືອດຈະເຂົ້າໄປໃນໂຜ້ງຮູດັງ. ສ່ວນການຍົກຍ້າຍຂອງນ້ຳໃນຮ່າງກາຍຈະເຮັດໃຫ້ບໍລິມາດປະລັສມາໜ້ອຍລົງ,ເລືອດເຂັ້ມຂຸ້ນຂຶ້ນ,ພາໃຫ້ເປັນພະຍາດຂາດເລືອດ.
ຖ້າລັງສີ,ອະນຸພາກທີ່ມີພະລັງງານສູງທີ່ມີໄຟຫຼືບໍ່ມີໄຟໃນອະວະກາດຫາກເກີນເສັ້ນຈຳກັດສູງສຸດຕໍ່ປະລິມານລັງສີທີ່ຮ່າງກາຍຄົນເຮົາທົນໄດ້,ຈະກະທົບກະເທືອນເຖິງລະບົບຍ່ອຍອາຫານຂອງຄົນ,ທຳລາຍເສັ້ນປະສາດຂອງເຍື່ອຮັບພາບໃນແກ້ວຕາແລະເສັ້ນປະສາດຂອງສະໝອງ,ພາໃຫ້ປວດຮາກຈົນກະທັ້ງເສຍຊີວິດ. ຖ້າປະລິມານລັງສີໜ້ອຍ,ແຕ່ໄດ້ສ່ອງເປັນເວລາດົນນານ,ນັບລວມເຂົ້າກັນແລ້ວ,ປະລິມານລັງສີກໍຈະພາໃຫ້ອາຍຸຂອງຄົນສັ້ນເຂົ້າ.
ສິ່ງແວດລ້ອມນ້ຳໜັກໜ້ອຍກໍຈະມີຜົນສະທ້ອນຕໍ່ກ້າມເນື້ອແລະກະດູກຂອງຄົນ. ຢູ່ໜ້າດິນ,ສັບພະຄຸນຕົ້ນຕໍຂອງກ້າມເນື້ອແມ່ນຮັກສາທ່າຢືນຊື່ແລະການເຄື່ອນໄຫວຂອງຮ່າງກາຍ. ໃຕ້ສະພາບນ້ຳໜັກໜ້ອຍ,ສັບພະຄຸນຂອງກ້າມເນື້ອທີ່ຕ້ານຢັນກັບນ້ຳໜັກເພື່ອຮັກສາຄວາມຊື່ຂອງຮ່າງກາຍກໍຈະສູນຫາຍໄປ,ຍ້ອນວ່າບໍ່ມີສັບພະຄຸນລາຍນີ້,ກ້າມເນື້ອສ່ວນນີ້ກໍຈະຄ່ອຍໆຫົດຫູ່ເຂົ້າ. ພ້ອມກັນນັ້ນ,ກະດູກກໍຈະເກີດມີການປ່ຽນແປງ,ການຊ່ຽມຈະຫາຍໄປຢ່າງຫຼວງຫຼາຍ. ສະພາບດັ່ງກ່າວດ້ານໜຶ່ງມັກພາໃຫ້ກະດູກຫັກ,ອີກດ້ານໜຶ່ງຈະເຮັດໃຫ້ປະລິມານການຊ່ຽມໃນນ້ຳຂອງຮ່າງກາຍເພີ່ມຂຶ້ນ,ແລ້ວພາໃຫ້ໝາກໄຂ່ຫຼັງເປັນໜິ້ວ.
ສິ່ງແວດລ້ອມນ້ຳໜັກໜ້ອຍຍັງຈະເຮັດໃຫ້ນັກບິນອະວະກາດມີອາການວິນຫົວ,ຕາລາຍ,ປວດຮາກແລະເຫງົ້ານອນ,ອາການເຫຼົ່ານີ້ຖືກເອີ້ນເປັນພະຍາດກິລາການບິນອະວະກາດ.
ໃນເວລານັກບິນອະວະກາດເຂົ້າສູ່ອະວະກາດແລະບິນຢູ່ອະວະກາດ,ຍ້ອນວ່າຍານອະວະກາດບັນທຸກຄົນບິນໄວແລະສູງ,ຈະມີປະກົດການໄຮ້ນ້ຳໜັກເປັນເວລາດົນນານແລະກາງເວັນກາງຄືນຜັດປ່ຽນກັນຢ່າງວ່ອງໄວ,ໂດຍສະເພາະແມ່ນໃນເວລາບິນຂຶ້ນແລະລົງຈອດ,ການເລັ່ງຄວາມໄວແລະຜ່ອນຄວາມໄວຢ່າງມະຫາສານ,ສຽງນັນແຊວທີ່ດັງກ້ອງສະຫນັ່ນ,ການສັ່ນສະເທືອນຢ່າງຮຸນແຮງແລະການຊຸທັ່ງຢ່າງຮ້າຍແຮງຈະເຮັດໃຫ້ນ້ຳແລະເນື້ອເຍື້ອໃນຮ່າງກາຍຍ້າຍບ່ອນຢູ່,ພາໃຫ້ເຈັບໜ້າເອິກ,ຫາຍໃຈຍາກ,ກ້າມເນື້ອເຄັ່ງຕຶງ,ເລືອດອັ່ງ,ຈົນກະທັ້ງເສຍຊີວິດ.
ເພື່ອຮັບປະກັນຄວາມປອດໄພດ້ານຊີວິດຂອງນັກບິນອະວະກາດໃນອະວະກາດ,ບັນດານັກວິທະຍາສາດການບິນອະວະກາດໄດ້ເພີ່ມທະວີການຄົ້ນຄວ້າແລະຊອກຄົ້ນໃນດ້ານລະບົບຄວບຄຸມສິ່ງແວດລ້ອມແລະລະບົບຮັບປະກັນຊີວິດຢ່າງບໍ່ຢຸດຢັ້ງ,ແລະໄດ້ຮັບຜົນສຳເລັດໃນລະດັບໃດໜຶ່ງແລ້ວ. ຄຽງຄູ່ກັບມະນຸດເຂົ້າໃຈແລະຊອກຮູ້ອະວະກາດຕື່ມອີກ,ບັນຫາເຫຼົ່ານີ້ຍ່ອມຈະໄດ້ຮັບການແກ້ໄຂ.
|
|
|
