|
|
 |
| (GMT+08:00)
2005-12-26 22:26:27
|
 |
|
ສຸກສັນບຸນຄຼິສມາດສ໌(ສຽງ)
cri
Author: shuo
|
ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ,ດີໃຈຫຼາຍທີ່ໄດ້ພົບກັບທ່ານໃນລາຍການນັດພົບໃນວັນອາທິດ.ມື້ນີ້ແມ່ນວັນທີ25ທັນວາ,ກົງກັບບຸນຄຼິສມາດ໌,ໃນລາຍການພາກນີ້,ພວກເຮົາໄດ້ຈັດເອົາເພງຄຼິສມາດ໌ປະມວນໜຶ່ງມາສູ່ທ່ານຟັງ,ແລະຂໍສົ່ງຄວາມອວຍພອນຂອງພະນັກງານພະແນກພາສາລາວວິທະຍຸCRIມາຍັງທ່ານຜູ້ຟັງໝົດທຸກຄົນ.
ກ່ອນອື່ນ,ເຊີນຟັງເພງ 《ສຸກສັນບຸນຄຼິສມາດສ໌》ທີ່ຂັບຮ້ອງໂດຍນາງສາວ7ຄົນ,ນີ້ແມ່ນເພງເກົ່າໆເພງໜຶ່ງຂອງອັງກິດ,ທຳນອງມ່ວນຊື່ນ,ເຕັມໄປດ້ວຍຄວາມເບີກບານໃນວັນບຸນ.ຜູ້ສາວ7ຄົນນີ້ມາຈາກສະຖາບັນສິລະປະນານກິ່ງຂອງຈີນ,ພວກນາງບໍ່ພຽງແຕ່ມີຮູບໂສມງາມໜ້າຮັກທໍ່ນັ້ນ,ຍັງມີສຽງຄໍທີ່ອ່ອນຫວານ.ໃນເພງ《ສຸກສັນບຸນຄຼິສມາດສ໌》,ສຽງຂອງພວກນາງເສາະໃສອ່ອນໂຍນ,ປານສຽງຂອງເທວະດາ.ໃນເພງນີ້ມີເນື້ອຮ້ອງວ່າ: "ພວກເຮົາຂໍອວຍພອນເຈົ້າຈົ່ງສຸກສັນວັນຄຼິສມາດສ໌,ປີໃໝ່ຂໍໃຫ້ກ້າວໜ້າ."
ຊາວຝ່າຍຕາເວັນຕົກຖືສີແດງ ສີຂຽວແລະສີຂາວເປັນສີຄຼິສມາດສ໌,ໃນມື້ບຸນຄຼິສມາດສ໌ ວຽນມາເຖິງ,ທຸກໆຄອບຄົວລ້ວນແຕ່ເອົາສາມສີນີ້ມາປະດັບປະດາເຮືອນຊານ.ດອກໄມ້ ແລະທຽນຄຼິສມາດສ໌ສີແດງ;ຕົ້ນຄຼິສມາດສ໌ສີຂຽວ,ສ່ວນຫຼາຍເລືອກເອົາຕົ້ນສົນ ຕົ້ນແປທີ່ ເປັນຮູບທາດມາຕົບແຕ່ງ,ເປັນສັນຍາລັກໃຫ້ອາຍຸໝັ້ນຂວັນຍືນ.ຢູ່ເທິງຕົ້ນຄຼິສມາດສ໌ໄດ້ປະດັບປະດາດ້ວຍທຽນ ດອກໄຟ ດອກໄມ້ສີຕ່າງໆ ເຄື່ອງຫຼິ້ນ ດາວເຈ້ຍແລະອື່ນໆ,ເພື່ອເພີ່ມບັນຍາກາດມ່ວນຊື່ນໃນວັນບຸນ.ໃນຄືນກ່ອນມື້ຄຼິສມາດສ໌,ຄົນທັງຫຼາຍມັກພາກັນເຕັ້ນລຳຮ້ອງເພງຢູ່ອ້ອມຕົ້ນຄຼິສມາດສ໌ຢ່າງສົມອົກສົມໃຈ.ພໍ່ເຖົ້າຄຼິສມາດສ໌ແມ່ນຜູ້ທີ່ໄດ້ຮັບຄວາມຊົມເຊີຍຫຼາຍກວ່າໝູ່ໃນບຸນຄຼິສ ມາດສ໌.ໃນຄືນກ່ອນມື້ຄຼິສມາດສ໌,ກ່ອນໄປນອນ,ເດັກນ້ອຍມັກເອົາຖົງຕີນກິ່ງໜຶ່ງວາງໄວ້ຢູ່ໜ້າເຕົາຝີງຫຼືຢູ່ຂ້າງໝອນ,ຖ້າໃຫ້ປາປາຄຼິສມາດສ໌ເອົາຂອງຂວັນໃສ່ໄວ້ໃນຖົງຕີນເວລາ ພວກເຂົາເຈົ້ານອນຫຼັບແລ້ວ.ຕໍ່ໄປເຊີນຟັງເພງ "ລາຕີຄຼິສມາດສ໌"ທີ່ຂັບຮ້ອງໂດຍທ່ານຢາງຄຸ່ນ.
ສິບກວ່າປີກ່ອນ,ເວົ້າສຳລັບຄົນຈີນ,ຜູ້ຮູ້ຕົ້ນຄຼິສມາດສ໌ແລະປາປາຄຼິສມາດສ໌ບໍ່ຫຼາຍ,ແຕ່ວ່າ ຄຽງຄູ່ກັບການແລກປ່ຽນກັນລະຫວ່າງວັດທະນະທຳຝ່າຍຕາເວັນອອກກັບວັດທະນະທຳຝ່າຍຕາເວັນຕົກ,ຄົນຈີນກໍນັບມື້ນັບຫຼາຍກໍມັກຫຼິ້ນບຸນຝ່າຍຕາເວັນຕົກນີ້,ລອງເບິ່ງສະເໜ ຂອງວັດທະນະທຳຕ່າງປະເທດ.ໃນຊູ່ມື້ນີ້,ຊາວໜຸ່ມຈຳນວນຫຼວງຫຼາຍມັກຈັດງານລາຕີຄຼິສມາດສ໌ໃນຄືນSilent night,ມີງານແບບຄອບຄົວ,ແບບເພື່ອນມິດແລະແບບຄູ່ຮັກ,ຄົນທັງຫຼາຍໃສ່ໝວກຄຼິສມາດສ໌,ຮ້ອງເພງຄິຼສມາດສ໌,ຕ່າງອະຖິຖານສິ່ງຕົນປາຖະໜາໃນບຸນຄຼິສມາດສ໌.ພໍ່ແມ່ທີ່ຍັງໜຸ່ມມັກເອົາຖົງຕີນສີແດງຫ້ອຍໄວ້ເທິງຫົວບ່ອນນອນຂອງເດັກ ນ້ອຍ,ເມື່ອລູກນອນຫຼັບແລ້ວ,ພໍ່ແມ່ກໍ່ເອົາຂະໜົມນ້ຳຕານທີ່ເດັກນ້ອຍມັກກິນຫຼືຂອງຂວັນອື່ນໆມາໃສ່ໃນຖົງຕີນ.ສ່ວນຜູ້ເຖົ້າຜູ້ແກ່ພັດມັກສົ່ງບັດອວຍພອນຄຼິສມາດສ໌ໄປໃຫ້ເພື່ອນມິດແລະພີ່ນ້ອງຢູ່ທາງໄກ.
ທີ່ທ່ານພວມຟັງຢູ່ນີ້ແມ່ນເພງ "ປາປາຄຼິສມາດສ໌ມາແລ້ວ" ທີ່ຂັບຮ້ອງໂດຍນາງເຊິນລີນ.ເພງນີ້ໄດ້ບັນລະຍາຍຄວາມມ່ວນຊື່ນຂອງຄົນທັງຫຼາຍໃນເວລາສະຫຼອງບຸນຄຼິສມາດສ໌.ໃນເພງມີເນື້ອຮ້ອງວ່າ "ທາຂົນຕາ,ໃສ່ໝວກແດງ,ຜິວປາກ,ທັງເຕັ້ນທັງລຳຕາມຫົນທາງ,ມ່ວນຊື່ນຟົດຟື້ນໝົດຄືນ,ແສງໄຟເຫຼື້ອມຍິບຍັບ,ສຽງຮ້ອງດັງກີກໆ,ປາປາຄຼິສມາດສ໌ມາແລ້ວ,ນັບຮອດ9ພວກເຮົາກໍກອດກັນໂລດ."
ກ່ອນບຸນຄຼິສມາດສ໌,ໂຮງແຮມຕ່າງໆໃນຕົວເມືອງໃຫຍ່ຂອງຈີນມັກຈັດຕົ້ນຄຼິສມາດສ໌ໃສ່, ອັນໄດ້ເຮັດໃຫ້ມີບັນຍາກາດວັນບຸນຢ່າງເຂັ້ມຂຸ້ນ.ຮ້ານຄ້ານ້ອຍໃຫຍ່ກໍກຽມເຄື່ອງປະດັບເອ້ບຸນຄຼິສມາດສ໌ແລະຂອງຂວັນຄຼສມາດສ໌ຫຼາຍຢ່າງຫຼາຍແນວໄວ້ຂາຍ,ຄືໝວກປາປາ ຄຼິສມາດສ໌,ຖົງຕີນຍາວທີ່ໃສ່ຂອງຂວັນໃຫ້ເດັກນ້ອຍ,ຕົ້ນຄຼິສມາດສ໌ ເຄື່ອງປະດັບຕົ້ນຄຼິສ ມາດສ໌ແລະອື່ນໆ,ຫຼາຍຈົນລາຍຫຼລາຍຕາ.ຜູ້ຂາຍຂອງສ່ວນຫຼາຍໃສ່ໝວກສີແດງ,ແຕ່ງຕົວຄືກັບປາປາຄຼິສມາດສ໌,ແລ້ວສົ່ງຂອງຂວັນນ້ອຍໆໃຫ້ລູກຄ້າ.
ຕໍ່ໄປເຊີນຟັງເພງ "Silent night" ບັນເລງແລະຂັບຮ້ອງໂດຍວົງດົນຕີຮວາເອີ.ວົງດົນຕີຮວາເອີປະກອບດ້ວຍຊາຍໜຸ່ມທີ່ໜ້າຮັກ3ຄົນ,ສຽງຂອງທ້າວຈ່າງເຫວີຍ ຜູ່ພາໝູ່ຮ້ອງເຕັມໄປດ້ວຍຫ້າວຫັນຟົດຟື້ນແຫ່ງໄວຄະນອງ.ໃນເພງຮ້ອງວ່າ:Silent night,ທຸກສິ່ງໃໝ່ອ່ຽມ,ຄວາມຝັນທັງໝົດທາສີສົດໃສ,ທ້ອງຟ້າລາຕີໝູ່ດາວລະຍິບລະຍັບ,ເມື່ອອາລຸນເບີກຟ້າ,Silent nightຜ່ານໄປ, ປີໃໝ່ກໍວຽນມາ, ຂໍໃຫ້ຊີວິດຍືນຍາວໄປ.
ເພງ "ໝາກຫິ່ງດັງແກ່ງໆ" ແມ່ນເພງທີ່ຄົນຈີນມັກຮ້ອງທີ່ສຸດ. ເນື້ອເພງມີຢູ່ວ່າ: "ພວກເຮົານັ່ງຢູ່ເທິງເຊີດຫິມະ,ບຸຜ່າລົມແຮງແລ່ນຜ່ານທົ່ງນາ,ທັງຫົວທັງຮ້ອງເພງ.ໝາກຫິ່ງດັງແກ່ງໆ,ຟັງແລ້ວຊື່ນໃຈ.ຄືນນີ້ຫຼິ້ນສະກີຈັ່ງແມ່ນມ່ວນ,ຮ້ອງເພງຕະລາດຫິມະ!" ຈັງຫວະແລະທຳນອງເພງທີ່ມ່ວນຊື່ນ,ເຮັດໃຫ້ຄົນຊື່ນອົກຊື່ນໃຈ.ມ້ວນທ້າຍລາຍການມື້ນີ້,ເຊີນຟັງເພງ"ໝາກຫິ່ງດັງແກ່ງໆ" ຂັບຮ້ອງໂດຍວົງດົນຕີເຮີຍຢ່າຈື ເຊິ່ງແມ່ນຄະນະຮ້ອງປະສານສຽງຄະນະທຳອິດຂອງຈີນ.
ທ່ານຜູ່ຟັງທີ່ໂຄລົບ, ໃນຖ່າມກາງສຽງເພງທີ່ໜ້າຟັງນີ້,ລາຍການພວກເຮົາກໍ່ໄດ້ສິ້ນສຸດລົງແລ້ວ.ຄິດວ່າລາຍການມື້ນີ້ຄົງໄດ້ນຳເອົາຄວາມເບີກບານມ່ວນຊື່ນມາໃຫ້ທ່ານ,ໃນໂອກາດບຸນຄຼິສມາດນີ້,ພວກເຮົາຂໍອວຍພອນໃຫ້ທ່ານຈົ່ງເບີກບານມ່ວນຊື່ນ,ປາຖະໜາສິ່ງໃດກໍໃຫ້ໄດ້ດັ່ງໝາຍທຸກປະການດ້ວຍເຖີດ! ພົບກັນໃໝ່ໃນລາຍການໜ້າ,ສະບາຍດີ.
|
|
|
