ໃນ​ລາຍການ​ມື້​ນີ້, ຂ້າພະເຈົ້າຈະ​ແນະນຳ​ເພງ​ຫຼາຍ​ເພງທີ່​ນິຍົມ​ກັນ​ໃນ​ອິນ​ເຕີ​ເນັດຂອງເຂດໃນຈີນ​. ກ່ອນອື່ນ, ເຊີນຟັງເພງທີ່​ນິຍົມ​ກັນ​ຫລາຍ​ກວ່າ​ໝູ່​ໃນ​ປີ2001 ຄື​ເພງ"Dong bei ren dou shi huo lei feng" ຊາວ​ພາກ​ຕາ​ເວັນ​ອອກສຽງ​ເໜືອ​ລ້ວນ​ແຕ່​ແມ່ນ​​ຄົນ​ດີ​ຄືເຫລີ​ຍ​ເຟິງ. ​ເພງ​ນີ້​​ແມ່ນ​ເພງ​ເນັດ​​ເພງ​ທຳ​ອິດ​ຢູ່​ເຂດ​ໃນ​ຈີນ, ທ່ານ​​ເສ​ຊຸນ ຈົນ​ໄດ້​ກາຍ​ເປັນ​ນັກ​ຮ້ອງໃນ​ປີນັ້ນ​ຍ້ອນ​ໄດ້​ຮ້ອງ​ເພງ​ນີ້​.

ທີ່​ຟັງ​ມານັ້ນ​ແມ່ນ​ເພງ"Dong bei ren dou shi huo lei feng" ຊາວ​ພາກ​ຕາ​ເວັນ​ອອກສຽງ​ເໜືອ​ລ້ວນ​ແຕ່​ແມ່ນຄົນ​ດີ​ຄື​​ເຫລີ​ຍ​ເຟິງ​. ​ເຫລີ​ຍ​ເຟິງ​ແມ່ນ​ນັກ​ລົບຜູ້​ໜຶ່ງ​ຂອງ​ກອງທັບ​ປົດ​ປ່ອຍປະ​ຊາ​ຊົນ​ຈີນໃນຊຸມ​ປີ 60 ສະຕະວັດ​ທີ່​ແລ້ວ, ​​​ເສຍ​ຊີວິດ​ໃນ​ຍາມ​ໜຸ່ມ​ນ້ອຍ, ​​ເຫຼີຍ​ເຟິງ​ຖື​ການ​ຊ່ອຍ​ເຫຼືອຜູ້​ອື່ນ​ເປັນຄວາມສຸກ​ຄວາມ​ມ່ວນ​ຊື່ນ​ກວ່າ​ໝູ່​ໃນ​ຊີວິດ​ຂອງ​ຕົນ, ນ້ຳ​ໃຈ​ຂອງ​​ເຫຼີຍ​ເຟິງ​ໄດ້​ລະດົມ​ໃຈ​​​ຊາວ​ຈີນ​ຫຼາຍ​ເຊັ່ນ​ຄົນ. ​ເພງ​ທີ່​ທ່ານ​ຟັງ​ເມື່ອ​ກີ້​ນີ້​ໄດ້​​ເລົ່າ​ເລື່ອງ​, ຄົນ​ຕ່າງ​ຖິ່ນຜູ້​ໜຶ່ງ​ໄປທຸລະ​ຢູ່​ພາກ​ຕາ​ເວັນ​ອອກສຽງ​ເໜືອ​ຂອງ​ຈີນ, ຖືກ​ລົດ​ຕຳ, ​ແລ້ວ​ໄດ້​ຮັບ​ຄວາມ​ຊ່ອຍ​ເຫຼືອຈາກ​ຄົນ​ທ້ອງ​ຖິ່ນ, ​ເລື່ອງ​ນີ້​ໄດ້​ສະ​ແດງ​ໃຫ້​ເຫັນ​ນ້ຳ​ໃຈ​ເຫລີ​ຍ​ເຟິງຂອງ​ຄົນ​ຢູ່​ແຫ່ງ​ນັ້ນ. ໃນ​ເພງ​ມີ​ຄວາມ​ເວົ້າ2-3ຄວາມ​ທີ່​ວ່າ"ຊຸ້ຍຮວາ, ຊ້າງ​ຊວນ​ຊ້າຍ" ​ແປ​ວ່າ "ນາງ​ຊຸ້ຍຮວາ, ​ເອົາ​ສົ້ມຜັກ​ມາ", ​ແລະ"ອານ​ເມິນ​ນ້າ​ກ່າ" ​ແປ​ວ່າ"ຢູ່​ບ້ານພວກ​ເຮົາ" ​ແມ່ນ​ພາສາ​ສຳນຽງ​ທ້ອງ​ຖິ່ນ, ດຽວ​ນີ້​​ໄດ້​ກາຍ​ເປັນ​ຄຳ​ເວົ້າທີ່​ຊາວ​ໜຸ່ມ​ມັກ​ຮຽນ​ເວົ້າ​ເລື້ອຍໆ.

ຕໍ່​ໄປ​ເຊີນ​ຟັງ​ເພງ"2002nian de di yi chang xue" ຫິມະ​ຕົກຄັ້ງທຳ​ອິດ​ໃນ​ປີ 2002. ຂັບ​ຮ້ອງ​ໂດຍ​ທ່ານ​ຕ່າວ​ລາງ.

ທ່ານ​ຢາງ​​ເສີນ​ກ່າງ​ແມ່ນ​ນັກ​ຮ້ອງ​ໃໝ່​ທີ່ນິຍົມ​ກັນ​ຫລາຍ​ຫລາຍຢູ່ຈີນ​ປັດຈຸບັນ, ​ເພງ​ທີ່​ທ່ານ​ແຕ່ງ​​ແລະ​ຂັບ​ຮ້ອງ​ເອງ​ຄື​ເພງ"ໜູ​ມັກ​ເຂົ້າສານ"​ໄດ້​ກາຍ​ເປັນ​ເພງ​​ເນັດ​ທີ່ດີ​ເດັ່ນ​ກວ່າ​ໝູ່​​ໃນ​ຫລາຍ​ປີ​ມາ​ນີ້. ບໍ່​ວ່າ​ໃນ​​​ເວັບ​ໄຊ​ດົນຕີ​​ໃດໆ, ​ຜູ້ກົດ​ຟັງ​ເພງນີ້ແມ່ນ​ຫລາຍກວ່າ​ໝູ່, ຖືກ​ຖື​ເປັນ​ເພງ​ທີ່​ນິຍົມ​ກັນ​ຫລາຍ​ກວ່າ​ໝູ່​ເທິງ​ເນັດ​​ໃນ​ປີ 2005 ຂອງ​ຈີນ. ດ້ວຍ​ເຫດ​ນີ້, ທ່ານ​ຢາງ​ເສີນ​ກ່າງ​​ຈຶ່ງ​​ໄດ້​ນາມ​ມະ​ຍົດເປັນ"ລາຊາ​ເພງ​​ເນັດ".

ເນື້ອ​ເພງ​ມີ​ຄວາມ​ໝາຍວ່າ"ຂ້ອຍ​ຮັກ​ເຈົ້າ, ຄື​ໜູ​ມັກ​ເຂົ້າສານ, ບໍ່​ວ່າຟ້າ​ຈະ​ລົມຝົນ​ຈະ​ຕົກ, ຂ້ອຍ​ກໍ​ຈະ​ຢູ່​ຄຽງ​ຂ້າງ​ເຈົ້າ; ຂ້ອຍ​ຄິດ​ຮອດ​ເຈົ້າ, ບໍ່​ວ່າ​ຈະ​ທຸກປານ​ໃດ, ທະ​ແນມ​ແຕ່​ເຈົ້າມ່ວນ​ຊື່ນ, ເຮັດ​ຫຍັງຂ້ອຍ​ກໍ​ຍິນ​ຍອມ, ຂ້ອຍຈັ່ງ​ແມ່ນ​ຮັກ​ເຈົ້າ." ​ເນື້ອ​ຮ້ອງເພງ​ນິ້ຈື່ງ່າຍ, ທຳ​ນອງ​ກໍມ່ວນ, ບວກ​ກັບ​ການ​ຂັບ​ຮ້ອງ​ດ້ວຍ​ອາລົມ​ເລິກ​ເຊິ່ງຂອງ​ທ່ານ​ຢາງ​ເສີນ​ກ່າງ, ​ເຮັດ​ໃຫ້​ເພງ​ໜູ​ມັກ​ເຂົ້າສານ ສົມ​​​ເປັນ​ເພງ​ທີ​ໜຶ່ງ​​ເທິງ​ອິນ​ເຕີ​ເນັດ.

ນາງ​ຊຽງ​ຊຽງ​ ນັກ​ຮ້ອງ​ເພງ​​ເນັດ​ມີ​ແຟນ​ເພງຫຼາຍ,  ພວກ​ແຟນ​ເພງ​ເອີ້ນ​ນາງ​ເປັນ​ລາ​ຊີ​ນີນ້ອຍ​ທີ່​ກອບ​ປີ້​ເພງ, ນາງ​​ເຄີຍ​​ໃຊ້​ສຽງ​ຫວານໆ​ຂອງ​ນາງຮ້ອງ​ເພງ ​"Jiang nan" ຂອງ​ທ້າວລິນ​ຈຸ້ນ​ເຈະ, ​ເພງ​ໜູ​ມັກ​ເຂົ້າສານຂອງ​ທ່ານ​ຢາງ​ເສີນ​ກ່າງ​​ແລະ​ເພງ​ອື່ນໆ​ຂອງ​ຜູ້​ອື່ນ​ລວມ 50 ກວ່າ​ເພງ, ມີ​ຜູ້​ກົດ​ຟັງ​ເພງ​ທີ່​ນາງ​ຮ້ອງ​​ເຖິງ 10 ລ້ານ​ເທື່ອ​ຄົນ, ນາງ​ຊຽງ​ຊຽງ​ກໍ​ກາຍ​ເປັນ"​ນັກ​ຮ້ອງ​​ເພງ​ເນັດ​ຜູ້​ໜຶ່ງ"ທີ່​ຄົນ​ນິຍົມ​ກັນ​ຫລາຍ​ກວ່າ​ໝູ່​ໃນ​ປັດຈຸບັນ. ​ເພງ"Zhu zhi ge"ທີ່​ນາງ​ຮ້ອງ​ນັ້ນ​ເປັນ​ໜ້າ​ຮັກ​ຫລາຍ, ​ເຊີນ​ຟັງ​ເພງ​ນີ້​ນຳ​ກັນ.
​
ເນື້ອ​ເພງ​ມີ​ຄວາມ​ໝາຍວ່າ: ຫົວ​ໝູ​ສະໝອງ​ໝູ​ໂຕ​ໝູ​​ຫາງ​ໝູ, ​ບໍ່​ເຄີຍ​ຮິຂອງ​ກິນ​ຈັກ​ເທື່ອ, ​ມື້​​ໃດ​ກໍນອນ​ຈົນ​ຕາ​ເວັນ​ສ່ອງ​ກົ້ນ, ​ບໍ່​ຖູ​ແຂ້ວ​ຈັກ​ເທື່ອບໍ່​​ຕີ​ກັນຈັກ​ເທື່ອ; ໝູ​ເອີຍ, ທ້ອງ​​ເຈົ້າສັງມາໃຫຍ່​​ແທ້, ​ເບິ່ງ​​ກໍ​ຮູ້​ໂລດ​ວ່າ​ ​ເຈົ້າອົດ​ທຸກ​ທົນຍາກ​ບໍ່​ໄດ້. ໝູ​ເອີຍ, ໜັງ​​ເຈົ້າຂາວ​ປານນັ້ນ, ຊາດ​ກ່ອນ​​ເຈົ້າຄື​ຊິ​ເກີ​ດໃນ​ຄອບຄົວ​ຄົນຮັ່ງນໍ.

ປັດຈຸບັນ, ຢູ່​ເຂດ​ໃນຈີນ​ມີ​ຫຼາຍ​ເພງ​ໄດ້​​ເຜີຍ​ແຜ່​ກັນ​ຮ້ອງ​ຢ່າງ​ກວ້າງຂວາງ, ​ເຊັ່ນ​ເພງ"Ding xiang hua" ດອກ​ການ​ພູ, ​ແລະ​ເພງ"Bie shuo wo de yan lei ni wu suo wei" ຢ່າວ່າ​​ເຈົ້າບໍ່​ຊານ້ຳ​ຕາ​ຂອງ​ຂ້ອຍ​ ​ແລະ​ເພງ​ອື່ນໆ, ກໍລ້ວນ​ແຕ່​ໄດ້​ເຜີຍ​ແຜ່​ທາງ​ອິນ​ເຕີ​ເນັດ. ​ເພງ"Ding xiang hua" ດອກ​ການ​ພູ​ ​ແມ່ນ​ເພງ​ພື້ນ​ເມືອງ, ​ແຕ່ງ​ໃນ​ເດືອນ​ເມສາ​ປີ 2000. ທ່ານ​ຖາງ​ເລີຍ ນັກ​ຮ້ອງ​ເວົ້າວ່າ, ທ່ານ​ແຕ່ງ​ເພງ​ນີ້​ແມ່ນ​​ເພື່ອ​ລະ​ນຶກ​ນາງສາວຜູ້​ໜຶ່ງ​ທີ່​ຈາກ​ໂລກ​ໄປ​ແລ້ວ​.

ເນື້ອ​​ເພງ​ມີ​ຢູ່​​ວ່າ: ນ້ອງ​ບອກວ່ານ້ອງ​ມັກ​ດອກ​ການ​ພູ​ທີ່​ສຸດ, ​ເພາະວ່າ​ຊື່​ດຽວ​ກັບ​ຊື່​ຂອງນ້ອງ​. ​ເປັນດອກ​ໄມ້ທີ່ງາມ​ອອນຊອນ, ​ແຕ່ພັດໜີ​ບໍ່ມົ້ມລົມ​ພັດ​ຝົນຮຳ, ນ້ອງ​ຈາກ​ໄປ​ແລ້ວດ້ວຍ​ຄວາມ​ຟ້າວ​ຟັ່ງ, ​ຈົ່ງ​​ແຕ່ຄວາມ​​ເປັນ​ຫ່ວງ​ໄວ້ກັບ​ອ້າຍ. ​ໃນ​ສວນບ້ານ​ບານ​ເຕັມ​ໄປ​ແຕ່​ດອກ​ການ​ພູ, ດ​ອກ​ສີ​ອິດ​ທີ່ສວຍ​ງາມ, ອ້າຍ​ຈະ​ເຝົ້າຢູ່​ແຫ່ງ​ນີ້, ​ເຝົ້າຮັກສາ​ນ້ອງ​ຊົ່ວ​ຊີວິດ.
​
ເພງ​ທີ່​ທ່ານ​ພວມ​ຟັງ​ຢູ່​ນີ້​ແມ່ນ​ເພງ "Bie shuo wo de yan lei ni wu suo wei" ຢ່າວ່າ​​ເຈົ້າບໍ່​ຊານ້ຳ​ຕາ​ຂອງ​ຂ້ອຍ, ​ແຕ່ງ​ແລະ​ຂັບ​ຮ້ອງ​ໂດຍ​ນັກ​ຮ້ອງ​ທີ່​ຊື່ວ່າ"ຕົ່ງ​ລາຍ​ຕົ່ງ​ວາງ". ​ເນື້ອ​ເພງ​ມີ​ຢູ່​ວ່າ, "ຄືນ​ນີ້​ຢູ່​ຜູ້​ດຽວ, ໂດດດ່ຽວປ່ຽວ​ພອຍ, ນອນ​ບໍ່​ຫລັບ, ຈັ່ງ​ແມ່ນຢາກ​ຫາ​ໝູ່​ມາ​ເປັນ​ເພື່ອນ, ບໍ່​ຢາກກິນ​ເຫຼົ້າ​ເມົາ​ຜູ້ດຽວ, ຄັນ​ເມົາ​ແລ້ວ​ກໍ​ນ້ຳຕາ​ໄຫຼອາບ​ແກ້ມ, ຄຶດ​ແຕ່​ເລື່ອງ​ທີ່​ເຈົ້າ​ເຮັດ​ໃຫ້​ຂ້ອຍ​ເສຍ​ໃຈ, ​ເປັນ​ຫຍັງ​ເຈົ້າມັກ​ເຮັດ​ໃຫ້​ຂ້ອຍ​ເສຍ​ໃຈ​ແທ້, ຢ່າ​ເວົ້າວ່າ ​ເຈົ້າບໍ່​ຊານ້ຳ​ຕາ​ຂອງ​ຂ້ອຍ, ​ຂ້ອຍ​ນ້ຳຕາ​ໄຫຼ​, ​ເຈົ້າກໍ​ບໍ່​ຫຼຽວ​ເລ, ​​ໄຫ້​ແລ້ວ, ​ນ້ຳຕາ​ແຫ້ງ​ແລ້ວ, ​ໃຈ​ກໍກາຍ​ເປັນ​ຂີ້​ເຖົ່າ​ແລ້ວ." ​​ເພ​ງນີ້​ຈັບ​ໃຈ​ຜູ້​ຟັງ​ຈົນ​ນັບ​ບໍ່​ຖ້ວມ, ສຽງ​ແຫບໆ​ໃນ​ເພງ​ກະ​ຕຸ້ນ​ໃຈ​ຜູ້​ຟັງ​ຫລາຍ.

ມ້ວນທ້າຍ​ລາຍການ​ມື້​ນີ້, ​ເຊີນ​ຟັງ​ເພງ"Liang zhi hu die" ​ແມງກະ​ເບື້ອສອງ​ໂຕ, ຂັບ​ຮ້ອງ​ໂດຍ​ທ່ານ​ຜາງ​ລົງ. ​ເພງ​ນີ້​ແມ່ນ​ທ່ານ​ຜາງ​ລົງ​ຮ້ອງ​​ສະຫຼັບ​ໃນເລື່ອງ​ໂທລະພາບ​ເລື່ອງ​ໜຶ່ງ, ​ໄດ້​ຖືກ​ຈັດ​ເຂົ້າ​ໃນ​ເພງ​ດີ​ເດັ່ນ​ 10 ​ເພງ​ຂອງ​ເວັບ​ໄຊ​ໃຫຍ່​ຕ່າງໆ​ຂອງ​ເຂດ​ໃນຈີນ​ເມື່ອ​ລະດູ​ໜາວ​ປີ​ກາຍ​ນີ້.

ເນື້ອ​ເພງ​ມີ​ຢູ່​ວ່າ: "ສຸດ​ທີ່​ຮັກ, ​ເຈົ້າບິນຊ້າໆ​ແດ່, ລະວັງ​ດອກ​ກຸ​ຫລາບ​ທີ່​ມີ​ໜາມ​. ສຸດ​ທີ່​ຮັກ, ​​ໃຫ້ເຈົ້າບິ​ນຕາມ​ຂ້ອຍ​​ເດີ້, ບີນຜ່ານ​ປ່າ​ໄມ້​ໄປ​​ເບິ່ງ​ນ້ຳ​ຫ້ວຍ. ສຸດ​ທີ່​ຮັກ, ​ເຮົາມາ​ເຕັ້ນ​ລຳນຳ​ກັນ, ລະດູບານ​ໃໝ່​ແຫ່ງ​ຄວາມ​ຮັກ​​ບໍ່​ມີ​ຍາມຟ້າ​ມືດ. ຂ້ອຍ​ກັບ​ເຈົ້າບິນ​ກ້ຽວ​ກັນໃນ​ເມືອງ​ມະນຸດ, ຄຽງ​ຄູ່​ກັນ​ໄປ​ຊົ່ວ​ນິລັນ. ​ເມື່ອ​ຮອດ​​ລະດູ​​ໃບ​ໄມ້ຫຼົ່ນ​, ​ໃບ​ໄມ້ຫຼົ່ນ​​​ເປັນ​ກອງ, ​ເຖິງ​ຈະ​ຫ່ຽວ​ແຫ້ງ​ນຳ​ເຈົ້າຂ້ອຍກໍ​ບໍ່​ກິນ​ແໜງ.