|
|
 |
| (GMT+08:00)
2005-12-27 19:11:23
|
 |
|
ການສັບຊ້ອນອົງປະກອບອຸດສາຫະກຳຂອງຈີນເນັ້ນໜັກມາດຖານປະຢັດພະລັງງານແລະອະນຸລັກສິ່ງແວດລ້ອມ(ສຽງ)
cri
|
ປັດຈຸບັນ,ຈີນໄດ້ກຳນົດເອົາການປະຢັດພະລັງງານແລະອະນຸລັກສິ່ງແວດລ້ອມເປັນມາດຖານສຳຄັນຂອງການສັບຊ້ອນອົງປະກອບອຸດສາຫະກຳໃນອະນາຄົດ.ໃນງານຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນຫວ່າງມໍ່ໆນີ້,ເຈົ້າໜ້າທີ່ເສດຖະກິດຈີນກ່າວວ່າ,ຕໍ່ໄປພາຍໜ້າ,ທະແນມແຕ່ແມ່ນໂຄງການອຸດສາຫະກຳທີ່ສິ້ນເປືອງພະລັງງານຫຼາຍແລະເຊື່ອມພິດສິ່ງແວດລ້ອມຫຼາຍ,ລ້ວນແຕ່ຈະຖືກປະຖິ້ມເທື່ອລະກ້າວໃນການສັບຊ້ອນ.ສ່ວນໂຄງການອຸດສາຫະກຳທີ່ນຳໃຊ້ຊັບພະຍາກອນຢ່າງມີປະສິດທິພາບສູງ,ແລະເຊື່ອມພິດໜ້ອຍນັ້ນຈະໄດ້ຮັບການສົ່ງເສີມແລະສະໜັບສະໜູນ.ຈຸດໝາຍຂອງການສັບຊ້ອນອົງປະກອບອຸດສາຫະກຳແມ່ນບັນລຸການພັດທະນາເສດຖະກິດແບບຍືນຍົງ.
ສາລະບານຊີ້ນຳການສັບຊ້ອນອົງປະກອບອຸດສາຫະກຳທີ່ຈີນປະກາດຫຼ້າສຸດໄດ້ແບ່ງຂອບເຂດການສັບຊ້ອນເປັນສາມປະເພດຄືສົ່ງເສີມ,ຈຳກັດແລະປະຖີ້ມ.ໂຄງການອຸດສາຫະກຳໂຄງການໜຶ່ງຈະຢູ່ໃນປະເພດໃດສຳຄັນແມ່ນເບິ່ງສະພາບການປະຢັດພະລັງງານແລະອະນຸລັກສິ່ງແວດລ້ອມ.ທ່ານລີວຈື້ ຫົວໜ້າກົມນະໂຍບາຍອຸດສາຫະກຳຄະນະກຳມະການການພັດທະນາແລະການປະຕິຮູບແຫ່ງລັດຈີນກ່າວວ່າ:
"ທະແນມແຕ່ແມ່ນໂຄງການທີ່ສິ້ນເປືອງຊັບພະຍາກອນແລະພະລັງງານຫຼາຍ,ເຊື່ອມພິດແລະທຳລາຍສິ່ງແວດລ້ອມຢ່າງໜັກໜ່ວງ,ພວກຂ້າພະເຈົ້າກໍຈະຈັດໂຄງການນີ້ເຂົ້າໃນປະເພດຖືກປະຖິ້ມ.ຕໍ່ໂຄງການເຫຼົ່ານີ້,ນອກຈາກຫ້າມລົງທຶນແລ້ວ,ຕໍ່ໂຄງການທີ່ຍັງເຫຼືອໃນປັດຈຸບັນກໍຕ້ອງໃຊ້ມາດຕະການປະຖິ້ມໃນເວລາກຳນົດ.ຕໍ່ວິສາຫະກິດການຜະລິດທີ່ບໍ່ປິດປະຕູຕາມເວລາກຳນົດ,ກໍສັ່ງໃຫ້ມັນເຊົາການຜະລິດຫຼືປິດປະຕູ."
ອີງຕາມມາດຖານປະຢັດພະລັງງານແລະອະນຸລັກສິ່ງແວດລ້ອມ,ຈີນຍັງຈະປັບປຸງຄວາມສາມາດການຜະລິດທີ່ເຫຼືອເຟືອຂອງຂະແໜງການເຫຼັກກ້າ,ອະລຸມິນຽມແຍກທາດດ້ວຍໄຟຟ້າແລະລົດຍົນເປັນຕົ້ນ.ທ່ານລີວຈື້ກ່າວວ່າ,ປີໜ້າ,ຈີນຈະໃຊ້ມາດຕະການສັບຊ້ອນອົງປະກອບຂະແໜງການເຫຼົ່ານີ້ທີ່ມີຄວາມສາມາດການຜະລິດເຫຼືອເຟືອ,ເພື່ອບັນລຸຈຸດປະສົງທີ່ນຳໃຊ້ຄວາມສາມາດການຜະລິດເຫຼົ່າຢ່າງເຕັມສ່ວນ.ທ່ານກ່າວວ່າ:
"ຕົ້ນຕໍແມ່ນຈຳກັດຄວາມສາມາດການຜະລິດທີ່ເພີ່ມໃໝ່ຢ່າງລັບຫູລັບຕາ. ສຳຄັນກວ່ານັ້ນແມ່ນປະຖິ້ມການຜະລິດທີ່ຫຼ້າສະໄໝ.ຕ້ອງອອກແຮງຊຸກຍູ້ການດັດສ້າງເຕັກນິກຂອງວິສາຫະກິດ,ເລັ່ງລັດບາດກ້າວລວມຕົວແລະປະກອບສ້າງວິສາຫະກິດຄືນໃໝ່,ເຮັດໃຫ້ອຸດສາຫະກຳໂຮມສູນກວ່າເກົ່າ."
ເຈົ້າໜ້າທີ່ຜູ່ນີ້ຍັງແນະນຳວ່າ,ຮອດທ້າຍປີນີ້,ຄວາມສາມາດຜະລິດອະລຸມິນຽມທີ່ແຍກທາດດ້ວຍໄຟຟ້າຂອງຈີນໄດ້ບັນລຸ10ລ້ານໂຕນຂຶ້ນໄປ.ຄວາມສາມາດການຜະລິດມີ1/4ໄດ້ລື່ນຄວາມຕ້ອງການຂອງຕະຫຼາດ.ຄວາມສາມາດການຜະລິດລົດຍົນຂອງຈີນຫຼາຍກວ່າການຈຳໜ່າຍ2ລ້ານຄັນ.ນອກນີ້,ຄວາມສາມາດການຜະລິດເຫຼັກກ້າຂອງຈີນໃນປີນີ້ຈະບັນລຸ470ລ້ານໂຕນ,ເຊິ່ງລື່ນ ຄວາມຕ້ອງການຂອງຕະຫຼາດຫຼວງຫຼາຍ.
ຕາມໄດ້ຮູ້ວ່າ,ນອກຈາກຍົກເລີກວິສາຫະກິດທີ່ສິ້ນເປືອງພະລັງງານຫຼາຍແລະເຊື່ອມພິດສິ່ງແວດລ້ອມຫຼາຍແລ້ວ,ເພື່ອຮັບປະກັນໃຫ້ເສດຖະກິດພັດທະນາຢ່າງສືບເນື່ອງແລະອ່າວໄວ,ຈີນຈະສືບຕໍ່ສົ່ງເສີມໃຫ້ໃຊ້ເຕັກນິກສູງໃໝ່ພັດທະນາໂຄງການທີ່ໃຊ້ພະລັງງານສະອາດ,ຕົວຢ່າງຄື,ການນຳໃຊ້ກ້ານຂອງພືດກະເສດຢ່າງສັງລວມ,ຜະລິດໄຟຟ້າດ້ວຍພະລັງລົມ,ການນຳໃຊ້ເສດແຮ່ຈ່ານຢ່າງສັງລວມເປັນຕົ້ນ.
ບໍລິສັດລົງທຶນດ້ານປະຢັດພະລັງງານຈີນ ແມ່ນບໍລິສັດການລົງທຶນລະດັບຊາດພຽງແຫ່ງດຽວໃນຂົງເຂດປະຢັດພະລັງງານແລະອະນຸລັກສິ່ງແວດລ້ອມຂອງຈີນໃນປັດຈຸບັນ.ທ່ານໂຈ່ວກຸ້ຍຈິ່ນ ຫົວໜ້າພະແນກໂຄງການລົງທຶນຂອງບໍລິສັດ ດັ່ງກ່າວບອກນັກຂ່າວວ່າ,ປັດຈຸບັນ,ພວກເຂົາເຈົ້າພວມປະຕິບັດຫຼາຍໂຄງການທີ່ສິ້ນເປືອນຊັບພະຍາກອນໜ້ອຍແລະເຊື່ອມພິດໜ້ອຍຢູ່ແຫ່ງຕ່າງໆຂອງຈີນ.
"ໃນດ້ານຜະລິດໄຟຟ້າດ້ວຍພະລັງລົມ,ພວກຂ້າພະເຈົ້າພວມສ້າງໂຮງໄຟຟ້າພະລັງລົມຂະໜາດ3ໝື່ນກິໂລວັດຢູ່ເຂດຊິນຈ່ຽງ.ສ້າງໂຮງໄຟຟ້າພະລັງລົມຂະໜາດ4ໝື່ນ5ພັນກິໂລວັດຢູ່ແຂວງເຮີເປ.ຕາມແຜນການໃນປີ2007,ພວກເຮົາຈະເຮັດ ໃຫ້ຄວາມສາມາດຜະລິດໄຟຟ້າພະລັງລົມບັນລຸເຖິງ5ແສນຫາ8ແສນກິໂລວັດ.ນອກນີ້,ພວກເຮົາພວມສ້າງໂຄງການຜະລິດໄຟຟ້າດ້ວຍກ້ານຂອງພືດກະເສດ,ດ້ານໜຶ່ງໄດ້ຜະລິດໄຟຟ້າຢ່າງສະອາດ,ອີກດ້ານໜຶ່ງ,ຜ່ານຈາກການເກັບໂຮມກ້ານ ຂອງພືດກະເສດ,ເຮັດໃຫ້ປະຊາຊົນມີລາຍໄດ້ເພີ່ມຂຶ້ນ,ແລະຍັງໄດ້ຫຼີກເວັ້ນການເຊື່ອມພິດສິ່ງແວດລ້ອມຍ້ອນຈູດໄຟເຜົາກ້ານຂອງພືດກະເສດຢູ່ທົ່ງນາໂດຍກົງຄື
ແຕ່ກ່ອນ."
ແຕ່ວ່າ,ໃນຂະນະທີ່ຈີນຍົກເລີກວິສາຫະກິດທີ່ມີເຕັກນິກຫຼ້າຫຼັງ,ສິ້ນເປືອງພະລັງງານຫຼາຍແລະເຊື່ອມພິດສິ່ງແວດລ້ອມຫຼາຍນັ້ນ,ກໍໄດ້ປະສົບບັນຫາບໍ່ໜ້ອຍທີ່ຕ້ອງການແກ້ໄຂ.ໃນນັ້ນ,ບັນຫາພົ້ນເດັ່ນກວ່າໝູ່ແມ່ນການປະກອບອາຊີບແລະລາຍໄດ້ຂອງພາລະກອນຂອງວິສາຫະກິດທີ່ຖືກປິດປະຕູ.ຕົວຢ່າງຄືຢູ່ຈີນ, ແຂວງຊ່ານຊີ ທີ່ມີຊື່ສຽງຍ້ອນຜະລິດຖ່ານຫີນໄດ້ຫຼາຍ,ປັດຈຸບັນໄດ້ມີວິສາຫະກິດໝື່ນກວ່າແຫ່ງໄດ້ປິດປະຕູແລ້ວ,ເມື່ອຮອດປີ2007,ບໍ່ຖ່ານຫີນແລະໂຮງຜະລິດຖ່ານກົກ ທີ່ສ້າງຜົນຜະລິດໜ້ອຍແລະເຕັກນິກຫຼ້າຫຼັງລ້ວນແຕ່ຖືກປິດປະຕູໃຫ້ໝົດ.
ເພື່ອແກ້ໄຂບັນຫາດັ່ງກ່າວ,ແຂວງຊ່ານຊີໄດ້ອົບຮົມເຕັກນິກການປູກຝັງແລະລ້ຽງສັດໃຫ້ແກ່ກຳມະກອນບໍ່ຖ່ານຫີນທີ່ຫວ່າງງານ,ເພື່ອຊ່ອຍພວກເຂົາເຈົ້າຊອກໄດ້ວຽກເຮັດງານທຳຄືນໃໝ່,ແລະມີລາຍໄດ້ເພີ່ມຂຶ້ນ.ຕາມໄດ້ຮູ້ວ່າ,ແຫ່ງອື່ນໆຂອງຈີນກໍໄດ້ໃຊ້ມາດຕະການທີ່ຄ້າຍຄືກັນນີ້ມາແກ້ໄຂບັນຫາປະກອບອາຊີບຂອງພາລະກອນໃນວິສາຫະກິດທີ່ ປິດປະຕູ.ປັດຈຸບັນ,ມີຜູ່ຊ່ຽວຊານບາງຄົນຍັງໄດ້ສະເໜີວ່າ,ຜ່ານຈາກການເພີ່ມທະວີພັດທະນາຂະແໜງການບໍລິການ,ສ້າງຕຳແໜ່ງວຽກງານໃຫ້ຫຼາຍກວ່າເກົ່າ.ສ່ວນພັດທະນາຂະແໜງການບໍລິການກໍສາມາດເຮັດໃຫ້ການພັດທະນາເສດຖະກິດອາໄສພະລັງງານໜ້ອຍລົງ,ມີຜົນດີຕໍ່ການພັດທະນາເສດຖະກິດຢ່າງສືບເນື່ອງແລະປອດໃສ.
|
|
|
