|
ນິທານອຸປະມາກ່ຽວກັບການຄຸ້ມຄອງ(2)(ສຽງ)
cri
ໃນລາຍການພາກນີ້, ຂ້າພະເຈົ້າຈະເລົ່ານິທານອຸປະມາກ່ຽວກັບການຄຸ້ມຄອງສອງເລື່ອງສູ່ທ່ານຟັງ, ຫວັງວ່າຄົງຈະມີຜົນດີຕໍ່ທ່ານ!
ນິທານອຸປະມາເລື່ອງທຳອິດທີ່ຈະເລົ່າສູ່ທ່ານຟັງມື້ນີ້ແມ່ນເລື່ອງຈຸດປະສົງຂອງຜູ້ໄຫວ້ພະ. ແມ່ນເວົ້າເລື່ອງຄົນຜູ້ໜຶ່ງ, ເພື່ອໄຫວ້ພະໄຫວ້ເຈົ້າໄດ້ໃຊ້ຈ່າຍເງິນຄຳຢ່າງຫຼວງຫຼາຍ, ເຄື່ອງໄຫວ້ຂອງທ່ານກໍຊື້ແຕ່ແນວດີໆແພງໆທັງໝົດ, ຈິ່ງວອນໃຫ້ເທວະດາຄຸ້ມກັນອາລັກຂາໃຫ້ເຂົາ, ລາບລວຍໄດ້ເປັນເຈົ້າເປັນນາຍ. ຄືນມື້ໜຶ່ງ, ເທວະດາອົງນີ້ໄດ້ມາເຂົ້າຝັນ, ແລະເວົ້ານຳເຂົາວ່າ: ເຈົ້າຢ່າສູ່ຖອກເທເງິນຄຳມາໄຫວ້ຂ້ອຍອີກແລ້ວ, ມື້ໃດມື້ໜຶ່ງຖ້າເຈົ້າບໍ່ມີເງິນຄຳ, ແນ່ນອນ, ເຈົ້າຕ້ອງມາຕູ່ຂ້ອຍ.
ນີ້ພຽງແມ່ນນິທານອຸປະມາເລື່ອງໜຶ່ງທໍ່ໜຶ່ງ, ແຕ່ມັນໄດ້ເຕືອນພວກເຮົາວ່າ: ຜູ້ທີ່ມັກໃຊ້ເງິນຄຳໄປເອົາໃຈຜູ້ອື່ນເລື້ອຍໆນັ້ນ, ແນ່ນອນແມ່ນຍ້ອນມີຈຸດປະສົງໃດໜຶ່ງ, ຜູ້ຮັບຈຶ່ງຕ້ອງລະມັດລະວັງ. ໃນບໍລິສັດຫຼືອົງການຕ່າງໆ, ຖ້າມີຄົນເອົາຂອງຂວັນແພງໆມາຕ້ອນ, ແນ່ນອນຕ້ອງມີຈຸດປະສົງໃດໜຶ່ງ, ຖ້າບໍ່ໄດ້ຕາມຄວາມປະສົງ, ຜູ້ໃຫ້ຂອງຕ້ອນກໍມັກຈະກັບມາໂຈມຕີຝ່າຍທີ່ເອົາຂອງຕ້ອນ. ໃນຊີວິດຕົວຈິງກໍ່ຄືກັນ, ຖ້າມີຄົນເອົາຂອງແພງໆມາໃຫ້, ຕ້ອງລະວັງ, ເພາະວ່າ, ຜູ້ເອົາຂອງມາໃຫ້ນັ້ນ, ອາດຈະມີເລື່ອງໃດໜຶ່ງຂໍຊ່ອຍ, ຖ້າພວກເຣົາຮັບເອົາຂອງຂວັນແລ້ວ, ກໍຈະເໝືອນດັ່ງຄຳພັງເພີຍຂອງລາວເວົ້ານັ້ນວ່າ:"ກິນເຂົ້າຜີ ຟັງຄວາມຜີ", ຮອດເວລາທີ່ຜູ້ເອົາຂອງໃຫ້ຕ້ອງການໃຫ້ເຮົາເຮັດຫຍັງໃຫ້ນັ້ນ, ເຮົາກໍຈະປະຕິເສດຍາກ, ແລະເວົ້າທົ່ວໄປແລ້ວ, ເລື່ອງທີ່ຕ້ອງການໃຫ້ເຮົາເຮັດໃຫ້ນັ້ນສ່ວນຫຼາຍແມ່ນພວກເຮົາຕ້ອງຝ່າຝືນຫຼັກການຈຶ່ງເຮັດໄດ້. ຖ້າພວກເຮົາປະຕິເສດ, ຜູ້ເອົາຂອງຂວັນໃຫ້ກໍຈະນາບຂູ່ວ່າ, ພວກເຮົາຮັບເອົາຂອງຫຼືໄດ້ຜົນດີຈາກເຂົາແລ້ວ. ດັ່ງນັ້ນ, ຖ້າມີຄົນເອົາຂອງແພງໆຫຼືລ້ຳຄ່າມາໃຫ້, ຫຼືວ່າດີຕໍ່ພວກເຮົາຈົນເກີນສ່ວນແລ້ວ, ພວກເຮົາກໍຕ້ອງລະວັງ.
ນິທານອີກເລື່ອງໜຶ່ງແມ່ນເວົ້າເຖິງໝູປ່າໂຕໜຶ່ງ, ກຳລັງຝົນແຂ້ວກ້ອງຕົ້ນໄມ້ໃຫຍ່ຕົ້ນໜຶ່ງ. ໝາຈອກມາເຫັນ, ເລີຍຖາມດ້ວຍຄວາມປະຫຼາດໃຈວ່າ: ບໍ່ເຫັນມີນາຍພານໄລ່ຕາມມາ, ກໍ່ບໍ່ມີອັນຕະລາຍຫຍັງ, ເປັນຫຍັງໂຕຈຶ່ງຝົນແຂ້ວຢ່າງເອົາຈິງເອົາຈັງປານນີ້? ໝູປ່າຕອຍວ່າ: ເຈົ້າຄິດເບິ່ງແມ, ຄັນເກີດອັນຕະລາຍຂຶ້ນແລ້ວ, ເຈົ້າຍັງມີເວລາຝົນແຂ້ວເຈົ້າບໍ່? ດຽວນີ້ຝົນໃຫ້ມັນເຂົ້າໆກ່ອນ, ບາດຕ້ອງການໃຊ້ຈຶ່ງບໍ່ກະວົນກະວາຍ.
ຈີນມີສຸພາສິດຄຳໜຶ່ງວ່າ: ສ້ອມແປງເຮືອນຊານກ່ອນຍາມຝົນ, ກົງກັບຄຳພັງເພີຍລາວວ່າ"ກັນດີກວ່າແກ້, ແຮດີກວ່າລົ້ວ", ຄຳພັງເພີຍຄຳນີ້ແມ່ນເວົ້າເຖິງນົກຊະນິດໜຶ່ງ, ກ່ອນຍາມຝົນຈະມາຮອດ, ມັນກໍຈິກເອົາເປືອກຕົ້ນມອນໄປແປງຮັງຂອງມັນໃຫ້ໝັ້ນຄົງ, ເພື່ອບໍ່ໃຫ້ເຮືອນຮົ່ວໃນຍາມຝົນຕົກ. ຄຳພັງເພີຍຄຳນີ້ແມ່ນອຸປະມາວ່າ, ເຮັດຫຍັງຄວນກະກຽມໄວ້ກ່ອນ, ເພື່ອປ້ອງກັນເກີດອຸບັດເຫດ. ເອົາໃຈໃສ່ທ້ອນໂຮມໃນຍາມທຳມະດາ, ກຽມພ້ອມໄວ້ກ່ອນ, ມື້ໃດມື້ໜຶ່ງໃນພາຍໜ້າຫາກຈະໄດ້ຜົນຢ່າງແນ່ນອນ. ໃນວຽກງານ, ຖ້າບໍ່ເອົາໃຈໃສ່ຮຽນຕື່ມ, ຮູ້ແຕ່ຈົ່ມວ່າຕົນເອງບໍ່ມີໂອກາດ, ແຕ່ເມື່ອມີໂອກາດເລື່ອນຊັ້ນແລ້ວ, ກໍ່ຈະກິນແໜງວ່າຕົນເອງບໍ່ໄດ້ສະສົມຄວາມຮູ້ຄວາມສາມາດໃຫ້ພຽງໃນຍາມປົກກະຕິ, ຈົນວ່າເສຍໂອກາດໄປລ້າໆ, ກໍຈະມີແຕ່ກິນແໜງແຄງໃຈທໍ່ນັ້ນ.
|
|
