|
|
 |
| (GMT+08:00)
2006-01-03 16:56:56
|
 |
|
ອວຍພອນປີໃໝ່(ສຽງ)
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ສຽງລະຄັງປີໃໝ່ໃກ້ຈະດັງຂຶ້ນ, ປີ 2006 ຈະວຽນມາເຖິງແລ້ວ. ໃນ ເລີ່ມຕົ້ນລາຍການມື້ນີ້, ແສງແກ້ວຂໍຕາງໜ້າພະນັກງານໝົດທຸກຄົນຂອງວິທະຍຸCRIອວຍພອນໃຫ້ທ່ານຜູ້ຟັງທັງຫລາຍຈົ່ງມີສຸກສັນວັນປີໃໝ່, ປາຖະໜາສິ່ງໃດຈົ່ງຂໍໃຫ້ສົມຫວັງທຸກປະການ!
"ອວຍພອນປີໃໝ່, ສົ່ງພອນປີໃໝ່, ເວລາຜ່ານໄປປານກະແສນ້ຳໄຫຼ, ຫວນຄືນເລື່ອງອະດີດ, ຄວາມໝອງໝົ່ນໄດ້ຜ່ານໄປ, ແຕ່ນີ້ໄປ, ປາຖະໜາສິ່ງໃດຂໍໃຫ້ສົມຫວັງທຸກປະການ." ນີ້ແມ່ນເພງອວຍພອນປີໃໝ່, ສຽງເພງເຕັມໄປດ້ວຍບັນຍາກາດໃນວັນບຸນອັນມ່ວນຊື່ນຟົດຟື້ນ, ສົ່ງຄວາມຖາມຂ່າວປີໃໝ່ຢ່າງສະໜິດສະໜົມ, ຜ່ານສຽງເພງນີ້, ແສງແກ້ວກໍຂໍສົ່ງພອນປີໃໝ່ອັນຈິງໃຈມາຍັງຜູ້ຟັງທັງຫລາຍ.
ໃນຊີວິດຂອງແຕ່ລະຄົນ, ຄອບຄົວແມ່ນອ່າວທະເລທີ່ອົບອຸ່ນແລະປອດໄພກວ່າໝູ່. ລູກຫລານເມື່ອເຕີບໃຫຍ່ແລ້ວ ບໍ່ວ່າເຂົາເຈົ້າຈະມີຖານະສູງຊ່ຳໃດ, ຫລືມີຄວາມຮູ້ສຶກທຳມະດາສາມັນແນວໃດ, ຄອບຄົວກໍແມ່ນຄວາມຄິດຮອດຄິດເຖິງຂອງເຂົາເຈົ້າຢູ່ສະເໝີ. ເມື່ອວາລະດິຖີຂຶ້ນປີໃໝ່ນີ້, ຂໍອວຍພອນໃຫ້ຄອບຄົວທັງໝົດຈົ່ງມີຄວາມສຸກ, ມ່ວນຊື່ນປອດໄພ. ຂໍໃຫ້ຄຳອວຍພອນນີ້ກາຍເປັນດອກຫິມະຕົກໃສ່ຝາມືຂອງທ່ານ, ນຳເອົາຄວາມຖາມຂ່າວອັນຈິງໃຈທີ່ສຸດມາຍັງທ່ານ.
ທີ່ທ່ານພວມຟັງຢູ່ນີ້ແມ່ນເພງສະຫຼັບໃນເລື່ອງໂທລະພາບ"Jia you jiu feng" ທີ່ຫາກໍສາຍຢູ່ຈີນ. ເພງນີ້ເຕັມໄປດ້ວຍຄວາມຍ້ອງຍໍສັນລະເສີນແລະຄວາມຄິດຮອດຄິດເຖິງອັນອົບອຸ່ນຕໍ່ຄອບຄົວ. ເນື້ອເພງມີຄວາມໝາຍວ່າ: "ຫິມະໃນຝາມື ລະລາຍໃນຄວາມຮັກ, ອົດຄວາມຄິດເຖິງ, ປີໜຶ່ງຜ່ານໄປດ້ວຍຄວາມຄຶດຮອດຄຶດເຖິງ. ຄວາມງ່ວມເຫງົາໃນຮອຍຍິ້ມ, ໃຜເປັນຜູ້ເບິ່ງແຍງ?" ແມ່ນແທ້, ພັບຕາດຽວ, ປີໜື່ງກໍຈະຜ່ານໄປແລ້ວ, ເວລານີ້, ໃນໃຈໝົດສູ່ຄົນ, ບໍ່ພຽງແຕ່ເຕັມໄປແຕ່ຄວາມມ່ວນຊື່ນທໍ່ນັ້ນ, ຍິ່ງຫລາຍກວ່ານັ້ນແມ່ນຄວາມກະຕຸ້ນໃຈ.
ເມື່ອປີໃໝ່ວຽນມາ, ຄົນທັງຫລາຍມັກສົ່ງບັດອວຍພອນທີ່ສວຍງາມໃຫ້ແກ່ກັນ, ອວຍພອນສະບາຍດີປີໃໝ່, ສົ່ງຄວາມຂອບໃຈແກ່ກັນ. ກ່ອນສຽງລະຄັງປີໃໝ່ໃກ້ຈະດັງຂຶ້ນນີ້, ເຊີນຟັງເພງ"gan xie ni " ຂອບໃຈເຈົ້າ ຂັບຮ້ອງໂດຍນາງຊູນເຢ້, ຂໍໃຫ້ພວກເຮົາອະທິຖານເພື່ອໝູ່ເພື່ອນດ້ວຍຄວາມຈິງໃຈ.
"ຂອບໃຈແມ່ທີ່ໃຫ້ຊີວິດແກ່ຂ້ອຍ, ຂອບໃຈຊີວິດທີ່ດົນບັນດານມິດຕະພາບແລະຄວາມຮັກ, ຂອບໃຈຊີວິດ ຂອບໃຈສັນຕິພາບ, ຂອບໃຈກາລະເວລາໃຫ້ຄວາມຍຸດຕິທຳຖາວອນ, ຂອບໃຈເຈົ້າ, ຄົນຮັກແລະເພື່ອນມິດຜູ້ຈິງໃຈຂອງຂ້ອຍ, ຂອບໃຈທຸກສິ່ງທຸກຢ່າງ." ນີ້ແມ່ນເພງເກົ່າທີ່ຊື່ວ່າ" ຂອບໃຈເຈົ້າ "ທີ່ຂັບຮ້ອງໂດຍນາງຊຸນເຢ້, ເພງນີ້ເຕັມໄປດ້ວຍຄວາມຮັກຄວາມແພງທີ່ຈິງໃຈ, ດຽວນີ້ກໍຍັງມັກຮ້ອງກັນຄືເກົ່າ. ເພື່ອນຜູ້ຟັງ, ໃນຊີວິດຄົນເຮົາ, ຜູ້ໃດກໍອາດຈະເຄີຍປະສົບຄວາມໝົ່ນໝອງແລະຄວາມທຸກລະທົມ, ແຕ່ເຊື່ອວ່າ, ຄຽງຄູ່ກັບເວລາຜ່ານໄປ, ທຸກສິ່ງທຸກຢ່າງກໍຍ່ອມຈະກາຍເປັນຊັບສົມບັດອັນລ້ຳຄ່າໃນຊີວິດຄົນເຮົາ. ສະນັ້ນ, ກໍໃຫ້ພວກເຮົາຟັງເພງ"ຂອບໃຈເຈົ້າ"ດ້ວຍຄວາມຂອບບຸນຂອບຄຸນນຳກັນ.
ປີໃໝ່ມັກປ່ຽມລົ້ນໄປດ້ວຍບັນຍາກາດອົບອຸ່ນມ່ວນຊື່ນ, ເຖິງວ່າມີຫລາຍຄົນບໍ່ໄດ້ເຕົ້າໂຮມກັບຄອບຄົວແລະໝູ່ເພື່ອນຍ້ອນວຽກງານແລະການຮ່ຳຮຽນ, ບໍ່ໄດ້ໂອ້ລົມມ່ວນຊື່ນນຳຄອບຄົວ, ແຕ່ສິ່ງເຫຼົ່ານີ້ພຽງແຕ່ແມ່ນຊົ່ວຄາວທໍ່ນັ້ນ, ສຸພາສິດເວົ້າວ່າ: ໃນເວລາຍັງເບິ່ງເຫັນນັ້ນ, ພວກເຈົ້າຢູ່ໃນສາຍຕາຂອງພວກເຮົາ, ໃນເວລາເບິ່ງບໍ່ເຫັນນັ້ນ, ພວກເຈົ້າຢູ່ໃນໃຈຂອງຂ້ອຍ.
ທີ່ທ່ານພວມຟັງຢູ່ນີ້ແມ່ນເພງ"xin nian kuai le" ສະບາຍດີປີໃໝ່ ຂັບຮ້ອງໂດຍຄະນະດົນຕີຊຸຍມູ້ນຽນຮວາ. ເນື້ອເພງມີຢູ່ວ່າ: "ສະບາຍດີປີໃໝ່ ສຸດທີ່ຮັກຂອງຂ້ອຍ, ຍາມໃດເຈົ້າຈະປະກົດຕົວ? ສະບາຍດີປີໃໝ່ ຄອບຄົວຂອງຂ້ອຍ, ຂ້ອຍບໍ່ຢູ່, ພວກເຈົ້າກໍສະບາຍດີບໍ່?" ທ່ານຜູ້ຟັງ, ບໍ່ຮູ້ວ່າ, ດຽວນີ້ ທ່ານພວມຢູ່ນຳຄອບຄົວບໍ່? ຫລືວ່າພວມຢືນຖ້າຢູ່ສະຖານີລົດໄປ ເພື່ອຂີ່ລົດເມືອບ້ານ? ຫລືຢູ່ຜູ້ດຽວພວມຄິດຮອດຄອບຄົວທີ່ຢູ່ທາງໄກ? ບໍ່ຮູ້ວ່າເພງສະບາຍດີປີໃໝ່ນີ້ເວົ້າຖືກໃຈທ່ານບໍ່? ຄຶດວ່າ ເມື່ອສຽງເພງດັງຂຶ້ນ, ຍາດຕິພີ່ນ້ອງຂອງທ່ານກໍໄດ້ຮັບຄວາມຖາມຂ່າວທີ່ມາແຕ່ທາງໄກນີ້ໂລດ.
ຊີວິດຂອງຄົນເຮົາແມ່ນປະກອບດ້ວຍຄວາມຝັນຫລາຍໆເທື່ອ, ປີໜຶ່ງຜ່ານໄປ, ປີໃໝ່ວຽນມາ, ຄວາມຝັນໄດ້ເຮັດໃຫ້ຊີວິດອັນສາມັນມີປີກບິນ. ບົນເສັ້ນທາງທີ່ສະແຫວງຫາຄວາມຝັນ, ຄົນທັງຫລາຍໄດ້ເຂົ້າໃຈຄວາມລຳບາກຂອງຊີວິດ, ແລະກໍສຳນຶກຮູ້ກຳລັງແຫ່ງຄວາມຮັກ. ບໍ່ວ່າເສັ້ນທາງຢູ່ຕໍ່ໜ້າຈະທຸລະກັນດານແນວໃດ, ກໍຂໍໃຫ້ເພື່ອນທັງຫລາຍຈົ່ງເຊັດນ້ຳຕາ, ກ້າວໄປຢ່າງກ້າຫານ. ເຊີນຟັງເພງ"zui chu de meng xiang" ຄວາມຝັນໃນເບື້ອງຕົ້ນ.
ນີ້ແມ່ນເພງ"zui chu de meng xiang" ຄວາມຝັນໃນເບື້ອງຕົ້ນ, ຂັບຮ້ອງໂດຍນາງຟ້ານເວີຍສີ. ເພງນີ້ສະຫງ່າຜ່າເຜີຍ, ເຕັມໄປດ້ວຍກຳລັງວັງຊາທີ່ເຮັດໃຫ້ຄົນບຸກບືນກ້າວຂຶ້ນ. ເນື້ອເພງມີຄວາມໝາຍວ່າ: ຄວາມຝັນໃນເບື້ອງຕົ້ນຢູ່ໃນກຳມື, ບ່ອນທີ່ຢາກໄປທີ່ສຸດ, ຈະປະຖິ້ມຢູ່ກາງທາງໄດ້ແນວໃດ. ຄວາມຝັນໃນເບື້ອງຕົ້ນຈະບັນລຸຜົນເປັນຈິງໃນທີ່ສຸດ, ບັນລຸຄວາມປາຖະໜາຢ່າງແທ້ຈິງ, ຈຶ່ງອາດເວົ້າໄດ້ວ່າໄດ້ຂຶ້ນສູ່ສະຫວັນແລ້ວ. ທ່ານຜູ້ຟັງ, ຖ້າທ່ານຍັງບໍ່ລືມຄວາມຝັນໃນເບື້ອງຕົນຂອງຕົນ, ກໍຂໍໃຫ້ທ່ານຈົ່ງກຳທຸກໂອກາດໃນຊີວິດ, ໄປສະແຫວງຫາຢ່າງບໍ່ປະວາງ, ໃນປີໃໝ່ນີ້ຂໍໃຫ້ທ່ານຈົ່ງໄດ້ຮັບຜົນຫລາຍກວ່າເກົ່າ.
ທ່ານຜູ້ຟັງທີ່ເຄົາລົບ, ລາຍການພາກນີ້ຂໍຈົບລົງທໍ່ນີ້, ສະບາຍດີ.
|
|
|
