|
ສະບາຍດີທ່ານຜູ່ຟັງທີ່ໂຄລົບ, ງານກິລາໂອລິມປິກລະດູໜາວຄັ້ງທີ 20 ຈະຈັດຂຶ້ນຢູ່ເມືອງຕູຣິງອີຕາລີໃນເດືອນກຸມພາປີໜ້າ. ໃນງານກິລາໂອລິມປິກລະດູ"ໜາວທີ່ເມືອງຊອນລັກອາເມລິກາປີ 2002, ນາງຢາງຢາງ ນັກກິລາຈີນຊິງໄດ້ຫຼຽນຄຳໃນລາຍການສະເກັດແລ່ນໄວໄລຍະ 500 ແມັດເພດຍິງ, ນີ້ແມ່ນຫຼຽນຄຳຫຼຽນທຳອິດທີ່ນັກກິລາຈີນຊິງໄດ້ໃນງານກິລາໂອລິມປິກລະດູໜາວ, ນອກນີ້, ນາງຢາງຢາງຍິງຊິງໄດ້ຫຼຽນຄຳໃນລາຍການສະເກັດແລ່ນໄວໄລຍະ 1000 ແມັດ ໃນງານກິລາໂອລິມປິກລະດູໜາວຄັ້ງນັ້ນ. ຫຼັງຈາກນັ້ນ 4 ປີ, ໃນງານກິລາໂອລິມປິກລະດູໜາວຄັ້ງໃໝ່ທີ່ຈະຈັດຂຶນຢູ່ເມືອງຕູຣິງ, ນາງຢາງຢາງຫວັງຈະຂຽນໜ້າໃໝ່ໃນຊີວິດການກິລາຂອງຕົນ.
ໃນງານກິລາໂອລິມປິກລະດູໜາວທີ່ເມືອງຊອນລັກ, ນາງຢາງຢາງຊິງໄດ້ຫຼຽນຄຳສອງຫຼຽນແລ້ວກາຍເປັນບຸກຄົນຕົວແບບໃນລາຍການກິລາລະດູໜາວຂອງຈີນ. ຫຼັງຈາກງານກິລາໂອລິມປິກລະດູໜາວທີ່ຊອນລັກສສິ້ນສຸດລົງບໍ່ດົນ, ນາງໄດ້ຖອນຕົວອອກຈາກວົງການກິລາແລະໄປຮຽນວິຊາຄຸ້ມຄອງອຸດສາຫະກຳການຄ້າໃນມະຫາວິທະຍາໄລຊິງຮວາ ເຊິ່ງແມ່ນມະຫາວິທະຍາໄລທີ່ມີຊື່ສຽງຂອງຈີນ, ພາຍຫຼັງມາ ນາງກໍໄດ້ໄປຮຽນຢູ່ອາເມລິກາອີກ, ແຕ່ໃນເດືອນຕຸລາປີກາຍນີ້, ນາງຢາງຢາງໄດ້ປະກາດວ່າ ຈະກັບຄືນສູ່ສະໜາມແຂ່ງຂັນນ້ຳກ້າມອີກໂດຍຢູ່ນອກຄວາມຄາດຄິດຂອງຄົນທັງຫຼາຍ. ແຕ່ນັ້ນມາ, ນາງໄດ້ອຳລາຊີວິດອັນສະບາຍອົກສະບາຍໃຈໃນມະຫາວິທະຍາໄລ ແລ້ວເຂົ້າຮ່ວມການຝຶກແບບອັນລຳບາກອີກ. ນາງຢາງຢາງທີ່ອາຍຸ 30 ປີ ຈະຕາງໜ້າຈີນເຂົ້າຮ່ວມງານກິລາໂອລິມປິກລະດູໜາວທີ່ເມືອງຕຸຣິງ, ເທື່ອນີ້ກໍ່ແມ່ນນາງເຂົ້າຮ່ວມງານກິລາໂອລິມປິກລະດູໜາວເທື່ອທີສາມ. ໃນເວລາໃຫ້ສຳພາດຕໍ່ນັກຂ່າວໃນຫວ່າງມໍ່ໆນີ້, ນາງຢາງຢາງເວົ້າວ່າ: ການມັກຮັກກິລາບົນຫິມະແລະນ້ຳກ້າມ ແມ່ນມູນເຫດທີ່ເຮັດໃຫ້ນາງກັບຄືນສູ່ວົງການກິລາອີກ, ນາງເວົ້າວ່າ: ໃນເວລາຂ້າພະເຈົ້າກັບຄືນຮອດປະເທດແລ້ວ, ຍາດພີ່ນ້ອງມິດສະຫາຍລ້ວນແຕ່ບໍ່ເຫັນດີນຳ, ຍ້ອນເຮັດຈັ່ງຊີ້ມີຄວາມສ່ຽງຫຼາຍ, ມູນເຊື້ອຂອງຄົນຈີນກໍແມ່ນເມື່ອຮອດລະດັບສຸດຍອດກໍເຊົາ. ຖ້າຫາກດຽວນີ້ຕົນເອງຊິງໄດ້ທີສອງ, ໝູ່ເພື່ອນກໍຈະເຫັນວ່າເຈົ້າປະລາໄຊແລ້ວ. ແຕ່ໃນເວລານັ້ນ ເຖິງວ່າຂ້າພະເຈົ້າບໍ່ແນ່ໃຈວ່າຈະຊິງໄດ້ຜົນໃນລະດັບໃດກໍ່ຕາມ, ແຕ່ຂ້າພະເຈົ້າເຊື່ອວ່າ ຢູ່ເມືອງຕູຣິງ ຖ້າຂ້າພະເຈົ້າພຽງແຕ່ເປັນຜູ່ຊົມຜູ່ໜຶ່ງທັງນັ້ນ, ຂ້າພະເຈົ້າຈະເສຍໃຈແທ້ໆ.
ໃນງານກິລາໂອລິມປິກລະດູໜາວທີ່ຕູຣິງ, ນາງຢາງຢາງຈະອອກແຮງສຸດຂີດຄອງແຊມປຽນລາຍການແລ່ນສະເກັດໄລຍະ 500 ແມັດແລະ 1000 ແມັດເພດຍິງອີກ. ແຕ່ການທ້າທາຍທີ່ນາງຢາງຢາງປະເຊີນນັ້ນກໍ່ໃຫຍ່ຫຼວງ, ໂດຍສະເພາະແມ່ນລາຍການແລ່ນສະເກັດ 500 ແມັດເພດຍິງ, ນາງບໍ່ພຽງແຕ່ຈະປະເຊີນກັບການທ້າທາຍຂອງນາງຣາດາໂນວາ ນັກກິລາບຸນກາລີ ຜູ່ສ້າງສະຖິຕິໂລກທໍ່ນັ້ນ, ກໍ່ຈະຮັບການທ້າທາຍຈາກນັກກິລາຈີນຜູ່ອື່ນໆອີກ--ໃນງານແຂ່ງຂັນແລ່ນສະເກັດໄລຍະສັ້ນຊິງຂັນໂລກປີນີ້ ໄດ້ຈັດຂຶ້ນ 4 ນັດແລ້ວ, ນາງຫວັງເມິງ ນັກກິລາຈີນທີ່ອາຍຸພຽງແຕ່ 20 ປີນັ້ນ ກໍຊິງໄດ້ຫຼຽນຄຳໝົດໃນການແຂ່ງຂັນແລ່ນສະເກັດໄລຍະ 500 ແມັດເພດຍິງ.
ເມື່ອທຽບກັບນັກກິລາໜຸ່ມເຫຼົ່ານີ້ແລ້ວ, ອາຍຸແກ່ແລະກຳລັງຮ່າງກາຍຂອງນາງຢ່າງຢາງໄດ້ກາຍເປັນຈຸດອ່ອນ. ແຕ່ນາງຢາງຢາງມີຄວາມໝັ້ນໃຈ, ເພາະບົດຮຽນແຂ່ງຂັນຂະໜາດໃຫຍ່ທີ່ອຸດົມສົມບູນແລະຈິດໃຈສູ້ຊົນທີ່ສຸກງອມຈະແມ່ນທ່າແຮງຂອງນາງ. ນາງຈະອອກແຮງສຸດຂີດ ຍາດເອົາໄຊຊະນະ.
ນາງຢາງຢາງໄດ້ເຂົ້າຮ່ວມງານກິລາໂອລິມປິກລະດູໜາວສອງເທື່ອແລ້ວ, ດຽວນີ້ ນາງບໍ່ພຽງແຕ່ຢາງຊິງເອົາຫຼຽນລາງວັນທໍ່ນັ້ນ, ນາງຍິ່ງເອົາໃຈໃສ່ເລື່ອງການເຂົ້າຮ່ວມງານກິລາໂອລິມປິກລະດູໜາວເປັນຄັ້ງທີສາມເມື່ອນາງມີອາຍຸ 30 ປີນັ້ນຫຼາຍກວ່າ. ນາງກ່າວວ່າ, ການເຂົ້າຮ່ວມງານກິລາໂອລິມປິກລະດູໜາວບໍ່ພຽງແຕ່ແມ່ນເພື່ອຊິງໄດ້ຜົນງານທີ່ດີເດັ່ນ. ນາງເວົ້າວ່າ: ໃນໄລຍະ 5 ປີກ່ອນງານກິລາໂອລິມປິກລະດູໜາວປີ 2002, ຂ້າພະເຈົ້າຊິງໄດ້ໄຊຊະນະທຸກເທື່ອໃນລາຍການແຂ່ງຂັນແລ່ນສະເກັດໄລຍະ 1500 ແມັດ, ແຕ່ໃນງານກິລາໂອລິມປິກລະດູໜາວທີ່ຊອນລັກ, ຂ້າພະເຈົ້າພັດເສຍໄຊໃຕ້ສະພາບລະດັບຂອງຕົນເອງສູງກວ່າຄູ່ແຂ່ງຂັນຫຼາຍສົມຄວນ, ອາດເວົ້າໄດ້ວ່າ ການເສຍໄຊເທື່ອນັ້ນ ເໝືອນ "ຈາກສະຫວັນຕົກລົງນະຮົກ"! ເວົ້າສຳລັບຂ້າພະເຈົ້າແລ້ວ, ສອງມື້ໃນຄາວນັ້ນແມ່ນປະສົບການອັນລຳບາກຂອງຂ້າພະເຈົ້າ, ຂ້າພະເຈົ້າໄດ້ຖອດຖອນບົດຮຽນຢ່າງຫຼວງຫຼາຍຈາກເລື່ອງນີ້, ບໍ່ສະເພາະຈຳກັດໃນການແຂ່ງຂັນທໍ່ນັ້ນ, ຜົນທີ່ໄດ້ຮັບດ້ານຊີວິດກໍ່ຫຼາຍ.
ງານກິລາໂອລິມປິກເຮັດໃຫ້ນາງຢາງຢາງຮັບຮູ້ວ່າ, ໃນຖານະເປັນນັກກິລາ, ສາມາດໃຊ້ຮູບແບບຫຍັງສ້າງຜົນສະທ້ອນແລະປ່ຽນແປງລາຍການແຂ່ງຂັນຂອງຕົນ. ເລີ່ມແຕ່ປີ 1999 ເປັນຕົ້ນມາ, ນາງຢາງຢາງກໍເລີ່ມເຂົ້າຮ່ວມກອງປະຊຸມຕ່າງໆຂອງສະຫະພັນແລ່ນສະເກັດສາກົນໃນຖານະເປັນຕົວແທນຂອງນັກກິລາ, ປະກອບຄວາມຄິດຄວາມເຫັນຂອງຕົນຕໍ່ການພັດທະນາລາຍການແຂ່ງຂັນ; ຫຼັງຈາກຊິງໄດ້ແຊມປຽນງານກິລາໂອລິມປິກລະດູໜາວແລ້ວ, ນາງຍິ່ງຕັ້ງໜ້າເຂົ້າຮ່ວມວຽກງານເຫຼົ່ານີ້. ນາງຢາງຢາງເວົ້າວ່າ, ປະສົບການເຫຼົ່ານີ້ໄດ້ເຮັດໃຫ້ນາງເປີດຫູເປີດຕາ, ປະສົບການອຸດົມສົມບູນກໍ່ເຮັດໃຫ້ນາງຍິ່ງມີຄວາມທຸ່ນທ່ຽງ ແລະໃຈເຢັນກວ່າເກົ່າອີກ. ນາງເວົ້າວ່າ: ໂດຍຜ່ານການເຂົ້າຮ່ວມການເຄື່ອນໄຫວຂອງອົງການຈັດຕັ້ງກິລາສາກົນເຫຼົ່ານີ້, ຂ້າພະເຈົ້າຮູ້ສຶກວ່າ ແລວຄວາມຄິດຂອງຕົນຍິ່ງກວ້າງຂວາງກວ່າເກົ່າ, ຈະຮູ້ສຶກວ່າຕົນເອງຍິ່ງເປັນເຈົ້າກີ້ເຈົ້າການ, ມີຄວາມສາມາດຄວບຄຸມຫຼາຍກວ່າເກົ່າ, ບໍ່ຄືເມື່ອກ່ອນ ບາງເທື່ອຄວບຄຸມໄດ້ແຕ່ເກີບແລ່ນສະເກັດແລະສອງຂາຂອງຕົນເອງ, ທີ່ຈິງແລ້ວ, ເມື່ອໄດ້ຮູ້ໄດ້ເຫັນຫຼາຍສິ່ງຫຼາຍແນວແລ້ວ, ຈະບໍ່ຮູ້ສຶກກະວົນກະວາຍອີກຕໍ່ສະພາບການທີ່ເກີດຂຶ້ນຢ່າງກະທັນຫັນຢູ່ສະໜາມແຂ່ງຂັນ, ວິທີຮັບມືກໍ່ຍິ່ງຫຼາຍກວ່າເກົ່າ.
ຢ່ເມືອງຕູຣິງເທື່ອນີ້, ນາງຢາງຢາງຍິງຈະເຂົາຮ່ວມການແຂ່ງຂັນຢູ່ "ສະໜາມແຂ່ງຂັນ" ອື່ນ, ນັ້ນກໍຄື ແຂ່ງຂັນເລືອກຕັ້ງເປັນກຳມະການຄະນະກຳມະການນັກກິລາຂອງຄະນະກຳມະການໂອລິມປິກສາກົນ, ໃນງານກິລາໂອລິມປິກລະດູໜາວທີ່ຊອນລັກ, ນາງຢາງຢາງກໍ່ເຄີຍໄດ້ເຂົ້າຮ່ວມການແຂ່ງຂັນດັ່ງກ່າວ, ແຕ່ໄດ້ເສຍໄຊດ້ວຍບັດສຽງຫຼຸດລື່ນກັນໜ້ອຍທີ່ສຸດ. ຢູ່ເມືອງຕູຣິງເທື່ອນີ້ດ ນາງຈະເປັນຜູ່ສະໝັກຮັບເລືອກຕັ້ງອີກເທື່ອໜຶ່ງ. ນາງຢາງຢາງມີທ່າທີອັນຕັ້ງໜ້າຕໍ່ການແຂ່ງຂັນເລືອກຕັ້ງເທື່ອນີ້, ນາງຫວັງວ່າ ພາຍຫຼັງຕົນເອງຖອນຕົວອອກຈາກການແຂ່ງຂັນແລ້ວ, ຍັງສາມາດປະກອບສ່ວນຫຼາຍກວ່າເກົ່າເຂົ້າໃນການກິລາໂອລິມປິກ ການກິລາຈີນແລະສາກົນ. ນີ້ແມ່ນຂົງເຂດຂຽນໜ້າໃໝ່ທີ່ນາງຫວັງຢ່າງແຮງກ້າທີ່ສຸດ ນອກຈາກການແຂ່ງຂັນໃນງານກິລາໂອລິມປິກລະດູໜາວແລ້ວ.
|
