|
ພາສາອິນເຕິເນັດກໍຄືພາສາທີ່ນິຍົມໃຊ້ໃນເຄືອຂ່າຍຄອມພົວເຕີ.ຄົນທັງຫຼາຍກໍ່ຮູ້ແລ້ວວ່າ,ໃນຫ້ອງລົມກັນໃນອິນເຕິເນັດ,ຫຼືໃນເວລາໃຊ້ເຄື່ອງມືລົມກັນບາງຢ່າງນັ້ນ,ຊາວເນັດສາມາດຜ່ານຈາກການພິມດີດຕົວໜັງສືເຂົ້າຄອມພີວເຕີມາລົມກັນແລະປະກອບຄຳຄິດຄຳເຫັນ.ຍ້ອນຮູບການແລກປ່ຽນແບບນີ້ຖືກປັດໄຈຕ່າງໆຈຳກັດ,ເຊັ່ນ,ຄວາມໄວໃນພິມດີດໜັງສືຂອງແປ້ນພິມດີດແລະ,ສະແດງອາລົມຈິດແບບໜ້າຕໍ່ໜ້າບໍ່ໄດ້,ເປັນຕົ້ນ,ຈິ່ງພາໃຫ້ຄ່ອຍໆຈໍ່ຕົວເປັນພາສາອິນເຕິເນັດທີ່ມີຈຸດພິເສດໃຊ້ງ່າຍ,ເບິ່ງເຫັນໂດຍກົງ,ເຂົ້າໃຈງ່າຍ,ສະແດງອາລົມຈິດງ່າຍເປັນຕົ້ນ.
ພາສາອິນເຕິເນັດທີ່ກຳເນີດໂດຍຄຽງຄູ່ກັບເຄືອຂ່າຍຄອມພິວເຕິຢູ່ຈີນ ໄດ້ມີປະຫວັດມາຫຼາຍປີແລ້ວ,ແຕ່ໃນຫວ່າງມໍ່ໆມານີ້,ໄດ້ມີທ່ວງທ່າຂະຫຍາຍກວ້າງອອກຢ່າງບໍ່ຢຸດຢັ້ງ.ທ່ານກົວລົງເຊີ່ງ ຜູ້ຊ່ຽວຊານຂອງຄະນະກຳມະການພາສາແລະຕົວໜັງສືແຫ່ງຊາດຈີນເວົ້າວ່າ,
"ພາສາອິນເຕິເນັດໄດ້ຊຶມເຂົ້າໃນທຸກດ້ານຂອງຊີວິດການເປັນຢູ່ສັງຄົມຂອງພວກເຮົາແລ້ວ,ບໍ່ວ່າເປັນເຈົ້າການຫືຼຢູ່ໃນທ່າຮັບ,ບຸກຄົນໃນທຸກເກນອາຍຸລ້ວນແຕ່ໄດ້ຮັບຜົນສະທ້ອນຈາກພາສາອິນເຕິເນັດ."
ຢູ່ຈີນ,ມີຫຼາຍໆຄົນມັກໃຊ້ພາສາອິນເຕິເນັດລົມກັນທາງອິນເຕິເນັດເລື້ອຍໆ, ຄືກັນກັບໃຊ້ພາສາທ້ອງຖິ່ນ.ຕາມສະຖິຕິຂອງສູນຂໍ້ມູນຂ່າວສານອິນເຕິເນັດຈີນສະແດງໃຫ້ເຫັນວ່າ,ນັບມາຮອດວັນທີ30ມິຖຸນາປີ2005,ຊາວເນັດຂອງຈີນໄດ້ມີ103ລ້ານຄົນແລ້ວ,ພຽງແຕ່ຖັດຈາກອາເມລິກາ,ເປັນທີ່ສອງໃນໂລກ,ແລະໃນຊາວເນັດ ເຫຼົ່ານີ້,ມີ1ສ່ວນ3ຂຶ້ນໄປໄດ້ລົມກັນໃນອິນເຕິເນັດເລື້ອຍໆ.ພວກເຂົາເຈົ້າກໍ່ໄດ້ນຳເອົາພາສາທີ່ໃຊ້ແຕ່ໃນອິນເຕິເນັດນັ້ນເຂົ້າສູ່ຊີວິການເປັນຢູ່ໂດຍບໍ່ຮູ້ເມື່ອ.
ທ້າວຟັ່ງຢານແມ່ນນັກສຶກສາຜູ້ໜຶ່ງຂອງມະຫາວິທະຍາໄລຄົມມະນາຄົມປະກິ່ງ,ລາວມມັກລົມກັນກັບໝູ່ຮຽນແລະໝູ່ເພື່ອນໃນອິນເຕິເນັດເລື້ອຍໆ,ພາສາທີ່ໃຊ້ນັ້ນກໍ່ແມ່ນພາສາອິນເຕິເນັດ.ທ້າວຟັ່ງເວົ້າວ່າ,
"ໃນອິນເຕິເນັດ,ພາສາອິນເຕິເນັດໃຊ້ສະດວກກວ່າ,ໃນເວລາພິມຕົວໜັງສືເຂົ້າໃສ່ຄອມພີວເຕິ,ພຽງແຕ່ຂຽນຕົວອັກສອນຫຼືຕົວເລກສອງສາມຕົວ,ກໍ່ສາມາດສະແດງເນື້ອໃນທີ່ອຸດົມສົມບູນ,ຄົນທັງຫຼາຍກໍ່ເຂົ້າໃຈໄດ້. ວິທີນີ້ດີຫຼາຍ!"
ນອກຈາກການແຜ່ຜາຍຂອງຊາວເນັດແລ້ວ,ສື່ມວນຊົນກໍ່ໄດ້ຊ່ອຍຊູຍູ້ໝູນການເຜີຍແຜ່ພາສາອິນເຕິເນັດ.ໃນບົດລາຍງານກ່ຽວກັບຄອມພີວເຕິ,ແລະອິນເຕິເນັດ,ຈົນກະທັ້ງໃນລາຍການບັນເທິງແລະພາກຂ່າວຂອງວິທະຍຸ,ໂທລະພາບ,ໜັງສຶພິມ,ວາລະສານເປັນຕົ້ນ,ກໍ່ໄດ້ໃຊ້ພາສາອິນເຕິເນັດເລື້ອຍໆ,ວັນນະຄະດີອິນເຕິເນັດ ເຊັ່ນ,ນະວະນິຍາຍອິນເຕິເນັດທີ່ເຕັມໄປດ້ວຍພາສາອິນເຕິເນັດຍິ່ງຖືກຜູ້ອ່ານຊາວໜຸ່ມນິຍົມ.
ພາສາອິນເຕິເນັດໄດ້ເຜີຍແຜ່ຢ່າງຂະໜາດໃຫຍ່ແນວນີ້,ໄດ້ພາໃຫ້ບາງຄົນເປັນຫ່ວງນຳ.ທ່ານນາງຕູ້ ຄູສອນໃນໂຮງຮຽນປະຖົມແຫ່ງໜຶ່ງຂອງປັກກິ່ງໄດ້ບອກນັກຂ່າວດ້ວຍຄວາມເປັນຫ່ວງວ່າ,ນັກຮຽນຂອງເພິ່ນມັກໃຊ້ພາສາອິນເຕິເນັດເລື້ອຍໆ.ຈົນກະທັ້ງໃຊ້ໃນບົດແຕ່ງ,ນີ້ຈະສ້າງຜົນສະທ້ອນທາງລົບໃຫ້ນັກຮຽນທີ່ຍັງບໍ່ທັນກຳໄດ້ພາສາຈີນແບບສະບັບທົງໝົດ.
"ເມື່ອຂຽນບົດແຕ່ງ,ນັກຮຽນປະຖົມຫຼາຍໆຄົນກໍມັກໃຊ້ພາສາອິນເຕິເນັດເລື້ອຍໆ,ພາສາເຫຼົ່ານີ້ບໍ່ເປັນແບບສະບັບ,ດັ່ງນັ້ນ,ຂ້າພະເຈົ້າເຫັນວ່າ,ມັນບໍ່ມີຜົນດີຕໍ່ພວກເຂົາເຈົ້າ.ນັກຮຽນປະຖົມຍັງຢູ່ໃນໄລຍະເຕີບໂຕ,ໃນດ້ານຮຽນພາສາ,ຕ້ອງການເປັນແບບສະບັບແດຈະດີກວ່າ.ດັ່ງນັ້ນ,ຂ້າພະເຈົ້າບໍ່ສົ່ງເສີມໃຫ້ນັກຮຽນປະຖົມໃຊ້ພາສາອິນເຕິເນັດໃນບົດແຕ່ງຂອງພວກເຂົາເຈົ້າ."
ພໍ່ແມ່ຂອງນັກຮຽນຫຼາຍໆຄົນຍິ່ງບໍ່ມັກໃຫ້ລູກຂອງຕົນໃຊ້ພາສາອິນເຕິເນັດຫຼາຍເກີນໄປ.ພວກເຂົາເຈົ້າເຫັນວ່າ,ດ້ານໜຶ່ງ,ລູກໃຊ້ພາສາອິນເຕິເນັດໂດຍບໍ່ແຍກກຳລະນີໃດນັ້ນ,ຈະກະທົບກະເທືອນພວກເຂົາເຈົ້າເຂົ້າໃຈແລະໃຊ້ພາສາຈີນທີ່ເປັນແບບສະບັບ,ອີກດ້ານໜຶ່ງ,ນີ້ຈະສ້າງຜົນສະທ້ອນທາງລົບຕໍ່ການແລກປ່ຽນກັນລະຫວ່າງພໍ່ແມ່ກັບລູກ,ເພາະວ່າ,ພໍ່ແມ່ຂອງນັກຮຽນຫຼາຍໆຄົນບໍ່ເຂົ້າໃຈພາສາອິນເຕິເນັດ.
ນອກນີ້,ຍັງມີບາງຄົນເປັນຫ່ວງຊາວໜຸ່ມໃຊ້ພາສາອິນເຕິເນັດຫຼາຍ ຈະສ້າງຜົນສະທ້ອນທາງລົບຕໍ່ການຂະຫຍາຍຕົວຂອງພາສາຈີນ.ຕໍ່ບັນຫາເຫຼົ່ານີ້,ທ່ານກົວລົງເຊິ່ງ ຜູ້ຊ່ຽວຊານຂອງຄະນະກຳມະການພາສາແລະຕົວໜັງສຶແຫ່ງຊາດຈີນຊີ້ອອກວ່າ,
"ພາສາຈີນຂອງພວກເຮົາມີປະຫວັດມາຫຼາຍພັນປີແລ້ວ,ພວກເຮົາຄວນມີຄວາມໝັ້ນໃຈອັນພຽງພໍ,ເຊື່ອວ່າພາສາຈີນມີຄວາມສາມາດຮັບທຸກສິ່ງທຸກຢ່າງໄດ້,ພ້ອມກັນນັ້ນກໍ່ມີພະລັງຊີວິດອັນໜຽວແໜ້ນ.ພາສາຈີນທີ່ມີພະລັງຊີວິດອັນໜຽວແໜ້ນນັ້ນບໍ່ຫ່ອນຈະຖືກພາສາອິນເຕິເນັດຊຸທັ່ງ.ຂ້າພະເຈົ້າເຫັນວ່າ,ຄູສອນຄວນບອກໃຫ້ພວກນັກຮຽນຮູ້ວ່າ,ພາສາອິນເຕິເນັດແມ່ນກຳເນີດຂຶ້ນແນວໃດ,ພ້ອມທັງຖ້າໃຊ້ພາສາອິນເຕິເນັດຈະມີຜົນດີຫຼືຜົນຮ້າຍຫຍັງເປັນຕົ້ນ."ຕໍ່ສະພາບການພາສາອິນເຕິເນັດໄດ້ໃຊ້ຢ່າງກວ້າງຂວາງ,ລັດຖະບານຈີນກໍ່ເອົາໃຈໃສ່ທີ່ສຸດ,ພວມດຳເນີນການສຳຫຼວດ, ຄົ້ນຄວ້າຢ່າງຕັ້ງໜ້າ,ເພື່ອໃຊ້ມາດຕະການອັນເໝາະສົມ,ປ້ອງກັນບໍ່ໃຫ້ໃຊ້ພາສາອິນເຕິເນັດຢ່າງທົ່ວທີບ.ຫວ່າງມໍ່ໆນີ້,ເມືອງຊຽງໄຮ້,ເຊິ່ງເປັນເມືອງອຸດສາຫະກຳການຄ້າໃຫຍ່ກວ່າໝູ່ຂອງຈີນໄດ້ປະກາດໃຊ້ກົດບັນຍັດລາຍໜຶ່ງ,ກຳນົດວ່າໃນເອກະສານຂອງກົງຈັກອົງການປົກຄອງແລະການສິດສອນຂອງໂຮງຮຽນ,ບໍ່ໃຫ້ໃຊ້ພາສາອິນເຕິເນັດທີ່ບໍ່ສອດຄ່ອງກົດເກນຂອງພາສາຈີນ.
|
