|
ນິທານອຸປະມາກ່ຽວກັບການຄຸ້ມຄອງ(3)(ສຽງ)
cri
|
ໃນລາຍການພາກນີ້, ຂ້າພະເຈົ້າຈະເລົ່ານິທານອຸປະມາກ່ຽວກັບການຄຸ້ມຄອງສູ່ທ່ານຟັງຈັກສອງເລື່ອງ: ຄືເລື່ອງ"ຖະໜອມສິດ"ແລະເລື່ອງສັນດານດັດຍາກ.
ນິທານເລື່ອງໜຶ່ງແມ່ນເວົ້າເຖິງສິງໂຕໜຶ່ງມັກລູກສາວຂອງພໍ່ນາຜູ້ໜຶ່ງ, ຈຶ່ງໄປອ້ອນວອນພໍ່ນາບົກລູກສາວໃຫ້. ແຕ່ພໍ່ນາຜູ້ນີ້ບໍ່ຍອມໃຫ້ລູກສາວຂອງຕົນແຕ່ງກັບສັດປ່າ, ແຕ່ກໍ່ບໍ່ກ້າປະຕິເສດ, ຈຶ່ງໄດ້ຄຶດຫາວິທີໜຶ່ງ. ເມື່ອສິງໂຕນີ້ມາຂ້ຽວອີກ, ພໍ່ນາຜູ້ນີ້ກໍເລີຍວ່າ: ຂ້ອຍກໍຢາກຍົກລູກສາວໃຫ້ເຈົ້າຢູ່, ແຕ່ລູກສາວຂ້ອຍຢ້ານເລັບແລະແຂ້ວແຫຼມໆຂອງເຈົ້າຫຼາຍ, ຖ້າເຈົ້າຕັດມັນຖິ້ມ, ລູກສາວຂ້ອຍກໍ່ຈະແຕ່ງດອງກັບເຈົ້າທັນທີ. ເມື່ອສິງໂຕຟັງແລ້ວກໍຕົກລົງໃນທັນທີວ່າຈະກັບເມືອຕັດເລັບແລະຫຼົກແຂ້ວຂອງຕົນຖິ້ມ. ເມື່ອສິງໂຕເຮັດແບບນີ້, ພໍ່ນາກໍບໍ່ຢ້ານສິງໂຕອີກ, ເມື່ອສິງໂຕກັບມາຫາອີກ, ພໍ່ນາກໍໃຊ້ໄມ້ຄ້ອນຂັບໄລ່ສິງໂຕໃຫ້ໜີໄປ.
ເວົ້າສຳລັບພໍ່ນາຜູ້ນີ້ແລ້ວ, ທຳອິດ, ລາວຢ້ານສິງໂຕນີ້ທີ່ສຸດ, ດີບໍ່ດີ, ໂຕກັບລູກສາວກໍຈະຖືກສິງໂຕກິນຊ້ຳ, ແຕ່ເພື່ອຮັກສາລູກສາວຂອງຕົນ, ໃນທີ່ສຸດຈຶ່ງຫາວິທີໄລ່ສິງໂຕໜີ. ໃນເລື່ອງນີ້, ພໍ່ນາໄດ້ໃຊ້ຄວາມສະຫຼາດຂອງຕົນປ່ຽນແປງສະພາບການທັງໝົດ. ໃນສັງຄົມຍຸກປະຈຸບັນ, ຄົນທັງຫຼາຍນັບມື້ນັບເອົາໃຈໃສ່ນຳການຄຸ້ມຄອງຊັບພະຍາກອນ, ໃນນັ້ນ, ສະຕິປັນຍາແລະຄວາມຮູ້ກໍ່ແມ່ນຊັບພະຍາກອນທີ່ສຳຄັນກວ່າໝູ່, ບາງເທື່ອ, ໃນເວລາກຳລັງຂອງຕ່າງຝ່າຍຕ່າງຜິດໂຕນກັນຫຼາຍນັ້ນ, ຖ້າຮູ້ໃຊ້ຄວາມສະຫຼາດ, ກໍສາມາດປ່ຽນທ່າອ່ອນໃຫ້ເປັນທ່າແຮງໄດ້ໂດຍບໍ່ຍາກຊາ, ໃນນິທານເລື່ອງນີ້, ທຳອິດສິງໂຕຢູ່ໃນຖານະທ່າແຮງ, ແຕ່ເຂົາພັດປະລະທ່າແຮງຂອງຕົນຢ່າງງ່າຍດາຍ, ສຸດທ້າຍມັນກໍ່ບໍ່ໄດ້ຫຍັງ, ບໍ່ວ່າບໍລິສັດ, ອົງການຫຼືວ່າສ່ວນບຸກຄົນ, ລ້ວນແຕ່ຕ້ອງຮູ້ຄັກແນ່ວ່າ, ທ່າແຮງຂອງຕົນແມ່ນຫຍັງ, ບໍ່ຄວນປະລະຢ່າງງ່າຍດາຍ, ຍາມໃດຖ້າເສຍທ່າໄປແລ້ວ, ສະພາບການກໍ່ຈະປ່ຽນແປງຢ່າງເຖິງຖອງ, ຈະຊອກຫາຄືນ, ກໍ່ຊ້າແລ້ວ.
ນິທານອຸປະມາອີກເລື່ອງໜຶ່ງແມ່ນເວົ້າເຖິງແມວໂຕຫນຶ່ງມັກອ້າຍບ່າວຜູ້ເຈົ້າຊູ້ຜູ້ໜຶ່ງ, ກໍເລີຍພາວະນາວິ່ງວອນໃຫ້ເທບທິດາ ເສກໃຫ້ມັນກາຍເປັນຄົນ, ໃນທີ່ສຸດ, ເທບທິດາອິດູຕົນ, ກໍເລີຍເສກໃຫ້ມັນກາຍເປັນຜູ່ສາວທີ່ສວຍງາມ, ເມື່ອອ້າຍບ່າວພົບເຫັນ, ສອງຄົນກໍ່ເລີຍຮັກກັນ, ບໍ່ດົນກໍສ້າງເປັນຄອບຄົວ. ມີມື້ຫນຶ່ງ, ເທບທິດາຢາກລອງເບິ່ງວ່າແມວໂຕນີ້ໄດ້ປ່ຽນຄົນແລ້ວຫຼືບໍ່, ກໍ່ເລີຍປ່ອຍຫນູໂຕຫນຶ່ງໃຫ້ແລ່ນເຂົ້າຫ້ອງ, ເມື່ອແມວໂຕນີ້ຫຼຽວເຫັນຫນູ, ກໍລືມວ່າຕົນເອງເປັນຄົນແລ້ວ, ເລີຍໂດດລົງຈາກຕຽງ, ຄຸບຫນູໂຕນັ້ນຢ່າງວ່ອງໄວ, ແລະຈັບຍັດເຂົ້າປາກໃນທັນທີ, ເທບທິດາຫຼຽວເຫັນກໍ່ຮ້ອງອຸທານຂຶ້ນພ້ອມບາດ, ແລ້ວໃຫ້ມັນກັບກາຍເປັນໂຕແມວຄືເກົ່າ.
ຢູ່ຈີນມີສຸພາສິດວ່າ: ພູຜາແມ່ນ້ຳແປງງ່າຍ, ສັນດານດັດຍາກ, ຢາກຮູ້ຈັກສັນດານຂອງຄົນຜູ່ຫນຶ່ງ, ຕ້ອງສັງເກດຈາກກິລິຍາວາຈາມະຍິກມະຍ່ອຍຂອງເຂົາໃນຍາມປົກກະຕິ, ເບິ່ງແຕ່ຮູບນອກບໍ່ໄດ້, ຖ້າກາຍເປັນນິໄສແລ້ວ, ຢາກປ່ຽນ ກໍຍາກ. ຖ້າຄົນຜູ່ຫນຶ່ງປ່ຽນນິໄສປານຄົນຜູ້ໃໝ່ຢ່າງກະທັນຫັນຢູ່ຕໍ່ຫນ້າພວກເຮົາ,ແນ່ນອນແມ່ນຕ້ອງມີສາເຫດໃດຫນຶ່ງ. ພວກເຮົາຈະເບິ່ງແຕ່ຮູບນອກຊື່ໆບໍ່ໄດ້, ກ່ອນຈະວິນິໄສ, ດີທີ່ສຸດແມ່ນຕ້ອງກຶກກອງຊອກຫາມູນເຫດທີ່ພາໃຫ້ປ່ຽນແປງ, ໂດຍສະເພາະແມ່ນຜູ່ທີ່ມີການພົວພັນດ້ານຜົນໄດ້ຜົນເສຍກັບພວກເຮົາ
ນິທານອຸປະມາກ່ຽວກັບການຄຸ້ມຄອງຂອງພວກເຮົາສ້ຽງສຸດລົງພຽງທໍ່ນີ້, ຫວັງວ່າຄົງຈະເປັນການຊີ້ແນະສ່ຳໃດສ່ຳໜຶ່ງຕໍ່ຊີວິດແລະວຽກງານຂອງທ່ານ!
|
|
