|
ຜູ້ວ່າການແທນນາຍົກລັດຖະມົນຕີອິສຣາແອນກ່າວວ່າ, ຊາວປາເລັສຕີນທີ່ຢູ່ເຢລູຊາເລັມຕາເວັນອອກເຂົ້າຮ່ວມການປ່ອນບັດຂອງການເລືອກຕັ້ງຄະນະກຳມະການນິຕິບັນຍັດປາເລັສຕີນໄດ້
cri
Author: mo
ຕາມຂ່າວCRI：ວັນທີ 10 ມັງກອນ, ຢູ່ເຢລູຊາເລັມ ທ່ານໂອເມີດ ຜູ້ວ່າການແທນນາຍົກລັດຖະມົນຕີອິສຣາແອນກ່າວວ່າ, ຊາວປາເລັສຕີນທີ່ອາໄສຢູ່ເຢລູຊາເລັມຕາເວັນອອກອາດເຮັດຕາມເຄີຍ, ໄປປ່ອນບັດຢູ່ໂຮງໄປສະນີທ້ອງຖິ່ນໃນເວລາເລືອກຕັ້ງຄະນະກຳມະການນິຕິບັນຍັດປາເລັສຕີນທີ່ຈະຈັດຂຶ້ນໃນວັນທີ 25 ມັງກອນ, ແຕ່ອົງການຮາມັສຈັດການແຂ່ງຂັນເລືອກຕັ້ງຢູ່ເຢລູຊາເລັມຕາເວັນອອກບໍ່ໄດ້.
ຕາມຂ່າວແຈ້ງວ່າ, ທ່ານໂອເມີດແມ່ນໃຫ້ທັດສະນະດັ່ງກ່າວໃນເວລາໂທລະສັບກັບທ່ານນາງໄລສ໌ ລັດຖະມົນຕີການຕ່າງປະເທດອາເມລິກາໃນຕອນບ່າຍມື້ດຽວກັນ. ທ່ານໂອເມີດຍັງເວົ້າວ່າ, ລັດຖະບານອິສຣາແອນຈະລົງຄະແນນສຽງກ່ຽວກັບບັນຫາດັ່ງກ່າວໃນກອງປະຊຸມປະຈຳທຸກອາທິດທີ່ຈະຈັດຂຶ້ນໃນວັນທີ 15 ມັງກອນ. ທ່ານເວົ້າວ່າ, ອິສຣາແອນຈະບໍ່ອະນຸຍາດໃຫ້ອົງການກໍ່ການຮ້າຍຂອງປາເລັສຕີນແລະຜູ້ຕາງໜ້າຂອງເຂົາເຂົ້າຮ່ວມການເລືອກຕັ້ງຢູ່ເຢລູຊາເລັມ.
ນອກນີ້, ໃນເວລາກ່າວຄຳປາໄສທາງໂທລະພາບໃນວັນທີ 10 ມັງກອນ, ທ່ານໂມຟັສ ລັດຖະມົນຕີກະຊວງປ້ອງກັນປະເທດອິສຣາແອນກໍໄດ້ສະແດງວ່າ ອະນຸຍາດໃຫ້ຜູ້ມີສິດເລືອກຕັ້ງປາເລັສຕີນທີ່ຢູ່ເຢລູຊາເລັມຕາເວັນອອກເຂົ້າຮ່ວມການເລືອກຕັ້ງຄະນະກຳມະການນິຕິບັນຍັດປາເລັສຕີນ.
|
|
