|
|
 |
| (GMT+08:00)
2006-01-12 14:30:30
|
 |
|
ການສ້າງຕັ້ງເຂດການຄ້າເສລີຈີນອາຊຽນໄດ້ມີການພັດທະນາຢ່າງໜັກແໜ້ນ(ສຽງ)
cri
Author: da
|
ຕາມຂ່າວCRI: ປີ 2005,ການຮ່ວມມືລະຫວ່າງຈີນກັບອາຊຽນໃນຫຼາຍຂົງເຂດໄດ້ເພີ່ມທະວີຂຶ້ນຕື່ມອີກ,ການຮ່ວມມືດ້ານເສດຖະກິດການຄ້າລະຫວ່າງສອງຝ່າຍ ໂດຍສະເພາະແມ່ນການສ້າງຕັ້ງເຂດການຄ້າເສລີຈີນອາຊຽນໄດ້ມີການພັດທະນາຢ່າງໜັກແໜ້ນກວ່າເກົ່າ.ໃນລາຍການເຂົ້າສູ່ອາຊຽນພາກນີ້,ເຊີນທ່ານຟັງບົດແຈ້ງຂ່າວທີ່ພາດຫົວເລື່ອງວ່າ:ການສ້າງຕັ້ງເຂດການຄ້າເສລີຈີນອາຊຽນໄດ້ມີການພັດທະນາຢ່າງໜັກແໜ້ນ.
ໃນເວລາເຂົ້າຮ່ວມການປະຊຸມສົນທະນາຜູ່ນຳຂອງກອງປະຊຸມສຸດຍອດອາຊີຕາເວັນອອກທີ່ຈັດຂຶ້ນຢູ່ກົວລາລຳເປີ ນະຄອນຫຼວງມາເລເຊຍໃນວັນທີ 12 ທັນວາປີ 2005,ທ່ານເວີນເຈຍປາວ ນາຍົກລັດຖະມົນຕີຈີນໄດ້ແນະນຳຄວາມຄືບໜ້າອັນໃຫຍ່ຫຼວງຂອງການສ້າງຕັ້ງເຂດການຄ້າເສລີຈີນອາຊຽນ.ທ່ານເວົ້າວ່າ: (1)
"ຈີນກັບອາຊຽນພວມຕັ້ງໜ້າຊຸກຍູ້ຂະບວນວິວັດການສ້າງຕັ້ງເຂດການຄ້າເສລີ,ໄດ້ກ້າວເຖິງຂັ້ນເຊັນສັນຍາການຄ້າສິນຄ້າ,ເລີ່ມຈັດການເຈລະຈາເພື່ອເຊັນສັນຍາການຄ້າການບໍລິການແລະການລົງທຶນ;ແຕ່ເດືອນກໍລະກົດປີ 2005 ເປັນຕົ້ນມາ,ການຄ້າສິນຄ້າເລີ່ມຫຼຸດພາສີຮອບດ້ານ."
ເພື່ອເປີດກວ້າງການພັດທະນາເສດຖະກິດຢ່າງໝັ້ນທ່ຽງແລະຊ່ອງຫວ່າງໃໝ່ຂອງການເພີ່ມການຄ້າກັບຕ່າງປະເທດ,ຈີນກັບ 10 ປະເທດອາຊຽນໄດ້ເຊັນ"ສັນຍາຂອບກ່ຽວກັບການຮ່ວມມືດ້ານເສດຖະກິດຮອບດ້ານລະຫວ່າງຈີນກັບອາຊຽນ"ໃນທ້າຍປີ 2002,ເລີ່ມເປີດຂະບວນການສ້າງຕັ້ງເຂດການຄ້າເສລີຈີນອາຊຽນຢ່າງເປັນທາງການ. ໃນຕົ້ນປີ 2004,ຈີນກັບປະເທດອາຊຽນສ່ວນຫຼາຍເລີ່ມປະຕິບັດ"ແຜນການຮັບຜົນໄລຍະຕົ້ນ"ພາຍໃຕ້ຂອບເຂດການຄ້າເສລີ,ຫຼຸດພາສີຜະລິດຕະພັນກະສິກຳ. ທ້າຍປີ 2004,ສອງຝ່າຍໄດ້ເຊັນ"ສັນຍາການຄ້າສິນຄ້າ"ແລະ"ສັນຍາກົນໄກແກ້ໄຂຄວາມວິວາດກັນ",ແລ້ວໄດ້ສຳເລັດການເຈລະຈາການຄ້າສິນຄ້າ.ອີງຕາມຕາລາງເວລາທີ່"ສັນຍາການຄ້າສິນຄ້າ"ກຳນົດໄວ້,ເດືອນກໍລະກົດປີ 2005,ສອງຝ່າຍໄດ້ເລີ່ມປະຕິບັດແຜນການຫຼຸດພາສີພາຍໃນເຂດການຄ້າເສລີ,ນອກຈາກຜະລິດຕະພັນທີ່ໄດ້ຮັບຜົນປະໂຫຍດໃນໄລຍະຕົ້ນທີ່ໄດ້ຫຼຸດພາສີເມື່ອປີ 2004ແລະຜະລິດຕະພັນສະດຸ້ງໄວສ່ວນໜ້ອຍແລ້ວ,ສອງຝ່າຍເລີ່ມຫຼຸດພາສີຜະລິດຕະພັນອີກ 7 ພັນຊະນິດເທື່ອລະກ້າວ.ນອກນີ້,ໃນປີ 2005,ສອງຝ່າຍຍັງໄດ້ເຈລະຈາກັນກ່ຽວກັບສັນຍາການລົງທຶນແລະການຄ້າການບໍລິການ.
ໃນງານຖະແຫຼງຂ່າວທີ່ຈັດຂຶ້ນໃນເດືອນກັນຍາປີ 2005,ທ່ານຟູ້ຈື້ຢີ້ງ ຜູ້ຊ່ອຍລັດຖະມົນຕີກະຊວງການຄ້າຈີນຊີ້ອອກວ່າ: (2)
"ບົນພື້ນຖານການຮ່ວມມືທາງເສດຖະກິດການຄ້າລະຫວ່າງສອງຝ່າຍລົງສູ່ລວງເລິກຢ່າງບໍ່ຢຸດຢັ້ງ,ຂະບວນການສ້າງຕັ້ງເຂດການຄ້າເສລີຈີນອາຊຽນໄດ້ເລັ່ງໄວເຂົ້າຕື່ມອີກ,ໂດຍສະເພາະໄດ້ເລີ່ມປະຕິບັດແຜນການຫຼຸດພາສີໃນເຂດການຄ້າເສລີຈີນອາຊຽນໃນເດືອນກໍລະກົດປີ 2005,ນີ້ເປັນຂີດໝາຍສະແດງໃຫ້ເຫັນວ່າ ການສ້າງຕັ້ງເຂດການຄ້າເສລີຈີນອາຊຽນໄດ້ກ້າວເຂົ້າສູ່ໄລຍະປະຕິບັດຢ່າງຮອບດ້ານແລະມີລັກສະນະທາດແທ້."
ການສ້າງຕັ້ງເຂດການຄ້າເສລີຈີນອາຊຽນດຳເນີນມາຢ່າງໜັກແໜ້ນໄດ້ນຳເອົາຜົນປະໂຫຍດໃຫ້ແກ່ທັງສອງຝ່າຍ. ແຕ່ປີ 2002 ຮອດປີ 2004,ສະເລ່ຍແລ້ວ ຍອດມູນຄ່າການຄ້າລະຫວ່າງຈີນກັບອາຊຽນໄດ້ເພີ່ມຂຶ້ນ 38,9% ຕໍ່ປີ.ຍອດມູນຄ່າການຄ້າລະຫວ່າງສອງຝ່າຍປີ 2004 ໄດ້ບັນລຸ 105 ຕື້ 900 ລ້ານໂດລາສະຫະລັດ,ເຊິ່ງບັນລຸຄາດໝາຍຍອດມູນຄ່າການຄ້າລື່ນກາຍ 100 ລ້ານໂດລາສະຫະລັດກ່ອນເວລາກຳນົດປີໜຶ່ງທີ່ສະເໜີໂດຍທ່ານເວີນເຈຍປາວ ນາຍົກລັດຖະມົນຕີຈີນ.ປະຈຸບັນ,ຈີນກັບອາຊຽນຕ່າງໄດ້ເປັນຄູ່ການຄ້າໃຫຍ່ທີ 4 ຂອງຝ່າຍກົງກັນຂ້າມ,ຍອດມູນຄ່າການຄ້າລະຫວ່າງສອງຝ່າຍໃນປີ 2005 ມີຫວັງຈະຫຼາຍກວ່າ 120 ຕື້ໂດລາສະຫະລັດ.
ໃນງານເອັກສ໌ໂປຈີນອາຊຽນຄັ້ງທີ 2 ທີ່ຈັດຂຶ້ນຢູ່ນະຄອນນານນິງ ເທດສະບານເຂດກວາງຊີຈີນໃນເດືອນຕຸລາປີ 2005,ທ່ານອົງເຄັງຢົງ ເລຂາທິການໃຫຍ່ອາຊຽນເວົ້າວ່າ: (3)
"ຂ້າພະເຈົ້າຕ້ອງຊີ້ອອກວ່າ,ຄວາມຮັບຮູ້ຄືກັນດ້ານການເມືອງລະຫວ່າງ 10 ປະເທດອາຊຽນກັບຈີນ,ແມ່ນປັດໄຈສຳຄັນອັນໜຶ່ງທີ່ຮັບປະກັນການສ້າງຕັ້ງເຂດການຄ້າເສລີຈີນອາຊຽນ. ປັດໄຈສຳຄັນອີກອັນໜຶ່ງກໍແມ່ນ ສະໜອງຊ່ອງຫວ່າງໃຫ້ວິສາຫະກິດເອກະຊົນ,ເຮັດໃຫ້ພວກເຂົາເຈົ້າສາມາດໄດ້ຜົນດີຈາກການໄຂຕະຫຼາດ.ໃນຂະນະທີ່ວິສາຫະກິດເອກະຊົນຮັບຜົນປະໂຫຍດຈາກຕະຫຼາດເຊື່ອມໂຍງເຂົ້າກັນຫຼາຍກວ່າເກົ່ານັ້ນ,ກໍຈະຊຸກຍູ້ການພົວພັນດ້ານເສດຖະກິດການຄ້າລະຫວ່າງອາຊຽນກັບຈີນແໜ້ນແຟ້ນຂຶ້ນຕື່ມ."
ໃນເວລາທົບທວນໄລຍະຜ່ານມາ,ພາຍໃຕ້ຄວາມພະຍາຍາມຮ່ວມຂອງທັງສອງຝ່າຍ,ການສ້າງສາເຂດການຄ້າເສລີຈີນອາຊຽນໄດ້ມີຄວາມຄືບໜ້າອັນໃຫຍ່ຫຼວງ.ຈ້ອງມອງເບິ່ງອະນາຄົດ,ການສ້າງສາເຂດການຄ້າເສລີຍ່ອມຈະກ້າວໄປສູ່ໄລຍະຄຳທີ່ຂະຫຍາຍລົງສູ່ລວງເລິກໂດຍບໍ່ຕ້ອງສົງໄສ,ເໝືອນດັ່ງທ່ານເສີນຈ້ຽນ ຜູ່ຊ່ອຍລັດຖະມົນຕີກະຊວງການຄ້າຈີນເວົ້ານັ້ນວ່າ: (4)
"ໃນ 5 ປີຂ້າງໜ້ານີ້,ຈີນຈະສືບຕໍ່ຂະຫຍາຍການພົວພັນມິດຕະພາບຖານບ້ານໃກ້ເຮືອນຄຽງລົງສູ່ລວງເລິກ,ຍຶດໝັ້ນມີໄມຕີຈິດຕໍ່ປະເທດໃກ້ຄຽງ,ຖືປະເທດໃກ້ຄຽງເປັນເພື່ອນ,ເພີ່ມທະວີການຮ່ວມມືພາກພື້ນ,ເຮັດໃຫ້ການຮ່ວມມືຮອບດ້ານທີ່ຕ່າງຝ່າຍຕ່າງມີຜົນປະໂຫຍດລົງສູ່ລວງເລິກ,ໂດຍສະເພາະແມ່ນເຮັດໃຫ້ການພັດທະນາກະສິກຳ ເຕັກນິກຂໍ້ມູນຂ່າວສານແລະຊັບພະຍາກອນມະນຸດ ການພັດທະນາແລະລົງທຶນເຊິ່ງກັນແລະກັນໃນເຂດລ່ອງແມ່ນ້ຳຂອງ,ພ້ອມດ້ວຍການຮ່ວມມືກັນລະຫວ່າງວິສາຫະກິດຂະໜາດນ້ອຍແລະຂະໜາດກາງໃນຂົງເຂດສາທາລະນະສຸກແລະວິທະຍາສາດເຕັກນິກລົງສູ່ລວງເລິກ,ເພີ່ມຊີວິດຊີວາໃໝ່ໃຫ້ແກ່ການພົວພັນຄູ່ຂາຍຸດທະສາດລະຫວ່າງຈີນກັບອາຊຽນທີ່ອວ່າຍໜ້າໄປສູ່ສັນຕິພາບແລະຈະເລີນຮຸ່ງເຮືອງ,ພ້ອມກັນຊຸກຍູ້ການພົວພັນດ້ານເສດຖະກິດການຄ້າລະຫວ່າງສອງຝ່າຍກ້າວຂຶ້ນສູ່ໄລຍະໃໝ່."
ນັກວິເຄາະເຫັນວ່າ,ການສ້າງຕັ້ງເຂດການຄ້າເສລີຈີນອາຊຽນ,ມີຜົນດີຕໍ່ການຂະຫຍາຍການພົວພັນມິດຕະພາບລະຫວ່າງຈີນກັບອາຊຽນລົງສູ່ລວງເລິກ,ຈະເຮັດໃຫ້ທັງສອງຝ່າຍຮັບຜົນພ້ອມກັນ,ທັງຈະສ້າງໂອກາດພັດທະນາໃໝ່ໃຫ້ອາຊີແລະໃຫ້ທົ່ວໂລກ.
|
|
|
