|
ທ່ານຜູ້ຟັງທີ່ໂຄລົບ,ຊົມເຊີຍທ່ານຮັບຟັງລາຍການວັດທະນະທຳຈີນ.ທ່ານເຊິນດ່ານຊິ່ນເຄີຍເປັນສາດສະດາຈານພິເສດຂອງສະຖາບັນວິຈິດຕະກຳຂອງມະຫາວິທະຍາໄລຊິ່ນຮວາປັກກິ່ງຂອງຈີນ,ໃນຫລາຍປີມານີ້,ຊື່ຂອງທ່ານໄດ້ປະກົດໃນສື່ມວນຊົນຕົ້ນຕໍຂອງຈີນເລື້ອຍໆ,ນີ້ຕົ້ນຕໍແມ່ນຍ້ອນປະສົບການແຕ້ມຮູບທີ່ບໍ່ທຳມະດາ,ການສະແຫວງຫາສິລະປະຢ່າງຈົດຈໍ່,ແລະບຸກຄະລິກລັກສະນະທີ່ກ້າເວົ້າກົງໄປກົງມາຂອງທ່ານ.ມື້ນີ້ຂ້າພະເຈົ້າກໍ່ຈະແນະນຳທ່ານເຊິນດ່ານຊິ່ນ ນັກແຕ້ມຈີນສູ່ທ່ານຟັງ.
ທ່ານເຊິນດ່ານຊິນມີອາຍຸ50ປີປາຍແລ້ວ,ແມ່ນນັກແຕ້ມແບບນັກປາດທີ່ສຸຂຸມຮອບຄອບຜູ້ຫນຶ່ງ,ທ່ານມັກນຸ່ງເຄື່ອງນຸ່ງແບບຈີນ,ຈົ່ງຜົມສັ້ນຄ້າຍຄືຫົວໂລ້ນ,ຜົມສັ້ນທີ່ຕັ້ງຂຶ້ນໄດ້ສໍ່ໃຫ້ເຫັນນິໄສທີ່ກົງໄປກົງມາຂອງທ່ານ.ທ່ານມີຕາແຫລມຄົມ,ສະແດງອອກເຖິງຄວາມສາມາດສອດສ່ອງອັນຫຼັກແຫຼມ.
ທ່ານເຊິນດ່ານຊິ່ນເຕີບໃຫຍ່ຢູ່ຊຽງໄຮ້ ຕົວເມືອງໃຫຍ່ຢູ່ແຄມທະເລພາກຕາເວັນອອກຂອງຈີນ,ໃນໂອກາດບັງເອີນເທື່ອຫນຶ່ງ,ທ່ານໄດ້ສຳຜັດກັບຮູບແຕ້ມຝ່າຍຕາເວັນຕົກຈຳນວນຫນຶ່ງ,ເຮັດໃຫ້ທ່ານເກີດມີຄວາມມັກແຕ້ມຮູບ.ປີ1970,ຈີນພວມດຳເນີນ"ການປະຕິວັດວັດທະນະທຳ",ທ່ານເຊິນດ່ານຊິ່ນທີ່ມີອາຍຸ17ປີໃນເວລານັ້ນໄດ້ໄປເປັນຊາວກະສິກອນຢູ່ແຂວງຈ່ຽງຊີ່,ແລະເປັນຊ່າງແຕ້ມແບບອາຊີບຜູ້ຫນຶ່ງໃນໂຮງງານຜະລິດກັບອັດຖິແຫ່ງຫນຶ່ງຂອງຊົນນະບົດ.ໃນເວລາລົມເຖິງປະສົບການຕອນນັ້ນ,ທ່ານເຊິນດ່ານຊິ່ນຍັງຈື່ບໍ່ລືມ:
"ຂ້າພະເຈົ້າເລີຍກາຍເປັນຊ່າງແຕ້ມແບບອາຊີບຜູ້ຫນຶ່ງ,ກໍ່ແມ່ນແຕ້ມຮູບໃສ່ກັບອັດຖິ.ໃນເວລານັ້ນໄດ້ເຮັດວຽກນຳອາຈານຜູ້ຫນຶ່ງ,ເພິ່ນເຮັດກັບອັດຖິ,ຂ້າພະເຈົ້າແຕ້ມຮູບໃສ່ກັບອັດຖິ,ແຕ້ມຕົ້ນແປກຕົ້ນສົນ,ຫມາຍຄວາມວ່າອາຍຸຍືນຍາວ"
ປະສົບການຕອນນີ້ເຮັດໃຫ້ລະດັບແຕ້ມຮູບຂອງທ່ານເຊິນດ່ານຊິ່ນໄດ້ມີຄວາມກ້າວຫນ້າ.ພາຍຫລັງມາ,ທ່ານເຄີຍແຕ້ມຮູບກາຕູນ,ຮູບປະກອບ,ຮູບໂຄສະນາ,ເຖິງວ່າບໍ່ເຄີຍໄດ້ຮັບການເຝິກຫັດຕາມແບບແຜນກໍ່ຕາມ,ແຕ່ຮູບແຕ້ມຂອງທ່ານເຊິນດ່ານຊິ່ນກໍ່ໄດ້ມີຊື່ສຽງບໍ່ໜ້ອຍຢູ່ແຫ່ງນັ້ນ.
ເດືອນກັນຍາປີ1976,ທ່ານເຊິນດ່ານຊິ່ນໄດ້ໄປແຕ້ມຮູບຢູ່ຕິເບດ.ໃນເວລານີ້,ທ່ານປະທານມາວເຈີຕົ່ງ ຜູ້ນຳທີ່ສ້າງຕັ້ງປະເທດຈີນໃຫມ່ໄດ້ເຖິງແກ່ກຳ,ປະຊາຊົນທົ່ວປະເທດຈີນຕົກຢູ່ໃນຄວາມໂສກເສົ້າສະຫລົດໃຈ.ໂດຍຫມູນອ້ອມເຫດການການເມືອງອັນສຳຄັນດັ່ງກ່າວນີ້,ທ່ານເຊິນດ່ານຊິ່ນໄດ້ແຕ້ມຮູບນ້ຳມັນແຜ່ນໃຫຍ່ທີ່ມີຊື່ວ່າ"ນ້ຳຕາຕົກເຕັມນາທີ່ເກັບກ່ຽວໄດ້ອຸດົມສົມບູນ".ຮູບແຜ່ນນີ້ໄດ້ເຂົ້າຮ່ວມງານວາງສະແດງວິຈິດຕະກຳລະດັບຊາດ,ໄດ້ຮັບຄວາມຍ້ອງຍໍຢ່າງສູງ,ຊື່ຂອງທ່ານເຊິນດ່ານຊິ່ນໄດ້ເຜີຍແຜ່ໃນວົງການວິຈິດຕະກຳຢ່າງວ່ອງໄວ,ຊາວຫນຸ່ມຫລາຍຄົນທີ່ແຕ້ມຮູບນ້ຳມັນໄດ້ມາຈາກແຫ່ງຕ່າງໆຂອງຈີນມາຂໍຮຽນນຳທ່ານເຊິນດ່ານຊິ່ນ.
"ມັນແມ່ນຜົນງານທີ່ໂຊກດີກວ່າໝູ່ຂອງຂ້າພະເຈົ້າ,ມັນໄດ້ສ້າງຊື່ສຽງໃຫ້ແກ່ຂ້າພະເຈົ້າໂດຍບັງເອີນ.ໃນຕົ້ນປີ1978,ໄດ້ເລີ່ມສອບເສັງຮັບສະໝັກນັກສຶກສາປະລິຍາໂທໃນທົ່ວປະເທດ,ໃນເວລານັ້ນຂ້າພະເຈົ້າກໍ່ໄດ້ສະໝັກຊື່ເຂົ້າຮ່ວມການສອບເສັງ.ຮອດເດືອນກັນຍາປີ1978,ໄດ້ຮັບໃບແຈ້ງໃຫ້ໄປຮຽນ,ແຕ່ນີ້ໄປຈຶ່ງໄດ້ອອກຈາກຊົນນະບົດຢ່າງເປັນທາງການ."
ຢູ່ສະຖາບັນວິຈິດຕະກຳສູນກາງຈີນ,ທ່ານເຊິນດ່ານຊິ່ນໄດ້ຮໍ່າຮຽນທິດສະດີແຕ້ມຮູບຝ່າຍຕາເວັນຕົກຢ່າງເປັນລະບົບ,ໄດ້ເລີ່ມຕົ້ນຊີວິດແຕ້ມຮູບແບບອາຊີບຂອງທ່ານ.ພາຍຫລັງສອງປີ,ທ່ານເຊິນດ່ານຊິ່ນໄດ້ໄປຕິເບດເທື່ອທີ່ສອງ,ໃນເດືອນສິງຫາປີ1980,"ປະມວນຮູບແຕ້ມກ່ຽວກັບຕິເບດ"ທີ່ທ່ານແຕ້ມນັ້ນໄດ້ພາໃຫ້ເກີດມີຄວາມຄືກຄື້ນໃນງານວາງສະແດງຕອນຮຽນຈົບຂອງຫ້ອງຮຽນປະລິນຍາໂທສະຖາບັນວິຈິດຕະກຳສູນກາງຈີນ,ກາຍເປັນຫລັກຫມາຍທາງແຫ່ງຫນຶ່ງໃນປະຫວັດວິຈິດຕະກຳຍຸກປະຈຸບັນຂອງຈີນ.
ປີ1982,ທ່ານເຊິນດ່ານຊິ່ນໄດ້ໄປຮຽນຕໍ່ຢູ່ອາເມລິກາ.ເວົ້າສຳລັບທ່ານເຊັນດ່ານຊິ່ນແລ້ວ,ຄວາມເຍົ້າຍວນທີ່ໃຫຍ່ກວ່າໝູ່ການໄປອາເມລິກາແມ່ນສາມາດເຫັນຕົ້ນສະບັບຂອງນັກແຕ້ມຝ່າຍຕາເວັນຕົກຈຳນວນຫຼວງຫລາຍ.ເພື່ອແກ້ໄຂບັນຫາດ້ານຊີວິດການເປັນຢູ່,ທ່ານທັງແຕ້ມຮູບໃຫ້ລະບຽງວາງສະແດງຮູບພາບ,ທັງປະດິດສ້າງການແຕ້ມຮູບ.ໃນການດຳລົງຊີວິດຢູ່ອາເມລິກາເປັນເວາລາ18ປີ,ທ່ານເຊິນດ່ານຊິ່ນໄດ້ແຕ້ມຮູບຈຳນວນຫຼວງຫຼາຍ,ໄດ້ສະສົມບົດຮຽນອັນອຸດົມສົມບູນ.
ປີ2000,ພາຍຫລັງທ່ານເຊິນດ່ານຊິ່ນກັບຄືນປະເທດຈີນແລ້ວ,ຖືກມະຫາວິທະຍາໄລຊິ່ນຮວາຈ້າງເປັນສາດສະດາຈານຂອງສະຖາບັນສິລະປະໂດຍຈຳເພາະ.ການກັບຄືນປະເທດຂອງທ່ານໄດ້ນຳເອົາອາກາດສົດໃສໃຫ້ແກ່ວົງການສິລະປະພາຍໃນປະເທດຈີນ.ທັດສະນະຄະຕິດ້ານສິລະປະແລະແບບວິທີສອນຂອງທ່ານໄດ້ເຮັດໃຫ້ວົງການສິລະປະໃນຄາວນັ້ນເປີດຫູເປີດຕາ,ທ່ານເນັ້ນຫນັກການສອນຕາມສະພາບຄວາມສາມາດ,ເນັ້ນຫນັກການປົດປ່ອຍບຸກຄະລິກລັກສະນະຂອງໝົດທຸກຄົນ,ພະຍາຍາມສຸດຂີດເສີມຂະຫຍາຍຄວາມຊຳນານພິເສດຂອງທຸກຄົນ,ກະຕຸກຄວາມບັນດານໃຈຂອງທຸກຄົນ.
ຫນຶ່ງປີກ່ອນ,ທ່ານເຊິນດ່ານຊິ່ນໄດ້ລາອອກຈາກຕຳແຫນ່ງສາດສະດາຈານມະຫາວິທະຍາໄລຊິນຮວາ,ກາຍເປັນນັກແຕ້ມອິດສະຫຼະ.ທ່ານບໍ່ພຽງແຕ່ມັກແພງແຕ້ມຮູບເທົ່ານັ້ນ,ຍັງມັກດົນຕີຫລາຍ,ປີ2002,ທ່ານໄດ້ພິມຈຳຫນ່າຍຊຸມນຸມບົດປະພັນຕ່າງໆ,ໄດ້ຮັບຄວາມຊົມເຊີຍຈາກຜູ້ອ່ານທັງຫລາຍ.
ບົດຄວາມຂອງທ່ານເຊິນດ່ານຊິ່ນ,ໄດ້ແຊກຊືມຈິດໃຈຕິຕຽນອັນສະເໝີຕົ້ນສະເໝີປາຍຂອງທ່ານໃນລະຫວ່າງແຕ່ລະຄຳແຕ່ລະປະໂຫຍກ,"ຊຸມນຸມບົດປະພັນຖອຍຄືນຫລັງ"ຂອງທ່ານໄດ້ຈັດໂຮມບົດຄວາມສ່ວນຫນຶ່ງຂອງທ່ານພາຍຫລັງກັບຄືນປະເທດຈີນຫ້າປີມານີ້,ຫົວເລື້ອງໄດ້ກ່ຽວພັນເຖິງຫລາຍດ້ານຄືຮູບແຕ້ມ,ຮູບພາບ,ຕົວເມືອງ,ການສຶກສາເປັນຕົ້ນ,ບົດຄວາມຂອງທ່ານໄດ້ສັງເກດຢ່າງແຫຼມຄົມ,ບັນລະຍາຍຂໍ້ປີກຍ່ອຍຢ່າງມີຊີວິດຊີວາ,ໄດ້ສຳຫລວດຄືນແລະຊັກຖາມຂົງເຂດສິລະປະມະນຸດຂອງຈີນໃນຮ້ອຍປີມານີ້ັຢ່າງເລິກເຊິ່ງ.
|
