|
ສະບາຍດີທ່ານຜູ່ຟັງທີ່ໂຄລົບ, ໃນໜຶ່ງປີທີ່ຜ່ານມາ, ເຖິງວ່າກິລາປະເພດແຂ່ງຂັນຂອງຈີນບໍ່ຮຸ່ງເຮືອງເໝືອນງານກິລາໂອລິມປິກອາແຕນປີ 2004 ກໍ່ຕາມ, ແຕ່ກໍ່ມີອັນໂລດໂຜນແລະຈຸດຮຸ່ງຢ່າງຫຼວງຫຼາຍ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ກິລາຈີນເດີນຜ່ານປີ 2005 ທີ່ບໍ່ທຳມະດາ.
ປີ 2005, ນັກກິລາຈີນຊິງໄດ້ແຊມປຽນລະດັບໂລກຂອງລາຍການແຂ່ງຂັນງານກິລາໂອລິມປິກ 28 ຫຼຽນ, ຖັດຈາກອາເມລິກາແລະຣັດເຊຍ. ໃນລາຍການທ່າແຮງທີ່ມີມູນເຊື້ອ ເຊັ່ນ ປິ່ງປ່ອງ ດອກປີກໄກ່ ໂດດນ້ຳແລະຍິງປືນເປັນຕົ້ນ, ຈີນສືບຕໍ່ຮັກສາຖານະທ່າແຮງຂອງຕົນ, ໃນງານແຂ່ງຂັນປິ່ງປ່ອງຊິງຊະນະເລີດລະດັບໂລກທີ່ຊຽງໄຮ້ໃນເດືອນພຶດສະພາປີ 2005, ທີມຈີນຊິງໄດ້ຫຼຽນຄຳທັງໝົດຂອງລາຍການດ່ຽວ 5 ລາຍການ, ໃນງານແຂ່ງຂັນດອກປີກໄກ່ຊູເດີມານຂັບປະເພດໝູ່ຄະນະປະສົມປີ 2005 ທີ່ຈັດຂຶ້ນຢູ່ທີ່ປັກກິ່ງໃນເດືອນພຶດສະພາ, ທີມຈີນໄດ້ເອົາຊະນະທີມອິນໂດເນເຊຍ ປະເທດເຂັ້ມແຂງດ້ານກິລາດອກປີກໄກ່ທີ່ມີມູນເຊື້ອໃນການແຂ່ງຂັນຮອບຊິງຊະນະເລີດ, ແລ້ວຊິງໄດ້ແຊມປຽນ. ທີມຈີນເລີຍກາຍເປັນທີມທີ່ຊິງໄດ້ແຊມປຽນງານແຂ່ງຂັນຊູເດີມານຂັບ ໂທມາສຂັບແລະຢູເບີຂັບທີມທຳອິດໃນໂລກ. ໃນງານແຂ່ງຂັນລອຍນ້ຳຊິງຊະນະເລີດລະດັບໂລກທີ່ຈັດຂຶ້ນຢູ່ມົງເຣອານແຫ່ງການາດາໃນເດືອນກໍລະກົດ, ທີມໂດດນ້ຳຈີນເຊິ່ງຖືກເອີ້ນເປັນ "ທີມແຫ່ງຄວາມຝັນ" ຊິງໄດ້ຫຼຽນຄຳ 5 ຫຼຽນໃນຈຳນວນ 10 ຫຼຽນຂອງລາຍການໂດດນ້ຳ, ໄດ້ປ້ອງກັນຖານະທ່າແຮງທີ່ບຸກບໍ່ແຕກອີກເທື່ອໜຶ່ງ.
ໃນງານກິລາໂອລິມປິກອາແຕນ, ນັກກິລາຈີນຊິງໄດ້ຫຼຽນຄຳ 32 ຫຼຽນ, ຖ້າຢາກຊິງໄດ້ຫຼຽນຄຳຫຼາຍກວ່າເກົ່າອີກໃນງານກິລາໂອລິມປິກປັກກິ່ງ, ກໍ່ຈຳເປັນຕ້ອງຊອກຫາຈຸດບຸກທະລຸໃໝ່. ປີ 2005, ນັກກິລາຈີນກໍ່ໄດ້ຮັບການບຸກທະລຸໃນບາງລາຍການແຂ່ງຂັນງານກິລາໂອລິມປິກທີ່ອ່າວຫຼ້າຫຼັງໃນເມື່ອກ່ອນ. ໂດຍສະເພາະແມ່ນໃນງານແຂ່ງຂັນຊົກມວຍຊິງຊະນະເລີດລະດັບໂລກຄັ້ງທີ 13 ທີ່ຈັດຂຶ້ນຢູ່ເມືອງໝຽນຢາງ ທາງພາກຕາເວັນຕົກສຽງໃຕ້ຂອງຈີນໃນເດືອນພະຈິກປີນີ້, ທ້າວໂຈ່ວຊື້ມິງ ນັກກິລາຈີນໄດ້ເອົາຊະນະຄູ່ແຂ່ງຂັນທີ່ເຂັ້ມແຂງໝົດທຸກຄົນ, ແລ້ວຊິງໄດ້ຫຼຽນຄຳໃນຮຸ້ນ 48 ກິໂລ, ໄດ້ຂຽນໜ້າໃໝ່ຂອງປະຫວັດນັກກິລາຈີນທີ່ບໍ່ເຄີຍຊິງໄດ້ຫຼຽນຄຳໃນລາຍການແຂ່ງຂັນຊົກມວຍຂະໜາດໃຫຍ່ລະດັບໂລກ. ທ່ານຊຸຍຕ້າລິນ ຮອງປະທານຄະນະກຳມະການຈັດງານກິລາໂອລິມປິກຈີນເວົ້າວ່າ:
"ໃນການແຂ່ງຂັນ, ທ້າວໂຈ່ວຊື້ມິງໄດ້ສະແດງລະດັບແລະແບບແຜນຂອງຕົນຢ່າງຈົບງາມ, ໄດ້ຮັບໄຊຊະນະດ້ວຍທ່າແຮງອ່າວໃຫຍ່. ການບຸກທະລຸຂອງທ້າວໂຈ່ວຊື້ມິງເທື່ອນີ້, ໄດ້ເພີ່ມຄວາມໝັ້ນໃຈຂອງວົງການມວຍຈີນ, ແລະກໍ່ໄດ້ເພີ່ມຄວາມຕັດສິນໃຈຂອງນັກກິລາມວຍຈີນທີ່ຈະຍາດເອົາຜົນງານດີໃນງານກິລາໂອລິມປິກປີ 2008."
ຕອນຮຸ່ງເຊົ້າວັນທີ 7 ສິງຫາປີ 2005, ການກິລາຈີນໄດ້ມີການບຸກທະລຸໃໝ່ອີກ ນັ້ນກໍ່ຄື ທ້າວສຽນເຈີ້ນຮວາ ນັກກິລາຈີນຊິງໄດ້ແຊມປຽນປະເພດດ່ຽວເພດຊາຍໃນການແຂ່ງຂັນ 5 ລາຍການຍຸກປັດຈຸບັນທີ່ຈັດຂຶ້ນຢູ່ທີ່ວັກໂຊວີແຫ່ງໂປໂລຍ, ທ້າວສຽນເຈີ້ນຮວາເລີຍກາຍເປັນຊາວອາຊີຜູ່ທຳອິດທີ່ຊິງໄດ້ແຊມປຽນຂອງລາຍການແຂ່ງຂັນດັ່ງກ່າວ.
ເດືອນພຶດສະພາປີ 2005, ທ້າວລິວສຽງ ນັກກິລາແລ່ນຂ້າມຮົ້ວ 110 ແມັດຂອງຈີນໄດ້ຮັບລາງວັນນັກກິລາຮຸ້ນໃໝ່ຜູ່ດີເດັ່ນກວ່າໝູ່ໃນລາງວັນໃຫຍ່ໂລແຣນສ໌ກິລາໂລກ ເຊິ່ງຖືກເອີ້ນເປັນ "ໂອສ໌ກາແຫ່ງເວທີກິລາ" ຍ້ອນມີການປະພຶດອັນລ້ຳເລີດໃນງານກິລາໂອລິມປິກອາແຕນ. ແຕ່ວ່າ, ນັກກິລາຈີນທີ່ສະເທືອນຈີນຢ່າງແທ້ຈິງໃນປີ 2005 ແມ່ນທ້າວຕິງຈິ້ນຮຸຍ ຊາວໜຸ່ມທີ່ມີອາຍຸພຽງແຕ່ 18 ປີ. ບໍ່ຕ້ອງສົງໄສເລີຍວ່າ ໃນສະໜາມແຂ່ງຂັນສະນຸກເກີສາກົນປີ 2005 ທ້າວຕິງຈິ້ນຮຸຍແມ່ນປະຈັກຕາຄົນກວ່າໝູ່. ພາຍໃນເວລາອັນສັ້ນໆ ຄື 8 ເດືອນ, ທ້າວຕິງຈິ້ນຮຸຍໄດ້ເຮັດໃຫ້ເວທີກິລາສະນຸກເກີຂອງໂລກຕົກສະເງີ້ສອງເທື່ອ: ກ່ອນອື່ນ ເພິ່ນຊິງໄດ້ແຊມປຽນໃນງານແຂ່ງຂັນສະນຸກເກີຈີນໂອເພັນທີ່ຈັດຂຶ້ນໃນເດືອນເມສາ; ໃນເດືອນທັນວາ, ທ້າວຕິງຈິ້ນຮຸຍໄດ້ສ້າງຄວາມອັດສະຈັນໃຫຍ່ກວ່າເກົ່າອີກໃນງານແຂ່ງຂັນສະນຸກເກີຊິງຊະນະເລີດອັງກິດ, ເພິ່ນໄດ້ເອົາຊະນະນັກກິລາເກັ່ງທີ່ມີຊື່ສຽງໃນໂລກ 9 ຄົນຕາມໆກັນ, ແລ້ວຊິງໄດ້ແຊມປຽນຂອງງານແຂ່ງຂັນສະນຸກເກີຊິງຊະນະເລີດອັງກິດເຊິ່ງມີຄວາມສໍາຄັນຖັດຈາກການແຂ່ງຂັນຊິງຊະນະເລີດຂອງໂລກ, ທັງຍັງໄດ້ເປັນນັກກິລາທີ່ບໍ່ແມ່ນຂອງສາມເກາະອັງກິດຜູ່ທຳອິດທີ່ຍາດເອົາກຽດສັກສີດັ່ງກ່າວ. ພາຍຫຼັງຊິງໄດ້ແຊມປຽນແລ້ວ, ທ້າວຕິງຈິ້ນຮຸຍເວົ້າວ່າ:
"ສາມາດຊິງໄດ້ແຊມປຽນໃນງານແຂ່ງຂັນສະນຸກເກີຢູ່ອັງກິດ, ເວົ້າສຳລັບຕົນເອງແລ້ວແມ່ນການບຸກທະລຸທີ່ໃຫຍ່ຫຼວງ, ມັນແມ່ນງານແຂ່ງຂັນສະນຸກເກີທີ່ມີຄວາມສຳຄັນອັນດັບສອງໃນໂລກ, ຂ້າພະເຈົ້າແມ່ນເລີ່ມແຂ່ງຂັນຈາກຮອບທຳອິດເຊິ່ງແມ່ນຮອບຕ່ຳສຸດ, ນີ້ໄດ້ເພີ່ມຄວາມເຊື່ອໝັ້ນຕົນເອງໃຫ້ແກ່ຂ້າພະເຈົ້າ, ເຮັດໃຫ້ຂ້າພະເຈົ້າໄດ້ຮັບບົດຮຽນຢ່າງຫຼວງຫຼາຍ."
ປີ 2005, ສາມາດເວົ້າໄດ້ວ່າ ທີມຜະຈົນໄພຂົ້ວໂລກໃຕ້ຂອງຈີນແມ່ນໝູ່ຄະນະກິລາທີ່ດີເດັ່ນກວ່າໝູ່. ວັນທີ 16 ທັນວາ, ທີມຜະຈົນໄພຂົ້ວໂລກໃຕ້ຂອງຈີນທີ່ປະກອບດ້ວຍ 7 ຄົນ ເມື່ອໄດ້ເດີນຜ່ານ 120 ກິໂລແມັດເປັນເວລາ 10 ມື້ຢ່າງລຳບາກກາກກຳແລ້ວ, ໃນທີ່ສຸດກໍ່ໄດ້ໄປຮອດຈຸດຂົ້ວໂລກໃຕ້, ສະມາຊິກສາມຄົນໃນທີມຜະຈົນໄພກອງນີ້ ຄື ທ້າວຫວັງຢົງເຟິງ ຫົວໜ້າທີມປິນພູຈີນກັບທ້າວຊຶໂລ້ແລະທ້າວລິວຈ້ຽນ ເລີຍໄດ້ສຳເລັດວິລະກຳອັນຍິ່ງໃຫຍ່ຄື "7 ບວກ 2" ໝາຍຄວາມວ່າໄດ້ສຳເລັດການເຄື່ອນໄຫວຜະຈົນໄພທີ່ເອົາຊະນະຈອມພູສູງສຸດຂອງ 7 ມະຫາທະວີບແລະເອົາຊະນະຈຸດຂົ້ວໂລກໃຕ້ແລະຈຸດຂົ້ວໂລກເໜືອ. ນີ້ແມ່ນຄົນຈີນສຳເລັດວິລະກຳອັນຍິ່ງໃຫຍ່ "7 ບວກ 2" ເປັນຄັ້ງທຳອິດ, ກ່ອນໜ້ານີ້, ໃນທົ່ວໂລກມີພຽງ 5 ຄົນເທົ່ານັ້ນໄດ້ສຳເລັດວິລະກຳອັນຍິ່ງໃຫຍ່ດັ່ງກ່າວ.
ປີ 2005 ແມ່ນປີທຳອິດທີ່ງານກິລາໂອລິມປິກໄດ້ກ້າວເຂົ້າຮອບປັກກິ່ງ, ໃນປີ 2005 ນີ້, ວຽກງານກະກຽມງານກິລາໂອລິມປິກປັກກິ່ງໄດ້ມີຄວາມຄືບໜ້າຢ່າງສະດວກ. ວັນທີ 26 ມິຖຸນາ, ຄຳຂວັນຫຼັກຂອງງານກິລາໂອລິມປິກປັກກິ່ງປີ 2008 ໄດ້ປະກາດຢ່າງຄຶກຄື້ນ, ທ່ານລິສາງຊຸນ ກຳມະ ການປະຈຳກົມການເມືອງສູນກາງພັກກອມມູນິດຈີນໄດ້ປະກາດເນື້ອໃນຄຳຂວັນດັ່ງກ່າວ:
ຄຳຂວັນຫຼັກຂອງງານກິລາໂອລິມປິກປີ 2008 ແມ່ນ "ໂລກອັນດຽວກັນ ຄວາມຝັນອັນດຽວກັນ".
ວັນທີ 11 ພະຈິກ, ໃນເວລາຫ່າງຈາກການເປີດສາກງານກິລາໂອລິມປິກປັກກິ່ງຍັງມີ 1000 ມື້ເຕັມໆ, "ຝູຫວາ" ເຊິ່ງເປັນຕົວນຳໂຊກຂອງງານກິລາໂອລິມປິກປັກກິ່ງ ຄື ຕຸກກະຕາຮູບເດັກ 5 ໂຕທີ່ໜ້າຮັກທີ່ສຸດ ໄດ້ປະກາດຢ່າງຄຶກຄື້ນ. "ຝູຫວາ" ແມ່ນທູດໄມຕີຈິດທີ່ຈີນອຸທິດໃຫ້ງານກິລາໂອລິມປິກແລະໂລກ. ຕົວນຳໂຊກ 5 ໂຕດັ່ງກ່າວນີ້ກໍ່ໄດ້ກາຍເປັນຕົວນຳໂຊກທີ່ມີຈຳນວນຫຼາຍກວ່າໝູ່ໃນປະຫວັດງານກິລາໂອລິມປິກ.
ການກໍ່ສ້າງຫໍແລະສະໜາມກິລາຂອງງານກິລາໂອລິມປິກປັກກິ່ງກໍ່ມີຄວາມຄືບໜ້າຢ່າງສະດວກ, ວັນທີ 18 ຕຸລາ, ຫໍກິລາຂອງມະຫາວິທະຍາໄລວິທະຍາສາດເຕັກໂນໂລຊີປັກກິ່ງເຊິ່ງຈະໃຊ້ເປັນສະໜາມແຂ່ງຂັນຢູໂດແລະເທຄວນໂດໃນງານກິລາໂອລິມປິກປັກກິ່ງໄດ້ເລີ່ມລົງ ມືກໍ່ສ້າງ. ເມື່ອເປັນແນວນີ້, ຫໍແລະສະໜາມກິລາຂອງງານກິລາໂອລິມປິກປັກກິ່ງທີ່ສ້າງໃໝ່ 14 ແຫ່ງໄດ້ເລີ່ມລົງມືກໍ່ສ້າງແລ້ວ. ເຈົ້າໜ້າທີ່ຄະນະກຳມະການຈັດງານກິລາໂອລິມປິກປັກກິ່ງໄດ້ໃຫ້ຄຳໝັ້ນສັນຍາວ່າ, ຫໍແລະສະໜາມກິລາທັງໝົດຂອງງານກິລາໂອລິມປິກປັກກິ່ງຈະສ້າງສຳເລັດກ່ອນທ້າຍປີ 2007.
ວຽກງານຊັກຊວນພໍ່ຄ້າມາລົງທຶນຂອງງານກິລາໂອລິມປິກກໍ່ໄດ້ຮັບຜົນງານທີ່ໜ້າເພິ່ງພໍໃຈ, ແຜນການສະໜັບສະໜູນງານກິລາໂອລິມປິກປັກກິ່ງສາມຂັ້ນຄື "ແຜນການຄູ່ຂາຮ່ວມມື" "ແຜນການຜູ່ສະໜັບສະໜູນ" ແລະ "ແຜນການຜູ່ສະໜອງ" ໄດ້ເລີ່ມປະຕິບັດແລ້ວ. ວິສາຫະກິດ 10 ແຫ່ງໄດ້ກາຍເປັນຄູ່ຂາຮ່ວມມືງານກິລາໂອລິມປິກປັກກິ່ງ, ມີວິສາຫະກິດ 9 ແຫ່ງໄດ້ກາຍເປັນຜູ່ສະໜັບສະໜູນງານກິລາໂອລິມປິກປັກກິ່ງແລ້ວ. ນອກນີ້, ວຽກງານກະກຽມດ້ານການປ້ອງກັນຄວາມສະຫງົບແລະປ້ອງກັນພະຍາດເປັນຕົ້ນ ກໍ່ໄດ້ຮັບຄວາມຄືບໜ້າໃນລະດັບຕ່າງກັນໃນປີ 2005.
ກິລາຈີນໄດ້ເດີນຜ່ານປີ 2005 ທີ່ບໍ່ທຳມະດາ, ສ່ວນນັກກິລາຈີນທັງຫຼາຍກໍ່ຫວັງຢ່າງແຮງກ້າຢາກຍາດໄດ້ຜົນງານດີກວ່າເກົ່າໃນປີ 2006.
ທ່ານຜູ່ຟັງທີ່ໂຄລົບ, ລາຍການໂລກກິລາພາກນີ້ຂໍຈົບລົງພຽງທໍ່ນີ້, ຂໍອວຍພອນໃຫ້ທ່ານຜູ່ຟັງທັງຫຼາຍຈົ່ງສະບາຍດີໃນປີໃໝ່, ພົບກັນໃໝ່ໃນອາທິດໜ້າ, ສະບາຍດີ.
|
