|
|
 |
| (GMT+08:00)
2006-01-13 16:30:11
|
 |
|
ການຮ່ວມມືດ້ານວິທະຍາສາດເຕັກນິກທົ່ວໂລກພວມລົງສູ່ລວງເລິກ(ສຽງ)
cri
Author: mo
|
ຫົວຂໍ້ຄົ້ນຄວ້າວິທະຍາສາດພວມນັບມື້ນັບມີລັກສະນະທົ່ວໂລກ. ນີ້ແມ່ນຄວາມຮຽກຮ້ອງອັນຮີບດ່ວນແຫ່ງການວິວັດທະນາການເສດຖະກິດສັງຄົມມະນຸດ. ຄື້ນຊູນາມີມະຫາສະໝຸດອິນເດຍ, ລົມພາຍຸຄັດດຼີນາກະໜ່ຳອາເມລິກາ, ພະຍາດໄຂ້ຫວັດສັດປີກແຜ່ລາມໃນທົ່ວໂລກ, ລາຄານ້ຳມັນດິບສ້າງສະຖິຕິສູງສຸດເລື້ອຍໆ…ໂລກໄດ້ເປັນພິຍານແຫ່ງໄພພິບັດແລະທົນຕໍ່ການທົດສອບຕັ້ງຫລາຍເທື່ອ. ໃນຊູ່ມື້ນີ້ທີ່ການພົວພັນໃນໂລກນັບມື້ນັບແໜ້ນແຟ້ນ, ເມື່ອປະເຊີນກັບການຂົ່ມຂູ່ຕ່າງໆເຊັ່ນພະຍາດຕິດແປດເປັນຕົ້ນ, ບໍ່ວ່າປະເທດໃດກໍຫຼີກບໍ່ມົ້ມ. ຖ້າຢາກແກ້ໄຂບັນຫາຂອງໂລກທີ່ຕັດສິນອະນາຄົດແຫ່ງການພັດທະນາແບບຍືນຍົງຂອງມະນຸດເຊັ່ນ: ການປ່ຽນແປງຂອງດິນຟ້າອາກາດ ພະລັງງານ ແລະສິ່ງແວດລ້ອມເປັນຕົ້ນ, ກໍຕ້ອງການບັນດາປະເທດຮ່ວມກັນຄົ້ນຄວ້າແລະຮ່ວມມືກັນ.
ປີ 2005, ການຮ່ວມມືລະຫວ່າງຊາດໃນບັນຫາວິທະຍາສາດເຕັກນິກທີ່ສຳຄັນຫຼາຍປະການລ້ວນແຕ່ໄດ້ຮັບຄວາມຄືບໜ້າອັນຕັ້ງໜ້າ. ໃຕ້ການເປັນປະທານຂອງອົງການຢູເນັສໂກ, ປະເທດແຄມຝັ່ງມະຫາສະໝຸດອິນເດຍໄດ້ສຳເລັດການປຶກສາຫາລືກັນຫລາຍຮອບກ່ຽວກັບການສ້າງລະບົບເຕືອນໄພຄື້ນຊູນາມີມະຫາສະໝຸດອິນເດຍ. ໃນກອງປະຊຸມຫລຸດໄພຂອງໂລກທີ່ຈັດຂຶ້ນຢູ່ໂຄເປແຫ່ງຍີ່ປຸ່ນໃນເດືອຍມັງກອນປີ 2005, ຜູ້ແທນສະຫະປະຊາຊາດໄດ້ປະກາດໂຄງຄວາມຄິດແຫ່ງການສ້າງລະບົບເຕືອນໄພຂອງໂລກ, ລະບົບດັ່ງກ່າວຈະເຕືອນໄພລ່ວງໜ້າໂດຍແນໃສ່ໄພທຳມະຊາດທຸກປະເພດ.
ໃຕ້ຄວາມພະຍາຍາມຂອງປະຊາຄົມໂລກ, ອະນຸສັນຍາກຽວໂຕທີ່ມີວັດຖຸປະສົງຫລຸດການລະບາຍອາຍຫ້ອງອຸ່ນທົ່ວໂລກໄດ້ມີຜົນບັງຄັບໃຊ້ຢ່າງເປັນທາງການໃນເດືອນກຸມພາປີ2005. ເດືອນຕຸລາ, ໃນກອງປະຊຸມສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດທີ່ຈັດຂຶ້ນຢູ່ມົງເຣອານແຫ່ງການາດາ, ຜູ້ແທນບັນດາປະເທດເຫັນດີເລີ່ມການເຈລະຈາກ່ຽວກັບເປົ້າໝາຍຫລຸດການລະບາຍອາຍຫ້ອງອຸ່ນຫລັງອະນຸສັນຍາກຽວໂຕ, ແລະຕົກລົງຈັດການສົນທະນາຄົ້ນຄວ້າຫາລືຍຸດທະສາດຍາວໄກແຫ່ງການຄວບຄຸມບໍ່ໃຫ້ທົ່ວໂລກອຸ່ນຂຶ້ນ.
ເດືອນມິຖຸນາປີ 2005, 6 ຝ່າຍທີ່ເຂົ້າຮ່ວມແຜນການເຄື່ອງປະຕິກອນທົດລອງນິວເຄຼຍຄວາມຮ້ອນສາກົນເຊັ່ນສະຫະພາບເອີລົບ ອາເມລິກາ ຣັດເຊຍ ຍີ່ປຸ່ນ ສ.ເກົາຫລີ ແລະຈີນໄດ້ກ້າວເຖິງຂັ້ນເປັນເອກະສັນກັນ, ຕົກລົງສ້າງໂຄງການທີ່ຈະລົງທຶນ 1 ຕື້ໂດລາດັ່ງກ່າວຢູ່ຝຣັ່ງ, ອັນໄດ້ຢ່ວງບາດກ້າວສຳຄັນບົນເສັ້ນທາງຊອກຄົ້ນພະລັງງານທີ່ປອດໄພ ມີປະສິດທິພາບສູງແລະສະອາດໃນອະນາຄົດ.
ປີ 2005, ໄຂ້ຫວັດສັດປີກໄດ້ກາຍເປັນຫົວຂໍ້ສຳຄັນຂໍ້ໜຶ່ງໃນກອງປະຊຸມຕ່າງໆຂອງໂລກແລະຂອງພາກພື້ນ. ໃນກອງປະຊຸມສາກົນກ່ຽວກັບບັນຫາໄຂ້ຫວັດສັດປີກທີ່ຈັດຂຶ້ນຢູ່ເຊີແນວ, ໄດ້ຜ່ານແຜນການດຳເນີນງານທົ່ວໂລກທີ່ມີງົບປະມານ 1 ຕື້ໂດລາສະຫະລັດນັ້ນຢ່າງສຳເລັດຜົນ.
ເຕັກນິກໂທລະຄົມຂໍ້ມູນຂ່າວສານໄດ້ປ່ຽນແປງຢ່າງໄວພະລັນ, ເງິນທຶນ ຜູ້ມີຄວາມຮູ້ຄວາມສາມາດ ແລະຄວາມຮູ້ເປັນຕົ້ນໄດ້ຈໍລະຈອນຢ່າງວ່ອງໄວພາຍໃນຂອບເຂດທົ່ວໂລກ, ພວມຊຸກຍູ້ໃຫ້ຈັດສັນປັດໃຈພັດທະນາວິທະຍາສາດເຕັກນິກພາຍໃນຂອບເຂດທົ່ວໂລກ, ການຮ່ວມມືດ້ານວິທະຍາສາດເຕັກນິກໄດ້ກາຍເປັນການເຄື່ອນໄຫວຂອງໂລກ.
ບົດລາຍງານສະບັບໜຶ່ງທີ່ອົງການຮ່ວມມືແລະພັດທະນາເສດຖະກິດປະກາດໃນປີ 2005 ຊີ້ອອກວ່າ, ຈຳນວນບໍລິສັດຂ້າມຊາດທີ່ສ້າງສູນຄົ້ນຄວ້າພັດທະນາຢູ່ຕ່າງປະເທດນັ້ນພວມເພີ່ມຫລາຍຂຶ້ນ. ໃນການລົງທຶນຄົ້ນຄວ້າວິທະຍາສາດເຕັກນິກຂອງວິສາຫະກິດຮົງກາລີແລະອຽກລັງນັ້ນ, ທຶນ 70% ມາຈາກບໍລິສັດຂ້າມຊາດຂອງຕ່າງປະເທດ. ຢູ່ຊູແອັດ ແອັສປາຍ ແລະປອກຕຸຍການເປັນຕົ້ນ, ອັດຕາດັ່ງກ່າວກໍໄດ້ລື່ນກາຍ 40%. ນອກນີ້, ຕາມສະຖິຕິ, ແຕ່ຊຸມປີ 80 ສັດຕະວັດທີ່ແລ້ວເປັນຕົ້ນມາ, ຄ່າໃຊ້ຈ່າຍໃນການຄົ້ນຄວ້າພັດທະນາຂອງບໍລິສັດຕ່າງປະເທດຢູ່ອາເມລິກາໄດ້ເພີ່ມຂຶ້ນ 3 ເທົ່າ, ທຶນຄົ້ນຄວ້າພັດທະນາທີ່ບໍລິສັດຕ່າງປະເທດທຸ່ມເທເຂົ້າອາເມລິກາຫລາຍກວ່າບໍລິສັດອາເມລິກາລົງທຶນເຂົ້າໃນການຄົ້ນຄວ້າພັດທະນາຢູ່ປະເທດອື່ນ.
ການຄົ້ນຄວ້າວິທະຍາສາດໃນຊູ່ມື້ນີ້ນັບມື້ນັບສັບສົນເຂົ້າ, ການຮ່ວມມືກັນໃນໂຄງການສຳຄັນຈຳນວນໜຶ່ງນັ້ນກໍແມ່ນຄວາມຮຽກຮ້ອງຕ້ອງການໃນຕົວຂອງການພັດທະນາວິທະຍາສາດ. ຄວາມກ້າວໜ້າຂອງເຕັກນິກໄດ້ເຮັດໃຫ້ຄວາມສຳຄັນຂອງປັດໃຈເຂດແຄວ້ນຂອງການເຄື່ອນໄຫວຄົ້ນຄວ້າວິທະຍາສາດເຕັກນິກຫລຸດໜ້ອຍລົງ, ຄວາມເຫີນຫ່າງກັນບໍ່ເປັນສິ່ງຂັດຂວາງອີກແລ້ວ, ອັນໄດ້ສ້າງຄວາມສະດວກໃໝ່ໃຫ້ແກ່ການຮ່ວມມືຄົ້ນຄວ້າວິທະຍາສາດເຕັກນິກພາຍໃນຂອບເຂດທົ່ວໂລກ. ແຜນການໝວດແຢນມະນຸດທີ່ນັກວິທະຍາສາດຫລາຍປະເທດຮ່ວມມືກັນສຳເລັດນັ້ນກໍແມ່ນຕົວຢ່າງທີ່ສຳເລັດຜົນໃນຫລາຍປີມານີ້.
ວິທະຍາສາດເຕັກນິກໄດ້ກາຍເປັນກຳລັງສຳຄັນໃນການຊຸກຍູ້ການພັດທະນາເສດຖະກິດແລະສັງຄົມແລ້ວ. ກະແສຟອງຂອງໂລກາວິວັດການຮ່ວມມືວິທະຍາສາດເຕັກນິກໄດ້ນຳເອົາການທ້າຍທາຍແລະໂອກາດມາໃຫ້ບັນດາປະເທດ. ພາຍຫລັງພິຈາລະນາສະຖານະການແລ້ວ, ປະເທດພັດທະນາແລະປະເທດພວມພັດທະນາບໍ່ໜ້ອຍໄດ້ເພີ່ມການລົງທຶນເຂົ້າໃນດ້ານວິທະຍາສາດເຕັກນິກດ້ວຍຄວາມແຮງທີ່ບໍ່ເຄີຍມີມາກ່ອນ, ໄດ້ເລັງສາຍຕາໃສ່ 5 ປີຫລື 10 ປີຂ້າງໜ້າ, ຕັ້ງໜ້າຮັບມືກັບການແກ່ງແຍ່ງດ້ານວິທະຍາສາດເຕັກນິກທົ່ວໂລກທີ່ນັບມື້ນັບດຸເດືອດ.
ໂລກາວິວັດການຮ່ວມມືວິທະຍາສາດເຕັກນິກໄດ້ພັດທະນາລົງສູ່ລວງເລິກນັ້ນ, ໄດ້ສ້າງຄວາມອາດເປັນໄປໄດ້ອັນໃໝ່ແກ່ປະເທດພວມພັດທະນາໄດ້ຮັບເງິນທຶນແລະເຕັກນິກຫລາຍກວ່າເກົ່າແລະເລັ່ງລັດປະດິດສ້າງວິທະຍາສາດເຕັກນິກເປັນຕົ້ນ. ແຕ່ກໍຄວນເຫັນວ່າ, ປັດຈຸບັນ, ການຈັດສັນຊັບພະຍາກອນການຮ່ວມມືດ້ານວິທະຍາສາດເຕັກນິກພາຍໃນຂອບເຂດທົ່ວໂລກຍັງແມ່ນປະເທດພັດທະນາເປັນຜູ້ນຳທາງ.
ໃນບົດລາຍງານຂອງໂລກສະບັບທຳອິດທີ່ຊື່ວ່າ"ກ້າວໄປສູ່ສັງຄົມແຫ່ງຄວາມຮູ້"ທີ່ອົງການຢູເນັສໂກປະກາດໃນເດືອນພະຈິກປີ 2005 ໄດ້ຊີ້ອອກວ່າ, ລະຫວ່າງປະເທດພັດທະນາກັບປະເທດພວມພັດທະນາພວມມີຊ່ອງຫວ່າງດ້ານຄວາມຮູ້ອັນໃຫຍ່ຫລວງທີ່ບໍ່ເຄີຍມີມາກ່ອນ. ສະມາຊິກອົງການອາເປັກລົງທຶນເຂົ້າໃນການຄົ້ນຄວ້າວິທະຍາສາດສະເລ່ຍແລ້ວໄດ້ກວມ GDP 2,2%, ແຕ່ອັດຕາສ່ວນຂອງປະເທດອາຟຼິກາພາກໃຕ້ຊາຮາລາແລະປະເທດອາລັບຕ່າງມີແຕ່ 0,2% ແລະ0,1% ເທົ່ານັ້ນ, ຊ່ອງຫວ່າງດັ່ງກ່າວຍັງມີທ່ວງທ່າຂະຫຍາຍກວ້າງອອກ.
ສະນັ້ນ, ເຮັດແນວໃດຈິ່ງຮັບປະກັນໃຫ້ບັນດາປະເທດລ້ວນແຕ່ກາຍເປັນຜູ້ໄດ້ຮັບຜົນປະໂຫຍດຈາກໂລກາວິວັດການຮ່ວມມືດ້ານວິທະຍາສາດເຕັກນິກ, ສ້າງໂລກທີ່ກົມກຽວກັນທີ່ພັດທະນາແບບຍືນຍົງຢ່າງແທ້ຈິງ, ນີ້ຍັງແມ່ນໜ້າທີ່ອັນໜັກໜາຢູ່.
|
|
|
