|
ທ່ານຜູ້ຟັງທີ່ໂຄລົບ,ໃນທ້າຍເດືອນທັນວາປີ2005,ຫໍພິພິດທະພັນຮູບເງົາຈີນເຊິ່ງເປັນສິ່ງກໍ່ສ້າງວັດທະນະທຳທີ່ເປັນສັນຍາລັກແຫ່ງການລະລຶກຮູບເງົາຈີນກຳເນີດຂຶ້ນຄົບຮອບ100ປີໄດ້ເປີດຫໍຢູ່ປັກກິ່ງຢ່າງຄຶກຄື້ນ.ໃນລາຍການວັດທະນະທຳຈີນພາກນີ້,ເຊີນຟັງການລາຍງານຂ່າວ:ຫໍພິພິດທະພັນຮູບເງົາຈີນສະແດງວິວັດທະນາການ100ປີຂອງຮູບເງົາຈີນ.
ເພື່ອລະລຶກຮູບເງົາຈີນກຳເນີດຂຶ້ນຄົບຮອບ100ປີ,ໃນວັນທີ29 ທັນວາປີ2005,ຫໍພິພິດທະພັນຮູບເງົາຈີນທີ່ໄດ້ສ້າງມາ3ປີກໍ່ໄດ້ເປີດຫໍຢ່າງຄຶກຄື້ນ,ໃນເວລາດຽວກັນຍັງໄດ້ຈັດງານວາງສະແດງທີ່ມີຊື່ວ່າ ວິວັດທະນາການ100ປີ ສະຕະວັດທີ່ສະຫງ່າລາສີ ເພື່ອລະລຶກຮູບເງົາຈີນກຳເນີດຂຶ້ນຄົບຮອບ100ປີ .
ກ່ຽວກັບເລື່ອງນີ້,ທ່ານວາງຊີຊ່ານ ເຈົ້າຄອງນະຄອນປັກກິ່ງກ່າວວ່າ:
"ການພົວພັນລະຫວ່າງປັກກີ່ງກັບຮູບເງົາຈີນແມ່ນແໜ້ນແຟ້ນທີ່ສຸດ,ປີ1905,ຮູບເງົາເລື່ອງ ຕ້ຽງຈຸ່ນຊ່ານ ຮູບເງົາເລື່ອງທຳອິດຂອງຈີນໄດ້ກຳເນີດຂຶ້ນຢູ່ປັກກິ່ງ,ໄດ້ເປີດໜ້າປະຫວັດສາດຂອງຮູບເງົາຈີນ,ໃນມື້ນີ້ພາຍຫຼັງເວລາຜ່ານໄປ100ປີ,ຫໍພິພິດທະພັນຮູບເງົາລະດັບຊາດແຫ່ງທຳອິດຂອງຈີນໄດ້ສ້າງຂຶ້ນຢູ່ປັກກິ່ງ,ໄດ້ຂຽນໜ້າໃໝ່ໃນປະຫວັດສາດຮູບເງົາຈີນອີກເທື່ອໜຶ່ງ.ການສ້າງຂຶ້ນແລະເປີດຫໍຂອງຫໍພິພິດທະພັນຮູບເງົາຈີນຈະກາຍເປັນປ່ອງຢ້ຽມສຳຄັນທີ່ສະແດງແລະແລກປ່ຽນວັດທະນະທຳຮູບເງົາຈີນ,ເຮັດໃຫ້ພາລະກິດຮູບເງົາຈີນຈະເລີນຮຸ່ງເຮືອງຂຶ້ນ,ພ້ອມກັນນັ້ນຍັງໄດ້ເປີດຍຸກສະໄໝອັນດີງາມຂອງການພັດທະນາຫໍພິພິດທະພັນ.
ຫໍພິພິດທະພັນຮູບເງົາຈີນຕັ້ງຢູ່ເຂດຊານເມືອງຕາເວັນອອກສຽງເໜືອຂອງປັກກິ່ງ,ມີເນື້ອທີ່ເກືອບ4ໝື່ນແມັດຕາ,ແມ່ນຫໍພິພິດທະທັນທີ່ມີເນື້ອທີ່ກໍ່ສ້າງໃຫຍ່ກວ່າໝູ່ໃນໂລກປະຈຸບັນ.ຮູບນອກຂອງຫໍພິພິດທະພັນຄ້າຍຄືກັບດຳສີ່ຫຼ່ຽມໜ່ວຍໜຶ່ງ,ຕາມເວົ້າວ່ານີ້ແມ່ນສັນຍະລັກຂອງກ້ອງຖ່າຍຮູບເງົາ,ກໍ່ແມ່ນສັນຍະລັກຂອງໂຮງສາຍຮູບເງົາ.ຢູ່ສະໜາມຫຼວງທີ່ຢູ່ຫນ້າຫໍພິພິດທະພັນໄດ້ຕັ້ງຂອບສີ່ຫຼ່ຽມສີດຳ10ໜ່ວຍທີ່ຕິດຕໍ່ກັນ,ຄ້າຍຄື"ແປ້ນຄ່າ"ທີ່ໃຊ້ໃນເວລາຖ່າຍຮູບເງົາ.ຊັ້ນຕົກແຕ່ງນອກຫໍພິພິດທະພັນເບິ່ງຈາກທາງໄກຄືດວງດາວເຕັມທ້ອງຟ້າ,ເບິ່ງຈາກທາງໃກ້ມີຮູບຊົງຕ່າງກັນ,ເປັນສັນຍະລັກຂອງດາລາທີ່ຂາດບໍ່ໄດ້ໃນໂລກຮູບເງົາ.
ຫໍພິພິດທະພັນຮູບເງົາຈີນມີຫ້ອງວາງສະແດງ21ຫ້ອງ,ເນື້ອທີ່ວາງສະແດງເກືອບໜຶ່ງໝື່ນແມັດຕາ,ໂດຍຖືການເຕົ້າໂຮມຜົນສຳເລັດດ້ານສິນລະປະຮູບເງົາເປັນຫຼັກ,ໂຮມເອົາງານມະຫະກຳ,ການວາງສະແດງ,ການສາຍຮູບເງົາ,ການຊົມເບິ່ງ,ການແລກປ່ຽນ,ການຄົ້ນຄວ້າວິທະຍາສາດ,ການລື່ນເລີງເປັນອັນໜຶ່ງອັນດຽວກັນ.ທ່ານວາງເທ້ຮວາ ຫົວຫນ້າກົມໃຫຍ່ວິທະຍຸ ຮູບເງົາແລະໂທລະພາບແຫ່ງຊາດຈີນກ່າວວ່າ:
"ຫໍພິພິດທະພັນຮູບເງົາຈີນຈະສະໜອງການບໍລິການວັດທະນະທຳຮູບເງົາອັນດີງາມໃຫ້ແກ່ມວນຊົນອັນໄພສານ,ຜ່ານຈາກການຈັດການເຄື່ອນໄຫວວັດທະນະທຳຮູບເງົາປະເພດຕ່າງໆ,ສ່ອງແສງວິວັດທະນາການແລະຜົນສຳເລັດອັນສະຫງ່າລາສີໃນໄລຍະຕ່າງໆຂອງຮູບເງົາຈີນຢ່າງຮອບດ້ານ,ພົ້ນເດັ່ນສະແດງຮູບເງົາເລື່ອງສຳຄັນແລະບຸກຄົນສຳຄັນໃນປະຫວັດສາດຮູບເງົາຈີນ,ເປີດເຜີຍຄວາມເລິກລັບດ້ານວິທະຍາສາດຂອງຮູບເງົາຢ່າງມີຊີວິດຊີວາ,ເຮັດໃຫ້ຫໍພິພິດທະພັນບໍ່ພຽງແຕ່ສາມາດຮັກສາຜົນສຳເລັດດ້ານປະຫວັດວັດທະນະທຳຂອງຮູບເງົາຈີນຢ່າງບັງເກີດຜົນແລະເຜີຍແຜ່ຜົນສຳເລັດດ້ານປະຫວັດວັດທະນະທຳຂອງຮູບເງົາຈີນຢ່າງກວ້າງຂວາງເທົ່ານັ້ນ,ຍັງສາມາດຊຸກຍູ້ວັດທະນະທຳຮູບເງົາຈີນໃຫ້ພັດທະນາຢ່າງວ່ອງໄວ."
ຕາມຊາບວ່າ, ງານວາງສະແດງທີ່ມີຊື່ວ່າ"ວິວັດທະນາການ100ປີ ສະຕະວັດທີ່ສະຫງ່າລາສີ"ທີ່ລະລຶກວັນຮູບເງົາຈີນກຳເນີດຂຶ້ນຄົບຮອບ100ປີຂອງຫໍພິພິດທະພັນ,ໄດ້ວາງສະແດງວັດຖຸບູຮານແລະເຄື່ອງວາງສະແດງຂອງຮູບເງົາອັນລ້ຳຄ່າ6000ກວ່າເຄື່ອງ,ກ່ຽວພັນເຖິງຮູບເງົາ1500ກວ່າເລື່ອງ.ໃນຫໍວາງສະແດງມີຈໍ260ແຜ່ນ,ໃຊ້ພາຫະນະໄຮເທັກຄືສຽງ,ແສງ,ໄຟຟ້າເປັນຕົ້ນ,ສ່ອງແສງວິວັດທະນາການຂອງຮູບເງົາຈີນແລະຜົນສຳເລັດອັນໃຫຍ່ຫຼວງທີ່ພາລະກິດຮູບເງົາຂອງປະເທດຈີນໃໝ່ໄດ້ຮັບຢ່າງມີຊີວິດຊີວາ.
ໃນຫ້ອງວາງສະແດງ,ຜູ້ຊົມບໍ່ພຽງແຕ່ໄດ້ເຫັນພາບຖ່າຍຮູບເງົາເລື່ອງ ຕ້ຽງຈຸ່ນຊ່ານ ຮູບເງົາເລື່ອງທຳອິດຂອງຈີນເມື່ອປີ1905,ມີຄວາມຮູ້ສຶກເໝືອນດັ່ງຢູ່ໃນເຫດການເທົ່ານັ້ນ,ຍັງສາມາດເຫັນພາບທີ່ອ້າຍນ້ອງລູມີເອສ໌ຖ່າຍຮູບເງົາເລື່ອງທຳອິດຂອງໂລກຢູ່ປາຣີໃນປີ1895ອີກດ້ວຍ.ເພື່ອສະແດງປະຫວັດສາດການກຳເນີດຂອງຮູບເງົາຕໍ່ຜູ້ເຂົ້າຊົມ,ຫໍພິພິດທະພັນຍັງໄດ້ເຊົ່າກ້ອງຖ່າຍຮູບເງົາເຄື່ອງທຳອິດໃນໂລກຈາກຝະລັ່ງ,ເຊິ່ງກໍ່ແມ່ນກ້ອງຖ່າຍຮູບເງົາທີ່ອ້າຍນ້ອງລູມີແອສ໌ໃຊ້ແລະຖືກຝະລັ່ງຖືເປັນຂອງລ້ຳຄ່າລະດັບຊາດ.
ພ້ອມກັນນັ້ນ,ວັດຖຸບູຮານຂອງຮູບເງົາ,ຮູບທຽນໄຂ,ຮູບຄົນປັ້ນດ້ວຍດິນດາກ,ປະກົດພາບຄືນໃໝ່,ສາຍຮູບເງົາພ້ອມດ້ວຍຮູບຖ່າຍ,ປ້າຍໂຄສະນາຂອງຮູບເງົາແຜ່ນຕ່າງໆເປັນຕົ້ນ,ໄດ້ເຮັດໃຫ້ພາບປະຫວັດສາດຕອນຕ່າງໆຂອງວິວັດທະນາການຮູບເງົາຈີນສະແດງຢູ່ຕໍ່ຫນ້າຄົນທັງຫຼາຍຢ່າງມີຊີວິດຊີວາ.
ຫໍພິພິດທະພັນຮູບເງົາຈີນບໍ່ພຽງແຕ່ສະແດງປະຫວັດສາດ100ປີຂອງຮູບເງົາຈີນເທົ່ານັ້ນ,ຍັງໃຊ້ພາຫະນະສາມມິຕິ,ເປີດເຜີຍຄວາມເລິກລັບໃນການຖ່າຍຮູບເງົາ,ອັດສຽງ,ຕັດຕໍ່ຟີມ,ລ້າງຟີມ,ປະສົມຟິມ,ລີລາສະແດງພິເສດ,ເຮັດກາຕູນເປັນຕົ້ນ,ຢູ່ແຫ່ງນີ້,ຜູ້ຊົມສາມາດຂີ່ລົດຈັກຫຼົບຫຼີກການໂຈມຕີຂອງ"ກະປອມຍັກ",ນັ່ງຢູ່ເທິງຜ້າພົມບິນ"ກົ້ມລົງເບິ່ງ"ນະຄອນປັກກິ່ງ,ຫ້ອງອັດສຽງຈຳລອງໄດ້ສະສົມຮູບເງົາບາງຕອນແລະບົດສົນທະນາຂອງຮູບເງົາ60ກວ່າເລື່ອງທີ່ຜູ້ຊົມນິຍົມທີ່ສຸດ,ຢູ່ແຫ່ງນີ້,ຜູ້ຊົມສາມາດທົດລອງຄວາມຮູ້ສຶກທີ່ພາກໃຫ້ຮູບເງົາໂດຍຕົນເອງ,ແລະສາມາດໄດ້ຮັບCDທີ່ຕົນເອງພາກເພື່ອລະລຶກ.
|
