ຕາມ​ຂ່າວສານ​ຊິນ​ຮວາ: ຕາມ​ຂ່າວ​ຈາກ​ຝ່າຍ​ທະຫານ​ໄທ​ລາຍ​ງານ​ວ່າ, ຕອນ​ບ່າຍ​ວັນ​ທີ 18 ມັງ​ກອນ ຜູ່​ປະກອບ​ອາວຸດ​ທີ່​ບໍ່​ຮູ້​ຖານະຝູງ​ໜຶ່ງ​ໄດ້​ກໍ່​ເຫດການ​ດ້ວຍກຳລັງຮຸນ​ແຮງ​ຢ່າງ​ຕໍ່​ເນື່ອງ​ຢູ່ 4 ຈັງ​ຫວັດ​ທາງ​ພາກ​ໃຕ້​ໄທ, ​ໄດ້​ເຜົາ​ທຳລາຍ​ຫຼັກສົ່ງ​ສັນຍານ​ໂທລະສັບ​ມື​ຖື 52 ​ແຫ່ງ. ປັດຈຸ​ບັນ ສັນ​ຍານ​ໂທ​ລະສັບ​ມື​ຖື​ຢູ່​ພາກ​ໃຕ້​ໄທ​ໄດ້​ຂາດ​ສະບັ້ນ​ໄປ​ໝົດ.

ຝ່າຍ​ທະຫານ​​ແລະ​ຝ່າຍຕຳຫຼວດໄທ​​ໄດ້​ແຕ່ງ​ກອງກຳລັງ​ໄປບ່ອນ​ເກີດ​ເຫດ​ຕ່າງໆ, ຢູ່​ບໍລິ​ແວນ​ບ່ອນ​ຖືກ​ເຜົາ​ຍັງ​​ໄດ້​ເຫັນ​ກະ​ເປົ໋າ​ທີ່​ສົງ​ໄສ​​ເປັນ​ລູກ​ລະ​ເບີດ. ​ແຕ່​ປັດຈຸບັນ ຝ່າຍ​ຕຳ​ຫຼວດ​ຍັງ​ບໍ່​ທັນໄດ້​ຈັບ​ຜູ່​ຖືກ​ສົງ​ໄສ​ໃດໆ.

ຕາມ​ໄດ້​ຊາບ, ຫຼັກ​ສົ່ງ​ສັນຍານ​ໂທລະສັບ​ມື​ຖື 52 ​ແຫ່ງ​ນີ້ແຈກ​ຢາຍ​ຢູ່ 20 ​ກວ່າຕົວ​ເມືອງ​ໃນ 4 ຈັງ​ຫວັດພາກ​ໃຕ້ ຄື ຈັງຫວັດສົງ​ຂາ ຈັງຫວັດ​ນະລາ​ທິວາດ ຈັງຫວັດ​ຍະ​ລາ​ແລະ​ຈັງ​ຫວັດ​ປັດ​ຕາ​ນີ. ຢູ່​ຈັງຫວັດ​ນະລາ​ທິວາ​ດ ຜູ່​ປະກອບ​ອາວຸດ​ຍັງ​ໄດ້​ຍິງ​ປືນ​ໃສ່​ເຮືອນ​ມໍ່​ຫຼັກ​ສົ່ງ​ສັນ​ຍານ​ໂທລະສັບ​ມື​ຖື, ​ແຕ່​ປັດຈຸບັນ​ຍັງ​ບໍ່​ມີ​ຂ່າວ​ກ່ຽວ​ກັບ​ຄົນ​ຕາຍ​ແລະ​ບາດ​ເຈັບ.