|
ຕາມຂ່າວCRI: ໂຄງການປະຕິສັງຂອນບູຮານນະສະຖານຈຸດໜັກ 3 ແຫ່ງຂອງຕິເບດຈີນຄື ວັງບູຕາລາ ວັດໂລປູ້ລິນຄາແລະວັດຊ້າເຈ່ຍທີ່ລວມທັງໝົດໄດ້ລົງທຶນ 330 ລ້ານຢວນນັ້ນ ປັດຈຸບັນ ໄດ້ສຳເລັດ 80% ຂຶ້ນໄປແລ້ວ.
ນັກຂ່າວໄດ້ຊາບຈາກງານສົນທະນາວຽກງານວັດຖຸບູຮານທີ່ຈັດຂຶ້ນຢູ່ນະຄອນລາຊາ ເທດສະບານຕິເບດວ່າ, ແຕ່ເລີ່ມລົງມືປະຕິສັງຂອນເມື່ອເດືອນມິຖຸນາປີ 2002 ມາຮອດປັດຈຸບັນ, ໂຄງການປະຕິສັງຂອນບູຮານນະສະຖານສາມແຫ່ງດັ່ງກ່າວໄດ້ສຳເລັດວຽກງານປະຕິສັງຂອນອາຄານຕົ້ນຕໍຂອງວັງບູຕາລາແລະວັດໂລປູ້ລິນຄາ ປະຕິສັງຂອນຮູບແຕັ້ມບົນຝາພະໜັງຂອງວັດໂລປູ້ລິນຄາ ຫ້ອງວາງສະແດງວັດຖຸບູຮານວັດຊ້າເຈ່ຍ.
ວັງບູຕາລາສ້າງເມື່ອ ຄ.ສ.ສະຕະວັດທີ 7, ຖືກຖືເປັນຜົນງານສູງສຸດແຫ່ງສິລະປະດ້ານການກໍ່ສ້າງແລະວັດທະນະທຳຊົນເຜົ່າຕິເບດ, ວັດໂລປູ້ລິນຄາແມ່ນສິ່ງກໍ່ສ້າງສວນບູຮານທີ່ຂະໜາດໃຫຍ່ກວ່າໝູ່ແລະຮັກສາໄວ້ສົມບູນກວ່າໝູ່ໃນໂລກ, ສອງແຫ່ງດັ່ງກ່າວຕ່າງຖືກອົງການຢູເນັສກູສະຫະປະຊາຊາດຈັດເຂົ້າໃນບັນຊີລາຍຊື່ມໍລະດົກໂລກໃນປີ 1994 ແລະປີ 2001. ວັດຊ້າເຈ່ຍແມ່ນວັດສຳຄັນຂອງພຸດທະສາສະໜານິກາຍຕິເບດ, ຢູ່ໃນວັດໄດ້ເກັບຮັກສາຄຳພີແລະວັດຖຸບູຮານທີ່ຫາຍາກໃນໂລກເປັນຈຳນວນຫຼວງຫຼາຍ.
|
