|
ຕາມຂ່າວສານຊິນຮວາ: ວັນທີ 23 ມັງກອນຢູ່ທີ່ປັກກິ່ງ, ທ່ານເຫີຊືຈົ່ງ ຫົວໜ້າກົມເສດຖະກິດຫ້ອງການວຽກງານໄຕ້ຫວັນລັດຖະບານຈີນກ່າວວ່າ, ນະໂຍບາຍຂອງເຈົ້າໜ້າທີ່ໄຕ້ຫວັນໄດ້ຈຳກັດການເປີດກວ້າງການຮ່ວມມືດ້ານເສດຖະກິດລະຫວ່າງສອງຝັ່ງຢ່າງໜັກໜ່ວງ.
ທ່ານເຫີຊືຈົ່ງກ່າວວ່າ, ປີກາຍນີ້ ແຜ່ນດິນໃຫຍ່ປະເທດຊາດໄດ້ໃຊ້ຫຼາຍມາດຕະການ ເຊັ່ນ ຊຸກຍູ້ການເໝົາຍົນລະຫວ່າງສອງຝັ່ງໃນໄລຍະບຸນກຸດຈີນ ຜ່ອນຄາຍເງື່ອນໄຂອະນຸຍາດໃຫ້ໝາກໄມ້ໄຕ້ຫວັນເຂົ້າຕະຫຼາດແຜ່ນດິນໃຫຍ່ ອຳນວຍຄວາມສະດວກໃຫ້ແກ່ວິສາຫະກິດທຶນໄຕ້ຫວັນໃນການລະດົມທຶນແລະອື່ນໆ, ພະຍາຍາມຊຸກຍູ້ໃຫ້ການພົວພັນລະຫວ່າງສອງຝັ່ງຂະຫຍາຍຕົວ. ຝ່າຍແຜ່ນດິນໃຫຍ່ຈະປົກປັກຮັກສາສິດແລະຜົນປະໂຫຍດອັນຊອບທຳຂອງນັກທຸລະກິດໄຕ້ຫວັນ, ຊຸກຍູ້ການແລກປ່ຽນດ້ານເສດຖະກິດລະຫວ່າງສອງຝັ່ງຢ່າງຮອບດ້ານ.
ເນື່ອງຈາກຜູ່ຄອງອຳນາດໄຕ້ຫວັນກັ້ນກາງ, ການແລກປ່ຽນດ້ານເສດຖະກິດການຄ້າລະຫວ່າງສອງຝັ່ງໄດ້ຕົກຢູ່ໃນສະພາບທາງອ້ອມແລະທິດດຽວໂດຍຕະຫຼອດ, ໄດ້ຈຳກັດການພັດທະນາການຮ່ວມມືດ້ານເສດຖະກິດການຄ້າລະຫວ່າງສອງຝັ່ງ. ໂດຍແນໃສ່ຄຳເວົ້າຂອງຜູ່ນຳເຈົ້າໜ້າທີ່ໄຕ້ຫວັນທີ່ກ່າວໃນຫວ່າງມໍ່ໆນີ້ທີ່ວ່າ "ຈິນຕະນາການໃໝ່ການປະພຶດໃໝ່ໃນນະໂຍບາຍເສດຖະກິດການຄ້າກັບແຜ່ນດິນໃຫຍ່" ທີ່ "ຕັ້ງໜ້າຄຸ້ມຄອງ ເປີດປະຕູຢ່າງບັງເກີດຜົນ", ທ່ານເຫີຊືຈົ່ງຕິຕຽນວ່າ, ນີ້ແມ່ນການກະທຳທີ່ຝຶນບ້ານຂວາງເມືອງ.
|
