|
ສະບາຍດີທ່ານຜູ່ຟັງທີ່ໂຄລົບ, ເວົ້າສຳລັບນັກກິລາຈີນແລ້ວ, ປີ 2006 ຈະແມ່ນປີໜຶ່ງທີ່ມີງານຫຼາຍທີ່ສຸດ. ຕົ້ນປີນີ້ແລະທ້າຍປີນີ້, ມີສອງໜ້າທີ່ສຳຄັນ ຄື ພະຍາຍາມຊິງໄດ້ຜົນງານດີເດັ່ນໃນງານກິລາໂອລິມປິກລະດູໜາວທີ່ຕູຣິງແລະງານເອຊຽນເກມທີ່ໂດຮາ, ສ່ວນໃນງານແຂ່ງຂັນປະເພດດ່ຽວຂະໜາດໃຫຍ່ຕ່າງໆ ທີ່ຈະຈັດຂຶ້ນຕາມໆກັນພາຍໃນປີນີ້, ນັກກິລາຈີນກໍ່ຈະພະຍາຍາມຈົນສຸດຂີດ, ຍາດແຍ່ງຊິງໄດ້ຜົນງານດີ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: "ນັກກິລາຈີນຈະສຸມກຳລັງບຸກບືນສູ້ຊົນໃນປີ 2006".
ການທົດສອບສຳຄັນເທື່ອທຳອິດຂອງນັກກິລາຈີນໃນປີນີ້ແມ່ນງານກິລາໂອລິມປິກລະດູໜາວຄັ້ງທີ 20 ທີ່ຈະຈັດຂຶ້ນຢູ່ເມືອງຕູຣິງແຫ່ງອີຕາລີແຕ່ວັນທີ 10 ຮອດວັນທີ 26 ເດືອນກຸມພາ. ເຖິງວ່າ ໃນສະເພາະໜ້ານີ້, ລະດັບກິລາເທິງຫິມະແລະນ້ຳກ້າມຂອງຈີນຍັງມີຄວາມໂຕນກັນຫຼາຍເມື່ອທຽບກັບປະເທດເຂັ້ມແຂງດັ້ງເດີມດ້ານກິລາຫິມະແລະນ້ຳກ້າມ ຂອງໂລກ ເຊັ່ນ ເຢຍລະມັນ ຣັດເຊຍແລະນອກແວເປັນຕົ້ນກໍ່ຕາມ, ແຕ່ໃນຫຼາຍປີມານີ້, ຈີນກໍ່ມີຄວາມກ້າວໜ້າຢ່າງເດັ່ນຊັດ. ໃນງານກິລາໂອລິມປິກລະດູໜາວທີ່ຈັດຂຶ້ນຢູ່ເມືອງຊອນເລກແຫ່ງອາເມລິກາປີ 2002, ຄະນະນັກກິລາຈີນຊິງໄດ້ຫຼຽນຄຳສອງຫຼຽນໃນລາຍການແຂ່ງຂັນແລ່ນໄວໄລຍະສັ້ນ, ເປັນເທື່ອທຳອິດທີ່ຈີນຊິງໄດ້ຫຼຽນຄຳໃນງານກິລາໂອລິມປິກລະດູໜາວ. ເທື່ອນີ້ຢູ່ຕູຣິງ, ຄົນຈີນຫວັງສາມາດລື່ນກາຍລະດັບຢູ່ເມືອງຊອນເລກ.
ເມື່ອທຽບກັບ 4 ປີກ່ອນທີ່ອາໄສແຕ່ລາຍການແລ່ນໄວໄລຍະສັ້ນ, ໃນຊູ່ມື້ນີ້ ນັກກິລາຈີນມີກຳລັງຊິງໄດ້ຫຼຽນຄຳໃນລາຍການແຂ່ງຂັນຫິມະແລະນ້ຳກ້າມຫຼາຍກວ່າເກົ່າແລ້ວ, ນີ້ແມ່ນມູນເຫດທີ່ເຮັດໃຫ້ພວກເຂົາເຈົ້າຍິ່ງມີຄວາມໝັ້ນໃຈ. ຢູ່ຕູຣິງ, ນອກຈາກ 3 ລາຍການແລ່ນໄວໄລຍະສັ້ນເພດຍິງແລ້ວ, ໃນລາຍການແລ່ນສະເກັດໄວ ແລ່ນສະກີແບບເສລີເພດຍິງແລະລາຍການແລ່ນສະເກັດແບບລວດລາຍເປັນຕົ້ນ, ນັກກິລາຈີນກໍ່ມີກຳລັງຊິງໄດ້ຫຼຽນຄຳ 4 ເຖິງ 5 ຫຼຽນ.
ແຕ່ວັນທີ 24 ເມສາຮອດວັນທີ 1 ພຶດສະພາ, ງານແຂ່ງຂັນປິ່ງປ່ອງໝູ່ຄະນະຊິງຊະນະເລີດລະດັບໂລກຄັ້ງທີ 49 ຈະຈັດຂຶ້ນຢູ່ແບຼແມນແຫ່ງເຢຍລະມັນ, ໃນງານແຂ່ງຂັນສະໄໝກ່ອນທີ່ຈັດຂຶ້ນຢູ່ໂດຮາໃນປີ 2003, ທີມຍິງຊາຍຈີນລ້ວນແຕ່ຊິງໄດ້ແຊມປຽນ. ການຊິງເອົາແຊມປຽນອີກໃນຄັ້ງນີ້ກໍ່ຈະແມ່ນເປົ້າໝາຍອັນໜຶ່ງອັນດຽວຂອງຄະນະນັກກິລາປິ່ງປ່ອງຈີນ.
ແຕ່ວັນທີ 28 ເມສາຮອດວັນທີ 7 ພຶດສະພາ, ງານແຂ່ງຂັນດອກປີກໄກ່ໂທມາສຂັບແລະຢູເບີຂັບ ເຊິ່ງແມ່ນງານແຂ່ງຂັນດອກປີກໄກ່ເພດຊາຍແລະເພດຍິງລະດັບສູງສຸດຂອງໂລກຈະຈັດຂຶ້ນຢູ່ຍີ່ປຸ່ນ. ຮອດເວລານັ້ນ ທີມດອກປີກໄກ່ຍິງຊາຍຈີນກໍ່ຈະສຸມກຳລັງສຸດຂີດເພື່ອຮັກສາແຊມປຽນອີກ.
ບານປິ່ງປ່ອງແລະດອກປີກໄກ່ລ້ວນແຕ່ແມ່ນລາຍການທ່າແຮງດັ້ງເດີມຂອງທີມຈີນ, ແຕ່ໃນງານກິລາໂອລິມປິກປີ 2008 ນັກກິລາຈີນຢາກບັນລຸຈຸດໝາຍທີ່ຊິງໄດ້ຫຼຽນຄຳຫຼາຍກວ່າງານກິລາໂອລິມປິກອາແຕນທີ່ຊິງໄດ້ 32 ຫຼຽນ, ກໍ່ຕ້ອງອາໄສປະເພດການແຂ່ງຂັນທີ່ບໍ່ມີທ່າແຮງບາງປະເພດ ໂດຍສະເພາະແມ່ນປະເພດກິລາແລ່ນແລະລານແລະລອຍນ້ຳເປັນຕົ້ນມີການບຸກທະລຸ.
ງານແຂ່ງຂັນກິລາແລ່ນແລະລານຊິງຂັນໂລກທີ່ຈັດຂຶ້ນຢູ່ອາແຕນແຫ່ງເກຼັກແຕ່ວັນທີ 16 ຮອດວັນທີ 17 ກັນຍາ ຈະສ້າງເວທີໃຫ້ແກ່ນັກກິລາແລ່ນແລະລານຂອງຈີນສະແດງກຳລັງຂອງຕົນເອງ. ຮອດເວລານັ້ນ ທ້າວລິວສຽງ ນັກກິລາລັກສະນະທຸງກິລາແລ່ນແລະລານຂອງຈີນ ຜູ່ຊິງໄດ້ແຊມປຽນລາຍການແລ່ນຂ້າມຮົ້ວ 110 ແມັດໃນງານກິລາໂອລິມປິກອາແຕນ ນາງສິງຮຸ້ຍນ້າ ແຊມປຽນລາຍການແລ່ນທົນ 1 ໝື່ນແມັດເພດຍິງຂອງງານກິລາໂອລິມປິກອາແຕນ ແລະນັກກິລາຜູ່ດີເດັ່ນຮຸ້ນໃໝ່ຂອງຈີນງວດໜຶ່ງຈະຕາງໜ້າທີມອາຊີເຂົ້າຮ່ວມງານແຂ່ງຂັນເທື່ອນີ້. ທ່ານເຝິງຊູ້ຢົງ ຄູຝຶກໃຫຍ່ທີມກິລາແລ່ນແລະລານຂອງຈີນໄດ້ແນະນຳສະພາບດ້ານນີ້ຕໍ່ນັກຂ່າວວ່າ:
ງານແຂ່ງຂັນຊິງຂັນໂລກແມ່ນຖືມະຫາທະວີບເປັນຫົວໜ່ວຍ, ສຳຄັນຫຼາຍ. ໃນງານແຂ່ງຂັນຊິງຊະນະເລີດອາຊີປີ 2005, ຈີນມີນັກກິລາ 20 ກວ່າຄົນຊິງໄດ້ຄຸນວຸດທິເຂົ້າຮ່ວມງານແຂ່ງຂັນຊິງຂັນໂລກ, ໃນປີ 2006, ເວົ້າສຳລັບກິລາແລ່ນແລະລານຂອງຈີນແລ້ວ ງານແຂ່ງຂັນຊິງຂັນໂລກຄັ້ງນີ້ແມ່ນງານແຂ່ງຂັນຂະໜາດໃຫຍ່ກວ່າໝູ່, ຂ້າພະເຈົ້າຄຶດວ່າ ງານແຂ່ງຂັນເທື່ອນີ້ຈະແມ່ນປະສົບການເທື່ອໜຶ່ງທີ່ດີຫຼາຍຕໍ່ນັກກິລາຈີນກະກຽມງານກິລາໂອລິມປິກປີ 2008.
ແຕ່ວັນທີ 31 ຮອດວັນທີ 16 ຕຸລາ, ງານແຂ່ງຂັນບານສົ່ງເພດຍິງຊິງຊະນະເລີດລະດັບໂລກປີ 2006 ຈະຈັດຂຶ້ນຢູ່ຍີ່ປຸ່ນ. ທີມຈີນຊິງໄດ້ແຊມປຽນງານແຂ່ງຂັນບານສົ່ງເພດຍິງຊິງຊະນະເລີດລະດັບໂລກຄັ້ງກ່ອນຫ່າງຈາກປັດຈຸບັນ 20 ປີເຕັມໆແລ້ວ. ຮອດເວລານັ້ນ ທີມບານສົ່ງເພດຍິງຈີນທີ່ຊິງໄດ້ແຊມປຽນງານແຂ່ງຂັນຊິງຂັນໂລກປີ 2003 ແລະຊິງໄດ້ແຊມປຽນໃນການແຂ່ງຂັນບານສົ່ງເພດຍິງຂອງງານກິລາໂອລິມປິກອາແຕນປີ 2004 ຈະບັນລຸການຄອງແຊມປຽນສາມຄັ້ງຕາມໆກັນໃນງານແຂ່ງຂັນຂະໜາດໃຫຍ່ສາກົນຫຼືບໍ່, ພວກເຮົາຈະຄອຍຖ້າເບິ່ງຢູ່.
ແຕ່ວັນທີ 1 ຮອດວັນທີ 15 ທັນວາ, ງານເອຊຽນເກມຄັ້ງທີ 15 ຈະຈັດຂຶ້ນຢູ່ໂດຮາ ນະຄອນຫຼວງກາຕາ. ເລີ່ມແຕ່ງານເອຊຽນເກມຄັ້ງທີ 9 ທີ່ຈັດຂຶ້ນຢູ່ນິວແດນລີແຫ່ງອິນເດຍເມື່ອປີ 1982 ເປັນຕົ້ນມາ, ຄະນະນັກກິລາຈີນໄດ້ຄອງອັນດັບໜຶ່ງໃນຕາລາງຫຼຽນຄຳງານເອຊຽນເກມ 6 ຄັ້ງລຽນຕິດແລ້ວ. ຢູ່ໂດຣາ ຄະນະນັກກິລາຈີນຈະຄອງອັນດັບໜຶ່ງອີກເທື່ອໜຶ່ງໄດ້ຫຼືບໍ່ໃນຕາລາງຫຼຽນຄຳເພື່ອຮັກສານາມມະຍົດເປັນປະເທດເຂັ້ມແຂງດ້ານກິລາຢູ່ອາຊີ? ນີ້ແມ່ນໜ້າສົນໃຈນຳທີ່ສຸດ. ຍິ່ງສຳຄັນກວ່ານັ້ນແມ່ນ ຄະນະກຳມະການຈັດງານກິລາໂອລິມປິກປັກກິ່ງໄດ້ຖືງານເອຊຽນເກມໂດຮາເປັນໂອກາດອຸ່ນຄິງສຳຄັນທີ່ສຸດເທື່ອໜຶ່ງກ່ອນຈະເຖິງມື້ຈັດງານກິລາໂອລິມປິກປັກກິ່ງປີ 2008, ສະນັ້ນ ຄະນະນັກກິລາຈີນທີ່ເຂົ້າຮ່ວມງານເອຊຽນເກມ ທີ່ໂດຮາຕົ້ນຕໍຈະປະກອບດ້ວຍນັກກິລາທີ່ຈະເຂົ້າຮ່ວມງານກິລາໂອລິມປິກປັກກິ່ງປີ 2008. ຫວ່າງມໍ່ໆນີ້ ທ່ານຊຸຍຕ້າລິນ ຮອງປະທານຄະນະກຳມະການໂອລິມປິກຈີນແນະນຳວ່າ:
ນີ້ແມ່ນງານກິລາສັງລວມລະຫວ່າງມະຫາທະວີບ, ແລະກໍ່ແມ່ນງານກິລາສັງລວມທີ່ເປັນໂອກາດຝຶກອົບຮົມເທື່ອສຸດທ້າຍຂອງພວກເຮົາກ່ອນຈະເຂົ້າຮ່ວມງານກິລາໂອລິມປິກປັກກິ່ງ. ຮອດເວລານັ້ນ ພວກຂ້າພະເຈົ້າຈະແຕ່ງຄະນະນັກກິລາຂະໜາດໃຫຍ່ ໄປເຂົ້າຮ່ວມງານເອຊຽນເກມທີ່ໂດຮາ. ໃນຂະນະດຽວກັນ ນັກກິລາໃນຄະນະຜູ່ແທນສ່ວນໃຫຍ່ຈະແມ່ນນັກກິລາທີ່ຈະເຂົ້າຮ່ວມງານກິລາໂອລິມປິກປີ 2008.
ໃນຖານະເປັນປະເທດເຈົ້າພາບ, ນັກກິລາຈີນຈະມີການປະພຶດແນວໃດໃນງານກິລາໂອລິມປິກທີ່ປັກກິ່ງ, ບາງທີຄົນທັງຫຼາຍຈະຄາດຄະເນໄດ້ບາງຢ່າງຈາກງານເອຊຽນເກມທີ່ໂດຮາ.
ທ່ານຜູ່ຟັງທີ່ໂຄລົບ, ງານແຂ່ງຂັນສາກົນປີ 2006 ຈະມີຫຼາຍສີຫຼາຍສັນ, ການປະພຶດຂອງນັກກິລາຈີນໜ້າຄອງຄອຍ, ພວກເຮົາຈະສືບຕໍ່ສົນໃຈນຳການປະພຶດຂອງນັກກິລາຈີນບົນເວທີກິລາສາກົນປີ 2006.
|
