|
ທ່ານເຈິ່ງເພີຍຢຽນກ່າວເນັ້ນຢູ່ດາໂວສ໌ວ່າ ວິສາຫະກິດຈີນແລະຕ່າງປະເທດຮ່ວມມືແບບຕ່າງຝ່າຍຕ່າງມີຜົນປະໂຫຍດນັ້ນມີອານາຄົດອັນກວ້າງຂວາງ
cri
Author: cai
ຕາມຂ່າວCRI:ວັນທີ 25 ມັງກອນ,ຢູ່ດາໂວສ໌ແຫ່ງສວິສ,ໃນເວລາທ່ານເຈິ່ງເພີຍຢຽນ ຮອງນາຍົກລັດຖະມົນຕີຈີນກ່າວປາຖະກະຖາຕໍ່ສະພາອຸດສາຫະກຳແລະການຄ້າສາກົນຂອງເວທີປາໄສເສດຖະກິດໂລກ,ທ່ານກ່າວເນັ້ນວ່າ,ວິສາຫະກິດຈີນແລະຕ່າງປະເທດຮ່ວມມືແບບຕ່າງຝ່າຍຕ່າງມີຜົນປະໂຫຍດນັ້ນມີອານາຄົດອັນກວ້າງຂວາງ.
ທ່ານເຈິ່ງເພີຍຢຽນເວົ້າວ່າ,ໃນ 5 ປີຂ້າງໜ້ານີ້,ຄວາມຮຽກຮ້ອງຕ້ອງການຂອງຈີນທີ່ມີຕໍ່ເຕັກນິກກ້າວໜ້າ ຄວາມຮູ້ດ້ານການຄຸ້ມຄອງ ຜະລິດຕະພັນທີ່ມີຄຸນນະພາບສູງແລະການລົງທຶນຂອງຕ່າງປະເທດນັ້ນຈະເປີດກວ້າງອອກຢ່າງບໍ່ຢຸດຢັ້ງ.
ມື້ດຽວກັນ,ຢູ່ດາໂວສ໌,ທ່ານສວັບ ປະທານເວທີປາໄສເສດຖະກິດໂລກກັບທ່ານຈ່າງສຽວຊຽງ ຮອງປະທານຄະນະກຳມະການການພັດທະນາແລະການປະຕິຮູບແຫ່ງລັດຈີນຕ່າງໄດ້ຕາງໜ້າເວທີປາໄສເສດຖະກິດໂລກແລະລັດຖະບານຈີນເຊັນບົດບັນທຶກຊ່ອຍຈຳຄວາມເຂົ້າໃຈກັນ.ອີງຕາມບົດບັນທຶກຊ່ອຍຈຳດັ່ງກ່າວ,ເວທີປາໄສເສດຖະກິດໂລກຈະຕັ້ງສຳນັກງານຜູ້ຕາງໜ້າຢູ່ປັກກິ່ງ ນະຄອນຫຼວງຂອງຈີນ,ແລະກຽມຈັດ"ກອງປະຊຸມສຸດຍອດຂະແໜງການທົ່ວໂລກ"ຢູ່ປັກກິ່ງແຕ່ປີ 2007 ເປັນຕົ້ນໄປ.
ມື້ດຽວກັນ,ໃນເວລາທ່ານສວັບໃຫ້ສຳພາດຕໍ່ສື່ມວນຊົນ,ທ່ານເວົ້າວ່າ,ຈີນພັດທະນາຢ່າງວ່ອງໄວນັ້ນ,ເວົ້າສຳລັບທົ່ວໂລກແລ້ວ,ທັງເປັນການທ້າທາຍ,ທັງເປັນໂອກາດທີ່ດີ,ຜ່ານຈາກຄວາມພະຍາຍາມ,ບັນດາຝ່າຍສາມາດບັນລຸສະພາບການທີ່ໄດ້ຮັບຜົນປະໂຫຍດນຳກັນຢ່າງແນ່ນອນ.
|
|
