|
|
 |
| (GMT+08:00)
2006-01-26 17:10:19
|
 |
|
ຈາກຕົວເລກສະຖິຕິເບິ່ງທິດການລົງທຶນຂອງຕ່າງປະເທດຢູ່ມຽນມາ(ສຽງ)
cri
Author: da
|
ຕາມຕົວເລກສະຖິຕິຫຼ້າສຸດຂອງຝ່າຍທາງການມຽນມາ,ປີ 2005 ແມ່ນປີທີ່ມຽນມາດູດດຶງທຶນຕ່າງປະເທດຫຼາຍກວ່າໝູ່ໃນຫຼາຍປີມານີ້,ເຊິ່ງດູດດຶງທຶນຕ່າງປະເທດ 110 ຕື້ໂດລາສະຫະລັດ,ຍອດມູນຄ່າໃນສັນຍາທີ່ຕ່າງປະເທດລົງທຶນຢູ່ມຽນມາບັນລຸ 7 ຕື້ 760 ລ້ານໂດລາສະຫະລັດ.
ພາຍຫຼັງຂຶ້ນຄອງອຳນາດໃນເດືອນກັນຍາປີ 1988 ເປັນຕົ້ນມາ,ລັດຖະບານທະຫານມຽນມາໄດ້ຍົກເລີກນະໂຍບາຍເສດຖະກິດແບບປິດປະຕູທີ່ປະຕິບັດມາເປັນເວລາຍາວນານ,ເລີ່ມໄຂປະຕູຕໍ່ພາຍນອກຢ່າງມີການຈຳກັດ,ດູດດຶງທຶນຕ່າງປະເທດຢ່າງຂະຫຍັນຫ້າວຫັນ,ອອກແຮງພັດທະນາເສດຖະກິດແຫ່ງຊາດທີ່ຫຼ້າຫຼັງກວ່າປະເທດອື່ນ.ແຕ່ຍ້ອນປະເທດຝ່າຍຕາເວັນຕົກລົງໂທດລັດຖະບານທະຫານມຽນມາເປັນເວລາຍາວນານ,ບວກກັບສະພາບແວດລ້ອມການລົງທຶນບໍ່ດີແລະປັດໄຈອື່ນໆ,ອັນໄດ້ເຮັດໃຫ້ການດູດດຶງທຶນຕ່າງປະເທດເພີ່ມຂຶ້ນຢ່າງລຳບາກແລະຊັກຊ້າ.ເມື່ອສັງເກດເບິ່ງຈາກມຸມນີ້,ພາຍໃນ 17 ປີ ມຽນມາໄດ້ດູດດຶງທຶນຕ່າງປະເທດ 7 ຕື້ 700 ລ້ານໂດລາສະຫະລັດແມ່ນຜົນງານທີ່ຍາດມາໄດ້ຢ່າງບໍ່ງ່າຍດາຍແລ້ວ.
ຕາມຕົວເລກສະຖິຕິຂອງຝ່າຍທາງການ, 10 ປະເທດແລະເຂດແຄວ້ນທີ່ລົງທຶນຢູ່ມຽນມາຫຼາຍກວ່າໝູ່ມີດັ່ງນີ້:ສິງກະໂປ ອັງກິດ ໄທ ມາເລເຊຍ ຮົງກົງ ຝຣັ່ງ ອາເມລິກາ ໂຮນລັງແລະຍີ່ປຸ່ນ.
10 ຂະແໜງການທີ່ຕ່າງປະເທດລົງທຶນຫຼາຍກວ່າໝູ່ນັ້ນມີດັ່ງນີ້: 2 ຕື້ 610 ລ້ານໂດລາສະຫະລັດລົງທຶນໃນຂົງເຂດນ້ຳມັນເຊື້ອໄຟແລະແກັສ, 1 ຕື້ 610 ລ້ານໂດລາສະຫະລັດລົງທຶນໃນຂະແໜງການປຸງແຕ່ງ, 1 ຕື້ 50 ລ້ານໂດລາສະຫະລັດລົງທຶນໃນຂະແໜງການລ້ຽງສັດແລະ ຜະລິດຕະພັນໃນນ້ຳ, 1 ຕື້ 50 ລ້ານໂດລາສະຫະລັດລົງທຶນໃນຂະແໜງການເຄຫະແລະຕາດິນ,ນອກນີ້ຍັງມີທຶນຕ່າງປະເທດຈຳນວນຫຼວງຫຼາໄດ້ລົງທຶນໃນຂະແໜງການທ່ອງທ່ຽວ ໂຮງແຮມ ຄົມມະນາຄົມ ການກໍ່ສ້າງເຂດອຸດສາຫະກຳ ຂະແໜງການກໍ່ສ້າງແລະກະສິກຳຂອງມຽນມາ.
ຜູ່ຊ່ຽວຊານເສດຖະກິດເຫັນວ່າ,ການລົງທຶນຂອງຕ່າງປະເທດຢູ່ມຽນມາ ມີຈຸດພິເສດ 4 ຂໍ້ຄື:ໜຶ່ງ,ໃນຊຸມປີ 90 ສະຕະວັດທີ່ແລ້ວ ທຶນຕ່າງປະເທດໄຫຼເຂົ້າມຽນມາທັງໄວທັງຫຼາຍ,ສ່ວນໃນສະຕະວັດນີ້ພັດຊ້າແລະໜ້ອຍ.ສອງ,ທຶນຕ່າງປະເທດສ່ວນຫຼາຍແມ່ນພັດທະນາຊັບພະຍາກອນ,ລົງທຶນພັດທະນາກະສິກຳໜ້ອຍ,ເຖິງວ່າມຽນມາມີຊັບພະຍາກອນກະສິກຳ ຊຶ່ງລວມທັງມີຊັບພະຍາກອນທີ່ດິນອຸດົມສົມບູນ.ສາມ,ເຖິງວ່າປະເທດຝ່າຍຕາເວັນຕົກລົງໂທດມຽນມາ,ແຕ່ບໍລິສັດຝ່າຍຕາເວັນຕົກພັດລົງທຶນຢູ່ມຽນມາຫຼາຍ,ຕົ້ນຕໍແມ່ນພັດທະນານ້ຳມັນເຊື້ອໄຟແລະແກັສ.ສີ່,ປະເທດຝ່າຍຕາເວັນຕົກແລະປະເທດອາຊຽນໄດ້ລົງທຶນຢູ່ມຽນມາຫຼາຍກວ່າເພິ່ນ,ສ່ວນການລົງທຶນຂອງປະເທດອາຊີອື່ນເຊັ່ນຍີ່ປຸ່ນ ຈີນແລະອິນເດຍຢູ່ມຽນມາຊ້ຳພັດໜ້ອຍ.
ມຽນມາເປັນປະເທດທີ່ມີຊັບພະຍາກອນທຳມະຊາດອຸດົມສົມບູນ,ຕ່າງປະເທດມາລົງທຶນສ່ວນຫຼາຍແມ່ນຍ້ອນດ້ານນີ້.ເວົ້າສຳລັບຄວາມໝາຍບາງດ້ານແລ້ວ,ການພັດທະນາມຽນມາມີຄວາມບົ່ມຊ້ອນອັນໃຫຍ່ຫຼວງ,ມີພາບອະນາຄົດເຫັນໄປໃນແງ່ດີ.ຜູ່ຊ່ຽວຊານເສດຖະກິດຊີ້ອອກວ່າ,ຂົງເຂດລົງທຶນສ່ວນຫຼາຍແມ່ນຂົງເຂດນ້ຳມັນເຊື້ອໄຟແລະແກັສ,ຂົງເຂດນີ້ຍັງມີຊ່ອງຫວ່າງຫຼາຍ.
ນັກສັງເກດການເຫັນໂດຍທົ່ວໄປວ່າ,ຖ້າຫາກແຜນການປະຊາທິປະໄຕທີ່ລັດຖະບານມຽນມາປະກາດນັ້ນ ຈະກ້າວໄປໜ້າຢ່າງໝັ້ນທ່ຽງແລະບັນລຸຄາດໝາຍໂດຍໄວເທົ່າທີ່ຈະໄວໄດ້,ຖ້າຫາກສະພາບແວດລ້ອມທີ່ດູດດຶງທຶນຕ່າງປະເທດຮັບການປົວແປງໃຫ້ດີຂຶ້ນແລ້ວ,ຄຽງຄູ່ກັບຂະບວນວິວັດເຊື່ອມໂຍງເຂົ້າກັນຂອງອາຊຽນລົງສູ່ລວງເລິກແລະມີການພັດທະນາ,ມຽນມາອາດຈະດູດດຶງທຶນຕ່າງປະເທດຫຼາຍກວ່າເກົ່າແລະໄວກວ່າເກົ່າ,ເສດຖະກິດມຽນມາກໍອາດຈະໄລ່ທັນການພັດທະນາຂອງພາກພື້ນ.
|
|
|
