|
ບຸນກຸດຈີນແມ່ນບຸນປະເພນີຂອງຊາວຈີນທີ່ອຶກກະທຶກຄຶກຄື້ນທີ່ສຸດ. ໃນໄລຍະບຸນກຸດຈີນ, ຄົນຈີນຈັດການເຄື່ອນໄຫວສະຫຼອງຫຼາຍຢ່າງຫຼາຍແນວ, ຕົວຢ່າງຄື ການຫຼິ້ນງານວັດ ຊົມໂຄມໄຟ ໄປຢາມຍາດພີ່ນ້ອງມິດສະຫາຍ ຫຼືໝົດຄອບຄົວຊຸມນຸມພາເຂົ້າ. ແຕ່ວ່າ ໃນບໍ່ເທົ່າໃດປີມານີ້ ຄົນຈີນນັບມື້ນັບຫຼາຍໄດ້ຖືການອອກກຳລັງກາຍເປັນລາຍການຜ່ານບຸນກຸດຈີນ, ສາມາດເວົ້າໄດ້ວ່າ, ການອອກກຳລັງກາຍໄດ້ກາຍເປັນເລື່ອງທີ່ຄົນນິຍົມກັນໃນໄລຍະບຸນກຸດຈີນ.
ຄົນຈີນຈຳນວນຫຼວງຫຼາຍ ໂດຍສະເພາະແມ່ນຊາວໜຸ່ມລ້ວນແຕ່ຖືໂອກາດໄລຍະພັກບຸນກຸດຈີນ 7 ມື້ ໄປອອກກຳລັງກາຍດ້ວຍຮູບແບບຕ່າງໆ ເຊັ່ນ ປິນພູ ລອຍນ້ຳໃນລະດູໜາວ ແລ່ນທົນແລະຫຼິ້ນບານປະເພດຕ່າງໆ, ຫຼືໄປອອກກຳລັງກາຍໃນສະໂມສອນຫັດກາຍບໍລິຫານ. ໃນໄລຍະບຸນກຸດຈີນ, ນັກຂ່າວໄດ້ໄປເອົາຂ່າວຢູ່ສະໂມສອນຫັດກາຍບໍລິຫານແຫ່ງໜຶ່ງທີ່ປັກກິ່ງ, ທ່ານຫວັງ ຄູຝຶກການຫັດກາຍບໍລິຫານຂອງສະໂມສອນບອກນັກຂ່າວວ່າ: ໃນໄລຍະພັກວຽກ ສະໂມສອນພວກຂ້າພະເຈົ້າມີຄົນຈຳນວນຫຼວງຫຼາຍມາອອກກຳລັງກາຍ, ເຖິງວ່າໃນໄລຍະບຸນກຸດຈີນກໍ່ເປັນແນວນີ້.
ເປັນຫຍັງຄົນຈີນຫຼາຍປານນີ້ລ້ວນແຕ່ເລືອກເອົາໄລຍະບຸນກຸດຈີນມາອອກກຳລັງກາຍ? ໃນຫຼາຍປີມານີ້, ເນື່ອງຈາກວ່າ ຈັງຫວະຊີວິດການເປັນຢູ່ໃນຕົວເມືອງຂອງຈີນໄດ້ໄວກວ່າເກົ່າ, ກຳລັງໜີບຂອງຄົນຈີນໃນດ້ານວຽກງານແລະຊີວິດກໍ່ນັບມື້ນັບຫຼາຍ, ສະນັ້ນ ໂຣກພະຍາດທີ່ເກີດຂຶ້ນຍ້ອຍກຳລັງໜີບກໍ່ລົບກວນຄົນທັງຫຼາຍ, ຮ່າງກາຍຕົກຢູ່ໃນສະພາບບໍ່ສຸຂະພາບປານໃດ ໄດ້ກາຍເປັນເລື່ອງອຸກອັ່ງຂອງມວນຊົນໃນຕົວເມືອງຫຼາຍແຫ່ງ. ຄຳສຸພາສິດທີ່ວ່າ "ຊີວິດຢູ່ນຳກິລາ" ເລີ່ມເປັນສິ່ງຊີ້ນຳແນວຄິດຂອງຄົນທັງຫຼາຍ, ການອອກກຳລັງກາຍຈຶ່ງກາຍເປັນເລື່ອງນິຍົມກັນຂອງຄົນທັງຫຼາຍ.
ນາງຊຸນເວີຍມີອາຍຸ 26 ປີ ເປັນບັນນາທິການໜັງສືພິມ, ໃນຍາມທຳມະດາ ນາງກໍມັກຫຼິ້ນກິລາ, ນາງຍັງເຫັນວ່າ, ໃນໄລຍະບຸນກຸດຈີນ ຫຼິ້ນກິລາອອກກຳລັງກາຍຍິ່ງມີຄວາມຈຳເປັນ. ນາງເວົ້າວ່າ: ໃນເວລາຜ່ານບຸນປະເພນີ, ຄົນຈີນກິນຊີ້ນແລະຂອງມັນຫຼາຍ, ໝົດຄອບຄົວຊຸມນຸມພາເຂົ້າ, ມີເປັດໄກ່ໝູປາຫຼາຍກວ່າຍາມທຳມະດາ, ທັງມັນກວ່າຍາມທຳມະດາ, ຂໍຍົກເອົາຂ້າພະເຈົ້າມາເປັນຕົວຢ່າງ, ໃນໄລຍະມື້ບຸນ ໂດຍສະເພາະແມ່ນໄລຍະບຸນກຸດຈີນ, ນ້ຳໜັກ ຮ່າງກາຍຈະເພີ່ມຂຶ້ນຫຼາຍສົມຄວນ, ສະນັ້ນ ໃນໄລຍະບຸນກຸດຈີນ ຂ້າພະເຈົ້າກໍລຸກແຕ່ເຊົ້າ ໄປແລ່ນທົນ ເຕັ້ນເຊືອກ ຫຼືຫຼິ້ນດອກປີກໄກ່ກັບພີ່ນ້ອງ. ເມື່ອເປັນແນວນີ້ ໄປອອກກຳລັງກາຍໜ້ອຍໜຶ່ງ ຈະບໍ່ອ້ວນຂຶ້ນ; ນອກນີ້, ຄົນທັງຫຼາຍນອກຈາກເບິ່ງໂທລະພາບທີ່ມີລາຍການຫຼາຍຢ່າງແລ້ວ ໄປອອກກຳລັງກາຍໜ້ອຍໜຶ່ງ, ກໍ່ຈະເຮັດໃຫ້ຈິດໃຈຫ້າວຫັນຂຶ້ນ.
ການອອກກຳລັງກາຍນອກຈາກເຮັດໃຫ້ສຸຂະພາບແຂງແຮງຂຶ້ນແລ້ວ ຍັງມີສັບພະຄຸນອີກຫຼາຍຢ່າງ. ທ່ານມາເລິຍອາຍຸ 27 ປີ ແມ່ນເຮັດວຽກທາງເວັບໄຊ, ທ່ານເປັນແມ່ນຜູ່ມັກຫຼິ້ນກິລາ. ໃນສາຍຕາຂອງທ່ານມາເລິຍ, ການໄປຫຼິ້ນກິລາອອກກຳລັງກາຍ ໂດຍສະເພາະແມ່ນໄປຫັດກາຍບໍລິຫານໃນໄລຍະມື້ບຸນ, ຍິ່ງມີຄວາມໝາຍໃນການແລກປ່ຽນກັນລະຫວ່າງຄົນກັບຄົນ, ທ່ານເວົ້າວ່າ: ການອອກກຳລັງກາຍແມ່ນເພື່ອຫຼຸດຄວາມອ້ວນ ຫຼືເພື່ອບຳລຸງສຸຂະພາບ, ຂ້າພະເຈົ້າເຫັນວ່າ ນີ້ແມ່ນສະພາບແລະບົດບາດໃນຂັ້ນຕົ້ນ. ຍັງມີບົດບາດຍິ່ງສຳຄັນກວ່າ ຕົວຢ່າງຄື ເມື່ອພວກເຮົາເຕີບໃຫຍ່ແລ້ວຂຸ້ນນຳວຽກຫຼາຍ, ບໍ່ພຽງແຕ່ເທົ່ານີ້ ໃນປະຈຸບັນ ເຮັດວຽກຢູ່ປັກກິ່ງມີກຳລັງໜີບຫຼາຍ, ສະນັ້ນ ຄົນທັງຫຼາຍນັດກັນ ໄປອອກກຳລັງກາຍນຳກັນ, ນີ້ແມ່ນຮູບການແລກປ່ຽນທີ່ດີທີ່ສຸດ.
ຕາມປະເພນີຈີນ, ຄົນຈີນເອົາໃຈໃສ່ນຳການແລກປ່ຽນອາລົມຈິດລະຫວ່າງຍາດພີ່ນ້ອງແລະເພື່ອນມິດ, ການຫຼິ້ນກິລາຫັດກາຍນຳກັນ ກໍເປັນຮູບການແລກປ່ຽນກັນລະຫວ່າງຄົນກັບຄົນ, ສົນພໍໄດ້ກາຍເປັນເລື່ອງທີ່ນິຍົມກັນຂອງຄົນຈີນໃນໄລຍະມື້ບຸນ.
|
