|
ສະບາຍດີທ່ານຜູ່ຟັງທີ່ໂຄລົບ, ຊົມເຊີຍທ່ານຮັບຟັງລາຍການອາລະຍະທຳພັນປີ, ກໍຄືກັນກັບບຸນຄຼິສມາດຂອງຊາວຕາເວັນຕົກ, ບຸນກຸດຈີນແມ່ນມື້ບຸນທີ່ຄຶກຄື້ນມ່ວນຊື່ນກວ່າໝູ່ຂອງຊາວຈີນໃນປີໜຶ່ງ, ເຖິງວ່າຄຽງຄູ່ກັບຍຸກສະໄໝໄດ້ມີການປ່ຽນແປງ, ເນື້ອໃນຂອງບຸນກຸດຈີນກໍ່ພວມປ່ຽນແປງ, ຮູບການສະຫຼອງມື້ບຸນຂອງຄົນທັງຫຼາຍກໍ່ພວມປ່ຽນແປງຢູ່ກໍ່ຕາມ, ແຕ່ຍັງບໍ່ມີສິ່ງໃດສາມາດເຂົ້າແທນຖານະຂອງບຸນກຸດຈີນໃນຊີວິດການເປັນຢູ່ແລະຈິດສຳນຶກຂອງຄົນທັງຫຼາຍໄດ້. ວັນທີ 29 ມັງກອນນີ້ແມ່ນມື້ບຸນກຸດຈີນຕາມຈັນທະຄະຕິຈີນ, ຕໍ່ໄປເຊີນຟັງລາຍລະອຽດກ່ຽວກັບບຸນກຸດຈີນ.
ຕາມເວົ້າກັນວ່າ ບຸນກຸດຈີນມີປະຫວັດມາ 4000 ປີແລ້ວ, ແຕ່ຫົວທີບໍ່ເອີ້ນເປັນບຸນກຸດຈີນ, ກໍ່ບໍ່ໄດ້ກຳນົດເອົາມື້ໃດເປັນມື້ບຸນ. ກ່ອນ ຄ.ສ.2100 ກວ່າປີ, ຄົນທັງຫຼາຍໃນສະໄໝນັ້ນໄດ້ອີງຕາມກົດເກນການໝູນເດີນຂອງດາວພະຫັດມາຄຳຄວນປີ, ແລະເອີ້ນບຸນກຸດຈີນເປັນ "ຊຸ້ຍ" ໝາຍເຖິງ "ປີ". ຮອດກ່ອນ ຄ.ສ.1000 ປີ, ຄົນທັງຫຼາຍໄດ້ໃຊ້ "ໜຽນ" ມາໝາຍເຖິງບຸນກຸດຈີນ. "ໜຽນ" ໃນຄາວນັ້ນແມ່ນໝາຍເຖິງການເກັບກ່ຽວໄດ້ຮັບຜົນອຸດົມສົມບູນ, ປີໃດໄດ້ຮັບຜົນອຸດົມສົມບູນກໍ່ເອີ້ນວ່າ "ໂຢວໜຽນ" ໝາຍຄວາມວ່າ "ປີອຸດົມສົມບູນ", ຖ້າໄດ້ຮັບຜົນອຸດົມສົມບູນທີ່ສຸດກໍ່ເອີ້ນວ່າ "ຕ້າໂຢວໜຽນ" ໝາຍເຖິງ "ປີທີ່ໄດ້ຮັບຜົນເກັບກ່ຽວອັນມະຫາສານ".
ຕາມປະເພນີພື້ນເມືອງຂອງຈີນແລ້ວ, ບຸນກຸດຈີນດ້ານຄວາມໝາຍກວ້າງໄດ້ເລີ່ມແຕ່ມື້ແຮມ 8 ຄ່ຳເດືອນ 12 ຕາມຈັນທະຄະຕິຈີນ, ແກ່ຍາວໄປຮອດບຸນຂະໜົມບົວລອຍຄື ມື້ຂຶ້ນ 15 ຄ່ຳເດືອນຈຽງປີໃໝ່, ແຕ່ຕົ້ນຕະຫຼອດປາຍມີປະມານ 3 ອາທິດ. ໃນໄລຍະນີ້ໄດ້ຖືເອົາວັນສົ່ງທ້າຍປີເກົ່າຕ້ອນຮັບປີໃໝ່ແລະມື້ອອກໃໝ່ໜຶ່ງຄ່ຳເດືອນຈຽງເປັນມື້ສຳຄັນແລະສະຫຼອງກັນຢ່າງຟົດຟື້ນທີ່ສຸດ.
ຢູ່ແຫ່ງຕ່າງໆຂອງຈີນ, ຄົນທັງຫຼາຍສະຫຼອງບຸນກຸດຈີນມີປະເພນີແລະຄວາມຊີນເຄີຍຕ່າງກັນຫຼາຍຢ່າງ, ແຕ່ຕອນຄ່ຳມື້ສົ່ງທ້າຍປີເກົ່າຕ້ອນຮັບປີໃໝ່ ສະມາຊິກຄອບຄົວໝົດທຸກຄົນຕ້ອງມາພ້ອມພຽງຮຽງໜ້າກັນ ກິນເຂົ້າຮ່ວມໂຕະ, ບໍ່ວ່າຢູ່ພາກເໜືອຫຼືຢູ່ພາກໃຕ້ ລ້ວນແຕ່ແມ່ນປະເພນີທີ່ຂາດບໍ່ໄດ້. ຢູ່ພາກໃຕ້, ຄາບຄ່ຳນີ້ທຳມະດາແລ້ວຈະມີອາຫານ 10 ກວ່າເຍື່ອງ, ໃນນັ້ນຕ້ອງມີເຕົ້າຮູ້ແລະປາ, ເພາະວ່າໃນພາສາຈີນ ເຕົ້າຮູ້ແລະປາອອກສຽງຄ້າຍຄືກັນກັບຄຳວ່າ "ຟູ້ອີ້" ໝາຍເຖິງ "ລ້ຳລວຍ. ຢູ່ພາກເໜືອ, ພາເຂົ້າຄາບນີ້ສ່ວນຫຼາຍແມ່ນກິນກ້ຽວ, ສະມາຊິກຄອບຄົວພາກັນຫໍ່ກ້ຽວ, ແລ້ວຕົ້ມໃຫ້ສຸກ, ໃສ່ເຄື່ອງປຸງແຕ່ງລົດຊາດ, ໝົດຄອບຄົວມານັ່ງກິນຢູ່ໂຕະດຽວກັນຢ່າງຄຶກຄື້ນ, ໃນຫຼາຍປີມານີ້, ຄຽງຄູ່ກັບລະດັບຊີວິດການເປັນຢູ່ໄດ້ຍົກສູງຂຶ້ນ, ມີຄອບຄົວບໍ່ໜ້ອຍໃນຕົວເມືອງໄປກິນເຂົ້າຄາບຄ່ຳນີ້ຢູ່ຮ້ານອາຫານ, ບໍ່ຕ້ອງເສຍເວລາກຽມພາເຂົ້າເອົາເອງ. ແນ່ນອນແລ້ວ ຄອບຄົວສ່ວນຫຼາຍແໜງເຮັດອາຫານເອົາເອງ, ຈະມ່ວນກວ່າ. ອາຫານດັ້ງເດີມໃນໄລຍະບຸນກຸດຈີນຍັງມີເຂົ້າໜົມເຂ້ງປີໃໝ່ແລະເຂົ້າໜົມບົວລອຍທີ່ເຮັດດ້ວຍແປ້ງເຂົ້າໜຽວ, ອາຫານເຫຼົ່ານີ້ໄດ້ໝາຍເຖິງລະດັບຊິວິດການເປັນຢູ່ສູງຂຶ້ນຄູ່ປີ, ສະມາຊິກຄອບຄົວມາພ້ອມພຽງຮຽງໜ້າກັນແລະມີຄວາມສຸກ.
ວັນສົ່ງທ້າຍປີເກົ່າຕ້ອນຮັບປີໃໝ່ຕ້ອງງັນກັນໝົດຄືນ, ນີ້ກໍ່ແມ່ນປະເພນີດັ້ງເດີມຂອງບຸນກຸດຈີນ. ໃນຄືນນີ້ ຄົນທັງຫຼາຍຈະສົ່ງທ້າຍປີເກົ່າຕ້ອນຮັບປີໃໝ່ໃນທ່າມກາງບັນຍາກາດອັນມ່ວນຊື່ນຟົດຟື້ນ. ໃນເມື່ອກ່ອນ, ເວລາປີໃໝ່ວຽນມາເຖິງ, ຄົນທັງຫຼາຍຈະຈູດໝາກກະໂພກ ເພື່ອສະເຫຼີມສະຫຼອງ. ປະເພນີທີ່ກຳເນີດຈາກການຂັບໄຫຼ່ຜີສາງນາງຮ້າຍດັ່ງກ່າວນີ້ ຍ້ອນມູນເຫດດ້ານຄວາມປອດໄພແລະເຊື່ອມພິດສິ່ງແວດລ້ອມ, ຢູ່ປັກກິ່ງແລະຕົວເມືອງໃຫຍ່ຈຳນວນໜຶ່ງໄດ້ຈຳກັດການຈູດໝາກກະໂພກຢູ່ເຂດກາງເມືອງ. ແຕ່ຢູ່ເຂດຊົນນະບົດອັນໄພສານ, ການຈູດໝາກກະໂພກຍັງແມ່ນລາຍການທີ່ຂາດບໍ່ໄດ້. ຮອດມື້ອອກໃໝ່ໜຶ່ງຄ່ຳ, ໝົດຄອບຄົວຈະໃສ່ເສື້ອຜ້າຊຸດໃໝ່, ຕ້ອນຮັບແຂກມາຢາມຫຼືໄປຢາມຍາດພີ່ນ້ອງ. ໃນຫຼາຍປີມານີ້, ໃນໄລຍະບຸນກຸດຈີນ ໃນຕົວເມືອງໃຫຍ່ຄື ປັກກິ່ງເປັນຕົ້ນກໍ່ໄດ້ຈັດງານວັດຕາມປະເພນີຢູ່ສວນສາທາລະນະ, ໃນງານວັດດັ່ງກ່າວ ມີການສະແດງປະເພນີພື້ນເມືອງຕ່າງໆ, ຕົວຢ່າງຄື ເອົານ້ຳຕານມາປັ້ນເປັນຮູບຄົນ ສານຂອດຈີນ ເຊີດສິງໂຕ ຊ່ວງເຮືອໂຄກແລະອື່ນໆ, ໄດ້ດຶງດູດຫຼາຍພັນຫຼາຍໝື່ນຄົນມາຊົມເບິ່ງ.
ການເຄື່ອນໄຫວດ້ານວັດທະນະທຳໃນໄລຍະບຸນກຸດຈີນກໍ່ມີຫຼາຍຢ່າງຫຼາຍແນວ. ໃນຫຼາຍປີມານີ້, ວັນປີໃໝ່ສາກົນຫາກໍ່ຜ່ານໄປ, ຮູບເງົາສະຫຼອງບຸນກຸດຈີນກໍ່ເລີ່ມເຫີ່ກັນສາຍໃນທົ່ວປະເທດແລ້ວ. ສ່ວນຢູ່ເຂດຊົນນະບົດອັນໄພສານ, ກໍ່ມີການສະແດງຄີຕະສິນທ້ອງຖິ່ນ ຟ້ອນອຽງເກີແລະໄປທ່ຽວງານວັດເປັນຕົ້ນ, ເຕັມໄປດ້ວຍບັນຍາກາດອັນມ່ວນຊື່ນຟົດຟື້ນໃນຍາມບຸນ.
ການຕິດຄະຕິຄູ່ໃສ່ສອງຂ້າງປະຕູ ຕິດຮູບແຕ້ມ ໄຕ້ໂຄມໄຟ, ກໍ່ແມ່ນເນື້ອໃນສະຫຼອງບຸນກຸດຈີນຂອງຄົນທັງຫຼາຍ. ຄຽງຄູ່ກັບລະດັບຊີວິດການເປັນຢູ່ໄດ້ຍົກສູງຂຶ້ນ, ໃນຂະນະທີ່ໄດ້ຮັກສາປະເພນີດັ້ງເດີມຂອງມື້ບຸນນັ້ນ, ຄົນທັງຫຼາຍກໍ່ໄດ້ພັດທະນາລາຍການເຄື່ອນໄຫວສະຫຼອງມື້ບຸນ.
ສິ່ງທີ່ຍັງຕ້ອງກ່າວເຖິງນັ້ນແມ່ນ ຈີນແມ່ນປະເທດທີ່ປະກອບດ້ວຍຫຼາຍຊົນເຜົ່າ, ນອກຈາກເຜົ່າຮັ້ນແລ້ວ ຍັງມີຊົນເຜົ່າສ່ວນໜ້ອຍ 55 ຊົນເຜົ່າ. ເຖິງວ່າພວກເຂົາເຈົ້າມີພາສາແລະຕົວໜັງສືຕ່າງກັນ, ມີວິຖີຊີວິດແລະຮີດຄອງປະເພນີຕ່າງກັນກໍ່ຕາມ, ແຕ່ພວກເຂົາເຈົ້າສ່ວນຫຼາຍກໍ່ຖືບຸນກຸດຈີນເປັນມື້ບຸນສຳຄັນຂອງຊົນເຜົ່າຕົນ. ບາງຊົນເຜົ່າຄື ເຜົ່າເອີ້ລຸນຊຸນ ເຜົ່າຕາວໍ້ເອີ ເຜົ່າເກົາຫຼີແລະເຜົ່າມົ້ງເປັນຕົ້ນ, ການເຄື່ອນໄຫວສະຫຼອງມື້ບຸນຂອງພວກເຂົາເຈົ້າຍັງມີຈຸດພິເສດຂອງຊົນເຜົ່າຕົນ.
|
