|
|
 |
| (GMT+08:00)
2006-02-01 20:40:35
|
 |
|
ຮີດຄອງປະເພນີບຸນກຸດຈີນ(ສຽງ)
cri
Author: da
|
ບຸນກຸດຈີນ ບຸນປະເພນີຂອງຄົນຈີນໄດ້ວຽນມາເຖິງແລ້ວ.ບຸນກຸດຈີນປີນີ້ ກົງກັບວັນທີ 29 ມັງກອນ.ບຸນກຸດຈີນແມ່ນບຸນປະເພນີທີ່ຄຶກຄື້ນແລະມ່ວນຊື່ນກວ່າໝູ່ໃນປີໜຶ່ງຂອງຄົນຈີນ. ມາທ່ຽວຈີນໃນຍາມບຸນກຸດຈີນ,ແມ່ນໂອກາດດີທີ່ສຸດເພື່ອຊອກຮູ້ຮີດຄອງປະເພນີຂອງຈີນ.ໃນລາຍການສີສັນແດນມັງກອນພາກນີ້,ພວກເຮົາຈະແນະນຳບຸນວັດນະຄອນປັກກິ່ງ ບຸນໂຄມໄຟເມືອງນານກິ່ງແລະຕະຫຼາດດອກໄມ້ເມືອງກວາງໂຈ່ວໃນຍາມບຸນກຸດຈີນສູ່ທ່ານຟັງ.
ໄປຫຼິ້ນບຸນວັດແມ່ນຮີດຄອງປະເພນີຢ່າງໜຶ່ງຂອງຄົນປັກກິ່ງໃນຍາມບຸນກຸດຈີນ.ບຸນວັດປັກກິ່ງມີປະຫວັດມາຫຼາຍຮ້ອຍປີແລ້ວ,ແຕ່ກ່ອນ ແມ່ນການເຄື່ອນໄຫວທີ່ຄົນທັງຫຼາຍບູຊາເທວະດາຟ້າແຖນ,ພາຍຫຼັງມາ ຈຶ່ງຄ່ອຍໆຈັດເປັນຕະຫຼາດນັດ ແລະມີລາຍການລື້ນເລີງ,ກາຍເປັນການເຄື່ອນໄຫວສະຫຼອງບຸນຂອງມະຫາຊົນຢ່າງໄວວາ,ສີສັນສາສະໜາກໍນັບມື້ນັບຈາງລົງ.
ບຸນວັດປັກກິ່ງໃນຍາມບຸນກຸດຈີນ,ລ້ວນແຕ່ແຂວນໂຄມໄຟ,ປະດັບປະດາຢ່າງຕາມຮີດຄອງ,ມີຄົນໄປທ່ຽວຢ່າງຄັບຄາໜາແໜ້ນ.ຢູ່ໃນບຸນວັດ,ທ່ານຈະໄດ້ຊົມການສະແດງຮີດຄອງປະເພນີຄື ການເຊີດສິງໂຕ ເຊີດມັງກອນແລະຫຼິ້ນໄມ້ໂຖກເຖກເປັນຕົ້ນ,ຈະໄດ້ຊີມຂະໜົມແຊບໆແບບປັກກິ່ງຫຼາຍຢ່າງຫຼາຍແນວ,ມີເຄື່ອງວິຈິດຕະກຳພື້ນເມືອງຊະນິດຕ່າງໆວາງຂາຍເຊັ່ນຄື ວ່າວ ຮູບເຈ້ຍຕັດ ຮູບຄົນດິນປັ້ນ ແລະກົງຫັນນ້ອຍເປັນຕົ້ນ.ຢູ່ໃນບຸນວັດ ຄົນຄັບຄາກັນທີ່ສຸດ ຕ່າງກໍປ່ຽມລົ້ນໄປດ້ວຍຄວາມມ່ວນຊື່ນເບີກບານ, ຖັນແຖວຟ້ອນຢາງເກີ ສຽງຄ້ອງສຽງກອງທີ່ມ່ວນຊື່ນ ແລະໝູ່ຄົນທີ່ຖືກົງຫັນນ້ອຍສີແດງສີຂຽວ,ໄດ້ເພີ່ມບັນຍາກາດສິລິມຸງຄຸນແລະມ່ວນຊື່ນໃຫ້ແກ່ວັດວາທີ່ເກົ່າແກ່ ແລະສວນສາທາລະນະປັກກິ່ງ. ປີນີ້ແມ່ນປີຈໍຈັນທະຄະຕິຂອງຈີນ,ສະນັ້ນ ໃນບຸນວັດກໍຍັງຈັດໃຫ້ມີລາຍການລື້ນເລີງກ່ຽວກັບໝາເຊັ່ນ ການໂຊໝາຊະນິດຕ່າງໆແລະການໂຊເຝິກໝາເປັນຕົ້ນ.
ທ່ານຈັ່ງໂຊ້ ຜູ້ຈັດການສຳນັກງານທ່ອງທ່ຽວສາກົນຈີນເວົ້າຕໍ່ນັກຂ່າວວ່າ:
"ໃນໄລຍະບຸນກຸດຈີນ,ບຸນວັດມີເອກະລັກພິເສດທີ່ສຸດຢູ່ນະຄອນປັກກິ່ງ.ປີນີ້ແມ່ນປີຈໍ,ບຸນວັດທຸກແຫ່ງຢູ່ປັກກິ່ງລ້ວນແຕ່ສ່ອງແສງໃຫ້ເຫັນຈຸດພິເສດທາງວັດທະນະທຳດັ່ງກ່າວຂອງຈີນ."
ຢູ່ປັກກິ່ງ, ບຸນວັດຂະໜາດໃຫຍ່ກວ່າເພິ່ນແມ່ນຈັດຢູ່ສາມບ່ອນ,ຢູ່3ເຂດທີ່ຕ່າງກັນ,ຄື:ວັດໄປຢຸນກ້ວນແລະວັດຕົ່ງເຢ້ ຊຶ່ງເປັນວັດສາສະໜາເຕົ໋າສອງແຫ່ງ ແລະຕີ້ຖານ ຊຶ່ງເປັນສະຖານທີ່ບວງສວງຂອງເຈົ້າຊີວິດສະໄໝບູຮານ.
ເມື່ອໄດ້ແນະນຳບຸນວັດປັກກິ່ງແລ້ວ, ຕໍ່ໄປພວກເຮົາຈະພາທ່ານໄປຊົມບຸນໂຄມໄຟຢູ່ເມືອງນານກິ່ງ ເມືອງບູຮານເກົ່າແກ່ຢູ່ຍ່ານໃຕ້ແມ່ນ້ຳຢາງເຊ ແມ່ນ້ຳໃຫຍ່ກວ່າໝູ່ຢູ່ຈີນ,ໄປເບິ່ງບຸນໂຄມໄຟຢູ່ແຫ່ງນັ້ນ.
ນານກິ່ງແມ່ນລາດຊະທານີຂອງ 10 ລາດຊະວົງທີ່ມີຊື່ສຽງຂອງຈີນ,ຊຶ່ງໝາຍຄວາມວ່າ, ໃນປະຫວັດສາດຈີນເຄີຍມີ 10 ລາຊະວົງຫຼືອຳນາດການປົກຄອງທີ່ມີຊື່ສຽງໄດ້ຕັ້ງນະຄອນຫຼວງຢູ່ແຫ່ງນີ້.ແມ່ນ້ຳຊິນຮວຍທີ່ໄຫຼຜ່ານເມືອງນີ້,ມີຊື່ລືນາມຍ້ອນມີພາບວິວຫໍຜາສາດລຽນກັນເປັນແຖວຢູ່ແຄມນ້ຳທີ່ຍາວຕັ້ງ 10 ລີ້,ບວກກັບສຽງພາຍເຮືອແລະແສງໂຄມໄຟທີ່ສວຍງາມ.ວັດຟູ່ຈືທີ່ສ້າງຢູ່ແຄມແມ່ນ້ຳຊິນຮວຍ,ແຕ່ມື້ເດືອນຈຽງອອກໃໝ່1 ຄ່ຳຮອດແຮມ 3 ຄ່ຳ ຈັນທະຄະຕິຈີນ,ຕ້ອງຈັດບຸນໂຄມໄຟຢູ່ວັດຟູ່ຈື ທຸກປີ,ບຸນໂຄມໄຟໄດ້ກາຍເປັນບຸນວັດທີ່ມີຊື່ສຽງໃນຍາມບຸນຢູ່ແຖບພາກໃຕ້ແມ່ນ້ຳຢາງເຊ.
ວັດຟູ່ຈື ກໍແມ່ນວັດຂົງຈື້ນັ້ນເອງ,ແມ່ນສະຖານທີ່ທີ່ຄົນສະໄໝບູຮານບູຊາຂົງຈື.ວັດຟູ່ຈືເມືອງນານກິ່ງ ມີປະຫວັດ 900 ກວ່າປີແລ້ວ. ກ່ອນແລະຫຼັງເດືອນຈຽງ 15 ຄ່ຳ ຄືບຸນຂະໜົມບົວລອຍທຸກປີ,ຜູ້ໄປທ່ຽວວັດຟູ່ຈືແລະຊົມໂຄມໄຟຢູ່ແຄມແມ່ນ້ຳຊິນຮວຍ ມີຫຼາຍເຖິງຫຼາຍແສນຄົນ. ເມື່ອເວົ້າເຖິງສະພາບບຸນວັດຟູ່ຈືປີນີ້,ທ່ານຢາງມິງ ນັກຂ່າວວິທະຍຸ CRI ປະຈຳຈ່ຽງຊູ່ເວົ້າວ່າ:
"ປີນີ້,ບຸນໂຄມໄຟວັດຟູ່ຈືເມືອງນານກິ່ງ ມີໂຄມໄຟ 4 ແສນ 5 ໝື່ນໜ່ວຍປ້ອນຕະຫຼາດ,ອັນໄດ້ສ້າງສະຖິຕິໃໝ່ໃນດ້ານຈຳນວນ.ສີສັນຊົນຊາດແລະລັກສະ ນະຮີດຄອງໂຄມໄຟ,ໄດ້ສ່ອງແສງໃຫ້ເຫັນເອກະລັກພິເສດລື່ນໝູ່ຂອງໂຄມໄຟແມ່ນ້ຳຊິນຮວຍ."
ເມື່ອແນະນຳບຸນວັດປັກກິ່ງແລະບຸນໂຄມໄຟນານກິ່ງແລ້ວ,ສຸດທ້າຍ ພວກເຮົາຈະແນະນຳຕະຫຼາດດອກໄມ້ຂອງເມືອງກວາງໂຈ່ວພາກໃຕ້ຂອງຈີນສູ່ຟັງ.ເມືອງກວາງໂຈ່ວແມ່ນເມືອງດອກໄມ້ທີ່ມີຊື່ສຽງຢູ່ຈີນ,ຢູ່ແຫ່ງນີ້ ອາກາດອົບອຸ່ນຕະຫຼອດປີ,ໃນເມືອງດອກໄມ້ບານເຮື່ອເຮືອງຕະຫຼອດປີ.
ໃນເວລາປີໃໝ່ຈັນທະຄະຕິຈີນວຽນມາເຖິງ,ໄທກວາງໂຈ່ວມັກຊື້ດອກໄມ້ຫຼາຍໂຖຫຼືຫຼາຍຊໍ່ມາເອ້ໃນເຮືອນຫຼືຫ້ອງການ,ພວກເຂົາເຈົ້າຖືວ່າ,ດອກໄມ້ທີ່ເບັ່ງບານ ທັງມີສີສວຍງາມ,ທັງຈະນຳເອົາໂຊກລາບມາໃຫ້ຕົນເອງໃນປີໃໝ່.
ທຸກໆປີ,ທະແນມແຕ່ເປີດຕະຫຼາດດອກໄມ້,ກໍຈະມີແຂກຄົນມາຊື້ຢ່າງຫຼວງຫຼາຍ. ຕະຫຼາດດອກໄມ້ຂອງເມືອງກວາງໂຈ່ວເວລາຂາຍດີທີ່ສຸດແມ່ນມື້ສິ້ນປີ.ໃນຕອນຄ່ຳມື້ສິ້ນປີ,ໄທກວາງໂຈ່ວທັງຫຼາຍ ເມື່ອຊຸມພາເຂົ້າສົ່ງທ້າຍປີເກົ່າແລ້ວ,ກໍພາກັນໄປເລາະຕະຫຼາດດອກໄມ້,ເລືອກຊື້ດອກໄມ້ກັນອຶກກະທຶກ. ໃນຕະຫຼາດນີ້ ມີດອກໂບຕັນ ດອກເບັນຈະມາດ ດອກກຸຫຼາບ ດອກບານເດິກ ດອກສຸ້ຍຊຽນແລະອື່ນໆ,ນອກນີ້ຍັງມີຕົ້ນໝາກກ້ຽງນ້ອຍທີ່ໝາຍຄວາມສິລິມຸງຄຸນ, ດອກໄມ້ນາໆຊະນິດສີສວຍສົດງົດງາມ,ສົ່ງກິ່ນຫອມຫວນຕ້ອງດັງ.ພ້ອມກັນນັ້ນ ຕະຫຼາດດອກໄມ້ຍັງຂາຍປາຄຳແລະເຄື່ອງໃຊ້ຂອງກິນຕ່າງໆສຳລັບບຸນປີໃໝ່, ແລະມີໂຄມໄຟຫຼາຍສີສັນ,ຮູ້ສຶກວ່າກໍມ່ວນຄືກັນ .
ຕະຫຼາດດອກໄມ້ກວາງໂຈ່ວມີປະຫວັດ 200 ກວ່າປີແລ້ວ,ເຖິງວ່າຈັດຂຶ້ນສູ່ປິ,ແຕ່ປີໃດກໍມີເນື້ອໃນໃໝ່.ທ່ານເສີນສື່ຕະ ຜູ້ຮັບຜິດຊອບວຽກງານຕະຫຼາດດອກໄມ້ປີໃໝ່ເມືອງກວາງໂຈ່ວເວົ້າວ່າ:
"ຕະຫຼາດດອກໄມ້ເມືອງກວາງໂຈ່ວປີນີ້,ໄດ້ສົມທົບກັບການທ່ອງທ່ຽວຢ່າງມິອິນຊີ,ຈັດເອົາລາຍການເລາະຕະຫຼາດດອກໄມ້ເປັນລາຍການທ່ອງທ່ຽວກວາງໂຈ່ວມື້ໜຶ່ງ."
|
|
|
