|
|
 |
| (GMT+08:00)
2006-02-02 19:28:20
|
 |
|
ສົມຫວັງທຸກປະການ(ສຽງ)
cri
Author: shuo
|
ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ,ຍິນດີຕ້ອນຮັບທ່ານເຂົ້າ ສູ່ລາຍການນັດພົບໃນວັນອາທິດຂອງວິທະຍຸສາກົນແຫ່ງປະເທດຈີນພວກເຮົາ.ມື້ນີ້ແມ່ນວັນທີ29ມັງກອນ,ຄ້ອມພໍດີແມ່ນມື້ຂຶ້ນປີໃໝ່ ຄື ບຸນກຸດຈີນ ບຸນປະເພນີຂອງຈີນ.ໃນລາຍການມື້ນີ້,ພວກເຮົາໄດ້ຈັດເພງມ່ວນຊື່ນປະມວນໜຶ່ງທີ່ມີຄວາມໝາຍສິລິມຸງຄຸນ,ຫວັງແບ່ງ ປັນຄວາມເບີກບານມ່ວນຊື່ນກັບທ່ານຜູ້ຟັງທັງຫຼາຍໃນມື້ບຸນ.
ກ່ອນອື່ນ,ເຊີນທ່ານຟັງເພງwan shi ru yi "ສົມຫວັງທຸກປະການ"ທີ່ຂັບຮ້ອງໂດຍນາງຈ່າງເຢ.ເພງນີ້ສຽງອ່ອນຫວານ,ອົບອຸ່ນ,ມີຄຳອວຍພອນທີ່ຄົນທັງຫຼາຍມັກເວົ້າຕໍ່ຍາດຕິພີ່ ນ້ອງ ມິດສະຫາຍໃນບຸນກຸດຈີນ:"ໃນ365ຄ່ຳ,ຄ່ຳຄືນທີ່ຫວານກວ່າໝູ່ແລະງາມກວ່າໝູ່ແມ່ນຄ່ຳຄືນ ສົ່ງທ້າຍປີເກົ່າ.ຢູ່ໃນສາຍລົມພັດມີກິ່ນຫອມ,ຢູ່ໃນຫິມມະຂາວຫຸ້ມມີລົດຫວານ, ຄະຕິຄູ່ຂຽນແຕ່ຄຳສັບສິລິມຸງຄຸນ,ຢູ່ໃນຈອກເຫຼົ້າເຈັມແຕ່ຄວາມຈະເລີນຮັ່ງມີ.ແສງໂຄມໄຟ ແດງ,ເຍືອງໝົດຄອບຄົວໃຫ້ມີຄວາມສຸກ,ໄຟທຽນແດງໄດ້ສົ່ງຂ່າວໄຊຂ່າວດີມາຮອດ. ຄວາມຮັກແພງກັນລະຫວ່າງຍາດຕິພີ່ນ້ອງໃນບ້ານເກີດເມືອງນອນໃຫ້ລູກຫຼານປະຊາຊາດຈີນຮູ້ສຶກອ່ອນຫວານ,ຄຳອວຍພອນທຸກໆຄຳຂໍສົ່ງໃຫ້ເຈົ້າ,ຂໍໃຫ້ເຈົ້າສົມຫວັງທຸກປະການ."
ທີ່ຟັງມານັ້ນແມ່ນເພງwan shi ru yi "ສົມຫວັງທຸກປະການ"ທີ່ຂັບຮ້ອງໂດຍນາງຈ່າງເຢ.ເວົ້າສຳລັບຄົນຈີນ,ບຸນກຸດຈີນກໍຄືກັນກັບບຸນຄຼິສມາດສ໌ຂອງຄົນຝ່າຍຕາເວັນຕົກ,ຄົນທັງ ຫຼາຍລ້ວນແຕ່ເມືອບ້ານ,ໝົດຄອບຄົວເຕົ້າໂຮມຊຸມນຸມກັນ,ເພື່ອສະເຫວີຍຄວາມມ່ວນຊື່ນ. ຕໍ່ໄປ,ເຮົາຈະມອບເພງhuan ju yi tang"ເຕົ້າໂຮມຊຸມນຸມກັນ"ສູ່ທ່ານຟັງ,ທຳນອງເພງ ມ່ວນຊື່ນ,ເຕັມໄປດ້ວຍຄວາມເບີກບານຊື່ນໃຈໃນວັນບຸນ.ເພງນີ້ມີເນື້ອຮ້ອງວ່າ: "ເຕົ້າໂຮມກັນເພື່ອຄວາມມ່ວນຊື່ນ,ເຕົ້າໂຮມກັນເພື່ອຄວາມສິລິມຸງຄຸນ,ເຕົ້າໂຮມກັນໃນລຶກງາມຍາມດີ.ເຕົ້າໂຮມກັນ,ດື່ມເຫຼົ້າຈອກໜຶ່ງກ່ອນໃຫ້ຈິດໃຈມ່ວນຊື່ນ,ເຕົ້າໂຮມກັນ,ແລ້ວຮ້ອງເພງມິດຕະພາບຖາວອນ."
ທີ່ຟັງມານັ້ນແມ່ນເພງ huan ju yi tang"ເຕົ້າໂຮມຊຸມນຸມກັນ"ທີ່ມ່ວນອອນຊອນ.ບຸນກຸດຈີນແມ່ນໄລຍະຕົ້ນຂອງປີໃໝ່ຕາມປະຕິທິນຈີນ,ຍັງໝາຍຄວາມວ່າລະດູບານໃໝ່ຈະວຽນ ມາເຖິງ.ໃນຍາມບຸນກຸດຈີນ,ຄົນທັງຫຼາຍໃນເວລາພົບກັນຕ່າງສົ່ງຄຳອວຍພອນເຊິ່ງກັນແລະກັນ,ຫວັງໃນປີໃໝ່ນີ້,ທຸກສິ່ງທຸກຢ່າງຈົ່ງປະສົບຄວາມສະດວກສະບາຍ,ແລະໂຊກດີມີໄຊຕະຫຼອດໄປ.(ປ່ອຍເພງ)ທີ່ທ່ານພວມຟັງຢູ່ນີ້ແມ່ນເພງxi shi deng men"ເລື່ອງດີຮອດບ້ານ".ໃນເພງມີເນື້ອຮ້ອງວ່າ:"ເລື່ອງດີມາຮອດບ້ານ,ມື້ໃດກໍຮຸ່ງເຮືອງປານລະດູບານໃໝ່,ໂຊກດີມາເຄາະປະຕູບ້ານ".
ໃນຕອນສຸດທ້າຍຂອງລາຍການພາກນີ້,ເຊີນຟັງເພງ xin xiang shi cheng"ຄິດຫຍັງກໍດັ່ງໝາຍ"ທີ່ຂັບຮ້ອງໂດຍນາງລູເວີ່ຍ ນັກຮ້ອງໜຸ່ມ.ເນື້ອຮ້ອງມີຢູ່ວ່າ: "ນົກສິລິມຸງຄຸນຄາບດາວໂຊກດີມາໃຫ້,ຢູ່ທຸກໆບ້ານທຸກໆເມືອງເຫັນຮອຍຍີ້ມແຍ້ມແຈ່ມໃສ,ປະຊາຊົນທີ່ດຸໝັ່ນ ຄິດຫຍັງກໍດັ່ງໝາຍ,ວຽກງານໄດ້ຮັບຜົນງານດີ,ມີອະນາຄົດຮຸ່ງເຮືອງ,ເສັ້ນທາງກວ້າງຂວາງຮາບພຽງ ສະດວກສະບາຍ."ນະທີ່ນີ້,ຂ້າພະເຈົ້າຂໍເອົາສຽງເພງທີ່ມ່ວນຊື່ນຟົດຟື້ນເພງນີ້ສົ່ງຄຳອວຍພອນອັນປະເສີດໄປຍັງທ່ານຜູ້ຟັງທັງຫຼາຍ,ຂໍໃຫ້ທ່ານຈົ່ງສົມຫວັງທຸກປະການແລະຄິດຫຍັງກໍດັ່ງໝາຍໃນປີໃໝ່.
ໃນທ່າມກາງສຽງເພງທີ່ມ່ວນຊື່ນ,ລາຍການນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້.ສຸດທ້າຍນີ້,ພະນັກງານໝົດທຸກຄົນໃນພະແນກພາສາລາວວິທະຍຸສາກົນແຫ່ງປະເທດຈີນຂໍສົ່ງຄຳອວຍພອນຂອງພີ່ນ້ອງປະເທດຊາດໄປຍັງຊາວຈີນຕ່າງດ້າວທີ່ອາໄສຢູ່ລາວ,ຂໍ ອວຍພອນພວກທ່ານມີຄວາມເບີກບານສຳລານໃຈໃນໂອກາດບຸນກຸດຈີນ,ແລະຂໍໃຫ້ທ່ານຜູ້ຟັງທັງຫຼາຍຂຽນຈົດໝາຍມາຍັງພວກເຮົາ,ເລົ່າເລື່ອງພວກທ່ານສະເຫຼີມສະຫຼອງບຸນກຸດຈີນຢູ່ລາວແນວໃດ,ຂອບໃຈທ່ານທີ່ຮັບຟັງ,ພົບກັນໃໝ່ໃນອາທິດໜ້າ,ສະບາຍດີ.
|
|
|
