|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ມື້ນີ້ແມ່ນມື້ອອກໃໝ່ 3 ຄ່ຳຕາມປະຕິທິນຈັນທະຄະຕິຈີນ, ການສະຫຼອງບຸນກຸດຈີນຢູ່ແຫ່ງຕ່າງໆຂອງຈີນຍັງດຳເນີນຢູ່ຢ່າງຟົດຟື້ນ. ໃນລາຍການນິທານສຸພາສິດພາກນີ້, ຂ້າພະເຈົ້າຈະເລົ່າສຸພາສິດທີ່ເບົາອາລົມທັງຕະຫຼົກເລື່ອງ "ຕົ່ງຊື່ຊ້ຽວຜິນ" ສູ່ຟັງ, ສຸພາສິດນີ້ໝາຍເຖິງຮຽນແຕ່ຜິວເຜີນ, ບໍ່ພຽງແຕ່ຮຽນເອົາຄວາມສາມາດອັນແທ້ຈິງບໍ່ໄດ້ທໍ່ນັ້ນ, ຫາກຍັງໄດ້ຮັບຜົນທີ່ກົງກັນຂ້າມອີກດ້ວຍ. ບາງທີກໍ່ໃຊ້ໃນກໍລະນີສະແດງຄວາມຖ່ອມຕົວ, ເຊັ່ນ "ຮຽນບໍ່ດີປານໃດ ພຽງແຕ່ເປັນແບບຕົ່ງຊື່ຊ້ຽວຜິນທໍ່ນັ້ນ".
ໃນສະໄໝຊຸ່ນຊິ່ວຂອງຈີນທີ່ຫ່າງຈາກປັດຈຸບັນ 2000 ກວ່າປີ, ລັດອູກັບລັດເຢ້ໄດ້ເກີດສົງຄາມເພື່ອຍາດຊິງເປັນເຈົ້າອຳນາດ. ໃນຫົວທີ, ຟູໄຊ ເຈົ້າຊີວິດລັດອູໄດ້ເອົາຊະນະໂກ່ວຈ້ຽນ ເຈົ້າຊີວິດລັດເຢ້. ເພື່ອແກ້ແຄ້ນ, ໂກ່ວຈ້ຽນໄດ້ສົ່ງນາງງາມຢ່າງຫຼວງຫຼາຍໃຫ້ຟູໄຊ ເຈົ້າຊິວິດລັດອູ, ເພື່ອໃຫ້ຟູໄຊມົວແຕ່ຫຼິ້ນນຳສາວງາມໝົດມື້, ບໍ່ອອກວ່າລັດຊະການ, ເຮັດໃຫ້ເຈົ້າຊີວິດລັດອູກັບເສນາບໍດີທັງຫຼາຍເກີດຄວາມຂັດແຍ່ງກັນ, ເພື່ອບັນລຸຈຸດປະສົງບັ່ນທອນກຳລັງຂອງລັດອູ. ໃນນາງງາມເຫຼົ່ານີ້, ໄຊຊີແມ່ນນາງງາມທີ່ສວຍງາມກວ່າໝູ່. ກ່ຽວກັບນາງງາມໄຊຊີ, ຍັງມີເລື່ອງມ່ວນໆເລື່ອງໜຶ່ງອີກ.
ຄວາມງາມຂອງໄຊຊີມີມາແຕ່ເກີດ, ເພິ່ນສວຍງາມຫຼາຍ, ຈົນບໍ່ມີໃຜທຽບໄດ້ໃນຄາວນັ້ນ. ໄຊຊີບໍ່ຕ້ອງທາແປ້ງ, ກໍ່ແສນງາມແລ້ວ, ຈົນກະທັ້ງທ່າທາງຍ້ອນຄວາມເຈັບເປັນຂອງນາງ ຜູ່ອື່ນເບິ່ງແລ້ວກໍ່ຮູ້ສຶກງາມຫຼາຍ. ຕາມເລົ່າກັນວ່າ ໄຊຊີມີອາການເຈັບໝາກຫົວໃຈ, ໃນເວລາເຈັບໝາກຫົວໃຈ, ນາງກໍ່ເອົາມືມາວາງໄວ້ໜ້າເອິກ ຍຸ້ມຄີ້ວ. ບາງຄົນເຫັນແລ້ວຮູ້ສຶກວ່າງາມຫຼາຍ ມີສະເໜເປັນພິເສດ.
ໄຊຊີມີເພື່ອນບ້ານຜູ່ໜຶ່ງຊື່ວ່າຕົ່ງຊື່, ຕົ່ງຊື່ໜ້າຕາຂີ້ຮ້າຍຫຼາຍແລະຍັງເປັນຄົນໃຈແຄບ. ນາງໄດ້ຍິນຜູ່ອື່ນຍ້ອງຍໍເລື້ອຍໆວ່າໄຊຊີງາມຫຼາຍ, ຈຶ່ງອິດສາທີ່ສຸດ, ເລີຍແຕ່ງຕົວຮຽນແບບໄຊຊີ. ແຕ່ບໍ່ວ່າຕົນເອງແຕ່ງຕົວແນວໃດ, ກໍ່ບໍ່ມີໃຜຍ້ອງຍໍວ່ານາງງາມຫຼາຍ, ນາງຈຶ່ງອຸກອັ່ງທີ່ສຸດ. ມີມື້ໜຶ່ງ, ຕົ່ງຊື່ໄດ້ຍິນວ່າທ່າທາງຂອງໄຊຊີໃນເວລາເຈັບປ່ວຍນັ້ນກໍ່ງາມຫຼາຍ, ກໍ່ເລີຍເຮັດທ່າທາງຕາມແບບໄຊຊີ. ຕົ່ງຊື່ບໍ່ໄດ້ເຈັບປ່ວຍ, ແຕ່ພັດເຮັດຕິເຈັບໝາກຫົວໃຈ, ເອົາມືວາງໃສ່ໜ້າເອິກ ຍຸ້ມຄີ້ວເໝືອນໄຊຊີ, ທຳທ່າຄືວ່າເຈັບຫຼາຍ. ແຕ່ຜິວໜ້າຂອງນາງຕົ່ງຊື່ຫຍາບຄາຍຫຼາຍ, ຂົນຄີ້ວທັງໃຫຍ່ທັງສັ້ນ, ເມື່ອນາງຍຸ້ມຄີ້ວ ທຳທ່າວ່າເຈັບຫຼາຍກໍ່ຍິ່ງບໍ່ເປັນໜ້າເບິ່ງ. ໃນຫົວທີ ຄົນທັງຫຼາຍບໍ່ຮູ້ວ່າຕົ່ງຊື່ເຮັດຫຍັງ, ກໍ່ບໍ່ມີໃຜສົນໃຈນຳ. ເວລາດົນແລ້ວ ບ້ານໃກ້ເຮືອນຄຽງຈຶ່ງຮູ້ວ່າຕົ່ງຊື່ເຮັດຫຍັງ, ເມື່ອເຫັນນາງຕົ່ງຊື່ເຮັດຕິເຈັບປ່ວຍ, ກໍ່ຫົວເຍີ້ຍວ່າ: "ມາເບິ່ງແມ ນາງຕົ່ງຊື່ຮຽນແບບໄຊຊີອີກແລ້ວ, ເຈົ້າເບິ່ງດູ, ນາງບໍ່ຮຽນຍັງໄຄແດ່, ຍິ່ງຮຽນຍິ່ງຂີ້ຮ້າຍກວ່າເກົ່າອີກ.
ນາງຕົ່ງຊື່ນຶກວ່າຕົນເອງຮຽນແບບໄຊຊີໃນຍາມເຈັບປ່ວຍຈະເຮັດໃຫ້ຕົນເອງງາມຂຶ້ນ, ພັດບໍ່ຮູ້ວ່າຕົນເອງໄດ້ກາຍເປັນຂີ້ປາກຂອງຄົນທັງຫຼາຍຫຼັງອາຫານ.
|
