|
ສະບາຍດີທ່ານຜູ່ຟັງທີ່ໂຄລົບ, ບານປິ່ງປ່ອງຖືກຖືເປັນ "ບານປະຈຳຊາດ" ຂອງຈີນ, ຄົນຈີນແມ່ນລາຊາໃນການຫຼິ້ນປິ່ງປ່ອງ. ປັດຈຸບັນ, ຄົນຈີນພວມພະຍາຍາມຈັດງານແຂ່ງຂັນປິ່ງປ່ອງປະສົມຂອງຕົນ, ຫວັງວ່າງານແຂ່ງຂັນປິ່ງປ່ອງປະສົມຈີນສາມາດກາຍເປັນງານແຂ່ງຂັນທີ່ມີຜົນສະທ້ອນຕໍ່ທົ່ວໂລກ. ໃນລາຍການພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: "ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນຫວັງສ້າງຍີ່ຫໍ້ຊື່ດັງໃນສາກົນ.
ຫວ່າງມໍ່ໆນີ້ ກອງປະຊຸມສະຫຼຸບງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນປີ 2005 ໄດ້ຈັດຂຶ້ນຢູ່ທີ່ປັກກິ່ງ, ກອງປະຊຸມໄດ້ປະເມີນສະພາບການຂະຫຍາຍຕົວຂອງງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນປີ 2005. ຜູ່ຮ່ວມປະຊຸມກ່າວວ່າ, ຜ່ານການທຸລະກິດຢ່າງຕັ້ງໜ້າ, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນທີ່ກຳເນີດຂຶ້ນ 7 ປີແລ້ວນັ້ນ ໄດ້ກາຍເປັນງານແຂ່ງຂັນປິ່ງປ່ອງປະສົມແບບອາຊີບທີ່ມີລະດັບສູງສຸດໃນໂລກ, ແລະໄດ້ຢ່ວງບາດກ້າວທີ່ໜ້າຊົມຊື່ນໃນດ້ານຫັນເປັນສາກົນ. ທ່ານຈ່າງສຽວເຜິງ ຮອງຫົວໜ້າພະແນກປິ່ງປ່ອງຂອງສູນປິ່ງປ່ອງແລະດອກປີກໄກ່ກົມໃຫຍ່ກິລາແຫ່ງຊາດຈີນເວົ້າວ່າ: ບໍ່ວ່າຈາກລະດັບຂອງນັກກິລາທີ່ເຂົ້າຮ່ວມການແຂ່ງຂັນ ລະດັບຄວາມດຸເດືອດຂອງການແຂ່ງຂັນ ຫຼືວ່າລະດັບຈາກດ້ານມີນັກກິລາຕ່າງປະເທດມາເຂົ້າຮ່ວມນຳ, ງານແຂ່ງຂັນປິ່ງປ່ອງປະສົມລະດັບເໜືອຂັ້ນຂອງຈີນລ້ວນແຕ່ມີລະດັບສູງສຸດໃນໂລກຢ່າງເດັດຂາດ.
ໃນຫຼາຍສິບປີທີ່ຜ່ານມາ, ຈີນແມ່ນປະເທດເຂັ້ມແຂງດ້ານກິລາປິ່ງປ່ອງທີ່ສົມຊື່. ແຕ່ຈົນຮອດປີ 1999, ຈີນຈຶ່ງເລີ່ມຈັດງານແຂ່ງຂັນປິ່ງປ່ອງປະສົມແບບອາຊີບ, ເມື່ອໄດ້ພັດທະນາມາເປັນເວລາ 7 ປີແລ້ວ, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນໄດ້ພັດທະນາກາຍເປັນງານແຂ່ງຂັນທີ່ມີຜົນສະທ້ອນໃນທົ່ວປະເທດຈີນແລ້ວ. ປີ 2005, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນມີສະໂມສອນຍິງຊາຍຕ່າງ 12 ແຫ່ງ, ມີຜູ່ເຂົ້າຊົມການແຂ່ງຂັນຢູ່ແຫ່ງຕ່າງໆຢ່າງຫຼວງຫຼາຍ, ການຖ່າຍທອດການແຂ່ງຂັນຂອງໂທລະພາບສູນກາງຈີນກໍ່ມີອັດຕາຮັບຊົມສູງສົມຄວນ. ທ້າວລານຜິງແມ່ນແຟນປິ່ງປ່ອງປັກກິ່ງຜູ່ໜຶ່ງ, ເພິ່ນເວົ້າວ່າ: ຂ້າພະເຈົ້າຕິດຕາມຊົມເບິ່ງງານແຂ່ງຂັນປິ່ງປ່ອງປະສົມລະດັບເໜືອຊັ້ນໃນທຸກວັນອາທິດ, ຂ້າພະເຈົ້າເຫັນວ່າ ມັນມີລະດັບບໍ່ຕ່ຳກວ່າການແຂ່ງຂັນປິ່ງປ່ອງໃນງານກິລາໂອລິມປິກ.
ເນື່ອງຈາກຈີນມີແຊມປຽນບານປິ່ງປ່ອງລະດັບໂລກຈຳນວນຫຼາຍກວ່າໝູ່ໃນໂລກແລະນັກກິລາປິ່ງປ່ອງລະດັບຍອດຢ້ຽມຈຳນວນຫຼວງຫຼາຍ, ສະນັ້ນ, ລະດັບຂອງງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນບໍ່ພຽງແຕ່ລື່ນກາຍລະດັບງານແຂ່ງຂັນປິ່ງປ່ອງປະສົມເຢຍລະມັນທີ່ເຄີຍມີຊື່ສຽງດົ່ງດັງບົນເວທີປິ່ງປ່ອງຂອງໂລກທໍ່ນັ້ນ, ຈົນກະທັ້ງບໍ່ຕ່ຳກວ່າລະດັບຂອງງານແຂ່ງຂັນຂະໜາດໃຫຍ່ຫຼາຍຢ່າງຂອງໂລກອີກດ້ວຍ. ການລອງລິດກັນລະຫວ່າງຫຼາຍທີມເຂັ້ມແຂງໃນງານແຂ່ງຂັນລະດັບເໜືອຊັ້ນຂອງຈີນ, ລະດັບຂອງການແຂ່ງຂັນແມ່ນສາມາດເທົ່າທຽມກັບງານແຂ່ງຂັນປິ່ງປ່ອງຊິງຊະນະເລີດລະດັບໂລກແລະການແຂ່ງຂັນປິ່ງປ່ອງຮອບຊິງຊະນະເລີດໃນງານກິລາໂອລິມປິກໄດ້.
ສະນັ້ນ, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນໄດ້ກາຍເປັນງານແຂ່ງຂັນລະດັບເໜືອຊັ້ນທີ່ນັກກິລາປິ່ງປ່ອງລະດັບຍອດຢ້ຽມໃນທົ່ວໂລກຫວັງຢາກເຂົ້າຮ່ວມ ຄືກັນກັບການແຂ່ງຂັນບານບ້ວງ NBA ການແຂ່ງຂັນບານເຕະພຼີເມຍລິກຂອງອັງກິດແລະສາຍ ກ.ຂອງອີຕາລີ. ທ່ານຈ່າງສຽວເຜິງແນະນຳວ່າ, ໃນລະດູການແຂ່ງຂັນປີ 2005, ນັກກິລາຕ່າງປະເທດທີ່ມາເຂົ້າຮ່ວມງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນມີເຖິງ 14 ຄົນ, ໃນນັ້ນ ລວມທັງທ້າວຕີໂມ ໂບນແຫ່ງເຢຍລະມັນ ທ້າວມີແຊນ ມາແຊແຫ່ງດານມາກ ທ້າວລິວຊຽງມິນແຫ່ງສ.ເກົາຫຼີແລະນາງຟູຈີນູມາ ອາອີແຫ່ງຍີ່ປຸ່ນ.ທ່ານຈ່າງສຽວເຜິງເວົ້າວ່າ:
ກ່ຽວກັບງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນ, ພວກຂ້າພະເຈົ້າສະເໜີວ່າ ຈະຈັດຕັ້ງໃຫ້ມັນກາຍເປັນງານແຂ່ງຂັນຫົວກະທິ, ແລະຢາກຈັດໃຫ້ກາຍເປັນງານແຂ່ງຂັນຫົວກະທິ, ຖ້າມີແຕ່ຄົນຈີນເຂົ້າຮ່ວມທໍ່ນັ້ນແມ່ນບໍ່ໄດ້, ບໍ່ວ່າ NBA ພຼີເມຍລິກອັງກິດ ຫຼືວ່າງານແຂ່ງຂັນອື່ນໆທີ່ອ່າວສຸກງອມ, ລ້ວນແຕ່ມີນັກກິລາຫຼາຍປະເທດເຂົ້າຮ່ວມນຳ, ເມື່ອສັງເກດເບິ່ງງານແຂ່ງຂັນປະສົມລະດັບເໜືອຊັ້ນໃນປີກາຍແລ້ວເຫັນວ່າ, ມີນັກກິລາຕ່າງປະເທດມາເຂົ້າຮ່ວມຫຼາຍກວ່າທຸກປີຜ່ານມາ, ທັງນີ້ໄດ້ເຮັດໃຫ້ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນຄືກັນກັບ NBA ມີຈຸດພິເສດເປັນແບບສາກົນ.
ນັກກິລາຕ່າງປະເທດທີ່ມີຊື່ສຽງດົ່ງດັງມາເຂົ້າຮ່ວມງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນນັ້ນ, ໄດ້ເຮັດໃຫ້ງານແຂ່ງຂັນລາຍນີ້ມີປະສິດທິຜົນທາງເສດຖະກິດແລະສັງຄົມອັນດີງາມ, ໄດ້ເຮັດໃຫ້ສື່ມວນຊົນຫຼາຍແຫ່ງຈົນກະທັ້ງສື່ມວນຊົນຕ່າງປະເທດສົນໃຈນຳ, ນີ້ກໍ່ໄດ້ຍົກສູງລະດັບຊື່ສຽງຂອງງານແຂ່ງຂັນ. ຕົວຢ່າງຄື ໃນລະດູການແຂ່ງຂັນປີ 2005, ນາງຟູຈີນູມາ ອາອີ ນັກກິລາປິ່ງປ່ອງຂອງຍີ່ປຸ່ນທີ່ໄດ້ຮັບຄວາມນິຍົມຊົມຊອບທີ່ສຸດຈາກຄົນທັງຫຼາຍໄດ້ເຂົ້າຮ່ວມສະໂມສອນເປີນກ່າງແຂວງລິວນິງ ເຊິ່ງເປັນສະໂມສອນເກັ່ງດ້ານກິລາປິ່ງປ່ອງໃນງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນ, ສະນັ້ນ ງານແຂ່ງຂັນດັ່ງກ່າວໃນລະດູການແຂ່ງຂັນປີ 2005 ຈຶ່ງໄດ້ຮັບຄວາມເອົາໃຈໃສ່ເປັນພິເສດຈາກຍີ່ປຸ່ນ. ຕັ້ງແຕ່ນາງຟູຈີນູມາ ອາອີເດີນທາງມາຮອດຈີນ, ສື່ມວນຊົນຍີ່ປຸ່ນ ເຊັ່ນໂທລະພາບເປັນຕົ້ນຫຼາຍ 10 ແຫ່ງກໍ່ເລີ່ມຕິດຕາມເອົາຂ່າວແຕ່ຕົ້ນຕະຫຼອດປາຍ. ພາຍໃນເວລາອັນສັ້ນໆ, ງານແຂ່ງຂັນລາຍນີ້ກໍ່ມີຊື່ສຽງສູງສົມຄວນຢູ່ຍີ່ປຸ່ນ. ໂດຍຖືໂອກາດນີ້, ໃນລະດູການແຂ່ງຂັນປີ 2005, ຈີນໄດ້ຈັດການແຂ່ງຂັນປິ່ງປ່ອງນັດໜຶ່ງຢູ່ຍີ່ປຸ່ນເປັນຄັ້ງທຳອິດ.
ນອກນີ້, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນຫັນເປັນສາກົນ, ກໍ່ມີຜົນສະທ້ອນອັນຕັ້ງໜ້າຕໍ່ການພັດທະນາຂອງກິລາປິ່ງປ່ອງຂອງໂລກ. ດ້ານໜຶ່ງ, ໃຕ້ສະພາບການທີ່ບໍ່ຕ້ອງເດີນທາງໄປຕ່າງປະເທດ, ນັກກິລາຈີນກໍ່ສາມາດແຂ່ງຂັນກັບນັກກິລາຜູ່ດີເດັ່ນຂອງແຫ່ງຕ່າງໆໃນໂລກ; ອີກດ້ານໜຶ່ງ, ນັກກິລາຕ່າງປະເທດກໍ່ສາມາດຝຶກອົບຮົມ ແລະແຂ່ງຂັນກັບນັກກິລາຈີນທີ່ມີລະດັບສູງໃນສະໂມສອນຕ່າງໆ, ນີ້ໄດ້ຊຸກຍູ້ໃຫ້ພວກເຂົາເຈົ້າຍົກລະດັບຂອງຕົນໃຫ້ສູງຂຶ້ນ. ໃນນັ້ນ ຕົວຢ່າງທີ່ເດັ່ນຊັດກວ່າໝູ່ແມ່ນໃນການແຂ່ງຂັນຮອບຊິງຊະນະເລີດໃນງານກິລາໂອລິມປິກອາແຕນປີ 2004, ທ້າວລິວຊຽງມິນ ນັກກິລາສ.ເກົາຫຼີໄດ້ອາໄສບົດຮຽນທີ່ສະສົມໃນເວລາແຂ່ງຂັນກັບນັກກິລາຈີນພາຍຫຼັງເຂົ້າຮ່ວມງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນ, ໄດ້ເອົາຊະນະທ້າວຫວັງຮາວ "ດາລາແຫ່ງຄວາມຫວັງ" ຂອງທີມ ປິ່ງປ່ອງຈີນໃນຍາມຫົວລ້ຽວຫົວຕໍ່. ພາຍຫຼັງຊິງໄດ້ແຊມປຽນງານກິລາໂອລິມປິກແລ້ວ, ທ້າວລິວຊຽງມິນກ່າວວ່າ: "ຂ້າພະເຈົ້າເຄີຍຕາງໜ້າທີມເຊສວນເຂົ້າຮ່ວມງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນ, ໄດ້ສຳຜັດກັບນັກກິລາຈີນຢ່າງຫຼວງຫຼາຍ, ແມ່ນນັກກິລາຈີນເຮັດໃຫ້ຂ້າພະເຈົ້າມີຄວາມກ້າວໜ້າແລະໄດ້ພັດທະນາ.
ເຖິງວ່າງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນໄດ້ກາຍເປັນງານແຂ່ງຂັນລະດັບຍອດຢ້ຽມຂອງໂລກແລ້ວກໍ່ຕາມ, ແຕ່ຜູ່ຊ່ຽວຊານທັງຫຼາຍເຫັນວ່າ, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນຢາກກາຍເປັນງານແຂ່ງຂັນທີ່ຊື່ດັງຄືກັນກັບ NBA ຢ່າງແທ້ຈິງ, ຍັງຕ້ອງເດີນທາງອັນຍາວໄກ. ໃນດ້ານກະຕິກາການແຂ່ງຂັນ ການພັດທະນາຕະຫຼາດແລະຜົນສະທ້ອນສາກົນ ຍັງມີຫຼາຍສິ່ງຫຼາຍຢ່າງຕ້ອງປັບປຸງ. ເຊື່ອວ່າ ເມື່ອໄດ້ປັບປຸງໃຫ້ສົມບູນແລ້ວ, ງານແຂ່ງຂັນປິ່ງປ່ອງປະສົມລະດັບເໜືອຊັ້ນຂອງຈີນຍ່ອມຈະມີຜົນສະທ້ອນສາກົນຢ່າງກວ້າງຂວາງກວ່າເກົ່າເປັນເທື່ອລະກ້າວ, ສ້າງຍີ່ຫໍ້ທີ່ຊື່ດັງແລະລ້ຳເລີດໃນສາກົນ.
|
