|
ສະບາຍດີທ່ານຜູ່ຟັງທີ່ໂຄລົບ. ຄຽງຄູ່ກັບລາຍການເສັງຄວາມຮູ້ກ່ຽວກັບ "ໄຕ້ຫວັນ--ເກາະປະເສີດຂອງຈີນ" ໄດ້ສິ້ນສຸດລົງ, ລາຍການໂລກກິລາກໍ່ໄດ້ວຽນມາພົບກັບທ່ານອີກ.
ທ່ານຜູ່ຟັງທີ່ໂຄລົບ, ຫວ່າງມໍ່ໆນີ້ ພິທີຈົກສະຫຼາກແບ່ງສາຍຂອງງານແຂ່ງຂັນບານເຕະຊິງຂັນໂລກທີ່ຈະຈັດຂຶ້ນຢູ່ເຢຍລະມັນໃນປີ 2006 ໄດ້ຈັດຂຶ້ນຢູ່ເມືອງໄລບຊິກແຫ່ງເຢຍລະມັນ. ເຖິງວ່າທີມຈີນບໍ່ໄດ້ສິດອອກສາຍໃນການແຂ່ງຂັນຮອບຄັດເລືອກກໍ່ຕາມ, ແຕ່ຄົນຈີນກໍ່ຍັງເຕັມໄປດ້ວຍຄວາມຈູບຈ້າວຕໍ່ງານແຂ່ງຂັນບານເຕະຊິງຂັນໂລກທີ່ເຢຍລະມັນຢູ່ຄືເກົ່າ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ແຟນບານເຕະຈີນສົນໃຈນຳງານແຂ່ງຂັນບານເຕະຊິງຂັນໂລກເຢຍລະມັນ.
ວັນທີ 9 ທັນວາ ພິທີຈົກສະຫຼາກແບ່ງສາຍຂອງງານແຂ່ງຂັນບານເຕະຊິງຂັນໂລກປີ 2006 ໄດ້ຈັດຂຶ້ນຢູ່ເມືອງໄລບຊິກແຫ່ງເຢຍລະມັນ, ຜ່ານການຈົກສະຫຼາກ, ທີມບານເຕະ 32 ທີມທີ່ຈະເຂົ້າຮ່ວມການແຂ່ງຂັນໄດ້ຖືກແບ່ງອອກເປັນ 8 ສາຍ. ເຖິງວ່າທີມຈີນໄດ້ຕົກຮອບ ໃນການແຂ່ງຂັນຮອບຄັດເລືອກເຂດອາຊີໃນປີກາຍກໍ່ຕາມ, ແຕ່ແຟນບານເຕະຈີນຍັງຄົງສົນໃຈນຳການຈົກສະຫຼາກເທື່ອນີ້ດ້ວຍຄວາມຈູບຈ້າວຫ້າວຫັນທີ່ສຸດ, ສົນໃຈນຳງານແຂ່ງຂັນບານເຕະຊິງຂັນໂລກທີ່ຈະຈັດຂຶ້ນໃນປີໜ້າ.
ການຈົກສະຫຼາກໄດ້ຈັດຂຶ້ນໃນຕອນກາງຄືນວັນທີ 10 ທັນວາເວລາປັກກິ່ງ, ແຕ່ກໍ່ມີແຟນບານເຕະຈີນນັບລ້ານຄົນອົດຫຼັບອົດນອນເພື່ອເບິ່ງລາຍການຖ່າຍທອດສົດພິທີຈົກສະຫຼາກທາງໂທລະພາບ. ຍັງມີແຟນບານເຕະຈີນຈຳນວນຫຼວງຫຼາຍທີ່ບໍ່ໄດ້ເບີ່ງການຖ່າຍທອດສົດນັ້ນ ເມື່ອຕື່ນນອນໃນຕອນເຊົ້າວັນທີ 10 ແລ້ວກໍ່ເປີດເບິ່ງໂທລະພາບ ຫຼືຟັງວິທະຍຸຫຼືເບິ່ງອິນເທີເນັດໃນທັນທີ ເພື່ອຊອກຮູ້ຜົນການຈົກສະຫຼາກ. ທ້າວລິນເຟິງ ນັກສຶກສາມະຫາວິທະຍາໄລການກິລາຊຽງໄຮ້ທັງເປັນແຟນບານເຕະເວົ້າວ່າ: ຫຼັງຈາກຂ້າພະເຈົ້າຕື່ນນອນໃນຕອນເຊົ້າມື້ນັ້ນແລ້ວ ເລື່ອງທຳອິດກໍ່ແມ່ນເບິ່ງອິນເທີເນັດເພື່ອຊອກຮູ້ຜົນການຈົກສະຫຼາກ, ຈົນບໍ່ທັນໄດ້ຖູແຂ້ວ.
ຈີນແມ່ນປະເທດໃຫຍ່ດ້ານບານປິ່ງປ່ອງ, ແຕ່ທີ່ຈິງແລ້ວ, ແຟນກິລາຈີນມີຄວາມຈູບຈ້າວຕໍ່ບານເຕະຍິ່ງກວ່າບານປິ່ງປ່ອງຫຼາຍ, ຈຳນວນແຟນບານເຕະກໍ່ຫຼາຍກວ່າແຟນບານປິ່ງປ່ອງຕັ້ງຫຼວງຫຼາຍ. ປັດຈຸບັນ, ບໍ່ວ່າຢູ່ເມືອງໃຫຍ່ຫຼືເມືອງຜ້ານກາງໃດໆຂອງຈີນ, ໃນທ້າຍສັບປະດາ ລ້ວນແຕ່ໄດ້ເບິ່ງການຖ່າຍທອດສົດງານແຂ່ງຂັນບານເຕະ 5 ປະເພດຂອງເອີລົບ, ໃນນັ້ນ ງານແຂ່ງຂັນບານເຕະສາຍກ.ຂອງອີຕາລີແລະພຼີເມຍລິກຂອງອັງກິດຍິ່ງໄດ້ຮັບຄວາມນິຍົມຈາກແຟນບານເຕະຈີນ. ງານແຂ່ງຂັນບານເຕະຊິງຂັນໂລກແລະງານແຂ່ງຂັນບານເຕະຊິງຊະນະເລີດເອີລົບທີ່ບາ 4 ປີຈັດຂຶ້ນເທື່ອໜຶ່ງຍິ່ງກາຍເປັນ"ບຸນກາກນາວານ" ຂອງແຟນບານເຕະຈີນ. ບາງທີມເກັ່ງດັ້ງເດີມໃນໂລກ ເຊັ່ນ ທີມເບຼຊິນ ທີມອີຕາລີ ທີມອາກຊັງຕິນ ທີມອັງກິດແລະທີມເຢຍລະມັນ, ຢູ່ຈີນລ້ວນແຕ່ມີແຟນສະໜັບສະໜູນເປັນຈຳນວນຫຼວງຫຼາຍ.
ໃນມື້ປະກາດຜົນຈົກສະຫຼາກນັ້ນ, ແຟນບານເຕະຈີນຢ່າງຫຼວງຫຼາຍໄດ້ຜ່ານອິນເທີເນັດລະບາຍອາລົມຂອງຕົນ. ບົນເວທີປາໄສ "ອິງກະແລນຖາວອນ" ເຊິ່ງແມ່ນແຟນບານເຕະຈີນທີ່ນິຍົມທີມອັງກິດເປັນຜູ່ຈັດຕັ້ງນັ້ນ ໄດ້ເຕັມໄປດ້ວຍບັນຍາກາດດີອົກດີໃຈ. ແຟນບານເຕະທັງຫຼາຍເປັນເອກະສັນກັນເຫັນວ່າ, ເທື່ອນີ້ ທີມອິງກະແລນຈົກໄດ້ສະຫຼາກດີທີ່ສຸດ, ມີອະນາຄົດອັນສະຫວ່າງສະໄຫວທີ່ຈະບຸກເຂົ້າຮອບ 4 ທີມເກັ່ງ. ກົງກັນຂ້າມ, ແຟນທີ່ສະໜັບສະໜູນທີມອາກຊັງຕິນພັດຮູ້ສຶກອຸກອັ່ງຫຼາຍ, ເນື່ອງຈາກທີມອາກຊັງຕິນຖືກແບ່ງເຂົ້າໃນ "ຈຸແຫ່ງຄວາມຕາຍ" ສອງເທື່ອລຽນຕິດຖັດຈາກງານແຂ່ງຂັນບານເຕະຊິງຂັນໂລກທີ່ຈັດຂຶ້ນຢູ່ສາທາລະນະລັດເກົາຫຼີແລະຍີ່ປຸ່ນ.
ເນື່ອງຈາກແຟນບານເຕະຈີນສົນໃຈຫຼາຍນຳງານແຂ່ງຂັນບານເຕະຊິງຂັນໂລກ, ສະນັ້ນ ເລື່ອງທີ່ສື່ມວນຊົນດ້ານກິລາຂອງຈີນຕ້ອງເຮັດນັ້ນກໍ່ແມ່ນເພີ່ມທະວີການລາຍງານຂ່າວກ່ຽວກັງງານແຂ່ງຂັນບານເຕະຊິງຂັນໂລກ. ປີໜ້າ ໂທລະພາບສູນກາງຈີນຫຼື CCTV ຈະຖ່າຍທອດສົດການແຂ່ງຂັນທັງໝົດ 64 ນັດຂອງງານແຂ່ງຂັນບານເຕະຊິງຂັນໂລກທີ່ເຢຍລະມັນ, ຍອດຈຳນວນເວລາການຖ່າຍທອດສົດຂອງ CCTV ໃນການລາຍງານຂ່າວກ່ຽວກັບງານແຂ່ງຂັນບານເຕະຊິງຂັນໂລກ ຈະລື່ນກາຍ 450 ຊົ່ວໂມງ. ຄາດວ່າ ໃນປີໜ້າ, ສື່ມວນຊົນແຫ່ງຕ່າງໆຂອງຈີນຈະແຕ່ງນັກຂ່າວລື່ນກາຍ 300 ຄົນໄປເອົາຂ່າວໃນງານແຂ່ງຂັນບານເຕະຊິງຂັນໂລກ.
ໜັງສືພິມ "ເປິຍຈິ່ງວານປ້າວ" ແມ່ນໜັງສືພິມທ້ອງຖິ່ນທີ່ພິມຈຳໜ່າຍຫຼາຍກວ່າໝູ່ຢູ່ປັກກິ່ງ, ໃນເວລາໃຫ້ສຳພາດຂ່າວ ທ່ານລີຮຸ້ຍມິນ ບັນນາທິການໃຫຍ່ພະແນກກິລາຂອງໜັງສືພິມດັ່ງກ່າວກ່າວວ່າ, ໃນໄລຍະຈັດງານແຂ່ງຂັນບານເຕະຊິງຂັນໂລກໃນປີໜ້າ, ຄໍລຳກິລາຂອງໜັງສືພິມດັ່ງກ່າວຈະຂະຫຍາຍອອກຢ່າງແນ່ນອນ, ທ່ານເວົ້າວ່າ: ງານແຂ່ງຂັນບານເຕະຊິງຂັນໂລກທຸກຄັ້ງກ່ອນລ້ວນແຕ່ໄດ້ຮັບຄວາມເອົາໃຈໃສ່ຈາກແຟນບານເຕະຈີນ, ສະນັ້ນ ໃນປີໜ້າ ພວກຂ້າພະເຈົ້າຈະແຕ່ງນັກຂ່າວກິລາ 3 ຄົນໄປເອົາຂ່າວຢູ່ເຢຍລະມັນ. ນອກນີ້, ປີໜ້າ ຄໍລຳກິລາຂອງພວກຂ້າພະເຈົ້າຈະຂະຫຍາຍອອກຢ່າງແນ່ນອນ.
ຕາມບຸກຄົນວົງການສື່ມວນຊົນແລະຂະແໜງການໂຄສະນາຂອງຈີນຄາດຄະເນວ່າ, ຍ້ອນແຟນບານຂອງຈີນມີຄວາມຈູບຈ້າວທີ່ສຸດຕໍ່ງານແຂ່ງຂັນບານເຕະຊິງຂັນໂລກ, ສະນັ້ນ ສາມາດເຫັນໄດ້ວ່າ, ໃນໄລຍະງານແຂ່ງຂັນບານເຕະຊິງຂັນໂລກທີ່ເຢຍລະມັນທີ່ຈະຈັດຂຶ້ນໃນລະດູຮ້ອນປີໜ້າ, ສື່ມວນຊົນໃຫຍ່ຕ່າງໆຂອງຈີນຍ່ອມຈະໄດ້ຮັບຜົນໃນດ້ານເສດຖະກິດ, ມີຂ່າວລາຍງານວ່າ, ບໍລິສັດໄຊນາໂມບິວ ຫຼືCHINA MOBILE ເຊິ່ງແມ່ນບໍລິສັດທຸລະກິດໂທລະສັບມືຖືທີ່ໃຫຍ່ກວ່າໝູ່ຂອງຈີນໄດ້ອອກທຶນ 100 ລ້ານຢວນ, ກາຍເປັນບໍລິສັດສະໜັບສະໜູນພຽງບໍ່ລິສັດດຽວຂອງ CCTV ໃນການຖ່າຍທອດສົດງານແຂ່ງຂັນບານເຕະຊິງຂັນໂລກປີ 2006.
ຄວາມຈູບຈ້າວຂອງແຟນບານເຕະຈີນທີ່ມີຕໍ່ງານແຂ່ງຂັນຊິງຂັນໂລກທີ່ເຢຍລະມັນ, ຍັງໄດ້ພົວພັນກັບຂະແໜງການທ່ອງທ່ຽວ, ການໄປຊົມເບິ່ງການແຂ່ງຂັນຢູ່ກັບບ່ອນໄດ້ກາຍເປັນຄວາມຝັນຂອງແຟນບານເຕະຈີນຈຳນວນບໍ່ໜ້ອຍ. ປັດຈຸບັນ ມີແຟນບານຢ່າງຫຼວງຫຼາຍພວມຕິດຕໍ່ກັບບໍລິສັດທ່ອງທ່ຽວ, ຫວັງຢາກໄປທ່ອງທ່ຽວ ຊົມເບິ່ງການແຂ່ງຂັນຢູ່ເຢຍລະມັນໃນລະດູຮ້ອນປີໜ້າ.
ຄວາມຈູບຈ້າວຕໍ່ງານແຂ່ງຂັນບານເຕະຊິງຂັນໂລກຂອງຈີນບໍ່ພຽງແຕ່ໄດ້ຊັກຈູງຂະແໜງການທ່ອງທ່ຽວເທົ່ານັ້ນ, ຍັງໄດ້ຊັກຈູງຂະແໜງການອື່ນໆອີກ. ຫວ່າງມໍ່ໆນີ້ ທ່ານເວິ້ຍຈີສຽງ ຮອງຫົວໜ້າສູນຫວຍກິລາຂອງກົມໃຫຍ່ກິລາແຫ່ງຊາດຈີນກ່າວວ່າ, ໃນໄລຍະງານແຂ່ງຂັນບານເຕະຊິງຂັນໂລກໃນປີໜ້າ, ສູນຫວຍກິລາຈະຈັດການເຄື່ອນໄຫວແຂ່ງຂັນແທງຫວຍສຳລັບງານແຂ່ງຂັນຊິງຂັນໂລກຢ່າງແນ່ນອນ.
ຂະແໜງການກິນດື່ມໃນຕົວເມືອງຂອງຈີນກໍ່ພວມທຳການກະກຽມ, ຄືກັນກັບຫຼາຍປະເທດເອີລົບ, ການໄປເບິ່ງການແຂ່ງຂັນບານເຕະຢູ່ໃນບາກໍ່ໄດ້ກາຍເປັນຮູບແບບຢ່ອນອາລົມທີ່ແຟນບານເຕະຈີນນິຍົມກັນ. ຖະໜົນໂຮ້ວໄຫແມ່ນຖະໜົນບາສາຍໜຶ່ງທີ່ມີຊື່ສຽງຢູ່ປັກກິ່ງ, ປັດຈຸບັນ ບາຈຳນວນໜຶ່ງຢູ່ບໍລິເວນນີ້ພວມຂະຫຍາຍສ້າງ, ເຖົ້າແກ່ຮ້ານບາຜູ່ໜຶ່ງແນະນຳວ່າ, ງານແຂ່ງຂັນບານເຕະທີ່ເຢຍລະມັນໃນປີໜ້າຈະເປັນຈຸດໜັກຂອງການທຸລະກິດໃນໝົດປີຂອງພວກເຂົາເຈົ້າ, ຮອດເວລານັ້ນ ພວກເຂົາເຈົ້າຈະອຳນວຍການບໍລິການຕ່າງໆທີ່ກ່ຽວພັນກັບງານແຂ່ງຂັນບານເຕະຊິງຂັນໂລກ, ເພື່ອດຶງດູດແຟນບານເຕະມາອຸດໜູນ.
|
