|
|
 |
| (GMT+08:00)
2006-02-07 18:51:40
|
 |
|
ບຸນກຸດຈີນ(ສຽງ)
cri
Author: MO
|
ສະບາຍດີທ່ານຜູ້ຟັງທີ່ເຄົາລົບ, ຊົມເຊີຍທ່ານຮັບຟັງລາຍການຢ່ອນອາລົມໃນວັນເສົາ, ຂ້າພະເຈົ້າແມ່ນແສງແກ້ວ. ຄືກັນກັບບຸນໂນແອນແມ່ນບຸນປະເພນີທີ່ຄຶກຄື້ນຟົດຟື້ນຂອງຄົນຝ່າຍຕາເວັນຕົກ, ບຸນກຸດຈີນກໍແມ່ນບຸນໃຫຍ່ໂຕມະໂຫລານຂອງຈີນ. ຄຽງຄູ່ກັບການປ່ຽນແປງຂອງຍຸກສະໄໝ, ເນື້ອໃນຂອງບຸນກຸດຈີນກໍມີການປ່ຽນແປງ, ວິທີຫຼີ້ນບຸນກຸດຈີນກໍປ່ຽນແປງຄືກັນ, ແຕ່ຖານະຂອງບຸນກຸດຈີນໃນຊີວິດແລະສຳນຶກຮູ້ຂອງຄົນທັງຫຼາຍຍັງສຳຄັນຄືເກົ່າ, ບໍ່ມີຫຍັງເຂົ້າແທນໄດ້. ໃນລາຍການມື້ນີ້, ແສງແກ້ວຂໍເລົ່າບຸນກຸດຈີນສູ່ຟັງໃນທ່າມກາງສຽງເພງສິລິມຸງຄຸນນີ້.
ຕາມເວົ້າກັນວ່າ, ບຸນກຸດຈີນມີປະຫວັດ 4 ພັນກວ່າປີແລ້ວ, ແຕ່ທຳອິດບໍ່ເອີ້ນເປັນ"ບຸນກຸດຈີນ", ກໍບໍ່ໄດ້ກຳນົດຕາຍຕົວໃນມື້ໃດ. ກ່ອນຄ.ສ.2100 ກວ່າປີ, ຄົນນັບປີຕາມກົດເກນໝູນວຽນຂອງດາວພະຫັດ, ດັ່ງນັ້ນກໍເອີ້ນກຸດຈີນເປັນ"ຊຸ້ຍ", ແປວ່າ"ປີ". ເມື່ອຮອດກ່ອນຄ.ສ.1000 ປີ, ຄົນທັງຫຼາຍຈຶ່ງເອີ້ນເປັນ"ນຽນ" ແປວ່າ"ປີ"ເຊັ່ນດຽວກັນ, ໃນຄາວນັ້ນ, "ນຽນ"ມີຄວາມໝາຍວ່າເກັບກ່ຽວໄດ້ອຸດົມສົມບູນ, ປີເກັບກ່ຽວໄດ້ຫຼາຍເອີ້ນ"ຢິວນຽນ", ປີເກັບກ່ຽວໄດ້ອຸດົມສົມບູນເອີ້ນເປັນ"ຕ້າຢິວນຽນ".
ຕາມປະເພນີພື້ນເມືອງຈີນ, ບຸນກຸດຈີນໄລ່ຕາມຈັນທະຄະຕິຈີນ ແມ່ນເລີ່ມແຕ່ມື້ແຮມ 7 ຄ່ຳຫຼື 8 ຄ່ຳເດືອນ 12 ປີເກົ່າ, ຈົນຮອດມື້ແພງ 15 ຄ່ຳເດືອນຈຽງຂອງປີໃໝ່. ປະມານ 3 ອາທິດ, ໄລຍະນີ້, ວັນສົ່ງປີເກົ່າແລະມື້ຂຶ້ນ 1 ຄ່ຳແມ່ນຄຶກຄື້ນຟົດຟື້ນກວ່າໝູ່.
ຢູ່ແຫ່ງຕ່າງໆຂອງຈີນ, ການຫຼີ້ນບຸນກຸດຈີນມີປະເພນີທີ່ຕ່າງກັນຫຼາຍຢ່າງ, ແຕ່ບໍ່ວ່າຢູ່ພາກເໜືອຫຼືຢູ່ພາກໃຕ້ ໝົດຄອບຄົວເຕົ້າໂຮມກັນຊຸມພາເຂົ້າໃນຕອນຄ່ຳວັນສົ່ງປີເກົ່າ, ແມ່ນຄືກັນໝົດ. ຢູ່ພາກໃຕ້, ກິນເຂົ້າຄາບນີ້ທຳມະດາແລ້ວມີອາຫານ 10 ກວ່າເຍື່ອງ, ໃນນັ້ນ, ຕ້ອງມີເຕົ້າຮູແລະປາ, ຍ້ອນວ່າໃນພາສາຈີນ, ເຕົ້າຮູກັບປາອອກສຽງຄ້າຍຄືກັນກັບ"ຟູຢູ" ເຊິ່ງແປວ່າ"ຮັ່ງມີ". ໃນບໍ່ເທົ່າໃດປີມານີ້, ຄຽງຄູ່ກັບລະດັບຊີວິດການເປັນຢູ່ໄດ້ຍົກສູງຂຶ້ນ, ຫຼາຍຄອບຄົວໃນຕົວເມືອງມັກກິນເຂົ້າສາມັກຄີຢູ່ຮ້ານອາຫານ, ເຮັດແນວນີ້ກໍບໍ່ຕ້ອງຂຸ້ນນຳວຽກກຽມໃນເຮືອນໃນບ້ານ. ແຕ່ແນ່ນອນແລ້ວ, ຄອບຄົວຍິ່ງຫຼາຍມັກແຕ່ງກິນເອງ, ເພາະຢາກສ້າງບັນຍາກາດມ່ວນຊຶ່ນໃນວັນບຸນ.
ໃນຕອນຄ່ຳວັນສົ່ງປີເກົ່າ ຕ້ອງເຝົ້າປີ, ນີ້ກໍແມ່ນລາຍການດັ້ງເດີມຂອງບຸນກຸດຈີນ. ຄ່ຳຄືນນີ້, ຄົນທັງຫຼາຍສົ່ງປີເກົ່າຕ້ອນຮັບປີໃໝ່ດ້ວຍຄວາມມ່ວນຊື່ນ. ແຕ່ກ່ອນ, ໃນໄລຍະບຸນກຸດຈີນ, ຄົນທັງຫຼາຍມັກຈູດໝາກກະໂພກ. ຕາມເວົ້າກັນວ່າ, ປະເພນີດັ່ງກ່າວແມ່ນເພື່ອໄລ່ຜີ, ແຕ່ມາຮອດປັດຈຸບັນ, ເພື່ອປ້ອງກັນຄວາມປອດໄພແລະການເຊື່ອມພິດອາກາດ, ຢູ່ປັກກິ່ງແລະຕົວເມືອງໃຫຍ່ຈຳນວນໜຶ່ງຈຳກັດການຈູດໝາກກະໂພກຢູ່ໃນໃຈກາງເມືອງ. ແຕ່ໃນຊົນນະບົດ, ການຈູດໝາກກະໂພກຍັງແມ່ນລາຍການໜຶ່ງທີ່ຂາດບໍ່ໄດ້. ເມື່ອຮອດມື້ຂຶ້ນປີໃໝ່, ຍິງຊາຍນ້ອຍໃຫຍ່ກໍນຸ່ງຊຸດໃໝ່, ຕ້ອນຮັບແຂກມາຢາມຫຼືອອກໄປຢາມໝູ່, ອວຍພອນປີໃໝ່ເຊິ່ງກັນແລະກັນ.
ການເຄື່ອນໄຫວວັດທະນະທຳໃນໄລຍະບຸນກຸດຈີນກໍມີຫຼາຍຢ່າງຫຼາຍແນວ. ໃນບໍ່ເທົ່າໃດປີມໍ່ໆມານີ້, ປີໃໝ່ສາກົນຫາກໍ່ຜ່ານພົ້ນໄປ, ຮູບເງົາເລື່ອງອວຍພອນປີໃໝ່ກໍເລີ່ມສາຍຢູ່ທ້ອງຖິ່ນຕ່າງໆທົ່ວປະເທດແລ້ວ. ໃນເຂດຊົນນະບົດອັນກວ້າງໃຫຍ່ໄພສານ, ກໍມີການສະແດງງິ້ວທ້ອງຖິ່ນ, ຟ້ອນຢ່າງເກີ, ຫຼີ້ນບຸນວັດ, ທຸກແຫ່ງຫົນເຕັມໄປແຕ່ບັນຍາກາດມ່ວນຊື່ນຟົດຟື້ນ.
ການຕິດຄະຕິຄູ່, ຕິດຮູບນຽນຮວາ, ແຂວນໂຄມໄຟ, ກໍແມ່ນເນື້ອໃນຫຼີ້ນບຸນ. ຄຽງຄູ່ກັບລະດັບຊີວິດການເປັນຢູ່ໄດ້ຍົກສູງຂຶ້ນ, ໃນເວລາຮັກສາປະເພນີດັ້ງເດີມ, ຄົນທັງຫຼາຍກໍໄດ້ບຸກເບີກລາຍການຫຼີ້ນບຸນອັນໃໝ່, ຕົວຢ່າງຄື: ໄປທ່ຽວຊານເມືອງ, ໄປແລ່ນສະກີ, ຖ້າຢູ່ໃນູເຮືອນ, ກໍນັດໝູ່ມາຫຼີ້ນເກມເນັດຫຼືແຕ່ງກະຕູນທີ່ຕະຫຼົກ. ນອກນີ້, ໄປທ່ອງທ່ຽວຢູ່ພາຍໃນປະເທດຈີນຫຼືຕ່າງປະເທດກໍໄດ້ກາຍເປັນຄວາມນິຍົມກັນຊະນິດໃໝ່ຂອງຄົນຈີນ.
ທ່ານຜູ້ຟັງທີ່ເຄົາລົບ, ຈີນແມ່ນປະເທດທີ່ມີຫຼາຍຊົນເຜົ່າ, ນອກຈາກເຜົ່າຮ້ານແລ້ວ, ຍັງມີ 55 ຊົນເຜົ່າສ່ວນໜ້ອຍ. ເຖິງວ່າໃຊ້ພາສາແລະຕົວໜັງສືທີ່ຕ່າງກັນ, ແບບແຜນດຳລົງຊີວິດແລະມີຮີດຄອງປະເພນີຕ່າງກັນ, ແຕ່ພວກເຂົາເຈົ້າສ່ວນຫຼາຍມັກຖືບຸນກຸດຈີນເປັນວັນບຸນອັນສຳຄັນຂອງຊົນເຜົ່າຕົນ. ໃນມ້ວນທ້າຍລາຍການມື້ນີ້, ແສງແກ້ວຂໍຕາງໜ້າວິທະຍຸCRIພາກພາສາລາວໝົດທຸກຄົນອວຍພອນແດ່ທ່ານຈົ່ງມີສຸຂະພາບເຂັ້ມແຂງ, ຈົ່ງປະສົບຜົນສຳເລັດໃນວຽກງານຂອງຕົນ.
ເອົາລະ, ທ່ານຜູ້ຟັງທີ່ເຄົາລົບ, ລາຍການພາກນີ້ຂໍຈົບລົງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
|
|
